Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Maaji 2014

Jehova aaqqissuussaanermut Guutiuvoq

Jehova aaqqissuussaanermut Guutiuvoq

‘Guuti ularussinermut Guutiunngilaq, eqqisseqatigiinnermulli.’ — 1 KOR 14:33.

1, 2. (a) Guutip kina siulliullugu pinngortippaa, taannalu Jehovamit qanoq atorneqarpa? (b) Sooq oqarsinnaavugut inngilit aaqqissuulluagaasut?

PINNGORTITSISUTTA, Jehovap, suut tamaasa aaqqissuussaasumik suliarisarpai. Siullertut ernini, Jiisusi, pinngortippaa. Jiisusi Guutimut pingaarnertut sinniisuummat Biibilimi ‘Oqaasermik’ taaneqarpoq. Tamatumani ima allassimavoq: “Pileqqaarneranni ippoq Oqaaseq, Oqaaserlu Guutimiippoq.” Taanna ukiuni millionilikkuutaani qilammi Jehovamut kiffartorpoq. Jiisusi aamma Biibilimi ima allaatigineqarpoq: “Suut tamarmik taassumuuna pinngorput, pinngortullu taassuma pinngortitarinngisaanik ataatsimilluunniit ilaqanngillat.” Ukiut 2000-it sinnerlugit matuma siorna Jehovap Oqaaseq inuttut naammalluinnartutut timeqalersillugu, tassaalersillugu Jiisusi Kristusi, nunarsuarmut aallartippaa. Jiisusi aalajaalluni Ataataminit peqquneqarnermisorluinnaq iliorpoq. — Joh 1:1-3, 14.

2 Jiisusi nunarsuarmukanngikkallarami Guutip ‘suliortuatut’ ilumoorluni kiffartorpoq. (Uss 8:301900) Jehovap Jiisusi ikiortigalugu qilammi inngilit millionillit pinngortippai. (Kol 1:16) Jehovap katersaarsuarnik aaqqissuulluagaasunik inngileqarnera  Biibilimi ima allaatigineqarpoq: “Tuusintit, ilumut tuusintilippassuit, kiffartuuppaat, tituusintit, ilumut tituusintilippassuit saani qeqarput.” — Dan 7:10; Tuss 103:21.

3. Ullorissat planetillu qanoq amerlatigippat, qanorlu aaqqissugaappat?

3 Jehovap avataarsua pinngortikkamiuk ulloriarpassuit planeterpassuillu pinngortitai amerlangaarmata kisinneqarsinnaanngillat. Qanoq amerlatiginerarneqartarpat? Texasimi aviisi Houston Chronicle-imi allassimavoq qanittukkut misissueqqissaarneq naapertorlugu ilisimatuut isummersimasut maanna avataarsuani 300 trilliardinik ulloriaqarlunilu planeteqartoq. Tassa kisitsisip 3-p kingorna 23-nik noor’loqarpoq! Ullorissat planetillu taakku aaqqissuussaasumik inissinneqarsimappat? Aap, ullorissat eqimattat galaksenut aaqqissuussaapput. Galakset tamarmik planeterpassuaqarlutillu milliardilinnik allaallu billionilinnik ulloriaqarput. Galakset amerlanerit eqimattanut, hobenik taaneqartartunut, aaqqissugaapput, eqimattallu taakku aamma eqimattanut anginernut, superhobenik taaneqartartunut, aaqqissugaapput.

4. Sooq Guutip nunarsuarmi kiffaminik aaqqissuussaatitsineranik upperinninnissaq tunngavissaqarpa?

4 Qilammi inngilit avataarsuanilu ullorissat planetillu tupinnaannartumik aaqqissugaalluarput. (Es 40:26) Taamaattumik Pinngortitsisutta nunarsuarmi kiffaasa aaqqissuulluagaanerannik upperinninnissamut tunngavissaqarpoq. Taakku pingaarutilinnik suliassarpassuaqaramik aaqqissuussaasumik kiffartornissaat pingaaruteqarluinnarpoq. Ukiut tuusintillit ingerlaneranni Jehovap innuttani aalajaallutik imminerminut pallorfiginnissinnaaniassammata aaqqissuussaatippai. Jehovap innuttaminik najuineranut ‘ularussinermullu Guutiunani eqqissinermut’ Guutiuneranut uppernarsaatissarpassuaqarpoq. — 1 Korinthimiut 14:33, 40 atuakkit.

