‘Kinaluunniit Jehovap aqqanik torlorfiginnittoq iluaatsuliunngikkili.’ — 2 TIM 2:19.

1. Suna pallorfiginninnitsinni pingaaruteqarluinnarpa?

NUNANI tamalaani Jehovap aqqa inissiarpassuarnut katersugaasivimmilu itsarnitsanut assigiinngitsorpassuarnut kiliorneqarsimasoq takuneqarsinnaavoq. Ateq taanna sumiiffinni taakkunani takugaangakku qularnanngitsumik pissangaammertarsimassaatit. Jehovap Nalunaajaasorimmatigut Guutip aqqa pallorfiginninnitsinni pingaaruteqarluinnarpoq. Inuit allat uagutsitut Guutip aqqanik atuineq ajorput. Jehovamilli Nalunaajaasuunermik immikkut pisinnaatitaaffeqaratta taassuminnga ataqqinarsisitsisumik pissusilersortarnissarput akisussaaffigaarput.

2. Guutip aqqanik ilisarnaateqarsinnaanermik immikkut pisinnaatitaaffeqaratta sumik akisussaaffeqarpugut?

2 Guutimit iluarisaajumalluta taassuma aqqa atuinnarnagu allamik iliuuseqartariaqarpugut. Taassuma ileqqorissaarneq pillugu najoqqutassiai maleruartariaqarlugillu ‘ajortoq nigorsimasariaqarparput’. (Tuss 34:15) Paulusip akisussaaffik tamanna erseqqissarpaa ima allakkami: ‘Kinaluunniit Jehovap aqqanik torlorfiginnittoq iluaatsuliunngikkili.’ (2 Timotheusi 2:19 atuaruk). Taamaattumik Guutimut innuttaagatta qanoq ‘iluaatsuliunnginnissarput’ qulakkeersinnaavarput?

 AJUSSUSERMIT ‘NIGORITSI’

3, 4. Inuit ilaasa oqaatsit suut paasiuminaatsippaat, aamma sooq?

3 Paulusip Timotheusimut allakkami aappaanni 2:19-imi ‘Guutip tunngaviliussaa aalajaatsoq’ innersuussutigaa. Tunngavimmut tassunga nalunaarutit marluk kiliorlugit allanneqarsimapput. Nalunaarut siulleq, Jehovap “pigisani ilisimavai”, Mosesimit allakkat sisamaanni 16:5-imeersuuvoq. (Allaaserisap siulia takuuk). Nalunaarutimmi aappaat ‘kinaluunniit Jehovap aqqanik torlorfiginnittoq iluaatsuliunngikkili’? Inuit ilaasa oqaatsit taakku paasiuminaatsippaat. Sooq?

4 Paulusip Allakkat Hebræerisuut immikkoortuisa ilaannit allamit issuaanera oqaasiinit erserpoq. Allassimaffiilli nalunaarummut tamatumunnga naapertuuppasinngillat. Taamaattumik apustili ima allakkami sumut innersuussiva: ‘Kinaluunniit Jehovap aqqanik torlorfiginnittoq iluaatsuliunngikkili’? Paulusip nalunaarutaa siulleq Mosesimit allakkat sisamaanni kapitali 16-imit issuagaasoq Korap pikitsitsineranut innersuussutaavoq. Nalunaarutip aappaa aamma pisumut tamatumunnga innersuussutaasimasinnaava?

5-7. Paulusip Timotheusimut allakkat aappaanni 2:19-imi Mosesip nalaani pisut suut innersuussutigai? (Allaaserisap aallaqqaataani assiliaq takuuk).

5 Korap pikitsitsinermi siulersuineranut Datani Abiramilu ilanngupput. (4 Mos 16:1-5) Taakkua Mosesimik ataqqinninnatillu taassuma Guutimit oqartussaanermik tunineqarsimanera ajattorpaat. Jehovallu innuttaasa akornanni suli inuugamik Israelikkoqatiminnik navianartorsiortitsipput. Jehovali kikkut ilumoorlutik pallorfiginninnersut paasitinnginnerani ersarissumik peqqusivoq.

