Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Juuni 2014

“Tullit ilittut asassavat”

“Tullit ilittut asassavat”

“[Inassutit aappaata] taamaaqatigaa: ‘Tullit ilittut asassavat.’” — MATT 22:39.

1, 2. (a) Jiisusip inassutit annersaata tullia suunerarpaa? (b) Apeqqutit suut akissutissarsissavavut?

INATSISIP annersaasup suuneranik farisiiarip aperimmani Jiisusip ima akivaa: “Naalagaq [Jehova, NW] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.” Tamanna qanoq paasisariaqarnersoq allaaserisap matuma siuliani sammivarput. Jiisusip aamma oqaatigaa inassutit annersaata tullia suunersoq. Ima oqarpoq: “Tullit ilittut asassavat.” — Matt 22:34-39.

2 Jiisusi oqarpoq tullerput asassagipput. Kinali tulleraarput? Tullitsinnut asanninnerput qanoq ersersissinnaavarput? Allaaserisami matumani apeqqutit taakku akissutissarsissavavut, aamma sooq tullitsinnut asanninnerput Jehovamit iluarisaallunilu inunnut tamanut iluaqutaanersoq sammissavarput.

KINA TULLERAARPUT?

3, 4. (a) Jiisusip tullermut asanninneq qanoq paasisariaqarnersoq ersersinniarlugu suna assersuusiaraa? (b) Samariamiup angut tillinniarfigitillunilu toqungajallugu persuttarneqarsimasoq qanoq ikiorpaa? (Allaaserisap aallaqqaataani assiliaq takuuk).

3 Angutip Jiisusi ima aperaa: “Kinami tulleraara?” Jiisusip akissutimini Samariamiu pillugu assersuusiaq iluaqutigalugu nassuiarpaa tullermut asanninneq qanoq paasisariaqarnersoq. (Lukasi 10:29-37 atuakkit). Angut juutiusoq tillinniarfigitillunilu toqungajallugu persuttarneqarsimasoq aqqusinermi  qimaannarneqarsimavoq. Palasip Israelikkuusup Levikkuusullu, tullerminnut asannittuusussaagaluit, ikiornagu saneqqutiinnarpaat. Samariamiulli ikiorpaa. Taamanikkut juutit Samariamiunik uumiginnipput. — Joh 4:9.

4 Angutip persuttarneqarsimasup ikii maminniassammata Samariamiup uuliamik viinnimillu kuivai. Akunnittarfimmukaappaa piginnittorlu denarinik marlunnik tunillugu. Akiliutaa taamani sulisartup ulluni marlunni sulineranut akissarsineratut naleqarpoq. (Matt 20:2) Angut persuttarneqarsimasoq ikiorniarlugu Samariamiup iliuuserisimasarpassuinit tullerminut asanningaarnera erserpoq. Inuit asallugillu misiginneqatigigutsigit Samariamiu taanna ilaarsinnaavarput.

Jehovap kiffai tullerminnik ikiuipallannermikkut asanninnertik ersersittarpaat (Immikkoortoq 5 takuuk)

5. Ulussaarsuup Sandyp kingorna Jehovap Nalunaajaasui tullerminnut asanninnertik qanoq ersersippaat?

5 ‘Ulluni kingullerni’ inuugatta inuit amerlanerit misiginneqataaneq ajorput. Inuppassuit misigittaatsuullutik nakuusernermik nuannarisaqartuullutillu tullerminnut asannittuunngillat. (2 Tim 3:1-3) Assersuutigalugu oktobarimi 2012-imi New York ulussaarsuarmit Sandymit pitoraanneqarami illoqarfiup ilaa aseruaatitinneqarpoq. Tassanilu inuit innaallagiaaruttoorsimallutillu kiassarneeruttoorsimapput pisariaqartitaminnillu amigaateqarlutik. Ajoraluartumillu inuit naalliuuteqareersut tillinniarfigitipput. Jehovalli Nalunaajaasui kristumiutut ilumoortutut tullerminnut asannikkamik qatanngutitik allallu eqqugaasimasut ikiorumallugit ikiuinissaminnik aaqqissuussipput. Tullitsinnut asanninneq aamma qanoq ersersissinnaavarput?

