“Mosesi inersimalerami uppernikkut Faraop paniata erneranik taaneqaqqunngilaq.” — HEBR 11:24.

1, 2. (a) Mosesi 40-nik ukioqarluni qanoq aalajangerpa? (Allaaserisap aallaqqaataani assiliaq takuuk). (b) Sooq Mosesi Israelikkut naallioqatiginiarlugit aalajangerpa?

MOSESIP Egyptenimi suna angusinnaanerlugu nalunngilaa. Pisuut illorujussui kusanartut takusinnaavai. Kunngikkormiuuvoq. “Egyptenimiut ilisimassusiannik tamanik ajoqersorneqarpoq”, ilaatigut eqqumiitsuliornermut, ulloriarsiornermut, matematikkimut ilisimatusarnernullu allanut tunngasuugunartunik. (ApS 7:22) Egyptenimiut inuinnaat angunngisaannagassaannik pisuujullunilu pissaaneqarlunilu immikkullu pisinnaatitaaffeqarluni inuuleriaannaavoq.

2 Mosesi periarfissarpassuaqaraluarluni 40-nik ukioqarluni Faraokkut paasisinnaanngisaannik aalajangiivoq. Egyptenimi kunngikkormiutut inuuneq tunuppaa. Egyptenimiutut inuinnartut inoorusukkami? Naamik. Inussiat akornanni inuuniarluni aalajangerpoq. Sooq? Uppertuugami. (Hebræerit 11:24-26 atuakkit). Mosesi uppertuugami Jehova takusinnaasutut ippaa. ‘Takussaanngitsoq’, Jehova, taassumalu neriorsuutai eqquukkumaartut upperai. — Hebr 11:27.

3. Allaaserisami matumani apeqqutit suut akineqassappat?

3 Aamma uagut takussaasut kisiisa eqqarsaatigissanngilavut. Tassaasariaqarpugummi ‘uppertunut ilaasut’. (Hebr 10:38, 39) Uppernikkut nakussatsissutiginiarlugu Mosesi pillugu Hebræerinut allakkani 11:24-26-mi allassimasut misissoriartigit. Taamaaliornitsinni apeqqutit pingasut uku akiniarsarikkit: Mosesip namminissarsiorluni kissaatinik itigartitsinissaminut uppernini qanoq iluaqutigaa? Akerlilersorneqaraangami Jehovamut kiffartornerminik  pingaartitsinissaminut uppernini qanoq iluaqutigisarpaa? Aamma sooq Mosesip ‘akissarsiassaq isumagaa’, tassa isumaminiitittuarpaa?

NAMMINISSARSIORLUNI KISSAATIT ITIGARTIPPAI

4. Mosesip ‘ajortimi inuulluataarneq’ pillugu suna paasivaa?

4 Mosesip uppernikkut paasivaa ‘ajortimi inuulluataarneq’ sivikitsuinnaasoq. Immaqa allat Mosesi isumaqatiginngilaat. Sooq? Egyptenip, guutipilussiorfiugaluarluni anersaarsiorfiugaluarlunilu, silarsuarmi pissaaneqangaalersimanera Jehovallu innuttai inussiatut naalliutsitaanerat tunngavilersuutigisimasinnaavaat. Mosesilli nalunngilaa Guutip pissutsit allanngortissinnaagai. Inuit namminissarsiortut iluatsitserpasikkaluartut Mosesip upperaa taakku piuneerussaassasut. Taamaattumik ‘sivikitsuinnarmik ajortimi inuulluataarnissaq’ ussernartorsiorfiginngilaa.

5. ‘Sivikitsuinnarmik ajortimi inuulluataarnissaq’ qanoq itigartissinnaavarput?

5 ‘Sivikitsuinnarmik ajortimi inuulluataarnissaq’ qanoq itigartissinnaaviuk? Puiunngisaannaruk ajortumik nuannaarniuteqarneq sivikitsuinnaasartoq. ‘Silarsuaq piumatussusialu nungussasut’ uppernikkut takusinnaavat. (1 Joh 2:15-17) Ajortuliortut peqqissiminngitsut suneqarumaartut eqqarsaatigeqqissaaruk. Taakku ‘aqqutini quasartuniipput annilaarnersuarmillu nungutitaassallutik’. (Tuss 73:18, 19) Ajortuliornissaq ussernartorsiorfigigukku imminut ima aperigit: ‘Siunissami qanoq pineqarusuppunga?’

6. (a) Sooq Mosesi “Faraop paniata erneranik” taaneqaqqunngila? (b) Sooq isumaqarpit Mosesip aalajangernera eqqortuusoq?

