Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Juuni 2014

Siumukarsinnaaqqullutit ‘isikkavit ingerlavissaat nalimmatsikkit’

Siumukarsinnaaqqullutit ‘isikkavit ingerlavissaat nalimmatsikkit’

UKIUMI 537-mi Kr.in.si. Israelikkut Babylonimit animmata Jerusalemimut aqqutissaat Jehovap pingaartippaa. Ima oqarfigai: “Inuiaat aqqutissiuussigit! Aqqusinnioritsi, aqqusinnioritsi, ujarassuit tassaniittut tamaasa piiarsigit!” (Es 62:10) Peqqussut tamanna maleruarniarlugu susimassappat? Imaassinnaavoq Israelikkut ilaat aqqutigineqartussani itersat matoorlugillu maniilakuluttut nalimmatsersimassagaat. Taamaaliornerat angerlamut ingerlaarnermi iluaqutaasimanissaa qularnanngilaq.

Taamatuttaaq Jehovamut kiffartornermi assigiinngitsunik suliaqarnitsinni aqqusinermik atuaasarpugullusooq. Suliaqarnitsinni sapinngisamik akornuteqannginnissarput Jehovap kissaatigaa. Kiffartornitsinni iluatsilluarumalluta Biibilimi siunnersuutip matuma maleruarnera iluaqutigissavarput: “Isikkavit ingerlavissaat nalimmatserukkit aqqutigisatit tamarmik isumannaatsuussapput.” — Uss 4:26NW.

SILATUSAARTUMIK AALAJANGIISARIT

Biibilimi ima allassimavoq: “Angutit inuusuttut nukitik pinnersaatigaat.” (Uss 20:29) Inuusuttut amerlanerit peqqillutillu silassorillutillu inuunerminni iluatsilluarusupput. Inersimasut amerlanertigut inuusuttut piginnaaneri pikkoriffiilu takusinnaasarpaat inuusuttullu periarfissaminnik atorluaanissaat neriuutigisarlugu. Inuusuttut piginnaanitik pikkoriffitillu Jehovamut kiffartornermi atorunikkit piviusumik pillualissapput.

Silarsuarmiuttaaq inuusuttortatta piginnaaneri pikkoriffiilu qujamasuutigisarpaat. Assersuutigalugu nalunaajaasorpassuit atuarfimmi ingerlalluartaramik ilinniartitsisunit ilinniartunillu allanit qaffasinnerusumik ilinniagaqalernissamut kimigiiserfigineqartarput. Immaqa inuusuttut timersullaqqissut aningaasarsiutigalugu timersortartunngornissaminnut kajumissaarneqassapput. Imaassinnaavoq illit taamatut kajumissaarneqartutit imaluunniit  nalunngisat taamatut tatineqartoq. Kristumiut silatusaartumik aalajangiinissaminnut suut iluaqutigisinnaavaat?

Inuunermi aqquserngup pitsaanerpaap atuarnissaanut Biibilimi ilinniartitsissutigineqartut iluaqutigisinnaavavut. Assersuutigalugu Oqaluussisartup oqaasii 12:1-imi allassimasoq eqqarsaatigiuk: “Pinngortitsisit eqqaamaniaruk inuusuttuunerpit ulluini.” Inuusuttuususi Jehova qanoq eqqaamasinnaavisiuk?

Afrikap Kitaani qatanngut angut inuusuttoq Johnimik * atilik pillugu oqaluttuaq sammeriartigu. Arsarneq nuannaraa. 15-inik ukioqarluni nunanut allanut unammisartunut ilaavoq. Europami pitsaanerpaamik sungiusarneqarnissaminut, immaqalu allaat arsarnermik inuussutissarsiuteqalernissaminut, periarfissaqalernissaa ilimanarpoq. John tamatuma nalaani Jehovap Nalunaajaasuinit Biibilimik atuaqqissaaqatigineqartalerpoq. Jehova qanoq ‘eqqaamasinnaassavaa’? Taassumalu misilittagai qanoq ilinniarfigisinnaavavut?

Johnip Biibilimik atuaqqissaarnermini Guutip inuiaat ajornartorsiutaannik tamanik aaqqiiumaarnera paasivaa. Tamatuma kingunerisaanik Guutip piumasaatut iliorneq arsarnermit pingaaruteqarnerungaarnera paasivaa. Taamaattumik kuisillunilu nukini piffissanilu Jehovamut kiffartornermut atorpai. Piffissap ingerlanerani ilagiinni kiffartortunngorpoq, tassa ilagiinniittunik ikiuisartunngorpoq. Aningaasarsiutigalugu arsartartunngornissaminut sungiusarneqarnani kingusinnerusukkut Qatanngutinut Angutinut Aappaqanngitsunut Biibilimik Ilinniarfimmi kristumiutut sungiusarneqarpoq.