6 Biibilimi ima allassimavoq: “Naalakkap Mosesi akivaa: ‘Ilagiit oqaluffigikkit: Korap, Datanip Abiramillu toqqisa eqqaannit nigorsimagitsi!’ Mosesip nikuilluni Datani Abiramilu ornippai, Israelikkullu utoqqaanertaasa malippaat. Taava ilagiit oqaluffigai: ‘Inuit iluaatsut taakkua toqqi nigorsigit, pigisaannillu attugaqarniaqinasi. Oqaatsikka naalanngikkussigit aamma ilissi nungutitaassaasi taakkua ajortuliaat tamaasa pillugit.’ Inuit Korap, Datanip Abiramillu toqqisa eqqaannit qimagupput.” (4 Mos 16:23-27) Tamatuma kingorna Jehovap pikitsitsisut tamaasa suujunnaarsippai. Guutimulli ilumoortut pikitsitsisunit nigornermikkut ‘iluaatsuliunnginnamik’ aniguipput.

7 Paulusip Timotheusimut allagaasa aappaanni 2:19-imi oqaatsit ‘Jehovap pigisani ilisimavai’ Mosesimik allakkat sisamaanni 16:5-imit issuagaapput. Paulusillu nalunaarutaa ‘kinaluunniit Jehovap aqqanik torlorfiginnittoq iluaatsuliunngikkili’ pisunut Mosesimik allakkat sisamaanni 16:23-27-mi allaatigineqartunut innersuussutaasimasinnaapput. Taamaattumik pissusissamisuussaaq isummiutissallugu nalunaarutit taakku marluk pisumut ataatsimut innersuussutaanerat. Nalunaarutit taakku marluk qanoq ilinniarfigaavut? Jehovap uummammiugineqartut takusinnaavai. Kiffani ilumoortut ilisimallugillu taakkua inunnit ajortunit avissaaqqanissaat piumasaraa.

“OQALLINNERNI SIANIITSORPALLATTUT SOQQUSAATSULLU NIGORSIMANIAKKIT”

8. Guutip aqqata atornerata ilagiinnullu ilaanitta saniatigut susariaqarpugut?

8 Paulusip Timotheusi Jehovamut attaveqarnermik illersuisariaqarneranik eqqaasinniarlugu Mosesip nalaani pisut eqqaavai. Mosesip nalaani Guutip kiffai ilumoortut Jehovap aqqanik atuinermik saniatigut suli annerusumik iliuuseqartariaqarsimanerattut kristumiut ilagiinnut ilaanermik saniatigut suli annerusumik iliuuseqartariaqarput. Guutip kiffai aalajaatsut tamarmik  ‘iluaatsuliunnginnissartik’ aalajangiusimasariaqarpaat. Tamanna pissutigalugu Timotheusi susariaqarpa? Paulusillu siunnersuutaa qanoq ilinniarfigisinnaavarput?

9. ‘Oqallinnerit sianiitsorpallattut soqqusaatsullu’ kristumiut siulliit ilagiivinut qanoq sunniuteqarpat?

9 Paulusi Timotheusimut allakkamini ajussutsimik itigartitsinissaq pillugu pitsaasunik siunnersuuteqarpoq. Assersuutigalugu Paulusip Timotheusi ‘assortuunnernut akuliunniaqqunagulu’ peqquaa “iluaatsunik isumaqanngitsunillu oqaluttartut” nigorsimassagai. (2 Timotheusi 2:14, 16, 23 atuakkit). Oqaatsit taakku qanoq paasisariaqarpat? Ilagiinniittut ilaat tunussisut ajoqersuutaannik ilinniartitsipput. Allat assortuutsitsilersunik ilinniartitsipput. Ilinniartitsissutit taakkua ilaat Biibilimi ilinniartitsissutigineqartunut toqqaannartumik akerliunngillat, ilagiinniittulli ataasioqatigiinnerannik navianartorsiortitsipput. Taamaattumik Paulusip Timotheusi kajumissaarpaa “oqallinnerni sianiitsorpallattut soqqusaatsullu” nigorsimaqqullugit.

