Imarisai

Imai

Jehovap Nalunaajaasui

Oqaatsit toqqakkit Kalaallisut

Eqqaamavigit?

Eqqaamavigit?

Atuagassiaativut saqqummertut kingulliit atuaqqissaarnikuuigit? Apeqqutit tulliuttut uku akisinnaanerlugit misilissinnaavat:

Savaaraq poorskisiutissaq nisanip 14-ianni ullup qanoq ilinerani toqunneqassava?

Biibili naapertorlugu “taarsinngitsiarnerani” savaaraq toqunneqassaaq. Biibilimik nutsikkani allani oqaaseq ‘taarsinngitsiarneq’ ‘tarrajussineq’-mik nutserneqarsimavoq. Taamaattumik seqernup tarrinnerata kingorna sulili taarsinngitsoq savaaraq toqunneqassaaq. (2 Mos 12:6) — 15/12, qupp. 18-19.

Qanoq ililluta nalunngilarput Guutip neriorsuutaa Saqqummersitani 21:4-miittoq qilammi inuuneq pineqarani nunarsuarmi inuuneq pineqartoq?

Siullermik, neriorsuutip aallaqqaataani ima allassimavoq: “Guuti ineqarfeqalerpoq inunni.” Inuillu nunarsuarmi najugaqarput. (Saqq 21:3) Aappassaanik, silarsuassami neriorsuutigineqartumi ‘toqu peerukkumaarpoq’. Qilammi toqusoqarsimanngisaannarpoq, nunarsuarmili toqu atuuppoq. — 1/1, qupp. 11.

Inuusuttut silatusaartumik aalajangiiniarnerminni najoqqutassiat Biibilimiittut suut maleruarsinnaavaat?

Najoqqutassiat pingasut uku maleruarsinnaavaat: (1) Guutip naalagaaffia naapertuilluassuserlu taassuma pia siulliullugit noqqaassutigikkit. (Matt 6:19-34) (2) Allanik kiffartuussineq pilluaatigiuk. (ApS 20:35) (3) Jehovamut kiffartorneq nuannaarutigiuk. (Oqal 12:1) — 15/1, qupp. 19-20.

Qaqugu ‘Savaaraq katissava’? (Saqq 19:7)

“Savaaraq”, kunngi Jiisusi Kristusi, ajugaareeruni, tassa Babylonersuaq suujunnaarsinneqareerpat sorsunnissarlu Harmagedoni naappat, ‘katissaaq’. — 15/2, qupp. 10.

Sooq juutit Jiisusip nalaani Missiarsip tikiunnissaa pillugu ‘ilimasuppat’? (Luk 3:15)

Missiarsi pillugu Danielip siulittuutaa uagut paasinnittaatsitsitut Jiisusip nalaani juutit paasisimaneraat uppernarsisinnaanngilarput. (Dan 9:24-271900) Imaassinnaavorli inngilip savanik paarsisunut tusarliussaa imaluunniit arnap pruffiitiusup, Annap, naalungiarsuk, Jiisusi, naalaffimmi takugamiuk qanoq oqarnera juutit tusarsimagaat. Aamma ‘ilisimasut’ “juutit kunngiat inoorlaaq” ujarpaat. (Matt 2:1, 2) Kingusinnerusukkut Johannesi Kuisisoq oqamisaarpoq Missiarsi qanittukkut tikiukkumaartoq. — 15/2, qupp. 26-27.

Neriorsuutivut qanoq eqqortittuarsinnaavavut? (2 Kor 1:18)

Ilaannikkut pissutsit iliuuseqarfigisinnaanngisavut pissutigalugit isumaqatigiissutigisaraluarput taamaatiinnartariaqartarparput. Neriorsuigaangattali neriorsuuterput eqqortinniarlugu sapinngisarput tamaat iliuuseqartariaqarpugut. — 15/3, qupp. 32.

Kristumiup aningaasarsiorniarluni ilaquttani qimallugit nunamut allamut nuunnera siunertarineqanngitsumik qanoq kinguneqarsinnaava?

Angajoqqaat ilaqutariittut najugaqatigiinniarnatik aalajangerpata meeqqat misigissusiat suullu eqqortuunerannik suullu eqqunngitsuunerannik najoqqutassiaat sunnerneqarsinnaapput. Aamma meeqqat angajoqqaatillu ataqatigiinnerat akornuserneqarsinnaavoq. Aappariillu najugaqatigiinngitsut kinguaassiuutitigut ussernartorsiulersinnaapput. — 15/4, qupp. 19-20.

Tiingasulersaarutinik isiginnaarnissamut ussernartorsiorneq qanoq akiorsinnaavarput?

Siunnersuutit iluaqutaasut pingasut ukuupput: (1) Assit isiginnaagassialluunniit takugutsigit alapallassavavut. (2) Ineriartornartut eqqarsaatigisarnerisigut Guutimullu qinusarnitsigut eqqarsaativut eqqunngitsut akiorsinnaavavut. (3) Filmit internetikkullu nittartakkat tiingasulersaarutitallit samminngisaannassavavut. — 1/5, qupp. 10-12.

Sooq oqarsinnaavugut sallusuissut ataasiinnaasoq?

Jehova ‘sallusuissutip Guutiatut’ taaneqarlunilu nammineq pilluni ima oqarsimavoq: “Allanngorsimanngilanga.” (Tuss 31:5NW [31:6]; Mal 3:6) Jiisusi Guutip oqaasia pillugu ima oqarpoq: “Oqaatsitit sallusuissutaapput.” (Joh 17:17) Sallusuissut taanna Guutip oqaasiani, Biibilimi, isumassarsiarititaasumi saqqummersinneqarsimavoq. — 1/5, qupp. 15.

Oqaluussigaangatta apeqqutit sisamat suut eqqumaffigisassavavut?

Kina oqaluuppara? Sumi oqaluuppara? Qaqugukkut piffissaalluarnerusarpa? Qanoq oqaluutissavara? — 15/5, qupp. 12-15.