Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Apriili 2014

Jehovap nakkutiginnittarnera qujamasuutigaajuk?

Jehovap nakkutiginnittarnera qujamasuutigaajuk?

“Naalakkap isai tamaginnut anngusimapput, ajortut ajunngitsullu nakkutigaat.” — USS 15:3.

1, 2. Guutip uagutsinnik nakkutiginnittarnera biilinik assiliissutit atorlugit angallannermik nakkutiginninnermit qanoq allaanerussuteqarpa?

NUNARPASSUARNI oqartussaasut biilinik angallanneq nakkutigiumallugu ajutoornerillu filmiliariumallugit assiliissutit ikkussorsimavaat. Aamma assiliissutit atorlugit biilertut inunnik aporsereernermik kingorna ikiuinatik qimaasut filmiliarineqartarput. Oqartussaasut filmiliarineqartut taakkuninnga tigusarinninnissamut iluaqutigisarpaat. Filmiliuuterpassuit pissutigalugit pinerluttartut amerlanerit pineqaatissinneqartarput.

2 Biibilimi allassimavoq Jehovap ‘isai tamaginnut anngusimasut’. (Uss 15:3) Tamanna inatsisiminik unioqqutitsisimanersugut takuniaannarlugu uagutsinnik nakkutiginnittarneratut paasisariaqarpa? Pillarniarluta kukkunissarput utaqqiinnartarpaa? Naamerluinnaq! (Jer 16:17; Hebr 4:13) Jehovap asallutalu toqqissisimatikkusullutalu pilluartikkusukkamisigut nakkutigisarpaatigut. — 1 Petr 3:12.

3. Jehovap qanoq tallimatigut nakkutigisarpaatigut?

3 Guutip asanninneranik qanoq paasinnilluarnerulersinnaavugut? Jehovap uagutsinnik tallimatigut nakkutiginnittarnera  sammissavarput. (1) Ajortuliunnginniassagatta mianersoqqusarpaatigut. (2) Eqqunngitsulioraangatta naqqittarpaatigut. (3) Najoqqutassiani Biibilimiittut atorlugit siulersortarpaatigut. (4) Misilinneqaraangatta ikiortarpaatigut. (5) Eqqortulioraangatta akissarsisittarpaatigut.

JEHOVAP MIANERSOQQUSARPAATIGUT

4. Sooq Kainip ajortuliunnginnerani Jehovap mianersoqquaa?

4 Siullertut ajortuliunnginniassagatta Jehovap uagutsinnik mianersoqqusisarneri sammissavavut. (1 Nal 28:9) Assersuutigalugu Kaini Jehovamit iluarisaannginnami kamalerpoq. (1 Mosesi 4:3-7 atuakkit). Jehovap Kaini ‘ajunngitsulioqquaa’, taamaaliunngippallu ‘ajortip matup killingani qamanissaanik’ mianersoqqullugu. Jehovap ima oqarfigaa: ‘Illit taassumunnga naalagaassaatit.’ Jehovap Kaini ‘niaqquminik makissimatitseqquaa’. Kaini mianersoqqussummik eqqumaffiginnissimasuuguni Guutimut attaveqarluartuarsimassagaluarpoq.

5. Jehovap qanoq mianersoqqusarpaatigut?

5 Ullutsinni aamma taamaappoq. Jehovap inuttut qanorpiaq ittuunersugut takusinnaavaa. Eqqarsaativut kissaativullu nalunngilai, uagullu taassumunnga sumilluunniit isertugaqarsinnaanngilagut. Taassuma asallutalu eqqortuliortikkusuppaatigut, pinngitsaalinerli ajorpaatigut. Taamaattumik ajortulioqqajaaleraangatta mianersoqqusarpaatigut. Qanoq? Biibilimik aalajangersimasumik atuartarutta, Biibililersaarutitsinnik atuartarutta ataatsimiinnernullu najuuttarutta Guutip mianersoqqussutai tusaasinnaassavavullusooq. Ajornartorsiummik Jehovap kisimi ilisimasaanik qaangigaqarnissannut iluaqutigisannik atuagaqarnikuuit imaluunniit tusagaqarnikuuit? Mianersoqqussutit taakku Jehovameersut pisariaqartitsiffitsinni saqqummiunneqartarput.