6 Mosesip uppernini inuunermini sulerissanerluni aalajangiisuutippaa. “Inersimalerami uppernikkut Faraop paniata erneranik taaneqaqqunngilaq.” (Hebr 11:24) Mosesi isumaqanngilaq kunngikkormiuutigaluni Guuti kiffartorfigisinnaallugu pisuussutini pisinnaatitaaffinilu qatanngutiminut Israelikkunnut iluaqutaatissinnaallugit. Mosesip uummatikkut tarnikkullu iluunngarluni nukinilu tamakkerlugit Jehovamik asanninnissani aalajangiusimavaa. (5 Mos 6:5) Mosesip aalajangernini iluaqutigingaarpaa. Egyptenimiut pisuussuterpassuarminnik Israelikkunnit piiaaffigitipput. (2 Mos 12:35, 36) Farao nikanarsisitaallunilu ipivoq. (Tuss 136:15) Mosesimi? Asattuunneqarlunilu Guutimit Israelikkunnik annaassisutut atorneqarpoq. Aap, inuunera siunertaqarluarpoq!

7. (a) Matthæusip allagaa 6:19-21 naapertorlugu sooq siunissamut naassaanngitsumut pilersaarusiussaagut? (b) Naassaanngitsussamut imaluunniit nunguttussanut pilersaarusiornerup assigiinngissutaannik misigisaqarsimasoq oqaluttuariuk.

7 Inuusuttuuguit Jehovamut kiffartortoq inuuninni sulerissanerlutit aalajangerniarninni uppernerit qanoq iluaqutigisinnaaviuk? Pilersaarusioruit silatusaassaatit. Guutip neriorsuutai upperalugit naassaanngitsussamut ‘katersigit’, tassa nunguttussaasut pilersaarusiorfiginagit. (Matthæusi 6:19-21 atuakkit). Qitittartoq (ballettertartoq) piginnaanilik Sophiemik atilik taama aalajangertariaqarpoq. Qitittartoqatigiiffiutillit USA-mi sumi tamaneersut ilinniartitaanera akilerumallugulu atorfinnik pilerinartunik neqeroorfigisarpaat. Sophie ima nassuerpoq: “Nuannarineqangaarneq pissanganarpoq. Ilami peqatigisannit pikkorinnerusutut misigivunga. Pilluanngilangali.” Taava Sophiep video Unge spørger: Hvad vil jeg med mit liv? isiginnaarpaa. Imalu nangippoq: “Silarsuarmi iluatsitsininnut nuannarineqangaarninnullu Jehovamut uummatikkut iluunngarlunga kiffartornera akigisimallugu paasilerpara.” Taamaattumik Jehovamut qamannga pisumik qinuvoq qitittartuujunnaarlunilu. Aalajangiussani pillugu qanoq misigiva? “Inuunitoqara maqaasinngilara. Ullumikkut pilluangaarpunga. Uiga pionerioqatigivara. Tusaamasaanatalu pigisakitsuararsuuvugut. Jehovalli najorpaatigut, Biibilimik atuaqqissaaqatigisartagaqarpugut anersaakkullu ittunik anguniagaqarluta. Peqqissimissuteqanngilanga.”

8. Inuusuttup inuunermini sulerissanerluni aalajangerniarnermini najoqqutassiaq Biibilimeersoq suna iluaqutigisinnaavaa?

8 Jehovap nalunngilaa ilinnut suna pitsaanerpaajunersoq. Mosesi ima oqarpoq: “Naalakkap  Guutivit ilinnit suna piumasaraa makkua saniatigut: Naalagaq Guutit mianerissagit aqqutigeqqusai tamaasa ingerlavigalugit Naalagarlu Guutit asassallugu kiffartuutissallugulu uummatikkut iluunngarlutit tarnikkullu iluunngarlutit, Naalakkallu peqqussutai inatsisaalu ullumi ilinnut tunniussakka maleruassagitit ajunngitsunik atugaqarsinnaaqqullutit.” (5 Mos 10:12, 13) Jehovap “uummatikkut iluunngarlutit tarnikkullu iluunngarlutit” asanissaanut kiffartorfiginissaanullu ajoqutaanngitsumik inuuninni sulerissanerlutit inuusuttuutillutit aalajangeruk. Taamatut aalajangeruit ‘ajunngitsunik atugaqassallutit’ upperilluinnarsinnaavat.

