Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Juuli 2014

Jehovap “pigisani ilisimavai”

Jehovap “pigisani ilisimavai”

“Kinaluunniit Guutimik asannittoq taassumannga ilisimaneqarpoq.” — 1 KOR 8:3.

1. Biibilimi oqaluttuaq Guutip innuttaasa ilaat imminut salloqittarsimanerannik ersersitsisoq oqaluttuariuk. (Allaaserisap aallaqqaataani assiliaq takuuk).

ANGUTERPASSUIT toqqip naapeqatigiittarfiup siornani tipigissaatilliissutinik Jehovamut pilliuteqarnissaminnut piareersimallutik nikorfapput. Aroni, Israelimi palasiuneq, qeqarpoq illuatungaanilu Kora angutillu 250-it qeqarput. (4 Mos 16:16-18) Tamarmik Guutimut ilumoorpasipput. Korali taassumalu tapersersortai makitapput, pikitsitsiumatuujupput, namminissarsiortuupput Aronillu palasiunertut kiffartorneranik arsaarinnerusupput. (4 Mos 16:1-11) Imminut salloqittarlutik isummersimapput pallorfiginninnertik Jehovamit akuerineqarumaartoq. Jehovali, uummammiugisanik takunnissinnaasoq, ajuallatsissimavaat. Jehovap ilumoortuusaartuusut imminullu naalannarsisikkusuttut takusinnaavaa. — Jer 17:10.

2. Mosesi qanoq siulittuiva, tamannalu qanoq eqquuppa?

2 Mosesi ima siulittuisimavoq: “Naalakkap ilisimalersinniarpaa kikkut piginerlugit.” (4 Mos 16:5) Kikkut ilumoorlutik imminut kiffartornersut kikkullu ilumoortuusaarnersut Jehovap qanoq ersersippaa? Jehovap Kora angutillu 250-it qilammit innermik nakkartitsivigalugit suujunnaarsippai. (4 Mos 16:35; 26:10)  Aroni kiserngorulluni nikorfavoq. Jehovap ersersippaa Aroni ilumoorluni palasitut kiffartorlunilu Jehovamik pallorfiginnittuusoq. — 1 Korinthimiut 8:3 atuaruk.

3. (a) Paulusip nalaani kristumiut ilagiivini susoqarpa? (b) Mosesip nalaani Jehovap pikitsitsisunik pinneriaasia qanoq ilinniarfigisinnaavarput?

3 Paulusip nalaani, ukiut 1500-t sinnerlugit qaangiummata, kristumiut ilagiivini tamatumunnga assingusumik pisoqarpoq. Paulusi nassuiaavoq kristumiuunerartut eqqunngitsumik ajoqersuisalersut. Taamaakkaluartorli ilagiinnut suli akuupput. Tunussisut taakku ilumoorlutik Jehovamut pallorfiginnissorinarsinnaapput. Amaqqutulli ulorianartigalutillu ‘amerlasuut uppernerat aseroriartortippaat’. (2 Tim 2:16-18) Jehovap pisut malinnaaffigai? Aap. Paulusip Guuti pikitsitsisunut, Koramut taassumalu tapersersortaanut, qanoq iliorsimasoq nalunnginnamiuk Jehovap pisunik malinnaaqqissaarnera qularinngilluinnarpaa. Uaguttaaq Jehovamik taamatut tatiginnissinnaavugut. Taamaaliornissatsinnut Paulusip Timotheusimut allagai soqutiginartut qanoq iluaqutigisinnaanerlugit sammeriartigu.

“UANGA NAALAGAQ ALLANNGORSIMANNGILANGA”

4. Paulusip suna qularinngilaa, Timotheusilu qanoq allaffigaa?

4 Paulusip qularinngilaa Jehovap ilumoortuusaarlutik pallorfiginnittut nalunngikkai. Qularinngilaattaaq Jehovap pallorfiginnitsini ilumoortut ilisimagai. Paulusip tatiginninnera isumassarsisitaalluni Timotheusimut allagaanit erserpoq. Paulusi tunussisut uppertunut anersaakkut ajoqusiisimanerat allaatigereerlugu ima allappoq: “Taamaakkaluartorli Guutip tunngaviliussaa aalajaappoq, naqissuserneqarsimavorlu ima allannilimmik: ‘Naalakkap pigisani ilisimavai,’ — aammalu: ‘Kinaluunniit Naalakkap [Jehovap, NW] aqqanik torlorfiginnittoq iluaatsuliunngikkili.’” — 2 Tim 2:19.

