Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Maaji 2014

“Kikkut tamaasa” qanoq akisassavavut?

“Kikkut tamaasa” qanoq akisassavavut?

‘Tamatigut oqaluttassaasi inussiarnersumik, ilisimaqqullugu kikkut tamaasa qanoq akisariaqartassagisi.’ — KOL 4:6.

1, 2. (a) Misigisamit sumit erserpa eqqarsaatigilluariikkanik apeqquteqartarnerup sunniuteqarluartarnera? (Allaaserisap aallaqqaataani assiliaq takuuk). (b) Sooq oqaloqatigiissutigiuminaatsut nangaassutigisariaqanngilavut?

QATANNGUTIP kristumiup uini nalunaajaasuunngitsoq Biibili pillugu oqaloqatigaa. Uia oqarpoq ataasiullunilu pingasuussuseq upperalugu. Nuliatali paasivaa ataasiullunilu pingasuussuseq oqaluffimmi qanorpiaq ajoqersuutigineqarnersoq nalugaa. Taamaattumik pissuserilluni ima aperaa: “Upperaajuk Guuti Guutiusoq, Jiisusi Guutiusoq aamma anersaaq illernartoq Guutiusoq; Guutilli pingasuunatik Guuti ataasiinnaasoq?” Uia tupaallalluni ima akivoq: “Naagga, taamatut upperisaqanngilanga!” Taava Guutip kinarpiaanera pillugu nuannersumik oqaloqatigiilerput.

2 Misigisaq tamanna sumik ilinniarfigisinnaavarput? Pissuserilluni eqqarsaatigilluariikkanik apeqquteqartarneq sunniuteqarluartarpoq. Aamma paasivarput oqaloqatigiissutigiuminaatsut, soorlu ataasiullunilu pingasuussuseq, anniarfik Guuteqarneratalu, eqqartornissaat nangaassutigisariaqarnagit. Jehova taassumanngalu ilinniartitaanerput tutsuigigutsigit  tusarnaartitta killitsissutigisaanik ilinniartitsisinnaavugut. (Kol 4:6) Allaaserisami matumani sammissavarput sunniuteqarluartumik qanoq ilinniartitsisinnaanersugut (1) oqaaseqarusulersitsisumik apeqquteqarnikkut, (2) Biibili tunngavigalugu eqqarsalersitsiniarnikkut aamma (3) erseqqissaaniarluni assersuutinik atuinikkut.

OQAASEQARUSULERSITSISUMIK APERISARIT

3, 4. Sooq inuup suna upperineraa paasiumallugu aperisarnissarput pingaaruteqarpa? Assersuuteqarit.

3 Apeqquteqarnikkut inuup suna upperineraa paasisinnaavarput. Sooq tamanna pingaaruteqarpa? Ussatit 18:13-imi ima allassimavoq: “Oqaaserineqartut naalaarluaqqaarnagit akissuteqarneq sianiitsorpallanneruvoq kanngunarsaataallunilu.” Taamaattumik paaseqqaartariaqarparput tusarnaarterput qanorpiaq upperisaqarnersoq. Taamaaliunngikkutta inuup taassuma upperisimanngisaannagaanik eqqunngitsuuneraaniarnermut piffissarujussuaq atorsinnaavarput. — 1 Kor 9:26.

4 Assersuutigalugu immaqa anniarfik eqqartorparput. Anniarfimmik upperisaqartut ilaasa upperaat anniarfik sumiiffiusoq ikualasoq allalli tassaaginnarnerarpaat Guutimit iluarisaannginneq. Immaqa imatupajaaq oqarsinnaavugut: “Anniarfik pillugu assigiinngitsunik upperisaqartoqarmat aperilaarlakkit tamanna pillugu illit suna upperinerit?” Tusarnaareerlugu Biibilimi ajoqersuutigineqartut pillugit paasitilluarsinnaanerussavarput.

