Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Juuni 2014

‘Jehova Guutit asassavat’

‘Jehova Guutit asassavat’

“Naalagaq [Jehova, NW] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.” — MATT 22:37.

1. Sooq Jiisusi Ataatanilu asaqatigiinnerulerpat?

JIISUSIP Ataataminut attaveqarluarnini ima oqaatigaa: ‘Ataataq asavara’, aamma ‘Ataatap Erneq asavaa’. (Joh 5:20; 14:31) Jiisusip nunarsuarmukannginnermini ukiuni millionilinni Ataatani suleqatigisimavaa. (Uss 8:301900) Suleqatigiinnerminni Jiisusi Ataatami pissusii pillugit ilinniangaarpoq, tamatumalu kingunerisaanik asaqatigiinnerulerput.

2. (a) Guuti qanoq misigissuseqarfigisariaqarparput? (b) Apeqqutit suut sammissavavut?

2 Tussiaasiortoq Daavi ima erinarsorpoq: “Asangaarpakkit Naalagaq, nakuussutiga.” (Tuss 18:2) Uaguttaaq taamatut Guuti misigissuseqarfigisariaqarparput. Neriorsorpaatigullu naalakkutsinni asanninnerminnik ersersitsivigiumaarluta. (5 Mosesi 7:12, 13 atuakkit). Guutili takusinnaanngikkaluarlugu qanoq asasinnaavarput? Jehovamut asanninneq qanoq paasisariaqarpa? Sooq asasariaqarparput? Guutimullu asanninnerput qanoq ersersissinnaavarput?

SOOQ GUUTI ASASINNAAGIPPUT

3, 4. Sooq Jehova asasinnaavarput?

3 ‘Guuti anersaajummat’ takusinnaanngilarput. (Joh 4:24) Taamaakkaluartorli Jehova asaneqarsinnaavoq. Allaat Biibilimi peqquneqarpugut Jehova asassagipput. Assersuutigalugu Mosesip  Israelikkut ima oqarfigai: “Naalagaq [Jehova, NW] Guutit asassavat uummatikkut iluunngarlutit tarnikkullu iluunngarlutit nukitillu tamakkerlugit.” — 5 Mos 6:5.

4 Sooq Guuti asaneqarsinnaava? Guutimut attaveqarnissamik pisariaqartitalittut asanninnermillu ersersitsisinnaasutut pinngortinneqaratta. Jehova ilisarisimaneruleriartortillugu taanna asanerulissavarput nuannaarnerulissallutalu. Jiisusip nassuiarpaa anersaakkut pisariaqartitaqarnerminnik miserratiginninngitsut pilluartut. Taannami ima oqarpoq: “Pilluarput anersaakkut piitsut.” (Matt 5:3) A. C. Morrison atuakkiamini tuluttuumi “Inuit kisimiinngillat”-mik qulequtalimmi allappoq inuit qutsinnerusumik Guutitut ittumik ujarlertuarlutillu upperinnittuarnerat tupinnangaartoq. Inuppassuit atuakkiortup isumaqarneratut nassuerutigaat inuit Guutimik ilisarisimanninnissamik pisariaqartitsisut.

5. Qanoq nalunngilarput Guutimik ujarlerneq asuliinnaanngitsoq?

5 Guutimik ujarlerneq asuliinnaava? Naamik, Guutimmi kissaatigaa attaveqarfigissagitsinni. Apustilip Paulusip itsaq Athenimi, guutiutitap arnap Athenap naalaffiata eqqaani, oqalugiarami tamanna erseqqissarpaa. Ima oqarpoq: “Guuti silarsuarmik taassumaniittunillu tamanik pinngortitsisuusoq ... naalaffinni assannik sanaasuni najugaqanngilaq.” Aamma nassuiaavoq inuit sumiluunniit najugaqaraluarlutik Guuti ‘nanisinnaagaat’, Guutimmi ‘ilatsinnit kimilluunniit ungasinngimmat’. (ApS 17:24-27) Aap, inuit Guutimut attaveqarsinnaapput. Jehovap Nalunaajaasuisa 7,5 millioninit amerlanerusut Jehova ‘nanisimavaat’ asangaarlugulu.

