Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Maaji 2014

 MISIGISALIKKERSAARUT

Jehovap ilumut ikiorsimavaanga

Jehovap ilumut ikiorsimavaanga

Nuliaralu asasara Evelyn katernaajulluta Canadami Ontariop avannaani illoqarfeeraq avinngarusimasoq Hornepayne qimuttuitsorluta tikipparput. Ullaaralaakkut issittorujussuusoq qatanngutip angutip aavaatigut. Taanna, taassuma nulia ernerallu ullaakkorsioqatigereerlugit aputikkut maasararluta illumiit illumut oqaluussivugut. 1957-imi ulloq taannarpiaq ualikkut ilagiinnik nakkutilliisutut angalasartutut siullerpaameerlunga tamanut oqalugiarpunga. Tallimaannaalluta najuuppugut; allanik takkuttoqanngilaq.

AMERLANERUNNGINNATTA ajorinngivippara. Tassami meeraallungali ittuutoorujussuuvunga. Meeraallunga ima ittuututigigama pulaartoqaraangatta toqqortarpunga, allaat pulaartut ilisarisimagaluarukkilluunniit.

Taamaattumik tupaallaatigissannguatsiarpat Jehovap peqatigiissortaani uannut suliassiissutigineqartuni amerlanerni inuppassuarnik naapitaqartartunga — ikinngutinik takornartanillu. Inuk ittuutooq imminullu tatigerpianngitsoq qanoq ililluni taamaaliorsinnaagami? Nammineerlunga saperpunga, Jehovalli suliassama naammassiniarnerani ikiortuartarsimavaanga. Jehovap neriorsuutaata matuma ilumoornera paasisimavara: “Nakussatsippakkit ikiorlutillu, assannik ajugaasartumik najummivakkit.” (Es 41:10) Jehovap uppeqatit aqqutigalugit ikiukulasarsimavaanga. Tamakku ilaannik oqaluttuutilaarlakkit. Meeraanera aallarniutigeriarlara.

BIIBILI ATUAGAARARLU QERNERTOQ ATORPAI

Ontariop kitaata kujataani nunaateqarfitsinni

1940-mi ullut ilaanni seqinnarissuugaa Elsie Huntingford ilaquttama nunaateqarfiannut Ontariop kitaata kujataaniittumut takkuppoq. Ataataga uattulli ittuutuummat anaanama matu ammarpaa. Uanga ataatagalu inimiit tusarnaarpugut. Qatanngut Huntingford arlaannik tuniniaaniarsoralugu anaanagalu pisariaqartitarinngisatsinnik pisissasoralugu ataatama anillaffigai  oqarfigalugulu soqutiginninngitsugut. “Biibilimik atuaqqissaarnissarsi soqutiginnginnassiuk?” qatanngut Huntingford aperivoq. “Naamik, soorunami taamaaliornissarput soqutigaarput,” ataataga akivoq.

Qatanngut Huntingford piffissaqqissukkut takkuppoq. Angajoqqaakka United Church of Canadamut ilaasortaasimapput suliniuteqarluartut, ungasinngitsukkulli aalajangersimapput oqaluffimmiit aniniarlutik. Sooq? Palasip aningaasanik tunisisimasut aqqi allattoriarlugit allattuiffigisani nivinngarsimammagu. Angajoqqaama aqqi allattukkami tassani allerpaat ilaanni allaqqapput, taamaattumillu tamanit naluneqanngilaq allaniit annikinnerusumik tunisisimasut. Angajoqqaakka aningaasaateqarpianngitsut misigisimapput oqaluffimmi utoqqaanertanit tunisinerunissaminnut tatineqarlutik. Oqaluffimmiit aninerannut alla pissutaasoq tassaavoq palasi alla nassuermat upperisavini ilinniartitsissutigigaluaruniuk palasitut atorfini annaassagaluarlugu. Taamaattumik oqaluffimmiit anivugut, kisianni suli Guuti kiffartorfigerusupparput taassuminngalu ilisarisimannilerusulluta.