ITSAQ GUUTIP KIFFANI PEQATIGIISSORTATUT AAQQISSUUSSAATIPPAI

5. Guutip siunertaa qanoq akornuserneqarpa?

5 Jehovap inuit siulliit pinngortikkamigit ima oqarfigai: “Kinguaassiorlusi amerliartoritsi nunarsuaq tamakkerlugu ilissinnullu naalatsigitillugu; naalagaagitsilu aalisakkanut immamiittunut qilaallu timmiaanut nersutinullu nunami aalasunut tamanut.” (1 Mos 1:28) Jehovap inuit millionillit ataatsikkut pinngortinngilai. Adami Evalu qitorniortussaapput, taakkualu qitornaat aamma qitorniortussaapput inuit nunarsuarmut tamarmut siaruaannissaasa tungaannut. Inuit nunarsuarmik tamarmik paratiisinngortitsinissaat Guutip siunertaraa. Adamili Evalu Guutimut naalanngimmata taassuma siunertaa akornuserneqarpoq. (1 Mos 3:1-6) Adamip Evallu kinguaavi amerlanerit Jehovamut kiffartunngillat, piffissallu ilaani Jehovap paasivaa “nunarsuarmi inuit ajussusiat angeqisoq ullorlu tamaat iliuuseriumasaat pilersaarusiaallu ajortuinnaasut”. Ajussuseqangaarnera pissutigalugu ‘nunarsuaq aserorneqarlunilu nakuusernermik ulikkaarpoq’. Taamaattumik Guuti aalajangerpoq inuit ajortut suujunnaarsinniarlugillu nunarsuarmi tamarmi ulersuartitsiniarluni. — 1 Mos 6:5, 11-13, 17.

6, 7. (a) Sooq Jehovap Noa aniguisippaa? (Allaaserisap aallaqqaataani assiliaq takuuk). (b) Inuit Noamut tusaajumanngitsut suneqarpat?

6 Inuit ilaat ulersuaqarnerani aniguisinneqarput. Noa naapertuilluartuugami Guutimillu saqeqateqarami Jehovap ‘isaani saammaannarsivoq’. Jehovap Noa umiarsualioqqugamiuk pisariaqartitaanik ilitsersoqqissaarpaa. (1 Mos 6:8, 9, 14-16) Inuit uumasullu umiarsuarmiittut ulersuarmit aniguiniassammata umiarsuaq immami puttasinnaasunngorlugu sananeqarpoq. Noa ilaqutaalu Jehovamit peqquneqarnermisorluinnaq iliorput. Uumasut umiarsuarmut ikisinneqareermata  Jehovap “matua matuaa”. — 1 Mos 7:5, 16.

7 Inuit amerlanerit ulersuaqarnissaa pillugu Noamit mianersoqquneqaramik tusaajumanngillat. (2 Petr 2:5) Ukiumi 2370-imi Kr.in.si. ulersuaqalerpoq. Jehovap inuit ‘uumasullu nunamiittut tamaasa’ suujunnaarsippai, Noali aalajaatsoq, taassuma nulia, erneri ukuaalu umiarsuarmiisinnerisigut aniguisippai. (1 Mos 7:23) Ullumikkut inuit nunarsuarmiittut tamarmik Noamit taassumalu ilaqutaanit kingoqqisuupput. Inuilli Noap mianersoqqussutaanut tusaajumanngitsut ulersuaqarnerani ajunaarput.