KIFFARTORNERMI IMMIKKUT PISINNAATITAAFFINI PINGAARTIPPAI

9. Nassuiaruk sooq Mosesip imminut suliassiissutigineqartoq naammassiuminaatsissimasinnaagaa.

9 ‘Kristusip mitannarsisitaanera [Mosesip] tassaatippaa pisuussut Egyptenip erlinnartuutaanit annerusoq.’ (Hebr 11:26) Allassimaffimmi matumani Mosesi tassaanerarneqarpoq ‘Kristusi’ imaluunniit ‘Tanitaq’. Tamanna isumaqarpoq Jehovap Mosesi toqqaraa Israelikkut Egyptenimit aniguineranni siulersuisussatut. Mosesip nalunngilaa taamaaliornissaq imaannaanngitsuussasoq, allaat ‘mitannarsisitaassalluni’, tassa akerlilersorneqassalluni. Siusinnerusukkut Israelikkuusup Mosesi mitaatigaa ima oqarluni: “Kia uatsinnut naalaganngortillutillu eqqartuussisunngortikkamisit?” (2 Mos 2:13, 14) Kingusinnerusukkut Mosesi Jehovamut ima oqarpoq: “Atamanna Faraop tusarumassanngikkaanga.” (2 Mos 6:12) Mosesi akerlilersorneqarnissaminut piareersimajumalluni siooragisani ernumassutinilu pillugit Jehovamut qinuvoq. Suliassamik imaannaanngitsumik naammassinninnissaanut Jehovap Mosesi qanoq ikiorpaa?

10. Jehovap suliassiissutigisaminik Mosesi qanoq naammassinnissinnaanngortippaa?

10 Siullermik, Jehovap Mosesi ima neriorsorpaa: “Uanga najussavakkit.” (2 Mos 3:12) Aappassaanik, Jehovap Mosesi neriuuteqalersippaa sapiissuseqalersillugulu nammineq atermi isumaanut tunngasut ilaat nassuiarlugu: “Sunngorusunnera naapertorlugu taamaalissaanga.” * (2 Mos 3:14, NW) Pingajussaanik, Mosesi tupinnartuliorsinnaanngortippaa Guutimit aallartitaaneranut uppernarsaataasumik. (2 Mos 4:2-5) Sisamassaanik, Jehovap Aroni ikiortissatut aamma Mosesi sinnerlugu oqaaseqartartussatut toqqarpaa. (2 Mos 4:14-16) Inuunermi naggataatungaani Mosesip upperilluinnarpaa Jehovap kiffani qanorluunniit suliassikkaluarunigit suliassiissummik naammassinnissinnaaqqullugit ikiortarai. Mosesip Jehova ima tatigitigaa Josvamut ima oqarsinnaalluni: “Naalagaq nammineq illit siuninni ingerlajumaarpoq. Najorumaarpaatit. Iperassanngilaatit imminiiginnassanallu. Siooraniaqinak ersilersitaaniaqinallu!” — 5 Mos 31:8.

11. Sooq Mosesip suliani pingaartingaarpaa?

11 Jehovamit annertoqqusersorneqarnermini Mosesip suliani imaannaanngitsoq pingaartingaarpaa ‘tassaatillugu pisuussut Egyptenip erlinnartuutaanit annerusoq’. Guutimut Ajugaqanngitsumut kiffartorneq nalissaqanngilluinnarpoq. Egyptenimi kunngikkormiuuneq Jehovamit Israelikkunnik siulersuisussatut toqqarneqarnermut sanilliullugu qanoq naleqartigaa? Mosesi qujamasuttuunini pillugu pilluaqquneqarpoq. Jehovamut qanittumik attaveqarpoq, Jehovallu Mosesi Israelikkunnik nunamut neriorsuutigisamut siulersuinerani ‘annilaarnangaaqisunik’ naammassinnitsippaa. — 5 Mos 34:10-12.

12. Jehovap sunik pisinnaatitaaffeqartippaatigut?

12 Uaguttaaq suliassaqarpugut. Paulusimik allanillu kiffartortunngortitsinermisulli Jehovap nutaarsiassamik nuannersumik oqaluussisussatut ‘kiffartortunngortippaatigut’. (1 Timotheusi 1:12-14 atuakkit). Tamatta tamanna immikkut pisinnaatitaaffigaarput. (Matt 24:14; 28:19, 20) Oqaluussisartut ilaat piffissaq tamaat kiffartortuupput. Qatanngutit  angutit inersimalluartut ilagiinni kiffartortutut utoqqaanertatulluunniit ilageeqatigisatik kiffartuuppaat. Imaassinnaavorli ilaquttavit allamik upperisallit allalluunniit ilagiinni pisinnaatitaaffivit naleqangaarnerat paasinngikkaat allaalluunniit Jehovamut pilliuteqarnerit pissutigalugu mitaatigigaatsit. (Matt 10:34-37) Nikallortippatsit eqqarsalersinnaavutit taamatut pilliuteqarnerit nammineq iluaqutiginaviarnagu suliassalluunniit naammassisinnaanaviarnagu. Taamaalisooruit upperneq pinertusaarnissamut qanoq iluaqutigisinnaaviuk?