10. Tunussisoqarpat susariaqarpugut?

10 Ullumikkut ilagiinni tunussisoqartarnera qaqutigoorpoq. Taamaattorli isummanik Biibilimi ilinniartitsissutigineqartunut akerliusunik aniatitsivigineqarsinnaavugut. Isummat taamaattut kimit aallaaveqarnerat apeqqutaatinnagu itigartittariaqarpavut. Tunussisunik — toqqaannartumik, internetikkut allatigulluunniit — attaveqaqateqarneq silatusaarnerussanngilaq. Tunussisut, immaqa ikiorusullugit, oqaloqatigigutsigit Guutimut naalanngissaagut. Taassuma peqquaatigut tunussinermik itigartitseqqulluta, aap ingalassimannilluinnaqqulluta.

Tunussisut attaveqaqatiginaveersaakkit (Immikkoortoq 10 takuuk)

11. Suna ‘sianiitsorpallattumik oqallissutaalersinnaava’, utoqqaanertallu qanoq maligassaalluarsinnaappat?

11 Tunussisut isumaasa saniatigut aamma assigiinngitsut ilagiinni eqqissinermik ajoqusiisinnaapput. Assersuutigalugu aliikkutassanut tunngatillugu isummat assigiinngitsut ‘sianiitsorpallattumik soqqusaatsumillu oqallissutaalersinnaapput’. Soorunami utoqqaanertat assortuunnissaq pinaveersaarniaannarlugu qatanngutit ataasiakkaat aliikkutassanik Jehovap ileqqorissaarneq pillugu najoqqutassiaanut akerliusumik siuarsaanerat akuersaassanngilaat. (Tuss 11:5; Ef 5:3-5) Utoqqaanertalli inuttut ataasiakkaatut isummaminnik sunniinaveersaartariaqarput. Akerlianik Biibilimi siunnersuut una maleruartariaqarpaat: “Guutip savaataanik ilissinniittunik paarsisuuniaritsi, ... akisussaaffigisassinnut naalagaaniassanngilasi, savaatinulli maligassaagitsi.” — 1 Petr 5:2, 3; 2 Korinthimiut 1:24 atuaruk.

12, 13. (a) Jehovap Nalunaajaasuisa sunik aliikkutaqarnissartik qanoq aalajangertarpaat, najoqqutassiallu Biibilimeersut suut atuuppat? (b) Immikkoortoq 12-imi najoqqutassiat sammineqartut assigiinngitsutigut aamma qanoq atuuppat?

12 Isiginnaagassiat, pinnguaatit, atuakkat nipilersuutilluunniit suut ingalassimasariaqarnerivut pillugit peqatigiissortatsinnit ilisimatinneqarneq ajorpugut. Sooq? Biibilimi allassimammat inuit immikkut tamarmik ‘ajunngitsumik ajortumillu immikkoortitsisinnaaneq sungiusartariaqaraat’. (Hebr 5:14) Aliikkutassanut tunngatillugu silatusaartumik aalajangiisarnissatsinnut najoqqutassiat Biibilimeersut iluaqutigisinnaavavut. Aalajangiileraangatta tamatigut ‘qulakkeertariaqarparput Naalakkamut suut iluarinartuunersut’. (Ef 5:10NW) Biibilimi ilinniartitsissutigineqartut naapertorlugit ilaqutariinni ittuusoq oqartussaassuseqarami aalajangersinnaavoq aliikkutassat aalajangersimasut angerlarsimaffimminni aliikkutarineqassanngitsut. — 1 Kor 11:3; Ef 6:1-4.

