Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Apriili 2014

Naalakkanut marlunnut kiffartorsinnaasoqanngilaq

Naalakkanut marlunnut kiffartorsinnaasoqanngilaq

‘Naalakkanut marlunnut kiffartorsinnaasoqanngilaq. Guutilu pisuussutillu kiffartorfigisinnaanngilasi.’ — MATT 6:24, 1936.

1-3. (a) Ilaqutariippassuit aningaasaqarnikkut qanoq ajornartorsiuteqarpat, ilaasalu ajornartorsiutertik qanoq aaqqinniartarpaat? (Allaaserisap aallaqqaataani assiliaq takuuk). (b) Meeqqanik perorsaanermi suut isumakuluutigineqalertarpat?

MARILYN ima nassuiaavoq: “James, uiga, ullut tamaasa qasulluinnarluni suliffimminiit angerlartarpoq, aningaasarsiaali ulluinnarni pisariaqartitatsinnut naammaqqalaaginnartarput. * Uiga oqilisaakkusullugulu ernitta, Jimmyp, atuaqatimisut nuannarisaminik pitsinneqartarnissaa kissaatigaara.” Marilynip ilaquttani ikiorusullugillu siunissaq eqqarsaatigalugu aningaasanik ileqqaagaqarusuppoq. Ikinnguterpassui aningaasarsiornerujumallutik nunanut allanut nuussimapput. Ilaquttanili qimallugit nunamut allamut nuunnissani eqqarsaatigileramiuk sussanerluni nalornilerpoq. Sooq?

2 Marilynip ilaquttaminik asasaminik qimatsinissani merseraa. Ilaqutariittut Jehovamik pallorfiginnittarput. Nunamulli ungasissumut nuukkuni qanoq pallorfiginneqatigiissinnaassagamik? Tamatumali saniatigut nalunngisani ilaquttaminnik qimatsillutik aallarsimasut, sulilu Jehovamik pallorfiginnippasissut, eqqarsaatigai. Aallarunili ernini “Jehovap ileqqoreqqusai oqaaqqissaarutaalu malillugit” internetikkut iluatsilluartumik perorsarsinnaavaa? — Ef 6:4, NW.

3 Marilyn allanut siunnersortissarsiorpoq. Uiata aallaqqunngikkaluarlugu oqarfigaa aallarusuppat unitsinniarsarinaviarnagu. Utoqqaanertat ilagiivineersullu allat aallaqqunngilaat, qatanngutilli arnat  ilaasa aallaqquaat ima oqarfigalugu: “Ilaquttatit asagukkit aallassaatit. Suli Jehova kiffartorfigisinnaavat.” Marilyn suli nalornigaluarluni James Jimmylu inuulluaqqoriarlugit nunamut allamut suliartorniarluni aallarpoq. Ima neriorsuivoq: “Uteqqiliivippunga.”

ILAQUTARIINNI AKISUSSAAFFIIT NAJOQQUTASSIALLU BIIBILIMEERSUT

4. Sooq inuppassuit ilaquttatik qimallugit nunanut allanut nuuttarpat, kikkullu meeqqanik perorsaasariaqartarpat?

4 Jehovap kiffami kaannissaat kissaatiginngilaa. (Tuss 37:25; Uss 30:8) Oqaluttuarisaanerup ingerlanerani Jehovap innuttai piitsutut atugaqarunnaarniarlutik nunanut allanut nuuttarsimapput. Jaakup kaannissartik pinngitsoortinniarlugu ernini Egyptenimut nerisassanik pisiniartippai. * (1 Mos 42:1, 2) Ullumikkut nunanut allanut nuussimasut amerlanerit kaannertik pissutigalugu angerlarsimaffimminnik qimatsineq ajorput. Amerlasuulli akiitsorpassuaqarput. Allat nunani piitsoqarfiusuni najugaqarput. Pitsaanerusunik pigisaqalernissaminnik atugarissaarnerulernissaminnillu kissaateqarnertik pissutigalugu ilaquttaminnik qimatsillutik sumiiffinnut allanut aningaasarsiupallaffiusinnaasunut nuuttarput. Angajoqqaat angerlarsimaffitsik qimakkaangamikku qitornartik allanit — soorlu angajoqqaamit allamit, qatanngutaanit angajullermit, aatakkuinit aanakkuinillu, ilaquttaminnit ikinngutiminnilluunniit — perorsarneqartittarpaat. Ilaquttanik qimatsineq aliasutitsingaartaraluartoq nunanut allanut nuuttut amerlanerit ilaquttaminnik qimatsisariaqartutut misigisarput.