TULLITSINNUT ASANNINNEQ QANOQ ERSERSISSINNAAGIPPUT

6. Tullerput Biibili tunngavigalugu qanoq ikiorsinnaavarput?

6 Inuit anersaakkut ikiornerisigut. Oqaluussigaangatta tullerput Biibili tunngavigalugu ‘tuppallersartarparput’. (Rom 15:4) Nutaarsiassamik nuannersumik oqaluussissutiginninnermi Biibili atoraangatsigu tullitsinnut asanninnerput ersersittarparput. (Matt 24:14) Tusarliussaq tamanna tullitsinnut ingerlateqqissinnaagatsigu ataqqinaatigaarput. — Rom 15:13.

7. Jiisusi qanoq siunnersuiva, siunnersuutaalu maleruarutsigu qanoq kinguneqassava?

7 Maleruagassap atoriaannaajuaannartup maleruarneratigut. Jiisusi ima siunnersuivoq: “Taamaattumik: Inunnut qanorluunniit iliorfigeqqugussi ilississaaq taamatut iliorfigisigit; taamaappummi inatsisit pruffiitillu.” (Matt 7:12) “Inatsisit” tassaapput atuakkat Mosesip allagai tallimaasut “pruffiitillu” tassaapput testamentitoqqami atuakkat siulittuutaasut. Jehovap innuttani asagamigit imminnullu asaqatigiinnissaat kissaatigigamiuk “inatsisit pruffiitillu” taakkununnga tunniuppai. Ullumikkuttaaq Jehovap piumasaraa tullitsinnut asannittuussasugut. Esajap allagaani Jehova ima oqarpoq: “Eqqartuussinermi iluartuliornissaq sianiginiarsiuk naapertuilluartumillu iliorlusi ... Pilluarpoq taama iliortoq.” (Es 56:1, 2) Tullitsinnut asanninnermik ersersitsigutta Jiisusillu siunnersuutaa maleruarutsigu pilluaqquneqarumaarpugut.

8. Sooq uagutsinnut akeraasut asassavavut, qanorlu kinguneqarsinnaava?

8 Uagutsinnut akeraasut asanerisigut. Jehovap ilinniartittuarpaatigut uagutsinnut akeraasut asassagivut. Jiisusip nalaani inuit ilaasa akeqqamik uumiginninneq ajoqersuutigisimavaat. Jiisusili ima ilinniartitsivoq: “Akeqqasi asasigit, ilissinnillu qinuginnittut qinnussigit.” (Matt 5:43-45) Paulusi aamma taamatupajaaq siunnersuivoq ima allakkami: “Akeqqat kaappat nerleruk, imerusuppallu immiguk.” (Rom 12:20; Uss 25:21) Itsaq Israelikkut Mosesip inatsisaani peqquneqarput akeqqaminnik aamma allaat taakkua uumasuutaannik  ikiuissasut. (2 Mos 23:5) Tamatuma maleruarneratigut inuit ilaat akerariissimagaluartut ikinngutigiilersimapput. Kristumiutut asanninnerput uagutsinnut akeraasunut ersersikkutsigu uagutsinnut isiginnittaasiat allanngortissinnaavarput. Immaqa ilaat allaat Jehovamut kiffartortunngorsinnaapput.