5. Apeqqutit iluaqutigalugit qanoq paasisinnaavarput sooq oqaloqatigisarput upperisamisut upperisaqarnersoq?

5 Pissuserilluni apeqquteqartarneq iluaqutigalugu aamma paasisinnaavarput sooq inuk upperisamisut upperisaqarnersoq. Assersuutigalugu oqaluussinitsinni Guutimik upperisaqannginnerartumik immaqa naapitaqarpugut. Isumaqarsinnaavugut taassuma pinngortitaasimanerput upperinngikkaa. (Tuss 10:4) Inuilli ilaasa Guuti upperiunnaarsimavaat inuit allat naalliunnerat namminerluunniit naalliussimanertik pissutigalugu. Upperisinnaanngilaat Guutip asannittup naalliunnartoqarneranik akuerinnissinnaanera. Taamaattumik oqaloqatigisaq oqarpat Guuti upperinagu ima aperisinnaavarput: “Taama isumaqartuaannarsimavit?” Naameerpat aperisinnaavarput Guutip piuneranik qulalissutigisaminik arlaannik pisoqarsimanersoq. Akissutaanit paasisinnaavarput qanoq ikiorluarsinnaaneripput. — Ussatit 20:5 atuaruk.

6. Aperereerutta sussaagut?

6 Aperereerutta aperisatta akissutaa tusarnaaqqissaartariaqarparput paasinnittuunerpullu ersersillugu. Imaassinnaavoq alianartumik pisoqarnera pissutigalugu Guutip asannittup piunera qularutigilersimallugu oqartoq. Guutip piuneranik uppernarsaannginnitsinni pitsaassaaq paasitikkutsigu misiginneqatigalugu aamma sooq naalliunnartoqarneranik eqqarsaatiginninneq kukkunerunngitsoq. (Hab 1:2, 3) Asannilluta paamitsaassinaveersaarutta immaqa paasisaqarnerorusulissaaq. *

BIIBILI TUNNGAVIGALUGU EQQARSALERSITSINIARTARIT

Sunniuteqarluartumik oqaluussinissamut suna iluaqutigisinnaavarput? (Immikkoortoq 7 takuuk)

7. Oqaluussinerput sunniuteqarluassappat susariaqarpugut?

7 Biibili oqaluussinitsinni atortutsinnit pingaarnerpaavoq. Tamanna ‘ajunngitsuliornernut tamanut piginnaanngorsagaanermut’ iluaqutigaarput. (2 Tim 3:16, 17)  Oqaluussinerput sunniuteqarluassappat allassimaffinnik atuaaneq naammanngilaq. Allassimaffiit tunngavigalugit eqqarsalersitsisinnaasariaqarpugut tamakkuninngalu nassuiaasinnaasariaqarluta. (Apustilit Suliaat 17:2, 3 atuakkit). Erseqqissaaniarluta assersuutit pingasut sammeriartigit.

8, 9. (a) Jiisusip Guutillu naligiinneranik upperinnittumut Biibili qanoq tunngavilersuutigisinnaavarput? (b) Tamanna pillugu illit sunniuteqarluartumik qanoq tunngavilersuisimavit?

8 Assersuut 1: Oqaluussinitsinni naapitatta upperaa Jiisusi Guutilu naligiittut. Tamatumani allassimaffiit sorliit tunngavilersuutigisinnaavavut? Naapitarput Jiisusip oqaasiinik Johannesi 6:38-mi allassimasunik atuaqqusinnaavarput: “[Qilammit] aqqarpunga uanga nammineq piumasara pinnagu aallartitsisimali piumasaa naammassiniarlugu.” Allassimaffik atuareerpagu ima aperisinnaavat: “Jiisusi Guutiuppat kiap qilammit aallartippaa? Aallartitsisoq Jiisusimit pissaaneqarnerusimassanngila? Aallartitsisormi aallartitamit oqartussaassuseqarneruvoq.”

9 Aamma Filippimiut 2:9 atuarsinnaavarput, tassani Jiisusip toqunerata makititaaneratalu kingorna Guutip susimanera apustilip Paulusip ima allaatigaa: “[Jiisusi] akitsingaartippaa Guutip tunillugu atermik akimuisumik tamanik.” Allassimaffik tunngavilersuutiginiarlugu ima aperisinnaavarput: “Jiisusi toqunnginnermini Guuti naligisimappagu makititaanermilu kingorna Guutimit akitsisinneqarami — taava Guutimit qutsinnerulersimassanngila? Kisiannimi Guutimit qutsinnerusoqarsinnaava?” Taamatut tunngavilersuinikkut inuit eqqortuliorusullutik Biibilimik ataqqinnittut paasisaqarnerorusulersissinnaavavut. — ApS 17:11.

10. (a) Anniarfeqarneranik upperinnittoq qanoq tunngavilersuiffigisinnaavarput? (b) Eqqartorneqartoq pillugu qanoq tunngavilersuisimavit?