GUUTIMIK ASANNINNEQ QANOQ PAASISARIAQARTOQ

6.  “Inassutit annersaat siullersaallu” suua?

6 Jehova qanoq asatigissavarput? Jiisusip tamanna akissutimini erseqqissarpaa farisiiarimit ima aperineqarami: “Ajoqersuisoq, inassut suna inatsisini annerua?” Jiisusip ima akivaa: “‘Naalagaq [Jehova, NW] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ Tassa inassutit annersaat siullersaallu.” — Matt 22:34-38.

7. Qanoq paasisariaqarpa Guuti asassagipput (a) ‘uummatikkut iluunngarluta’? (b) ‘tarnikkut iluunngarluta’? (c) ‘isumakkut iluunngarluta’?

7 Jiisusip oqaasii taakku qanoq paasisariaqarpat? Jiisusi oqarmat Jehova ‘uummatikkut iluunngarluta’ asassagipput uummaterput assersuutaasoq tamaat pivaa, taannalu kissaatigisatsinnut misigissutsitsinnullu tamanut assersuutaavoq. Aamma ‘tarnikkut iluunngarluta’ asassavarput. Tarneq tamaat ima paasisariaqarpoq kinaassuserput tamaat inuunitsinnilu iliuuserisartakkavut tamaasa. Kiisalu ‘isumakkut iluunngarluta’ asassavarput. Isumarput tamaat ima paasisariaqarpoq eqqarsaativut tamaasa eqqarsartaaserpullu tamaat. Jiisusip taamaalilluni erseqqissarpaa Jehova nangaassuteqarata asalluinnartariaqaripput.

8. Guuti asallutigu qanoq ersersissinnaavarput?

8 Guuti uummatikkut, tarnikkut isumakkullu iluunngarluta asallutigu ersersittarparput Biibili aalajangersimasumik atuaqqissaaraangatsigu, iliuusereqqusai tamaasa maleruaraangatsigit, aallussillutalu Guutip naalagaaffianik nutaarsiassaq nuannersoq allanut oqaluussissutigigaangatsigu. (Matt 24:14; Rom 12:1, 2) Eqqaaneqartut iliuuserisarutsigit Jehovamut attaveqarluarnerulissaagut. (Jaak 4:8) Guutimik asanninnitsinnut pissutaasut tamaasa eqqaasinnaanngikkaluarlutigit taakkua ilaannai sammeriartigit.

SOOQ JEHOVA ASASSAGIPPUT

9. Sooq illit Jehova asaviuk?

9 Jehova Pinngortitsisigigatsigu, taassumalu pisariaqartitatsinnik tamanik tunisarmatigut. Paulusi ima oqarpoq: “Taassumanimi inuuvugut anersaartorlutalu atallutalu.” (ApS 17:28) Jehova nunarsuaq  kusanangaartoq najugaqarfissatsitut tunniussimavaa. (Tuss 115:16) Inuuginnarsinnaaqqulluta inuussutissanik allanillu tunisarpaatigut. Tamanna pissutigalugu Paulusip Lystramiut oqarfigai guutiliat pallorfiginagit ‘Guuti uumasoq’, Jehova, pallorfigisariaqaraat. Guuti pillugu Paulusi ima oqarpoq: “Ajunngitsuliornermigut [tunisarpaasi] qilammit sialummik ullunillu naalluarfiusunik, qaarsillartittarlusi uummatisilu nuannaartittarlugit.” (ApS 14:15-17) Jehova asannilluni pisariaqartitatsinnik sunik tamanik tunisarpaatigut. Tamanna Pinngortitsisersuatsinnik asanninnissatsinnut pissutaalluarpoq, ilaa? — Oqal 12:1.