13. Jehovap suliassikkaangamisigut qanoq ikiortarpaatigut?

13 Jehovap ikiorumaaraatit upperalugu qamannga pisumik qinugit. Annilaangassutigisatit isumakuluutitillu taassumunnga oqaluttuarikkit. Suliassiisoq tassaammat Jehova qularinngilluinnarsinnaavat suliassat naammassisinnaaqqullugu taassuma ikiorumaaraatit. Mosesimik ikiuisimanermisulli ikiussavaatit. Siullermik, Jehova ima neriorsuivoq: “Nakussatsippakkit ikiorlutillu, assannik ajugaasartumik najummivakkit.” (Es 41:10) Aappassaanik, neriorsuutini tatiginartuusut ima oqarluni eqqaasippaatit: “Oqatsiaannaruma taamaalisissavara, eqqarsatsiaannaruma pilersaarutiga naammassissavara.” (Es 46:11) Pingajussaanik, suliassannik naammassinnissinnaaqqullutit Jehovap ‘pissaanermik asseqanngitsumik’ tunisarpaatit. (2 Kor 4:7) Sisamassaanik, kiffartorninni pinertusaarsinnaaqqullutit Ataatatta isumassuisup pallorfiginnittut ilumoortut ‘tuppallersaqatigiillutillu ineriartorteqatigiittut’ silarsuaq tamakkerlugu qatanngutigiiusut pilersippai. (1 Th 5:11) Suliassannik naammassinnissinnaaqqullutit Jehovap isumassoraangatit uppernikkut nakussatsissutigisassavat, aamma taassumunnga kiffartorninni pisinnaatitaaffigisatit silarsuup neqeroorutigisinnaasaaninngarnit sunilluunniit pingaartinnerulissavatit.

‘AKISSARSIASSAQ ISUMAGAA’

14. Sooq Mosesip akissarsissalluni qularinngilaa?

14 Mosesip ‘akissarsiassaq isumagaa’, tassa isumaminiitittuarpaa. (Hebr 11:26) Siunissaq pillugu sorpassuit ilisimanngikkaluarlugit ilisimasamininnguani najoqqutaralugit aalajangiisarpoq. Siuaasamisut Aaperaatut Mosesip upperaa Jehovap toqusimasut makitissinnaagai. (Luk 20:37, 38; Hebr 11:17-19) Guutip neriorsuutaanik upperinnikkami Mosesi misiginngilaq ukiuni 40-ni qimaasutut inuusariaqarsimagami ukiunilu 40-ni inoqajuitsumiittariaqarsimagami inuunini asiutissimallugu. Jehova neriorsuutiminik tamanik qanorpiaq eqquutitsissanersoq ilisimanngikkaluarlugu  Mosesip taanna upperilluinnaramiuk akissarsiassani takusinnaasutullusooq ippaa.

15, 16. (a) Sooq akissarsiassarput takorloortariaqarparput? (b) Guutip naalagaaffiata aqutsinerani pilluaqqussutisiassat suut qilanaaraagit?

15 Illimmi, ‘akissarsiassaq’ isumanniitittuarpiuk? Soorlu Mosesip ilisimasai killeqartut uaguttaaq Jehovap neriorsuutai qanorpiaq eqquutissanersut naluarput. Assersuutigalugu annikilliornartussarsuaq “qaqugu nalliukkumaartoq” naluarput. (Mark 13:32, 33) Paratiisissarli pillugu Mosesimit ilisimasaqarnerungaarpugut. Guutip naalagaaffiata aqutsinerani inuunerup qanoq ittuujumaarneranik Jehova neriorsuuterpassuaqarmat silarsuassaq nutaaq takorloorluarsinnaavarput. Taamatut takorluuilluarsinnaagutta Guutip naalagaaffia salliukkusungaassavarput. Assersuuteqariarta. Illu ilisimasaqarfigerpianngisat pisiarissaviuk? Soorunami naamik! Taamatulli neriorsuummut uppererpianngisatsinnut nukivut piffissarpullu atornavianngilavut. Guutip naalagaaffiata aqutsinerani inuunissarput uppernikkut takorloorluarsinnaasariaqarparput.