5, 6. Sooq Paulusip oqariartaatsimik ‘Guutip tunngaviliussaa aalajaatsoq’-mik atuinera soqutiginarpa, tamannalu Timotheusip qanoq iluaqutigaa?

5 Biibilimi oqaaseq ‘tunngavik’, imaluunniit “ujarak teqeqqussaq”, assigiinngitsunut assersuutitut atorneqartarpoq. Tamatumunnga itsaq Israelimi illoqarfiit pingaarnersaat, Jerusalemi, Jiisusillu Guutip siunertaani inissisimaffia ilaapput. (Tuss 87:1, 2; 1 Kor 3:11; 1 Petr 2:6) Oqariartaaserli ‘Guutip tunngaviliussaa aalajaatsoq’ Biibilimi ataasiaannarluni atorneqarpoq. Paulusip oqariartaaseq taanna atoramiuk pisoq suna innersuussutigaa?

6 Mosesip Kora taassumalu tapersersortai pillugit oqaasii Paulusip issuariarlugit oqariartaaseq ‘Guutip tunngaviliussaa aalajaatsoq’ atorpaa. (4 Mos 16:5). Paulusip taamaalilluni Jehovap ilagiinni pisunik malinnaaviginninneranik Timotheusi eqqaasippaa. Tunussisut ajoqusiinnginnissaat Jehovap qulakkiissavaa. Jehovap siunertaa Koramit allanngortinneqanngilaq, Guutillu siunertaa ilagiinni tunussisunit allanngortinneqarnavianngilaq. Paulusip oqariartaaseq ‘Guutip tunngaviliussaa aalajaatsoq’ qanoq isumaqavinnersoq nassuianngilaa. Paulusilli allagai Timotheusip Jehovamik tatiginninnissaminut iluaqutigai.

7. Sooq Jehovap naapertuilluarlunilu aalajaattuarnissaa qularinngissinnaavarput?

7 Jehovap najoqqutassiai allanngunngisaannarput. Tussiaat 33:11-mi ima allassimavoq: “Naalakkap siunertarisai taamaattuassapput naassaanngitsumik, pilersaarutai atuuttuassapput kinguaariikkuutaani.” Jehova kunngiuvoq ilumoorluni asanninnermik ersersitsisarlunilu naapertuilluarlunilu aalajaatsoq. Pissusiisa taakkua allanngunngisaannarnerat Biibilimi ersersinneqarpoq. (2 Mos 15:18; Tuss 106:1; 111:3; 117:2) Malaki 3:6-imi ima allassimavoq: “Uanga Naalagaq allanngorsimanngilanga.” Tamatumunnga assingusumik Jaaku 1:7-imi allassimavoq Jehova ‘allanngorneq ajortoq’.

 ALLAKKAT JEHOVAMUT UPPERNERMIK NAKUSSATITSISUT

8, 9. ‘Guutip tunngaviliussaani aalajaatsumi’ allassimasut qanoq ilinniarfigisinnaavavut?

8 Itsaq sanaartukkap toqqavianut nalunaarummik kigartuilluni allattarneq ileqquusimavoq. Taamaaliortoqartarpoq takutinniarlugu kiap illu pigineraa sanasimaneraaluunniit. Biibilimik allaqataasuni Paulusi siullersaalluni assersuummik tamatuminnga atuivoq. * Paulusip Timotheusimut allakkami aappaanni 2:19-imi ‘Guutip tunngaviliussaa aalajaatsoq’ eqqartugaa marlunnik nalunaaruteqarpoq: (1) ‘Jehovap pigisani ilisimavai’ aamma (2) ‘Kinaluunniit Jehovap aqqanik torlorfiginnittoq iluaatsuliunngikkili’. Tamanna Mosesimik allakkat sisamaanni 16:5-imi allassimasunik eqqaasitsissutigaarput. — Atuaruk.