Aaqqissuulluagaaneq inuit arfineq-pingasut aninguissutigaat (Immikkoortut 6 aamma 7 takukkit)

8. Guutip Israelikkut nunamut neriorsuutigisamut iseqqummagit qanoq aaqqissuussaatippai?

8 Ulersuaqarnerata kingorna ukiut 800-t sinnerlugit qaangiummata Guutip Israelikkut innuttatut aaqqissuussaatippai. Inuunerat tamaat, ingammik imminut pallorfiginneriaasiat, aaqqissuussaatippaa. Assersuutigalugu Israelikkut amerlasuut palasiullutillu Levikkuupput, aammali “arnat Toqqup Naapeqatigiittarfiup isertariaani” kiffartortunngortippai. (2 Mos 38:8) Jehovap Israelikkut Kana’animut nunasseqquai. Israelikkulli amerlanerit annilaanganertik pissutigalugu aallarumanngimmata ima oqarfigai: “Ilarsi ataasiinnarluunniit nunamut najugassassitut neriorsuutigisimasannut isissanngilaq, Kalebi Jefunnep ernera Josvalu Nunip ernera kisimik tassunga isissapput.” Josva Kalebilu nunamik neriorsuutigisamik misissuereernerup kingorna kisiartaallutik isumalluarnartumik nalunaarusiorput. (4 Mos 14:30, 37, 38) Kingusinnerusukkut Jehovap Josva Israelikkunnut siulersuisunngortippaa. (4 Mos 27:18-23) Israelikkut Kana’animik tiguaanngitsiartut Jehovap Josva ima oqarfigaa: “Tuppallerit pissatsillutillu! Erseqinak nikallornalluunniit; uangami Naalagaq, tassaasunga Guuti, najorpakkit qanoq iliorninni tamani.” — Jos 1:9.

9. Rahabi Jehova taassumalu innuttai pillugit qanoq isiginnittaaseqarpa?

9 Jehovap Guutip Josva sumiikkaluaraangalluunniit najortarpaa. Assersuutigalugu Israelikkut ukiumi 1473-imi Kr.in.si. Kana’anikkut illoqarfiata Jerikop eqqaani tammaarmata Josvap angutit marluk Jerikomut  alapernaarsuiartortitaasa arnaq atortittartoq Rahabi naapippaat. Jerikomiut angutitaasa alapernaarsuiartortitat tigusareriaraluarpaat, Rahabilli illumi qaavanut toqqortippai. Taassuma Israelikkut alapernaarsuiartortitaat ima oqarfigai: ‘Nalunngilara Jehovap nuna manna ilissinnut tunniussimagaa. Tusarsimavarpummi Egyptenimit anigassi Jehovap Immami Ivissuartuumi aqqutissassinni imaq tissortissimagaa Amorikkullu kunngii qanoq iliorfigisimagisi.’ Ima nangippoq: “Guutersi Guutiuvoq pavani qilammi nunamilu maani.” (Jos 2:9-11) Rahabi ilaqutaalu Jehovap innuttamisut toqqarsimasaanik tapersersuipput. Kingusinnerusukkut Israelikkut Jerikomik tiguaammata Jehovap Rahabi ilaqutaalu aniguisippai. (Jos 6:25) Rahabi aalajaatsoq Jehovamik taassumalu peqatigiissortaanik ataqqinningaarpoq.

KRISTUMIUT SIULLIIT AAQQISSUUSSAASUMIK KIFFARTORPUT

10. Jiisusip juutit upperisarsiornikkut siuttui qanoq oqarfigai, aamma sooq?

10 Israelikkut Josvamit aalajaatsumit siulersorneqarnerminni iluatsilluarlutillu Kana’animi illoqarfinnik tiguaaqattaarput. Kingusinnerusukkulli ukiut 1500-t ingerlaneranni Israelikkut Guutip inatsisaanik unioqqutitsisaqattaarput. Jiisusip nunarsuarmiinnermini Israelikkut Jehovamut taassumalu pruffiitiinut naalanngittualersimammata juutit Jerusalemimi najugallit ‘pruffiitinik toqutsisunik’ taavai. (Matthæusi 23:37, 38 atuakkit). Jehovap juutit upperisarsiornikkut siuttui naalanngittuarmata ajattorpai. Jiisusip ima oqarfigai: “Guutip naalagaaffia ilissinnit peerneqassaaq tunniunneqassallunilu inuiannut inerititaqartitsisinnaasunut.” — Matt 21:43.