Jehovap Nalunaajaasuisa kiffartornerat Canadami taamanikkut inerteqqutaammat qatanngutip Huntingfordip Biibili allattugaatinilu atuagaarannguami qernertumiittut kisiisa atorlugit atuaqqissaaqatigisarpaatigut. Kingusinnerusukkut paasigamiuk pisortanut nalunaarutigiunnanngikitsinni atuagassianik Biibililersaarutinik tunivaatigut. Atuaqqissaareeraangatta atuagassiat toqqorluartarpavut. *

Angajoqqaakka oqaluussiffigineqaramik tusarnaarput 1948-milu kuisillutik

Akerlilersuisoqaraluartoq allanillu akornuteqaraluartoq qatanngut Huntingford aallussilluarluni oqaluussiuarpoq. Aallussilluarnera killitsissutigalugu aalajangerpunga Jehova kiffartorfiginiarlugu. Angajoqqaakka 1948-mi kuisipput. Uanga aappaaguani 17-inik ukioqarlunga nersutinut imiisivimmi saviminiusumi kuisippunga. Kuisinnerma kingorna pioneritut kiffartulernissara anguniarpara.

JEHOVAP IKIORLUNGA SAPIISSUSEQALERSIPPAANGA

1952-imi tupaallaatigeqisannik Betelimut qaaqqusaavunga

Ingerlaannarli pioneritut kiffartulernissannut nangaavunga isumaqarama aningaasarsioqqaartariaqarlunga. Taamaattumik marlunnik suliffittaarpunga, aningaaserivimmi allaffimmilu sulisalerlunga. Inuusuttuugamali misilittagakitsoq aningaasarsiakka ingerlaannaq atortarpakka. Qatanngutip Ted  Sargentimik atillip kajumissaarpaanga sapiitsooqqullunga Jehovamillu tatiginneqqullunga. (1 Nal 28:10) Kajumissaarneqarnera tamanna qiimmaallaatigalugu 1951-imi novembarimi pionerinngorpunga. Pigisatuaraakka 40 dollarit, sikkili atornikoq mappilu nutaaq. Jehovalli pisariaqartitannik isumagiuarpaanga. Tedip pioneritut kiffartulernissannik kajumissaarsimammanga qujamasoqaanga! Taamatut aalajangerama pilluaqquneqangaartarpunga.

1952-imi aggusti naalersoq unnuit ilaanni Betelimiit Torontomiittumit sianerfigineqarpunga. Septembarip aallaqqaataani Jehovap Nalunaajaasuisa immikkoortortaqarfiani kiffartortussatut qaaqquneqarpunga. Ittuutuugaluarlunga immikkoortortaqarfitsinniinngisaannarnikuugaluarlungalu Beteli pillugu tusartakkakka nuannersut pissutigalugit qilanaarpunga. Tikikkama ingerlaannaq angerlarsimasutut misigivunga.

“QATANNGUTIT SOQUTIGINNINNERMIK TAKUTITSIVIGIKKIT”

Ukiuni marlunni Betelimeereerlunga Torontomi ilagiinni nakkutilliisunngorpunga (maanna utoqqaanertaqaqatigiinnik ataqatigiissaarisutut taaneqartartoq). Bill Yacos uannit utoqqaanerusoq misilittagaqarnerusorlu taarserpara. 23-innarnik ukioqarlunga nukappiarakulunnguatut nunaannarmiuusutut misigivunga. Qatanngutilli Yacosip maniguulluni asannillunilu qanoq iliornissannik ilitsersuuppaanga. Jehovallu ilumut ikiorpaanga.

Qatanngut Yacos nerinnattuuvoq qungutsarissuullunilu, inunnillu soqutiginnittuuvoq. Qatanngutit asavai taakkunanngalu asaneqarluni. Qatanngutip Yacosip qatanngutini pulaakulasarpai, aamma ajornartorsiuteqanngikkaluaraangata. Taamaaliortaqqullunga qatanngutillu oqaluusseqatigisaqqullugit kajumissaarpaanga. Ima oqarfigaanga: “Ken, qatanngutit soqutiginninnermik takutitsivigikkit. Taamaaliorneq kukkussuterpassuarnik matoorisarpoq.”

NULIARA JEHOVAMUT UANNULLU ILUMOORFIGINNIPPOQ

Jehovap 1957-imi januaarimiilli immikkut ittumik ikiorsimavaanga. Qaammat taanna Evelyn Ilinniarfimmi Gileadimi 14. klassimi ilinniartuusimasoq katippara. Taannalu suli aappariilernata nunap immikkoortuani franskisut oqaaseqarfiusumi Quebecimi kiffartorpoq. Evelyn taamanikkut ilagiit katuullit Ruumalerisut sunnertissimaffigisaanni oqaluussiffigiuminaatsumilu oqaluussisarsimavoq. Jehovamulli ilumoorfiginnittuarpoq oqaluussiuaannarlunilu.