9. Qatanngutitsinnik eqqisseqatiginninnissaq pillugu Jiisusi qanoq oqarpa?

9 ‘Tamanik eqqisseqatiginninnissap noqqaassutigineratigut.’ (Hebr 12:14) Inuit tamaasa eqqisseqatigissagutsigit soorunami aamma qatanngutivut eqqisseqatigisariaqarpavut. Jiisusi ima oqarpoq: “Taamaattumik tunissutissat pilliivimmukaakkukku tassanilu eqqaalerlugu qatanngutit illit pillutit unnerluussutissaqartoq, taava tunissutissat pilliivimmut qimallugu qatanngutit saammaakkiartoqqaarallaak [eqqisseqatigiartoqqaarallaak, NW], taavalu aatsaat kingorna tunissutissat pilliutigiartorlugu.” (Matt 5:23, 24) Qatanngutitta ilaat aaqqiagiinngissuteqarfigigaangatsigu taassumunnga asanninnerput ersersissinnaavarput ingerlaannaq eqqisseqatiginiartarutsigu. Taamaaliorutta Jehovap nuannaarutigingaassavaa.

10. Sooq allanik eqqartuussissanngilagut?

10 Allat eqqartuunnginnerisigut. “Eqqartuusseqinasi eqqartuunneqaqqunasi.” Jiisusip taama oqarnermigut ilinniartippaatigut allat kukkussutaat pissutigalugit eqqartuutissanngikkivut. Aamma ima oqarpoq: “Sooq qatanngutivit issiutaa makiarninnguaq isiginiarpiuk, paakkarut illit isinniittoq maluginagu? Imaluunniit qatanngutinnut qanoq oqarsinnaavit: Issiutit peerallarlara uffa paakkarummik illit isinniittoqartoq. Ilumoortuusaartutit uumaa, paakkarut illit isinniittoq peeqqaarallaak, taava isigilluarsinnaassaatit qatanngutivit issiutaata peernissaanut.” (Matt 7:1-5) Tamatumani ilinniagassaq pingaarutilik tassaavoq inuit allat kukkussutaat pillugit isornartorsiussanngikkivut namminermi kukkussuterpassuaqartaratta.

ASANNITTULIORNEQ PITSAANERPAAQ

11, 12. Tullerput qanoq pitsaanerpaamik asannittuliorfigisinnaavarput?

11 Tullitsinnut asanninnerput assigiinngitsorpassuartigut ersersissinnaavarput. Jiisusip ilinniartippaatigut pitsaanerpaamik taamaaliorsinnaasugut Naalagaaffik  pillugu nutaarsiassap nuannersup oqaluussissutigineratigut. (Luk 8:1) Ajoqersukkani peqquai ‘inunnik inuiannit tamaneersunik ajoqersuganngortitsissasut.’ (Matt 28:19, 20NW) Jiisusip peqqussutaa maleruarutsigu tullerput aqqut sileqisoq suujunnaarsitaanissamik kinguneqartoq ingerlavigiunnaarsinnaaqqullugu aqqullu ameqisoq inuunermut naassaanngitsumut sammisoq ingerlavigilersinnaaqqullugu ikiorsinnaavarput. (Matt 7:13, 14) Qularutiginngilarput Jehovap oqaluussinermi ilungersornivut nuannaarutigingaartarai.

12 Jiisusip inuppassuit anersaakkut ittunik pisariaqartitsinerminnik paasinninnissaannut ikiorpai. (Matt 5:3) “Iivangkiiliu”, nutaarsiassaq nuannersoq Guutimeersoq, inunnut ‘nalunaajaatigigaangatsigu’ Jiisusi ilaartarparput. (Rom 1:1) Inoqativut ilinniartittarpavut Jiisusip pilliutaa tunngavigalugu Jehovamut ikinngutaasinnaallutillu taassuminnga iluarisaasinnaasut. (2 Kor 5:18, 19) Nutaarsiassamik nuannersumik oqaluussissutiginninneq tullitsinnut asannittuliorneruvoq pitsaanerpaaq.