10. Utertitsissutitut pilliut qanoq isumaqarfigaajuk?

10 Guutip ajorti toqulu Adamimit kingornussavut atorunnaarsikkumaarmagit. (Rom 5:12) Biibilimi ima allassimavoq: “[Guutip] uagutsinnut asanninnini takutippaa ajortiliugallartilluta Kristusip pilluta toquneratigut.” (Rom 5:8) Ajortuliatsinnik peqqissimissutiginnikkutta utertitsissutitullu pilliut upperigutsigu Guutip ajortuliatsinnik isumakkeerfigiumaarpaatigut. Jehovap asanningaarnini pissutigalugu ernini uagut pilluta toquniassammat aallartimmagu qamannga pisumik qujamasuffigingaarparput. — Joh 3:16.

11, 12. Jehovap sumik neriuuteqalersippaatigut?

11 Jehovap inuunermik naassaanngitsumik neriuuteqalersimmatigut. (Rom 15:13) Uppernikkut misilinneqaraangatta neriuut tamanna pinertusaarnissatsinnut iluaqutigisarparput. Tanitat aalajaatsut naassaanngitsumik qilammiinnissaminnik neriuuteqarput. (Saqq 2:10) Aalajaatsut allat nunarsuarmi paratiisiusumi naassaanngitsumik inuulernissartik neriuutigaat. (Luk 23:43) Neriuuteqarnerput qanoq isumaqarfigaarput? Uummaterput nuannaarnermik, eqqissinermik Guutimullu ‘tunissutinik ajunngitsunik naammalluinnartuusunillu tamanik’ tunisisartumut asanninnermik ulikkaartarpoq, ilaa? — Jaak 1:17.

12 Jehovap toqusunik makititaanissamik neriuuteqalersimmatigut. (ApS 24:15) Asasatsinnik toqukkut annaasaqaraangatta aliasuutigingaartarparput. Jehovali toqusimasut inuulerseqqikkumallugit neriorsuisimammat ‘neriuuteqanngitsutut’ aliasunneq ajorpugut. (1 Th 4:13) Jehovap piffissaq taanna uagutsinnit qilanaarineruaa. Inuit millionilikkuutaat, ingammik aalajaallutik toqusimasut, makitikkusungaarpai. (Job 14:151900) Meeqqat angajoqqaatik takoqqikkaat qanimullu ikinngutigiit naapeqqittut takugukkit qanoq misigissanersutit takorlooriaruk! Jehovap toqusimasut makititaanissaat isumaliutigalugulu neriorsuutigisimavaa, siunissamilu eqquutitikkumaarpaa. Jehova taamatut uagutsinnik neriuuteqartitsimmat asangaarparput.

13. Qanoq nalunngilarput Guutip soqutigingaaraatigut?

13 Jehovap soqutigingaarmatigut. (Tussiaat 34:7, 19, 20; 1 Petrusi 5:6, 7 atuakkit). Allaat nalitsinni toqqissisimasutut misigisinnaavugut nalunnginnatsigu Jehovap imminut aalajaatsut tamatigut ikiorumasarai. (Tuss 79:13) Siunissamilu Guutip uagutsinnut iliuuserisassarpassui takorlooriakkit. Jiisusip, Guutip naalagaaffiani kunngiusup, pinerluttuliornerit, inunnik naqisimanninnerit ajussuserlu nunami atuukkunnaarsikkumaarpai. Taava Guutip inuit aalajaatsut tamaasa eqqissinermik tuniumaarpai inuunertillu tamakkiisumik nuannaarutiginiassammassuk pisariaqartitai tamaasa matussuserlugit. (Tuss 72:7, 12-14, 16) Taamatut neriuuteqaratta uummatikkut, tarnikkut isumakkullu iluunngarluta nukivullu tamakkerlugit Guutimik asanninnissatsinnut pissutissaqarluarpugut, ilaa? — Luk 10:27.