Evelynilu 1957-imi katikkatta

Evelynip aamma ilumoorfiginnilluni tapersersortarsimavaanga. (Ef 5:31) Taamaaliornissaq ilaannikkut ajornakusoortarpoq. Assersuutigalugu katikkatta aqaguani immikkoortortaqarfimmiit Betelimut Canadamiittumut ataatsimiigiaqqusaavunga sapaatip-akunneranik ataatsimik sivisussusilimmik. Pilersaarutigereeraluarparpulli Floridamut katernaatut angalaniarluta. Kisianni Evelynilu Jehovap kissaatigisaatut iliorusukkatta katernaatut angalanissaraluarput taamaatiinnarlugu Betelimukarpugut. Evelyn sapaatip-akunnerani tassani immikkoortortaqarfiup eqqaani oqaluussisarpoq. Oqaluussiffigisartakkani Quebecimiit allaanerugaluaqisoq sapinngisani tamaat oqaluussiniarluni iliuuseqarpoq.

 Sapaatip-akunnera naalersoq ilimaginngisannik pisoqarpoq — Ontariop avannaani nakkutilliisutut angalasartutut toqqarneqarpunga. Katernaajuvunga 25-innarnik ukiulik misilittagaqarpianngitsoq, Jehovamilli ikiorneqarumaarnerput tatigaarput. Canadami ukiorisseruttortoq nakkutilliisut angalasartut arlallit nakkutilliisuuffigisassaminnukaasut qimuttuitsunut unnuakkut ingerlasussanut ikeqatigaavut. Taakkua kaammattuissorpaatigut! Qatanngutip ataatsip unnuaq naallugu issiaannaqqunata ineeqqamini siniffilimmeeqquaatigut. Aqaguani, katinnitsinniit ullut 15-it qaangiutiinnartut, aallaqqaataani eqqaasattut Hornepaynemi gruppi tikeraarparput.

Ukiualuit qaangiuttut Evelynilu inuunerput allanngoqqippoq. 1960-ip naalernerani ilageeqatigiinnik arlalinnik nakkutilliisutut kiffartortilluta Ilinniarfiup Gileadip 36. klassianut qaaqqusaavunga. Pikkorissarneq qaammatinik qulinik sivisussusilik 1961-imi februaarimi aallartittussami Brooklynimi ingerlanneqassaaq. Qaammatini qulini Biibilimik misissueqqissaarnissara qilanaarutigigaluarlugu soorunami Evelynip ilaasussaannginnera nikalluallaatigivara. Qatanngutit nuliaasut allat assigalugit Evelyn qinnuigineqarpoq sivikinnerpaamik qaammatini qulini avissaaqqanissarput akueralugu allagaqassasoq. Taama sivisutigisumik avissaaqqanissarput qullilissutigigaluaraa isumaqatigiippugut Gileadimukassasunga. Naleqaqisumik ilinniartitaanissara Evelynip nuannaarutigaa.

Peqannginninni Evelyn Canadami Betelimi kiffartorpoq. Qatanngut tanitaq Margaret Lovell ineqatiginera immikkut pisinnaatitaaffigaa. Soorunami Evelynilu immitsinnut maqaaseqaagut. Jehovali ikiortigalugu suliassavut suliaraavut. Evelyn Jehovamut pilliuteqarumavoq, tamannalu killitsissutigeqaara.

Qaammatit pingasut missaanni Gileadimeereerlunga qatanngutip Nathan Knorrip, taamanikkut nunarsuaq tamakkerlugu oqaluussinermi siuttuusup, immikkuullarissumik aperivaanga. Gileadi qimallugu Canadamut uterusunnersunga immikkoortortaqarfimmi Naalagaaffimmut Kiffartornermik Ilinniarfimmi ilinniartitsisunngorallarsinnaanersunga aperivaanga. Qatanngutip Knorrip oqarfigaanga naameersinnaasunga. Piumaguma Ilinniarfik Gileadi naammassisinnaavara, taavalu immaqa ajoqersuiartortitatut aallartitaasinnaallunga. Oqarporlu taamaaliunngikkuma Ilinniarfimmut Gileadimut qaaqquneqaqqinnissara ilimananngitsoq Canadamilu kiffartoqqissasunga. Nuliaralu oqaloqatigeriarlugu aalajangeqquaanga.