11, 12. (a) Jehovap Israelikkunnik ajattuilerneranut peqatigiissortaminillu nutaamik iluarinnilerneranut suna uppernarsaataava? (b) Kikkut peqatigiissortamut tassunga ilannguppat?

11 Jehovap Israelikkut Jiisusip nunarsuarmiinnerani ajattulerpai, sulili nunarsuarmi peqatigiissortaqarpoq. Inuit amerlanngitsut Kristusimut taassumalu ilinniartitsissutaanut naalannermikkut Guutip peqatigiissortaanut nutaamut ilaalerput. Ukiumi 33-mi piinsip ulluani Jehovap Israelikkut peqatigiissortaminik nutaamik tamatuminnga taarserpai. Jiisusip ajoqersugai 120-t missaat katisimatillugit tassanngaannaq “perpaluk anoraasuarsuartut qilammit tutsiuppoq, illulu isersimaffigisaat tamaat ulikkaarpaa. Oqqallu innertut ittut taakkununnga takutipput tamaasalu immikkut tuffigalugit. Taava tamarmik Anersaamik Illernartumik ilumioqangaalerput allamiullu oqaasii atorlugit oqalulerput Anersaap oqaasissiuinera naapertorlugu.” (ApS 2:1-4) Pisumit tamatumannga erserpoq Jehovap peqatigiissortani nutaaq, Kristusip ajoqersugaanit ilaasortaaffigineqartoq, tapersersoraa.

12 Ulloq taanna inuit 3000-t missaanniittut Jehovap peqatigiissortaanut nutaamut ilanngupput. Biibilimi aamma eqqaaneqarpoq Jehovap ‘annaanneqartut ullut tamaasa ilanngutitittarai’. (ApS 2:41, 47) Jiisusip ajoqersugaasa oqaluussinerminni angusaqarluartarnerat Biibilimi ima allaatigineqarpoq: “Guutip oqaasia siammariartorpoq, ajoqersukkallu Jerusalemimiittut amerliartuinnarput.” Allaat “palasit amerlaqisut uppernermut naalattunngorput”. (ApS 6:7) Kingusinnerusukkut Jehovap juutiunngitsunik kristumiut ilagiivinut ilanngutitsinera peqatigiissortaminik nutaamik tapersersuineranut aamma uppernarsaataavoq. — Apustilit Suliaat 10:44, 45 atuakkit.

13. Guutip peqatigiissortai sumik suliassinneqarpat?

13 Kristusip ajoqersugai Guutimit sumik suliassinneqarsimanerat erseqqippoq. Jiisusip kuiseqqammerluni “Qilaap Naalagaaffia” pillugu oqaluussilernermigut maligassippai. (Matt 4:17) Jiisusip ajoqersukkani ima oqarfigalugit oqaluusseqquai: “[Nalunaajaasigissavassi] Jerusalemimi Judæamilu tamarmi Samariamilu nunarsuullu isua tikillugu  allaat.” (ApS 1:8) Jiisusip ajoqersugaasa sumik piumaffigineqarnerlutik paasivaat. Assersuutigalugu Paulusip Barnaballu Pisidiamiitillutik juutit akerlilersuisut nakimanatik ima oqarfigaat: “Guutip oqaasia ilissinnut nalunaajaatigineqaqqaartariaqarsimavoq. Ilissili ajattorassiuk inuunermullu naassaanngitsumut naleqquttuutinnasi taava Guutimik nalusut saaffigissavavut. Naalakkammi ima peqqusimavaatigut: Inuiannut qaammaqqutinngortippakkit, annassutaaqqullutit nunarsuup isua tikillugu.” (ApS 13:14, 45-47) Ukiuni hundredini siullerniilli Guutip peqatigiissortaasa ilaasa nunarsuarmiittut taassuma annaassiniarluni susimanera inuiannut ilisimatitsissutigisarpaat.