10 Assersuut 2: Oqaloqatigisatta inuit ajortut anniarfimmi pillarneqassanngitsut upperiuminaatsippaa. Immaqa inuit ajortut pillarneqartikkusukkamigit anniarfeqarnera upperaa. Taamatut misigisut qanoq tunngavilersuiffigisinnaavavut. Siullermik, oqarsinnaavugut ajortut pillarneqarumaartut. (2 Th 1:9) Taava Mosesimik allakkat siulliit 2:16, 17 atuaqqusinnaavavut, tassani ersersinneqarpoq ajortip toqu pillaatisiarissagaa. Nassuiarsinnaavarput Adamip ajortuliornera pissutigalugu inuit tamarmik ajortiliusut. (Rom 5:12) Guutip inuit anniarfimmi pillarneqassasut oqaatiginngikkaa eqqaasinnaavarput. Taava Mosesimik allakkat siulliit 3:19 atuarsinnaavarput. Allassimaffimmi  tamatumani Guutip Adami oqarfigaa pillaatisiaralugu issunngussasoq. Ima aperisinnaavugut: “Adami anniarfimmut pisussaasimassagaluarpat taanna issunngussasoq oqarfigigamiuk Guuti eqqortuliorsimassanngikkaluarpoq, ilaa?” Taamatut aperisarutta inuup eqqortuliorusuttup eqqartorneqartoq eqqarsaatiginerulersinnaavaa.

11. (a) Inuit ajunngitsut tamarmik qilaliarnissaannik upperinnittoq qanoq tunngavilersuiffigisinnaavarput? (b) Qilaliarnissaq pillugu qanoq tunngavilersuisimavit?

11 Assersuut 3: Oqaluussinermi naapitatta inuit ajunngitsut tamarmik qilaliassasut upperaa. Isuma tamanna naapitatta Biibilimik paasinninneranut sunniuteqassaaq. Assersuutigalugu Saqqummersitat 21:4 atuarutsigu, inuk taanna isumaqassaaq qilammi inuuneq pineqartoq. (Atuaruk). Taanna qanoq tunngavilersuiffigisinnaavarput? Allassimaffinnik allanik sammisaqarnata oqaatsit Saqqummersitat 21:4-mi atorneqartut eqqartornerusinnaavavut. Allassimavoq ‘toqu peerukkumaartoq’. Taamaattumik ima aperisinnaavugut: “Sunaluunniit peerutissaguni piusimasariaqarpoq, ilaa?” Angissagunarpoq. Taava oqarsinnaavugut qilammi toqu piunngisaannartoq. Nunarsuarmiinnaq inuit toqusarput. Taamaattumik Saqqummersitat 21:4-mi allassimasut nunarsuarmi pilluaqqussutisiassaasimassapput. — Tuss 37:29.

ERSEQQISSAANIARLUTIT ASSERSUUTEQARTARIT

12. Sooq Jiisusi assersuusiortarpa?

12 Jiisusi oqaluussinermini assersuusiortarpoq. (Matthæusi 13:34, 35 atuakkit). Assersuutigisartagaanit paasinarsisarpoq tusarnaatai eqqortuliorusuttuunersut Jehovamillu kiffartorfiginnikkusunnersut. (Matt 13:10-15) Aamma Jiisusip assersuusiai ilinniartitsissutigisaanik soqutiginartunngortitsillutillu eqqaamannissinnaalersitsisarput. Uagut ilinniartitsinitsinni qanoq assersuusiortarsinnaavugut?

13. Guutip Jiisusimit qutsinnerunera sumut assersuussinnaaviuk?

13 Assersuutit paasiuminartut sunniuteqarluarnerusarput. Guutip Jiisusimit qutsinnerunera ilinniartitsissutiginiarutsigu ima assersuusiorsinnaavugut: Siullermik, eqqaasinnaavarput Guuti aamma Jiisusi erneriittutut imminnut oqaatigisarnerat. (Luk 3:21, 22; Joh 14:28) Taava ima aperisinnaavugut: “Inuit marluk naligiinnerat ersersinniarlugu qanoq ilillutik ilaqutariittut eqqaassavigit?” Oqaloqatigisap qatanngutigiit marlulissalluunniit eqqaassagunarpai. Aamma ima oqarsinnaavugut: “Tassa assersuutitsialak. Uagut taamatut assersuusioriaannaagutta sooq Jiisusi ajoqersuisorsuaq tamatumunnga assingusumik assersuusiunngila? Qatanngutigiit assersuutiginagit oqarpoq Guuti Ataatagalugu. Taamaaliornermigut Jiisusip ersersinniarpaa Guuti imminit utoqqaanerusoq oqartussaassuseqarnerusorlu.”