5, 6. (a) Jiisusip pilluarnermut toqqissisimanermullu tunngatillugu suna ilinniartitsissutigaa? (b) Jiisusip ajoqersukkani pigisat eqqarsaatigalugit qanoq qinusaqquai? (c) Jehovap qanoq pilluaqqusarpaatigut?

5 Jiisusip nalaani inuppassuit piitsuunertik pissutigalugu misigisimasinnaapput aningaasaateqarnerugunik pilluarnerussallutillu toqqissisimanerussallutik. (Mark 14:7) Jiisusilli piffissami killilimmi piugallaannartartunik tatiginninnissaat kissaatiginagu Jehovamik, naassaanngitsumik pilluaqqusisartumik, tatiginninnissaat kissaatigaa. Piviusumik pillualernissamut toqqissisimalernissamullu pigisat namminerlu suliniutit aalajangiisuusarnatik Ataatatsinnilli qilammiusumik Jehovamik ikinnguteqarnerup aalajangiisuusarnera Jiisusip qaqqami oqaluutsimini ilinniartitsissutigaa.

6 Jiisusip qinnummi najoqqutassiamini ilorrisimaarnissarput pillugu qinusarnissatsinnik ilinniartinnata ima ilinniartippaatigut: “Inuussutissatsinnik ullumi tunisigut.” Jiisusip tusarnaartini ima ilinniarteqqissaarpai: “Erlinnartuutinik nunami katerseqinasi. ... Qilammili katersigitsi erlinnartuutinik.” (Matt 6:9, 11, 19, 20) Jehovap neriorsuisimanermisut uagutsinnik pilluaqqusiumaarnera upperilluinnarsinnaavarput. Guutip pilluaqqusinera iluarinninneruinnarnani pisariaqartitatsinnik tunisiumaarneranik neriorsuutaavoq. Ataatarput asannittoq, Jehova, aatsaat aningaasanit annerusumik tatigineratiguinnaq piviusumik pilluarsinnaallutalu toqqissisimasinnaavugut. — Matthæusi 6:24, 25, 31-34 atuakkit.

7. (a) Jehovap meeqqanik perorsaanissamik akisussaaffik kikkunnut tunniuppaa? (b) Sooq angajoqqaat marluullutik qitornaminnik perorsaasariaqarpat?

7 Ilaqutariinni akisussaaffinnut tunngatillugu Jehovatut isiginnittaaseqarneq Guutip piumasaatut iliornermut ilaavoq. Assersuutigalugu Mosesip inatsisaani piumasarineqarpoq angajoqqaat qitornatik Jehovamut kiffartornissaannik ilinniartittassagaat. Kristumiut Jehovamit iluarisaarusuttut aamma taamaaliortariaqarput. (5 Mosesi 6:6, 7 atuakkit). Akisussaaffik tamanna Guutip aataasumut aanaasumullu allanulluunniit tunniunnagu angajoqqaajusunut tunniuppaa. Kunngi Salomo ima allappoq: “Ernera, ataatavit oqaaqqissaarutai naalaartarniakkit anaanavillu ajoqersuussutai sumiginnarnagit.” (Uss 1:8) Angajoqqaat  marluullutik qitornaminnik ilinniartitsisarlutillu siulersuisarniassammata angajoqqaat najugaqatigiinnissaat Jehovap kissaatigaa. (Uss 31:10, 27, 28) Meeqqat angajoqqaatik Jehova pillugu oqaloqatigiittut tusaasarlugulu Jehovamut ullut tamaasa kiffartoqatigiittut takusarunikkit angajoqqaatik ilaalissavaat.

SUNNIUTIT SIUNERTARINEQARSIMANNGITSUT

8, 9. (a) Angajoqqaat ilaquttatik qimallugit nuukkaangata suut amerlanertigut ajornartorsiutigineqalertarpat? (b) Angajoqqaat meeqqallu najugaqatigiinnginnerat ilaqutariinnut qanoq ajortumik sunniuteqartarpa?