13 Najoqqutassiat Biibilimeersut eqqaaneqareersut  inuunitsinni aamma allatigut silatusaartumik aalajangiisarnissatsinnut iluaqutigisinnaavavut. Assersuutigalugu atisalersortarneq isikkorissartarnerlu, peqqissuseq inuussutissallu aamma nammineq aalajangigassanut tunngasut allat pillugit isummat assortuussutaalersinnaapput. Taamaattumik najoqqutassiat Biibilimeersut unioqqutinneqanngippata Jehovap innuttai silatusaassapput tamakku pillugit oqallinnerit ingalassimasarunikkit, “[Naalakkamummi] kiffaasoq saqitsaassisussaanngilaq. Taanna tamanut inussiarnersuussaaq.” — 2 Tim 2:24.

INUIT AJORTUMIK SUNNIISARTUT ILAGISASSANNGILATIT!

14. Paulusi inunnik ajortumik sunniisartunik ilagisaqartannginnissaq pillugu qanoq assersuusiorpa?

14 Guutip kiffaasut qanoq allatigut ‘iluaatsuliunngissinnaavugut’? Inuit ajortumik sunniisartut ilagisannginnerisigut. Paulusi tamanna pillugu qanoq assersuusiorpa? ‘Guutip tunngaviliussaa aalajaatsoq’ eqqaareerlugu ‘illorsuaq’ pillugu allappoq. ‘Illorsuarmi atortoqarpoq kuultimik sølvimillu sanaanik, aammattaaq qisummit marrarmillu sanaanik, ilaat nalliuttorsiornermi allallu ulluinnarni atugassat.’ (2 Tim 2:20, 21) Tamatuma kingorna Paulusip kristumiut ‘atortunit ulluinnarni atugassanit’ nigorsimaqqullugit kajumissaarpai.

15, 16. ‘Illorsuaq’ pillugu assersuusiaq qanoq ilinniarfigisinnaavarput?

15 Paulusip assersuusiaa qanoq paasisariaqarpa? ‘Illorsuaq’ kristumiut ilagiivinut assersuunneqarsinnaavoq. Illumi “atortut” ilagiinniittunut assersuunneqarsinnaapput. Illumi atortut ilaat minguttuunngoraangamik ajoqutaalersinnaasarput. Taama pisoqaraangat illumik piginnittup atortut minguttuut minguitsunit, soorlu iganermi atorneqartartunit, immikkoortittariaqarsinnaasarpai.

16 Ullumikkut Guutip kiffaanut tunngatillugu aamma taamaappoq. Inuunitsinni sutigut tamatigut minguitsoorusukkutta ilagiinniittut Jehovap najoqqutassiaanik suusupaginnittut ilagisassanngilavut.  (1 Korinthimiut 15:33 atuaruk). Ilagiinniittut ajortumik sunniisartut ilagisassanngikkutsigit taava ilagiinnut ilaanngitsunik ilagisaqartannginnissarput pingaaruteqarnerungaassaaq. Taamaaliortarpugut silamiorpassuit ‘aningaaserituujummata, angajoqqaaminnut naalanngitsuummata, mitalliisuummata, mamarliisuummata, ajunngitsunut akeraasuummata, killuussisuummata inuulluarniutinillu Guutimit pingaarnerutitsisuummata’. — 2 Tim 3:1-5.