9 Jehovamit pigineqartut ‘Guutip tunngaviliussaani aalajaatsumi’ allassimasut qanoq ilinniarfigisinnaavaat? Jehovap pingaartitai najoqqutassiaalu sallusuissutinik marlunnik tunngaveqarput: (1) Jehovap ilumoorfiginnitsini asavai, aamma (2) Jehovap eqqunngitsuliorneq uumigaa. Tamanna ilagiinni tunussisunut qanoq attuumassuteqarami?

10. Paulusip nalaani tunussisut pissusilersornerat aalajaatsunut qanoq sunniuteqarpa?

10 Tunussisut pissusilersornerat Timotheusip allallu aalajaatsut nanertisimassutigingaarpaat. Kristumiut ilaasa tunussisut taakku sooq ilagiinniiginnarnersut apeqqutigisimassavaat. Aalajaatsut ilaasa allaat eqqarsaatigisimassavaat namminneq ilumoornertik tunussisut ilumoortuusaarlutik pallorfiginninnerannit allaanerunera Jehovap takusinnaaneraa. — ApS 20:29, 30.

Timotheusi tunussisut pissusilersornerannit sunnertikkusunngilaq (Immikkoortut 10-miit 12-imut takukkit)

11, 12. Paulusip allagai Timotheusip qanoq uppernikkut nakussatsinneqaatigisimagunarpai?

11 Paulusip allagai Timotheusip uppernikkut nakussatsissutigisimassavai. Paulusip itsaq Kora taassumalu tapersersortaasa ilumoortuusaarnerannik Jehovap ersersitsisimanera pillugu Timotheusi eqqaasippaa. Jehovap taakku itigartillugillu suujunnaarsippai, Aronimilli iluarinninnini ersersillugu. Taamatuttaaq Paulusip nalaani kristumiuunerartoqaraluartoq Jehovap kikkut piginerlugit paatsuugassaanngitsumik ersersissavaa.

12 Jehova allanngunngisaannarmat tatigiuarsinnaavarput. Taassuma ajussuseq uumigigamiuk peqqissiminatik ajortuliortartut pillarumaarpai. ‘Kinaluunniit Jehovap aqqanik torlorfiginnittoq’ ajussusermik itigartitsisariaqarmat Timotheusi  kristumiuunerartut ajortumik sunniisarnerannik itigartitsisariaqarnerminik eqqaasinneqarpoq. *

ILUMOORLUNI PALLORFIGINNINNEQ IMMINUT AKILERSINNAAJUAANNARPOQ

13. Suna qularinngissinnaavarput?

13 Paulusip Timotheusimut allagai uaguttaaq anersaakkut nakussatsissutigisinnaavavut. Qanoq? Jehovap ilumoorfigigitsinni ilisimalluarpaa. Ilumoorfiginnitsinilu ilisimaannarnagit soqutiginninnermik ersersitsivigisarpai. Biibilimi ima allassimavoq: “[Naalakkap] nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit.” (2 Nal 16:9) Qularinngissinnaavarput “uummammit minguitsumit” kiffartornerput Jehovamit eqqaamajuarneqarnissaa. — 1 Kor 15:58; 1 Tim 1:5.

14. Pallorfiginneriaaseq qanoq ittoq Jehovap ajattorpaa?

14 Jehovap ilumoortuusaarluni pallorfiginninneq uumigalugulu ajattorpaa. Inuit uummataat takusinnaagamigit ‘imminik tunaarinninngitsut’ uummataat takusinnaavai. Inuk naalappasikkaluarluni isertorluni ajortuliortartoq Jehovap iluarinngilluinnarpaa. (Uss 3:32) Inuit inummit taamaattumit salloqittarneqarsinnaapput, Jehovali salloqittarneqarsinnaanngilaq. Biibilimi ima allassimavoq: “Unioqqutitsinerminik isertuisoq iluatsinnavianngilaq.” Jehovap pissaaneqangaarnera naapertuilluassusermullu Guutiunera tamatumunnga pissutaavoq. — Uss 28:13NW; 1 Timotheusi 5:24 *; Hebræerit 4:13 atuakkit.