8 Ilaquttaminnik qimatsinissaminnik eqqarsaatiginnittorpassuit aalajangikkamik ajornartorsiuteqalersitsisinnaanera paasisarpaat. Taamatulli aalajangiinerup illit ilaquttannut qanoq sunniuteqassanera ilisimasinnaanngilat. (Uss 22:3) * Marilynip nooqqammitsiaannarluni ilaquttaminit avissaaqqanini misigissutsikkut anniaatigilerpaa. Uia erneralu aamma misigissutsikkut annialerput. Jimmyp anaanani ima aperiuarpaa: “Sooq qimakkamma?” Marilyn qaammatialunni nunami allami sulinissani pilersaarutigisimagaluarlugu pileriallarpaa ukiuni arlalinni nunami allamiissimalluni ilaquttanilu allanngorsimasut. Jimmy tunuarsimaalersimallunilu misigissutsikkut anaanaminit ungasinnerulersimavoq. Marilyn nikallungalluni ima oqaluttuarpoq: “Asajunnaarsimavaanga.”

9 Angajoqqaat meeqqallu ilaqutariittut najugaqatigiinngikkunik misigissusiat allaallu suut eqqortuunerannik suullu eqqunngitsuunerannik najoqqutassiaat sunnerneqassapput. * Meeqqat ukiukitsut angajoqqaaminnit sivisunerusumik avissaaqqanerujartortillugit ajortumik sunnerneqarnerusarput. Marilyn Jimmyp iluaqutissaanik pilliuteqarnerarpoq, Jimmyli misigivoq anaanaminit asaneqarunnaartutut. Aallaqqaammut Jimmyp anaanami nunami allamiinnera iluarinngilluinnarpaa. Kingusinnerusukkulli anaanani tikeraarmat iluarinngilluinnarpaa. Jimmy meerarpassuit angajoqqaaminnit avissaartinneqarsimasut assigalugit isummerpoq anaanani asaneqarnissaminut naalanneqarnissaminullu pisussaaffeqarunnaartoq. — Ussatit 29:15, NW atuaruk. *

Qitornaq internetikkut pakkunneqarsinnaanngilaq! (Takuuk immikkoortoq 10)

10. (a) Angajoqqaat qitornaminnik najuinatik tunissuteqaannartarnerat meeqqamut qanoq sunniuteqarsinnaava? (b) Angajoqqaaq ungasissumiit qitornaminik perorsaaleraangat suna amigaatigineqalertarpa?

10 Marilynip ernini Jimmy najunnginnamiuk aningaasanik tunissutinillu nassittarneratigut pissutsit ajunnginnerulersinniaraluarpai. Paasilerpaali ernerminik ajattuisimalluni. Ilaquttamininngarnit allaallu Jehovaminngarnit aningaasanik asanninnissaanik ilinniartissimavaa. (Uss 22:6) Jimmyp anaanani ima  oqarfigisarpaa: “Utissanngilatit. Tunissutinik nassiussiinnartassaatit.” Marilynip paasilerpaa allakkatigut, oqarasuaatikkut internetikkulluunniit ernerminik perorsaasinnaanani. Ima nassuiaavoq: “Qitornaq internetikkut pakkunneqarsinnaananilu sinilluaqquniarlugu aparneqarsinnaanngilaq.”

Aappannik najugaqateqannginnerit qanoq ajornartorsiuteqalissutigisinnaaviuk? (Takuuk immikkoortoq 11)

11. (a) Nunami allami suliffeqarneq pissutigalugu najugaqatigiinnginneq aappariinnermut qanoq sunniuteqartarpa? (b) Qanga Marilynip ilaquttaminik najuisariaqarnini paasivaa?

11 Marilyn aamma Jehovamut attaveqarluarunnaariartulerpoq. Ilagiinniittunik sapaatip-akunneranut ataasiaannarluni ikinnerusumilluunniit peqateqartarpoq. Aamma uiminut attaveqarluarunnaariartulerpoq. Suliffimmini ittorisani imminerminik atoqateqarusuttoq akiortariaqarpaa. James Marilynilu ajornartorsiutitik pillugit oqaloqatigiissinnaannginnamik misigissutsitik pillugit allanik oqaloqateqartalerput allasiungajallutillu. Marilynip paasilerpaa allasiorsimanngikkaluarlutik aappariinnertik patajalersoq. Aappariit katissimasut misigissutsikkut kinguaassiuutitigullu pisariaqartitaminnik matussuseeqatigiittarnissartik pillugu Biibilimi ilitsersorneqarput. Marilyn Jamesilu imminnut ungasillutik najugaqaramik aappariittut katissimasutut marluinnaallutik imminnut piffissaqarfigisarnissaminnik sammisarnissaminnillu nuannaarutiginnittariaqarnermittut nuannaarutiginnissinnaanngillat. (Erin 1:2; 1 Kor 7:3, 5) Aamma ernertik peqatigalugu Jehovamik pallorfiginneqatigiissinnaanngillat. Marilyn ima oqarpoq: “Jehovap ullussarsuani aniguissagutta aalajangersimasumik ilaqutariittut atuaqqissaaqatigiittarnerup uagutsinnut pingaaruteqarluinnarnera ataatsimeersuarnermi ilikkarakku angerlartariaqarlunga paasivara.” Ilaquttaminut Jehovamullu attaveqarnini ineriartorteqqittariaqarpai.