14. Assersuummit sumit erserpa Guutip Diaavulu anniarfimmi pillaasunngortinnavianngikkaa?

14 Allamik assersuuteqariarta. Inuit ilaasa upperaat Guutip Saatani anniarfimmi paarsisunngortissimagaa. Angajoqqaat qanoq paasitinniarsinnaavavut Guutip inuit anniarfimmi Diaavulumit anniartinneqartinnavianngikkai? Ima aperisinnaavugut: “Qitornat naalanngitsunngorpat ajortuliarpassuaqarpallu qanoq iliussagaluarpit?” Ilimanarpoq angajoqqaat oqassasut qitornartik naviissallugu. Qitornartik ajortuliortarunnaartinniarlugu ikiorniartuassagunarpaat. (Uss 22:15) Ima aperisinnaavugut: “Qitornat allannguiumanngippat qanoq iliussavit?” Angajoqqaat amerlanerit oqassagunarput qitornartik pillartariaqalissallugu.  Taamaappat ima aperisinnaavugut: “Taavami paasigukku qitornat inummit ajortumit sunnerneqarluni ajortuliortartoq?” Qularnanngilluinnarpoq angajoqqaat inuk taanna kamaatissagaat. Erseqqissaaniarluta ima aperisinnaavugut: “Nalunngikkaluarlugu inuup ajortup qitornat ajortumik sunnertaraa inummit taassumannga qitornat pillarneqartissagaluarpiuk?” Soorunami naamiissaaq. Saatani tassaavoq inunnik sunniilluni ajortuliortitsisartoq. Tassa erseqqippoq Guutip inuit taakku Saatanimit pillarneqartinnavianngikkai.

NIKALLOQINAK

15, 16. (a) Sooq ilimagissanngilarput kikkut tamarmik sallusuissummik ilassinnissasut? (b) Ilinniartitsillaqqinngikkaluaruttaluunniit ilinniartitsinerput sunniuteqarluarsinnaava? Nassuiaruk. (Aamma ungalusaq “ Akissuteqarniarnermi iluaqutissaq” takuuk).

15 Eqqarsaatigilluariikkanik apeqquteqartaraluartugut, pitsaanerpaamik tunngavilersuisaraluartugut assersuusiullaqqikkaluartugullu Guutip naalagaaffianik tusarliussamik tusartut ilaannaat ilassinnissapput. (Matt 10:11-14) Aamma inuit ikittuinnaat Jiisusip ilinniartitsissutigisaanik ilassinnipput naak taanna ajoqersuisut nunarsuarmi inuusimasut pingaarnerpaartarigaluaraat. — Joh 6:66; 7:45-48.

16 Allaat ilinniartitsillaqqippallaarnata misigigaluarutta oqaluussinerput sunniuteqarluarsinnaavoq. (Apustilit Suliaat 4:13 atuaruk). Biibilimi uppernarsaavigineqarpugut “eqqortumik isiginnittaaseqarnertik pissutigalugu naassaanngitsumik inuulersinnaasut tamarmik” nutaarsiassamik nuannersumik ilassinnissasut. (ApS 13:48, NW) Taamaattumik oqaloqatigisatta nutaarsiassamik nuannersumik ilassinninnginnera nikallussutiginagu ilinniartitsillaqqissuuneq anguniagarissavarput. Jehova taassumalu uagutsinnik ilinniartitsinera tutsuigigutsigit ilinniartitsillaqqinnerulissaagut, tamannalu nammineq iluaqutigalugulu tusarnaartitta iluaqutigissavaat. (1 Tim 4:16) Jehovap ‘kikkut tamaasa akinissaannik’ ikiussavaatigut. Allaaserisami tulliuttumi sammissavarput najoqqutassiap Matthæusi 7:12-imi allassimasup maleruarneratigut oqaluussinitsinni qanoq iluatsilluarsinnaasugut.

^ par. 6 Vagttårnet 1. oktobari 2009-moortumi allaaserisaq “Er det muligt at få tro på en Skaber?” takuuk.