14. Guutip immikkut ittumik sumik pisinnaatitaaffeqartippaatigut?

14 Jehovap imminut nalunaajaasunngortitsinermigut immikkorluinnaq pisinnaatitaaffilermatigut. (Es 43:10-12) Guuti asavarput taassuma naalagaaffimminik tapersersuinissatsinnik  periarfissimmatigut naalliuttunillu neriuuteqalersitseqataasinnaanngortimmatigut. Inunnut allanut nutaarsiassamik nuannersumik tusarliussinissamut uppersuseqarlutalu qularuteqanngilluinnarpugut. Sooq? Tusarliussarput Guutip oqaasianeersuummat Guutillu neriorsuutai eqquuttuaannarput. (Josva 21:45; 23:14 atuakkit). Jehovap asanissaanut pissutissarpassuaqarpugut. Taassumunngali asanninnerput qanoq ersersissinnaavarput?

GUUTIMUT ASANNINNERPUT QANOQ ERSERSISSINNAAGIPPUT

15. Biibilimik atuaqqissaarneq ilikkakkatsinnillu maleruaaneq qanoq iluaqutigisinnaavavut?

15 Guutip oqaasiata aalajangersimasumik atuaqqissaarneratigut ilikkakkattalu maleruarneratigut. Taamaaliornikkut ersersissavarput Jehova asallutigu oqaasianillu siulersortikkumalluta. (Tuss 119:105) Naalliuuteqaraangatta asannittumik neriorsuutit uku tuppallersaatigisinnaavavut: “Uummat peqqissimisoq artorsaateqangaartorlu itigartittarinngilat, Guuti.” “Unneqqarissutsivit najummisarpaanga, Naalagaq. Eqqarsaatima eqqissiviilliortileraangannga tuppallersaanerpit nuannaalersittarpaanga.” (Tuss 51:19; 94:18, 19) Jehovap Jiisusillu naalliuuteqartut tamaasa nallittortarpaat. (Es 49:13; Matt 15:32) Biibili atuaqqissaaraangatsigu Jehovap uagutsinnut asanninnera pillugu paasisaqartarpugut. Tamannalu taassumunnga asanninnerulissutigisarparput.

16. Guutimut qinukulasarneq taassumunnga qanoq asanninnerulissutigisinnaavarput?

16 Guutimut qinukulasarnikkut. Guutip qinnutivut akigaangagit taassumunnga asanninnerulertarpugut. (Tuss 65:3) Immaqa misiginikuuarput Jehovap artukkatsinnik usserneqarnissarput akuersaarsimanngikkaa. (1 Kor 10:13) Isumakuluuteqarluta qamannga pisumik Jehovamut ikioqqulluta qinugutta ‘eqqissineq Guutimit pisoq’ asseqanngilluinnartoq misigisinnaavarput. (Fil 4:6, 7) Ilaannikkut Nehemiatut nipaatsumik qinusarsinnaavugut kingornagullu paasillugu Jehovap qinnuterput akisimagaa. (Neh 2:1-6) Qinujuarutta qinnutivullu Jehovap qanoq akisarnerai misigisarlutigu taassumunnga asanninnerulissaagut. Uppernikkullu misilinneqaraangatta  qularutiginngissinnaavarput Jehovap tamatuma naammagalugu atornissaanut ikiorumaaraatigut. — Rom 12:12.

17. Guuti asagutsigu ataatsimiigiartuarnissamut qanoq isiginnittaaseqassaagut?

17 Kristumiut ataatsimiinnerinut ataatsimeersuarnerinullu najuuttuarnikkut. (Hebr 10:24, 25) Jehova ataqqinnittumik pallorfigiumallugu inatsisaalu naalakkumallugit itsaq Israelikkut Jehova pillugu tusarnaarlutillu ilinniarusullutik katersuuttarsimapput. (5 Mos 31:12) Jehova ilumoortumik asagutsigu kristumiut ataatsimiinnerannut najuuttuartassaagut. (1 Johannesi 5:3 atuaruk). Taamaattumik ataatsimiigiartuarnissatsinnut sunaluunniit akornutigissanngilarput. Jehovamummi asanninnerput siulleq soraarukkumanngilarput. — Saqq 2:4.