SIUNNERSUUTITSIALAAT SIUNNERSUUTIPALAALLU

12. Ilaquttaminnik najugaqateqanngitsut siunnersuut Biibilimeersoq suna iluaqutigisinnaavaat?

12 Marilynip angerlarniarluni aalajangernera qatanngutit assigiinngitsumik qisuariarfigaat. Ilagiinni utoqqaanertat Marilynimik nersualaaripput. Allat aallaqqunngikkaluarpaat oqarfigalugulu angerlaruni naammattumik aningaasarsiaqarsinnaanngitsoq. Aamma ‘uteqqiliivinnerarpaat’. Kristumiut taamatut nikallornartumik oqaaseqarnatik ‘arnat inuusuttut uiminnik qitornaminnillu asanninnissamut ningiuulluarnissamullu’, tassa ‘illumi paarsilluarnissamut’ (1936), perorsartariaqarpaat. Kristumiut taamaalillutik Guutip aqqanik kanngunarsisitsissanngillat. — Titusi 2:3-5 atuakkit.

13, 14. Sooq ilaquttatta kissaataannut akerliusumik iliuuseqassagutta uppersuseqartariaqarpugut? Assersuuteqarit.

13 Inuppassuit ilaquttatik qimallugit suliartortartut ileqqut ilaquttallu, ingammik angajoqqaat, ataqqinarnerpaanerannik ilinniartinneqarsimasarput. Kristumiu Jehovamit iluarisaajumalluni ilaquttamik kissaataannut akerliusumik iliuuseqassaguni uppersuseqarluartariaqarpoq.

 14 Carin ima misigisalikkersaarpoq: “Ernera Don inunngormat uigalu nunami allami sulivugut, uangalu Biibilimik atuaqqissaartalerlaajuvunga. Aningaasaqarnikkut patajaatsumik inissisimalernissatta tungaanut Don angajoqqaannit perorsarneqartillugulu taakkunani ineqartissagiga ilaquttama tamarmik naatsorsuutigaat.” Carin Donimik nammineq perorsaaniarluni aalajangerami ilaquttaminit uiminillu eqiasuttuunerarneqarlunilu illaruaatigineqarpoq. Carin ima oqarpoq: “Taamanikkut Donip angajoqqaanni ukiuni arlaqanngitsuni najugaqartinnissaa ajortutut isiginngikkaluarpara. Nalunngilarali ernitsinnik perorsaanissamik akisussaaffik Jehovap uagutsinnut — angajoqqaajusunut — tunniukkaa.” Naartuleqqimmat uiata uppinngitsup naartuerseqquaa. Carinip siusinnerusukkut aalajangiilluarnini Jehovamit iluarisaasumik aalajangeeqqinnissaminut piareersimanissaminut iluaqutigaa. Maanna ilaqutariittut najuinnarsimanertik nuannaarutigaat. Carinip qitornani ataaseq tamaasaluunniit allanit perorsarneqartissimasuugunigit ilaqutaasut atugaat allaanerulluinnarsimassagaluarput.

15, 16. (a) Vicky kikkunni peroriartorpa? (b) Sooq peroriartorsimanermisut qitornaminik peroriartortitserusunngila?

15 Nalunaajaasoq Vickymik atilik ima oqaluttuarpoq: “Ukiut arlaqanngitsut qaangiummata nukkama angajoqqaatsinni peroriartornerani uanga aananni peroriartorpunga. Piffissap ingerlanerani angajoqqaakka najoqqilerakkit taakkununnga misigissutsikka allanngorput. Nukkama angajoqqaakka unneqqarissumik oqaluussinnaallugillu pakkutaarsinnaallugillu ikinngutigilluarpai. Angajoqqaannit ungasillisimasutut misigivunga, allaallu inersimasunngoreerlunga misigissutsinnik ersersitsiviginissai sapernartittarpara. Nukaralu angajoqqaakka neriorsornikuuagut utoqqalippata isumassorumaarlugit. Qitornaasutulli pisussaanera pissutiginerullugu isumassussagunarpakka, qatanngutimalu taakkuninnga asanninnini pissutiginerullugu isumassussavai.”