GUUTIP KIFFAI ANIGUIPPUT

14. Kristumiut siulliit nalaanni Jerusalemi suneqarpa, kikkulli aniguippat?

14 Juutit amerlanerit Jiisusi pillugu nutaarsiassaq nuannersoq akuerinagulu Jerusalemip suujunnaarsitaajumaarnera pillugu Jiisusip mianersoqqussutaa tusarnaanngilaat. Jiisusip ajoqersukkani ima mianersoqquai: “Takugussiuk Jerusalemi sakkutuunit unguneqarsimasoq, taava nalussanngilarsi piuneerussaaffissaa qanillisoq. Taava Judæamiittut qaqqanut qimaassapput; illoqarfimmiittut illoqarfik qimassavaat, nunaannarmiittullu illoqarfimmut isissanngillat.” (Luk 21:20, 21) Jiisusip siulittuisimaneratorluinnaq Jerusalemi suujunnaarsinneqarpoq. Juutit Romamiunut pikitsitsimmata Jerusalemi Romamiut sakkutuuinit ukiumi 66-imi unguneqarlunilu suujunnaarsinneqarnialerpoq. Sakkutuulli qimaguteriataarmata Jiisusip ajoqersugai Jerusalemimit Judæamillu qimaanissaminnut periarfissaqalerput. Amerlasuut kuussuakkut Jordanikkut ikaariarlutik qaqqarsuarnut qimaapput. Ukiumi 70-imi Romamiut sakkutuui uteqqikkamik Jerusalemimik suujunnaarsitsipput. Kristumiulli Jiisusip mianersoqqussutaanik eqqumaffiginnikkamik aniguipput.

15. Kristumiut siulliit qanoq pineqartaraluarlutik amerliartorpat?

15 Kristumiut siulliit malersorneqarlutillu uppernikkut misilinneqarput. Taamaakkaluartorli inuppassuit kristumiunngorput. (ApS 11:19-21; 19:1, 19, 20) Kristumiut ilagiivisa Guutimit iluarineqarnerat pissutigalugu inuppassuit kristumiunngorput. — Uss 10:22.

16. Kristumiut tamarmik uppersuseqarluartuarumallutik susariaqarpat?

16 Kristumiut upperluartuarumallutik ataasioqatigiittuarumallutillu tamarmik immikkut iliuuseqangaartariaqarput. Biibilimik atuaqqissaartariaqarlutillu ataatsimiinnernut najuuttuartariaqarlutillu oqaluussinermi aallussilluartariaqarput. Ilagiit aaqqissuussaalluarput. Utoqqaanertat ilagiinnilu kiffartortut ilagiinniittunik ikiuinissaminnut kajumipput, qatanngutillu angutit taakkua tamaviaarlutik sulinerat ilagiinniittut iluaqutigingaartarpaat. (Fil 1:1; 1 Petr 5:1-4) Aamma Paulusitut nakkutilliisutut angalasartunit tikeraarneqartarnertik nuannaarutigisarpaat. (ApS 15:36, 40, 41) Ullumikkut pallorfiginninnitta kristumiut siulliit pallorfiginneriaasiannut assingunera takullugu tupinnarpoq. Jehovap kiffamik pallorfiginninnerannik aaqqissuussaatitsiuarsimanera qujamasuutigingaarparput! *

17. Allaaserisami tulliuttumi suna sammineqassava?

17 Ulluni kingullerni inuugatta Saatanip silarsuaa suujunnaarsinneqangajalerpoq. Guutilli peqatigiissortaasa ilaat nunarsuarmiittoq aatsaat taama siumukartigivoq. Illit Jehovap peqatigiissortai siumukaqatigaagit? Qanoq taamaaliorsinnaasutit allaaserisami tulliuttumi sammineqassaaq.

^ par. 16 Napasuliaq Alapernaarsuiffik-mi 1. aggusti 2002-moortumi allaaserisat “Kristumiut anersaakkut ilumoornikkullu pallorfiginnittarput” aamma “Kristumiut sallusuissummi inuujuaannartut” atuakkit. Guutip peqatigiissortaasa ilaat nunarsuarmiittoq pillugu sukumiisumik paasisaqarumallutit atuagaq Jehovas Vidner — forkyndere af Guds rige atuaruk.