Evelynip teokratiimik suliassanut isiginnittaatsiminik paasitereernikuummanga qatanngut Knorr ingerlaannaq ima oqarfigaara: “Jehovap peqatigiissortaasa qanorluunniit ilioqqugaluarpatigut nuannaarutigalugu taamaaliussaagut.” Isumaqartuaannarpugut Jehovap peqatigiissortaasa sumukaqqugaluarpatigulluunniit aallassasugut, uagut allatut iliornissaq pileriginerugaluarutsiguluunniit.

1961-imi apriilimi Brooklynimiit aallarpunga Canadamullu uterlunga Naalagaaffimmut Kiffartornermik Ilinniarfimmi ilinniartitsisuujartorlunga.  Kingusinnerusukkut Evelynilu Betelimut kiffartoriaqquneqarpugut. Taava tupaallaatigeqisannik Gileadip 40. klassianut 1965-imi aallartittussamut qaaqqusaavunga. Evelyn avissaaqqanissarput ajorinagu nalunaarluni allaqqittariaqarpoq. Sapaatit-akunnialunnguilli qaangiuttut Evelyn Ilinniarfimmut Gileadimut aamma qaaqqusaavoq. Nuannaaqaagut!

Ilinniarfimmut Gileadimut tikikkatta qatanngutip Knorrip oqarfigaatigut saniatigut franskisut ilinniartinneqartugut tamatta Afrikamut aallartinneqassasugut. Tupaallaatigeqaarput naggataarnersiornermi paasigatsigu Canadamut uteqqissalluta. 34-innarnik ukioqarlunga immikkoortortaqarfimmi nakkutilliisunngortinneqarpunga (maanna Immikkoortortaqarfiup Ataatsimiititaliaani ataqatigiissaarisoq). Qatanngut Knorr inuusuppallaarnerarlunga oqarfigigakku taassuma eqqissisarlunga sapiissuseqalersippaanga. Aallaqqaammulli pingaarutilinnik aalajangiitinnanga qatanngutit misilittagaqarluarnerusut isumasiorniartarpakka.

BETELI — ILINNIARFISSAALLUNILU ILINNIARTITSIFFISSAQ

Betelimi kiffartorninni allat ilinniarfiginissaannut nalissaqanngitsumik periarfissaqarsimavunga. Immikkoortortaqarfiup Ataatsimiititaliaanut ilaasortat allat ataqqeqalugillu nuannaartoreqaakka. Aamma kristumiut angutit arnallu — inuusuttut utoqqaallu — hundredilippassuit immikkoortortaqarfitsinni ilagiinnilu assigiinngitsuni kiffartorfigisatsinni naapissimasavut ilinniarfigisimaqaakka.

Canadami Betelikkormiut ullormut allassimaffimmik eqqartuineranni aqutsisunga

Aamma Betelimi kiffartorninni allanik ilinniartitsisinnaasimavunga uppernerannillu nakussatsitsisinnaasimallunga. Apustilip Paulusip Timotheusi ima allaffigaa: ‘Illit ilinniarsimasatit aalajangiunniakkit.’ Aamma ima allaffigaa: “Ilisimannittut amerlaqisut najuunneranni uannit tusakkatit paarisassanngortissavatit inunnut tatiginartunut aammattaaq allanik ajoqersuisinnaajumaartunut.” (2 Tim. 2:2; 3:14) Ilaannikkut aperineqartarpunga ukiut 57-it Betelimi kiffartorfigisimasakka qanoq ilinniarfigisimanerikka. Ima akisarpunga: “Jehovap peqatigiissortaasa iliuusereqqusaat nangaanak iliuuserisaruk Jehovap ikiorumaaraatit tatigalugu.”

Soorlulusooq ippassaq Betelimut tikittunga. Taamanikkut angutaavunga inuusuttoq ittuutooq misilittagakitsoq. Ukiorpassuilli taakku ingerlanerini Jehovap ‘talerpikkut’ tasiorsimavaanga. Pisariaqartitsinerpaaffinni uppeqatit asannittut aqqutigalugit ikiortarsimavaanga. Taamaaliornermigut Jehovap ima oqarfigaangalusooq: “Siooraqinak, ikiortigaarma.” — Es 41:13.

^ par. 10 1945-mi maajip 22-anni Canadami naalakkersuisut Jehovap Nalunaajaasuisa oqaluussinerat inerteqqutigiunnaarpaat.