16 Vicky ima oqaluttuarpoq: “Maanna anaanama oqarfigisarpaanga uannik aananni peroriartortitsisimanermisut paniga perorsarniassammassuk taakkunani peroriartortissagiga. Inussiarnersumilli itigartippara.” Ima nangippoq: “Uigalu qitornarput Jehovap piumasaatut perorsarusupparput. Siunissamilu paninnut attaveqarnera innarlerusunngilara.” Jehovamik taassumalu najoqqutassiaanik sunit tamanit asanninnerunikkuinnaq iluatsilluartoqarsinnaanera Vickyp ilikkarsimavaa. Guutimut pisuussutinullu kiffartornermut tunngatillugu Jiisusi paatsuugassaanngitsumik ima oqarpoq: “Naalakkanut marlunnut kiffartorsinnaasoqanngilaq.” — Matt 6:24; 2 Mos 23:2.

JEHOVAP ILIUUTSIVUT KINGUNEQARLUARTITTARPAI

17, 18. (a) Sooq kristumiut ilaquttaminnik qimatsisariaqartutut misigisariaqanngillat? (b) Apeqqutit suut allaaserisami tulliuttumi akissutissarsissavavut?

17 Ataatatta, Jehovap, naalagaaffik naapertuilluassuserlu taassuma pia siulliullugit noqqaassutigiuarutsigit pisariaqartitatsinnik tamanik tuniumaarluta neriorsorpaatigut. (Matt 6:33) Kristumiut taamatut neriorsorneqaramik ilaquttaminnik qimatsisariaqartutut misigisariaqanngillat. Allaat qaangeruminaalluinnartunik ajornartorsiuteqaleraluarutta Jehovamit iluarisaaniartuarsinnaallutalu najoqqutassianik Biibilimeersunik maleruaajuarsinnaavugut. Jehovap neriorsorpaatigut ‘aniguiffissamik pilersitsiumaarluni’. (1 Korinthimiut 10:13 atuaruk). Jehovamut qinusarnerput naalannerpullu taassuminnga tatiginninnitsinnut ersiutaapput. (Tuss 37:5, 7) Jehovap iliuutsivut maluginiassallugillu pisariaqartitatsinnik tamanik tuniumaarpaatigut. Inuunitsinni ‘iluatsilluartissavaatigut’. — 1 Mosesi 39:3 naleqqiuguk.

18 Avissaaqqasimaguttali qanoq ataasioqatigeeqqilersinnaavugut? Ilaquttavut qimanngikkaluarlugit taakkua timikkut pisariaqartitaat qanoq matussusersinnaavavut? Aamma allat ilaquttaminnik najuiinnarnissaannut qanoq kajumissaarsinnaavavut? Apeqqutit taakku allaaserisami tulliuttumi akissutissarsissavavut.

^ par. 1 Atit allanngortitaapput.

^ par. 4 Jaakup erneri Egyptenimukaraangamik sapaatit-akunnerini pingasuni sivikinnerusumilluunniit ilaquttatik qimaqqasarpaat. Kingusinnerusukkut Jaaku erninilu Egyptenimut nuukkamik nuliatik qitornatillu ilagaat. — 1 Mos 46:6, 7.

^ par. 8 Takuuk allaaserisaq “Immigration — Drømme og virkelighed” Vågn op! februaari 2013-imoortoq.

^ par. 9 Nunanit amerlasuunit nalunaarusianit ersersinneqarpoq aappaq qitornarluunniit qimallugu nuunneq ajornartorsiutinik annertuunik pilersitsisartoq. Taakkua ilagaat allasiorneq, anguteqatinik arnaqatinilluunniit atoqateqartarneq imaluunniit qanigivallaakkamik atoqateqartarneq. Meeqqat atuarfimminni ajornartorsiuteqalersinnaapput, kamalersinnaapput, annilaangalersinnaapput, isumatsaqqalersinnaapput allaallu imminornissaminnik eqqarsaateqalersinnaapput.

^ par. 9 Ussatit 29:15, NW: “Ungoorissut oqaaqqissaarullu ilisimassuseqalersitsisarput, nukappiararli killilersorneqanngitsoq anaanaminut kanngunarsaataassaaq.”