15. Sunaveersaartariaqarpugut, aamma sooq?

15 Jehovap innuttai amerlanerit Jehovamik uummatikkut iluunngarlutik asannipput. Qatanngutit ilaat sallullutik ilumoortuusaarlutillu Jehovamik pallorfiginnittarnerat qaqutigoorpoq. Mosesilli kristumiullu siulliit nalaanni taama pisoqarsinnaappat ullumikkuttaaq taama pisoqarsinnaavoq. (2 Tim 3:1, 5) Imaappa qatanngutitsinnut pasillerajuttuullutalu taakkua Jehovamut ilumoornerat apeqqusertassagipput? Naamik, uppernarsaatissaqanngitsumik qatanngutitsinnut pasillerneq eqqunngitsuliornerussaaq. (Romamiut 14:10-12; 1 Korinthimiut 13:7 atuakkit). Qatanngutitsinnullu tunngatillugu apeqqusiinerput Jehovamut attaveqarnitsinnik ajoqusiissaaq.

16. (a) Uummatinni annikitsutigut ilumoortuusaalinnginnissat qanoq qulakkeersinnaaviuk? (b) Ungalusaq ‘ Immissinnik paasiniaaffigalusilu misiligitsi!’ qanoq ilinniarfigisinnaavarput?

16 Kristumiut tamarmik immikkut ‘nammineq suliatik misilittariaqarpaat’. (Gal 6:4) Naammalluinnanngitsuugatta nalusatsinnik eqqunngitsumik pissutiginiagaqarluta Jehovamut pallorfiginnileratarsinnaavugut. (Hebr 3:12, 13) Kiffartornitsinni annikitsutigut ilumoortuusaaleratarsinnaavugut. Taamaattumik imminut ima aperisariaqarpugut: ‘Jehova asagakku taassumalu kisimi oqartussaanera akuerigakku pallorfigaara? Imaluunniit paratiisimi pilluarlunga inuulluataarnissara eqqarsaatiginerullugu kiffartorfigaara?’ (Saqq 4:11) Taamatut aperinikkut uummatitsinni annikitsutigut ilumoortuusaalinnginnissarput qulakkeersinnaavarput.

ILUMOORNEQ PILLUALERSITSISARPOQ

17, 18. Sooq Jehovamik pallorfiginninnitsinni ilumoortariaqarpugut?

17 Sapinngisarput tamaat ilumoorluta pallorfiginninniarnerput iluaqutigingaassavarput. Tussiaasiortoq ima allappoq: “Pilluarpoq  inuk Naalakkap ajorteqartinngisaa, peqqusersiornermillu ilumiugisaqanngitsoq.” (Tuss 32:2) Ilumoorluta pallorfiginnikkutta massakkut nuannaassallutalu siunissami naammalluinnartumik pilluarluta inuusinnaalissaagut.

18 Qanittukkut Jehovap inuit ajortut allamik isumataarumanngitsut isertorlutilluunniit ajortuliortartut qulaassavai. ‘Iluartup iluanngitsumit, tassa Guutimik kiffartuussisup kiffartuussinngitsumit,’ allaanerussutaa takutissavaa. (Mal 3:18) Tamanna nalliutserlugu tuppallernarpoq nalunagu ‘Jehovap isaasa sammivigigaat iluartut, ikioqqullutik nillianerat siutaasa tusartaraat’. — 1 Petr 3:12.

^ par. 8 Kingusinnerusukkut ileqqoq taanna Saqqummersitat 21:14-imi innersuussutigineqarpoq. Tamatumani allassimavoq apustilit aqqaneq-marluk aqqi ‘ujaqqani aqqaneq-marlunni tunngaviusuni’ allassimasut.

^ par. 12 Qanoq Jehovamik ilaarsisinnaallutalu ajussusermik itigartitsisinnaasugut allaaserisami tulliuttumi sammineqassaaq.

^ par. 14 1 Timotheusi 5:24NW: “Inuit ilaasa ajortuliaat tamanit ilisimaneqarput, ingerlaannartumillu eqqartuunneqarput; ilaasali ajortuliaat kingusinnerusukkut aatsaat paasineqarumaarput.”