John inuussutissarsiutigalugu arsartartunngorsimasuuguni tusaamasanngorlunilu pisuunngorsimasinnaavoq. Paasivaali Biibilimi ima allassimasup ilumoornera: “Pisuup peqangaarutini pallittaalisarai, eqqarsaataani qarmarsuartut portusuutut ittarput.” (Uss 18:11) Aap, inuup pigissaarnermigut toqqissisimasorinera takorluuinerinnaavoq. Inuit pisuunngorniartut ‘imminnut amerlasuunik erloqissutissiortarput’. — 1 Tim 6:9, 10.

Inuusuttorpassuit piffissaq tamaat kiffartornerminni pilluarlutillu toqqissisimapput. John ima oqarpoq: “Piffissaq tamaat Jehovamut kiffartortut ‘sungiusaqatigisarpakka’. Taakkunannga pikkorinnerusoqanngilaq, Jehovalu qutsavigisarpara piviusumik pillualernissamik iluatsinnissamillu ilinniartissimammanga.”

Illimmi? Silarsuarmi matumani anguniagaqarnak aqqusineq Jehovamut kiffartornermi nuannersunik periarfissaqalissutigisinnaasat atuarsinnaaviuk? Pionerinngorsinnaavit? — Ungalusaq “ Iluaqutissat ilisimatusarfimmi pissarsiarineqarsinnaanngitsut” takuuk.

NAAKKIUFFISSAT AQQUTISSANNIT PIIAKKIT

Aappariit USA-mi immikkoortortaqarfimmi pulaarnerminni Betelikkormiut pilluangaarnerat maluginiarpaat. Kingusinnerusukkut qatanngut arnaq ima allappoq: “Inooriaaserput sungiuppallaalersimavarput.” Taamaattumik aappariit aalajangerput piffissartik nukitillu Jehovamut kiffartornermi atorluarneruniarlugit.

Aappariit pisariaqartumik allannguinissartik unamminiarnartippaat. Ullulli ilaanni Jiisusip oqaasii Johannesi 8:31-mi allassimasut eqqarsaatigilerpaat: “Oqaasera aalajangiussimajuarussiuk ilumut ajoqersugarissavassi.” Paasivaat Jiisusimut ajoqersukkatut ilumoortuussagunik pilliuteqartariaqarlutik. Ima isummerput: “Pilimanianngitsumik inuuneqalerumalluta iliuutsivut tamarmik pilliutaapput imminut akilersinnaasut.” Illortik angisooq pigisatillu pisariaqanngitsut tunillugillu ilagiinnut pisariaqartitsiffiunerusumut nuupput. Massakkut pioneriullutillu naalagaaffilersaarfinnik sanaartoqataasarlutillu ataatsimeersuarnerni nammineq kajumissutsimik suleqataasarput. Allannguinertik qanoq isumaqarfigaat? “Pilimanianngitsumik inuunitsinni Jehovap peqatigiissortaasa kajumissaarinerattut iliornerput tupinnaannartumik nuannaarutigaarput.”

AQQUMMIT NIGOQINAK

Salomo ima allappoq: “Isitit sammisikkit siumuinnaq, isiginerit siumoorluinnarli.” (Uss 4:25) Biilertup aqqutigisaminik isigiuarneratut uaguttaaq anersaakkut anguniagaqarnissatsinnut taakkuninngalu angusinissatsinnut akornutigisinnaasavut ingalassimaniartariaqarpavut.

Sunik anguniagaqarsinnaavit? Imaassinnaavoq piffissaq tamaat kiffartulersinnaasutit. Immaqa ilagiinnut  ikittunik oqaluussisartulimmut annertuumilli oqaluussiffigisartagaqartumut nuussinnaavutit. Qatanngutaaguit angut ilagiinni utoqqaanertanik ilagiinniluunniit kiffartortunik pisariaqartitsiffiusuni kiffartorsinnaavutit. Ilagiit sorliit pisariaqartitsinerunersut paasiniarlugu ilagiinnik nakkutilliisoq oqaloqatigisinnaavat. Illoqarfik najukkat qimallugu kiffartulerusukkuit ilagiit ungasissumiittut pillugit paasissutissanik amerlanerusunik pissarsiniarsinnaavutit. *

Esaja 62:10-mi peqqussut eqqarsaatigeqqeriartigu. Juutit Jerusalemimut uteqqittariaqarmata juutit ilaat aqqusinermik piareersaaniarlutik suleruloorsimassapput. Ullumikkut aamma illit anguniakkatit angujumallugit iliuuseqartariaqarputit. Tunniutiinnanngisaannarit. Jehovap ikiuineratigut anguniakkatit angusinnaavatit. Naakkiussutigisinnaasavit suulluunniit peerniarneranni ilisimassusermik tuneqqullutit Jehova qinnuigisaruk. Piffissap ingerlanerani ‘isikkavit ingerlavissaannik nalimmatserininni’ Guutimit qanoq ikiorneqarnerit takusinnaalissavat. — Uss 4:26NW.

^ par. 8 Ateq allanngortitaavoq.

^ par. 18 Organiseret til at gøre Jehovas vilje-mi quppernerit 111 aamma 112 atuakkit.