Mosesitut aalajaassimasut oqaloqatiginissaat pissanganaq! (Immikkoortoq 16 takuuk)

16 Guutip naalagaaffia takorloorluarsinnaanerujumallugu paratiisissami inuunissat isumanniitittuaruk. Assersuutigalugu inuit Jiisusi sioqqullugu inuusimasut pillugit Biibilimik atuaqqissaaraangavit eqqarsaatigisaruk taakku makititaappata qanoq apererusunnerlugit. Illit ulluni kingullerni inuunerit pillugu apeqqutigisinnaasaat takorluukkit. Siuaasatit ukiut hundredillit matuma siorna inuusimasut naapinnissaat Guutillu taakku pillugit iliuuserisimasarpassuinik ilinniartinnissaat qanoq pissanganartigissanersoq takorlooruk. Uumasut nujuartat nunarsuarmi eqqissisimaffiusumiittut qimerloornerisigut taakku pillugit ilinniarnissavit nuannaarutiginnissaa takorlooruk. Naammalluinnartunngoriartuaarninni Jehovamut qanoq qanillitiginerunissat eqqarsatigeqqissaaruk.

17. Akissarsiassatta takorloorluarsinnaanera qanoq iluaqutigisinnaavarput?

17 Akissarsiassarput isumatsinniitittuarutsigu pinertusaarsinnaallutalu nuannaarsinnaallutalu naassaanngitsumik inuunissaq eqqarsaatigalugu aalajangiisinnaavugut. Paulusi ima allappoq: ‘Takusinnaanngisarput neriuutigigaangatsigu eqquunnissaa nikallujuilluta utaqqisarparput.’ (Rom 8:25) Oqaatsit taakku tanitanut allataagaluartut kristumiunut naassaanngitsumik inuunissamik neriugisalinnut tamanut tunngapput. Akissarsiassarput suli pinngikkaluarlutigu upperluartuugatta tamatuma tunniunneqarnissaa nikallujuilluta utaqqivarput. Misiginngilagut ukiorpassuit Jehovamut kiffartornermut atukkavut piffissaajaatigiinnarsimallugit, soorlu Mosesi aamma taama misigisimanngitsoq. ‘Takussaasummi soraajasut takussaanngitsulli soraajuitsuusut’ upperilluinnarpavut. — 2 Korinthimiut 4:16-18 atuakkit.

18, 19. (a) Sooq upperluartuujuarumalluta ilungersortariaqarpugut? (b) Allaaserisami tulliuttumi suna sammissavarput?

18 Uppertuugatta piviusut takussaanngitsut qularutiginngilavut. (Hebr 11:1) Inuup anersaakkut ittunik pingaartitsinngitsup Jehovamut kiffartornerup pingaaruteqarnera paasisinnaanngilaa. Inummut taamaattumut taamatut pisinnaatitaaffeqarneq “sianiitsuliorneruvoq”. (1 Kor 2:14) Silamiut takorloorsinnaanngisaat, tassa naassaanngitsumik inuunissaq toqusullu makititaanissaannik takunnittuunissaq neriuutigaavut. Soorlu ullumikkut inuit amerlanersaasa neriuut oqaluussissutigisarput asuleerutaannaasorigaat, Paulusip nalaani ilisimaqqissaarniartut ilaat isumaqarsimapput taanna tassaasoq “oqaaserpassualik” asuli makkuluinnartuusoq. — ApS 17:18.

19 Inunnik uppersuseqanngitsunik avatangiiseqaratta upperluartuujuarumalluta ilungersortariaqarpugut. “Uppersutsit soraaqqunagu” qamannga pisumik Jehova qinnuigisaruk. (Luk 22:32) Ajortuliornerup kingunipilussaa, Jehovamut kiffartornerup immikkut pisinnaatitaaffiunera naassaanngitsumillu inuunissamik neriuut isumanniitittuakkit. Mosesi allamik ilinniarfigisinnaavarput? Aap, allaaserisami tulliuttumi sammissavarput Mosesip uppernini iluaqutigalugu Guuti ‘takussaanngitsoq’ qanoq takusinnaaneraa. — Hebr 11:27.

^ par. 10 Mosesimik allakkat aappaat 3:14 pillugu Biibilimik ilisimatooq ima allappoq: “[Guutip] piumasaminik naammassinninnissaminut sunaluunniit akornutigisinnaanngilaa ... Ateq [Jehova] Israelikkut pallittaalisarisussaavaat, tassaalluni neriuummut tuppallersaammullu peqqumaasivik imaarussinnaanngitsoq.”