13. Qanoq misigisarpit inuit allat Jehova pillugu ilinniartikkaangakkit?

13 Pulaaqqiinissamut Biibilimillu atuaqqissaaqateqarnissamut piareersarluarnitsigut Jehovap naalannissaanut inunnik ikiuisarnerput nalerisimaarutigaarput. Inuit ilaat inuunerminni allannguerujussuartariaqarput. (1 Kor 6:9-11) Jehovap inunnik maniguuttunik anersaakkut siumukarnissaannut imminullu ikinngutaalernissaannut ikiuisarnera takugaangatsigu nuannaarutigisarparput. (Joh 6:44) Inuit Biibilimik atuaqqissaaleraangamik neriuuteqarsimanngikkaluarlutik pillualertarput, isumakulussimagaluarlutillu Jehova tatigilertarpaat. Oqaluussinikkut pitsaanerpaamik tullitsinnut asannittuliorsinnaanerput ataqqinaatigaarput.

PAULUSIP ASANNINNERMIK ALLAATIGINNINNERA

14. Paulusip Korinthimiunut allakkamini siullerni 13:4-8-mi asanninneq qanoq allaatigaa?

14 Tullerput Paulusip allaatigisaatut asagutsigu Jehova nuannaartissallugulu ajornartorsiuterpassuit pinngitsoortissallugillu pilluarsinnaavugut. (1 Korinthimiut 13:4-8 atuakkit). Maanna Paulusip allatai naapertorlugit tullitsinnut qanoq aamma asannittuliorsinnaanersugut sammeriartigu.

15. (a) Sooq kamagittartuullutalu saamasuusariaqarpugut? (b) Sooq sinnganatalu pingaakujussanngilagut?

15 ‘Asanninneq kamagittartuuvoq saamasuullunilu.’ Jehovap inuit naammalluinnanngitsuugaluartut saamasuulluni kamagittarfigisarpai. Taamaattumik allat kukkugaangata allaallu sorraaffigigaangatigut aamma uagut saamasuullutalu kamagittarfigisariaqarpavut. Aamma ima allassimavoq: “Asanninneq sinngasarinngilaq.” Ilumoorluta asannittuugutta qatanngutit ilaasa pigisaat ilagiinniluunniit akisussaaffii pissutigalugit sinngaginavianngilavut. Aamma makitanata pingaakujunnavianngilagut. Biibili naapertorlugu Jehovap “isit usorsisimaarpalunnerat uummatillu makitassusiat” uumigai. — Uss 21:4.

16, 17. Korinthimiunut allakkat siulliit 13:5, 6 naapertorlugit tullitsinnut asanninnerput qanoq ersersissinnaavarput?

16 Asanninneq “kanngunartuliortarinngilaq”. Tullerput asagutsigu salluffiginagulu tilliffiginavianngilarput Jehovallu inatsisaanut naapertuutinngitsumik allamik iliuuseqarfiginaviarnagu. Aamma asanninneq “namminissarsiortarinngilaq”. Taamaattumik namminissarsiornata tullitsinnut iluaqutaanerpaamik iliuuseqartuarusuppugut. — Fil 2:4.

17 Asanninneq “puffassartarinngilaq puttarsisaqartarnanilu”. Eqqunngitsuliorfigineqarutta narrutsapallassanngilagut. (1 Th 5:15) Aamma ajuallatsinneqarsimanivut  naatsorsoqqissaassanngilavut. Kamannerput ilumikkiukkutsigu innertut siammariataarsinnaavoq, kammasertooruttalu immitsinnut allanullu ajoqutaangaarsinnaavoq. (3 Mos 19:18) Paarlattuanik isumakkeerfiginnittuullutalu eqqunngitsuliorfigineqarnerput puiortariaqarparput. Asanninnerup ‘iluaanneq nuannarisarinngilaa’. Inuk uagutsinnik uumiginnittoq eqqunngitsuliorfigineqarpat tamanna nuannaarutiginavianngilarput. — Ussatit 24:17, 18 atuakkit.