18. Guutimut asanninnerput qanoq iliornissatsinnut killissutigaarput?

18 Aallussilluarluta sallusuissummik inunnut allanut oqaluussissutiginninnitsigut. (Gal 2:5) Guuti asagatsigu taassuma naalagaaffia inunnut allanut oqaluussissutigerusupparput. Harmagedonimi Guutip kunngiutitaa, Jiisusi, Jehovap naalakkersuisinnaatitaaneranik illersuissaaq. (Tuss 45:5; Saqq 16:14, 16) Guutip asanninnera taassumalu silarsuassaa nutaaq pillugit inunnik ilinniartitsisarnerput nuannaarutigeqaarput! — Matt 28:19, 20.

19. Sooq ilagiinni utoqqaanertat pingaartissavavut?

19 Ilagiinni utoqqaanertanik pingaartitsinermik ersersitsinikkut. (ApS 20:28) Jehovap ajunngitsumik kissaattuaannaramisigut utoqqaanertanik ivertitsisimavoq. Utoqqaanertat ‘anorersuarmut sialussuarmullu oqqiffittut, inoqajuitsumi kuunnguatut kuuttutut nunamilu imissaaleqisumi qaarsorsuup alanngortaatut’ ipput. (Es 32:1, 2) Anorersuarmut sialussuarmullu oqquigaangatta imaluunniit kiassuarmut alannguiffissarsigaangatta qanoq misigisarnersugut eqqarsaatigeriaruk. Taamatuttaaq ajornartorsiuteqaraluarluta Jehova kiffartuuttuarumallugu utoqqaanertat pisariaqartitatsinnik ikiortarlutalu kajumissaartarpaatigut. Sooq utoqqaanertat naalattarpavut? Angutit ‘tunissutaasut’ taakkua pingaartikkatsigit Jehovalu Jiisusilu, ilagiinni niaquusoq, asagatsigit. — Ef 4:8; 5:23; Hebr 13:17.

Jehovap utoqqaanertanik uagutsinnik isumassuingaartartunik tunisimavaatigut (Immikkoortoq 19 takuuk)

GUUTIMUT ASANNINNERIT INERIARTORTITTUARUK

20. Guuti asagukku qanoq iliorumassavit?

20 Jehovap ‘inatsisimini naammalluinnartuni’ qanoq piumaffigineraatigut paasitinneqarpugut. (Jaaku 1:22-25 atuakkit). Jehovamut attaveqarluarusukkuit tusarnaaginnarnagu aamma allamik iliuuseqartariaqarputit. (Tuss 19:8-12) Ilikkakkatit naapertorlugit iliuuseqartariaqarputit. Assersuutigalugu Guuti asagakku aallussilluarlutit oqaluusseqataajumallutit ataatsimiinnernilu akisarumallutit iliuuseqarumassaatit.

21. Qinnutitit qamannga pisut sumut assersuunneqarsinnaappat?

21 Jehova qinunikkut saaffigikulasarparput asagatsigu. Itsaq Israelimi palasit ullut tamaasa Jehovamut tipigissaatilliisarput. Kunngip Daavip qinnutini tipigissaatilliinermut assersuullugit ima erinarsorpoq: “Qinnutiga ilinnut anngulli tipigissaatilliinertut, assakkalu qummut isaassimasut unnukkut pilliutitut!” (Tuss 141:2; 2 Mos 30:7, 8) Jehovap Daavip qinnutai tusarnaartarpai. Maniguulluta qujamasulluta qamanngalu pisumik Jehovamut qinugutta qinnutivut tipigissaatitut issallutillu taassumunnga nuannaarutaassapput. — Saqq 5:8.

22. Allaaserisami tulliuttumi suna sammissavarput?

22 Jiisusi oqarpoq Guuti tullerpullu asassagivut. (Matt 22:37-39) Jehova asagutsigu taassumalu najoqqutassiai nuannarigutsigit tullitsinnik asanninnissatsinnut iluaqutigissavarput. Tamanna qanoq paasisariaqarnersoq allaaserisami tulliuttumi sammissavarput.