JEHOVAP ILUMOORNERPUT PILLUGU PILLUAQQUSSAVAATIGUT

17. Israelikkut ilumoortut ‘iluaatsuliunnginnissamut’ tunngatillugu qanoq pimoorussitigippat?

17 Jehova ‘Korap, Datanip Abiramillu toqqisa eqqaannit nigorsimatitseqqusimmat’ Israelikkut aalajaatsut aalajangiussisimalluinnarlutik “toqqisa eqqaannit qimagupput”. (4 Mos 16:24, 27) Pikitsitsisunit avissaarnissaminnut mulunatillu qularatik iliuuseqarput. Toqqisa “eqqaannit”, imaluunniit ‘avataannit’ (1900) qimagupput. Israelikkut ilumoortut uummatikkut iluunngarlutik naalannissaminnut piumassuseqarput. Paatsuugassaanngitsumik ersersippaat Jehova tapersersorlugu ‘iluaatsuliornerlu’ akerleralugu. Maligassiuinerat qanoq ilinniarfigisinnaavarput?

18. Paulusip Timotheusi ‘inuusuttut kajungerisaat qimarratigeqqullugit’ allaffigigamiuk suna pivaa?

18 Jehovamik ikinnguteqarnerput pingaartikkatsigu illersorniarlugu iliuuseqapallattassaagut. Paulusip Timotheusi ‘inuusuttut kajungerisaat qimarratigeqqullugit’ allaffigigamiuk tamanna pivaa. (2 Tim 2:221936) Taamani Timotheusi 30-t sinnerlugit ukioqarsimagunarpoq. Allaat inersimasut sianiilliorlutik ‘inuusuttutut kajungerisaqarsinnaapput’. Timotheusip ‘kajungerisat’ taamaattut ‘qimarratigisariaqarpai’. ‘Iluaatsuliorneq’ itigartittariaqarpaa. Jiisusi tamatumunnga assingusumik nalunaaruteqarpoq: “[Isivit] tammartippatit peeruk igillugulu.” (Matt 18:9) Kristumiut siunnersuummik tamatuminnga maleruaarusuttut Guutimillu ikinnguteqarnerminnik illersuerusuttut ingerlaannaq aalajangiussisimannilluinnarlutillu iliuuseqartariaqarput.

19. Qatanngutit ilaasa Jehovamik ikinnguteqarnertik qanoq illersorsimavaat?

19 Kristumiut ilaasa Jehovamik ikinnguteqarnertik qanoq illersorsimavaat? Imigassamik atornerluisuusimasut ilaat aalajangertarput imigassartunngilluinnarniarlutik. Allat aalajangersimasunik sanngiissutillit aliikkutassat pilerissusipiloqalersitsisinnaasut suulluunniit ingalassimaniartarpaat. (Tuss 101:3) Assersuutigalugu qatanngutip angutip nalunaajaasunngunngikkallarami qitigiartarfinnut kinguaassiuutitigut inuunerluttutut pissusilersorfiusartunut qitigiartarnini nuannarisarsimavaa. Sallusuissut paasigamiuk allaat nalunaajaasut katerisimaaqatigiinnerini qiteqqinngisaannarniarluni aalajangerpoq. Qatanngut kissaatipiloqalerniarnanilu eqqunngitsunik eqqarsaateqalerusunngilaq. Soorunami tamanna kristumiut tamarmik imigassartortannginnissaattut, qitittannginnissaattut allanilluunniit namminermini ajortuunngitsunik ingalassimanninnissaattut paasisariaqanngilaq. Tamattali Jehovamut attaveqarnerput erlinnartutut isigisariaqarlugulu illersortariaqarparput.

20. ‘Iluaatsut’ itigartinnissaat ajornaatsuujuaannanngikkaluartoq suna tuppallersaatigaarput?

20 Jehovap Nalunaajaasuanik taaneqarsinnaaneq immikkut pisinnaatitaaffiuvoq. Tamannali akisussaaffiliivoq. ‘Iluaatsut’ itigartittariaqarlugillu ‘ajortoq nigorsimasariaqarparput’. (Tuss 34:15) Tamanna ajornaatsuujuaannanngilaq. Tuppallernangaarporli nalunagu Jehovap “pigisani” naalatsinilu asajuassagai. — 2 Tim 2:19; 2 Nalunaarsuutit 16:9a atuaruk.