18. Korinthimiunut allakkani siullerni 13:7, 8-mi asanninneq pillugu suna paasivarput?

18 Paulusi allappoq asanninneq ‘tamatigut naammagittartuusoq’. Tullitsinnit ajuallatsinneqarutta taanna asagatsigu isumakkeerfigissavarput. Paulusi aamma allappoq asanninneq ‘tamatigut uppertartoq’. Biibilimi allassimasut upperaavut Jehovallu peqatigiiffianit ilinniartinneqarnerput qujamasuutigingaarlugu. Asanninneq “tamatigut neriuttarpoq”. Jehovap neriorsuutigisai tamaasa upperigatsigit neriuuteqarpugut. Inoqativullu asagatsigit neriuutitsinnik oqaluttuukkusuppavut. (1 Petr 3:15) Unamminiagassaqaraangatta ajunnginnerpaamik aaqqinneqarnissaa neriuutigalugulu qinnutigisarparput. Allaat ajortuliorfigineqaraangatta imaluunniit malersorneqaraangatta pinertusaartarpugut. Paulusimi allappoq asanninneq ‘tamatigut ilalaartartoq’. Aamma allappoq asanninneq ‘soraanngisaannassasoq’. Jehovamut naalattut tullerminnut asanninnertik naassaanngitsumik ersersissavaat.

TULLIT ILITTUT ASAJUARUK

19, 20. Allassimaffiit suut tullitsinnut asannittuarnissatsinnut kajumississutigisinnaavavut?

19 Biibilimi siunnersuutigineqartut maleruarutsigit tullerput uagutsitut asajuassavarput. (Matt 22:39) Jehovap Jiisusillu taamaaliornissarput piumasaraat. Inuit tamaasa qanorluunniit tunuliaqutaqaraluarpata suminngaanneeraluarpatalu asassavavut. Tullitsinnut asanninnermik ersersitsinissamik ajornakusoortitsigutta Jehova anersaaminik illernartumik tuneqqulluta qinnuigisinnaavarput. Qularutiginngilarput Jehovap tamanna nuannaarutigissagaa ikiorumaarlutalu. — Rom 8:26, 27.

20 Tullitsinnut uagutsitut asanninnissamik peqqussut ‘inatsimmik akimasumik’ taaneqarpoq. (Jaak 2:8) Mosesip inatsisaani Jehovap innuttani peqqussutinik amerlasuunik tullerminnik asanninnissamik ilinniartitsissutinik tunivai. Kingusinnerusukkut Jehovap Paulusi isumassarsisillugu ima allatsippaa: “[Inassutit] allat tamarmik ataatsimut eqinneqarput inassummi matumani: ‘Tullit ilittut asassavat.’ Asannittup tullini ajortuliorfigineq ajorpaa. Taamaattumik asanninneq tassaavoq inatsisit naammassissutaat.” — Rom 13:8-10.

21, 22. Sooq Guuti tullerpullu asassavavut?

21 Tullitsinnut asanninnermik ersersitsinissatsinnut pissutaasunik eqqarsaatiginneqqissaarnitsinni Jiisusip Ataatani pillugu oqaasii uku iluaqutigisinnaavavut: “Seqerni ajortunut ajunngitsunullu nueqqusarpaa siallersitsisarlunilu iluartunut iluaatsunullu.” (Matthæusi 5:43-45) Jiisusip ilinniartippaatigut inunnut tamanut, “iluartunut iluaatsunullu”, asanninnerput ersersissagipput. Eqqaaneqareersutut Jehova taassumalu naalagaaffia pillugit ilinniartitsinitsigut tullitsinnut asanninnerput pitsaanerpaamik ersersissinnaavarput. Tullitta Biibilimit ilikkakkani maleruarunigit Jehovamut ikinngutaalernini nuannaarutigisinnaavaa.

22 Sooq Jehova uummatikkut, tarnikkut isumakkullu iluunngarluta asassagipput sammereerparput. Aamma tullitsinnut qanoq asanninnermik ersersitsisinnaanersugut ilikkarparput. Jehova aamma tullerput asagutsigit inassutit pingaarnerit marluk maleruassavavut. Pingaarnerpaamillu, Ataatarput qilammiusoq asannittoq Jehova nuannaartissavarput.