6, 7. (a) Jehovap kiffaminik tamanik asanninneranut suut uppernarsaataappat? (b) Jehovap inunnik ataasiakkaanik soqutiginninnera qanoq iluaqutigisinnaaviuk?

6 Biibilimi mianersoqqussutit Jehovap tamatsinnik asanninneranut ersiutaapput. Inuit millionillit Biibilimik, Biibililersaarutitsinnik ataatsimiittarnitsinnillu iluaqutiginnittarnerat ilumoorpoq. Jehovalli illit eqqortuliorniassagavit mianersoqqussutiminik Biibilimiittunik eqqumaffiginneqquaatit. Tamanna ilinnik soqutiginninneranut takussutissaavoq.

Nalunngeqatigiinnissuterput Biibili tunngavigalugu ilinniartinneqarsimasoq navianartunut illersuutigisarparput (Immikkoortut 6 aamma 7 takukkit)

7 Guutip mianersoqqussutai qanoq iluaqutigisarpavut? Siullertut uagutsinnik soqutiginninnera upperisariaqarparput taassumalu oqaasia maleruarlugu. Taamaattumik eqqarsaativut suulluunniit Guutimit iluarineqanngitsut piaarnerpaamik eqqarsaatigiunnaartariaqarpavut. (Esaja 55:6, 7 atuakkit). Mianersoqqussutinik tusarasuartarutta uummatikkut aliasungaarnerit pinngitsoortissinnaassavavut. Taavami tusarnaarneq ajorutta? Jehovap suli soqutigissavaatigut?

ATAATATTA ASANNITTUP NAQQITTARPAATIGUT

8, 9. Biibili tunngavigalugu oqaaqqissaarneqarnerput Jehovamit soqutigineqarnitsinnut sooq uppernarsaataava? Assersuuteqarit.

8 Jehovamit naqqinneqaraangatta naluneq ajorparput taassumannga soqutigineqarluta. (Hebræerit 12:5, 6 atuakkit). Oqaaqqissaarneqarnitsinnik naqqinneqarnitsinnilluunniit nuannarinninngittarnerput ilumoorpoq. (Hebr 12:11) Biibili tunngavigalugu oqaaqqissaarisup pissutiginiagaanik paasinninnissarput pingaaruteqarluinnarpoq. Uagutsinnik ajuallatitserusunnini pissutiginagu Jehovamulli attaveqarnitta navianartorsiornera takusinnaagamiuk taamaaliorpoq. Taassuma Biibili tunngavigalugu Jehovamut qanoq uteqqissinnaasugut paasitinniarluta piffissani nukinilu atorusuppai.  Oqaaqqissaarneqarnerput Jehovameersuummat akuerissavarput.

9 Assersuutigalugu qatanngut angut sallusuissut malillugu inuulinngikkallarami pornografiimik isiginnaartarsimavoq. Sallusuissut paasigamiuk taamaaliortarunnaarpoq. Kingusinnerusukkut nutaamik oqarasuaatitaarami pornografiimik internetikkut isiginnaaqqittalerpoq. (Jaak 1:14, 15) Paasinarsivoq pornografiimik suli isiginnaarusussuseqartoq. Ullut ilaanni oqarasuaatini utoqqaanertamut atukkiukkamiuk oqarasuaataani nittartakkat pornografiimik imallit nuipput. Utoqqaanertap qatanngut ingerlaannaq oqaaqqissaarpaa. Qatanngut oqaaqqissaarneqarnermisut iliorpoq naggataatigullu pornografiimik isiginnaartarunnaarluni. Jehovap isertorluta ajortuliornivut takusinnaallugillu taassumunnga attaveqarnitsinnik innarliinnginnitsinni naqqissinnaavaatigut. Jehovamit soqutigineqarnerput qujamasuutigaarput.

NAJOQQUTASSIANIK BIIBILIMEERSUNIK MALERUAANERPUT ILUAQUTIGISARPARPUT

10, 11. (a) Guutip siulersuinera qanoq ‘eqqarsaatigiuarsinnaavarput’? (b) Ilaqutariit silatusaarlutik Jehovap siulersuineranik maleruaasut misigisimasaat oqaluttuariuk.

10 Tussiaasiortoq Jehovamut ima erinarsorpoq: “Ilitsersuutikkut ingerlatissavarma.” (Tuss 73:24) Biibilimik misissueqqissaartarnitsigut Jehovap ilitsersuutaa ‘eqqarsaatigiuartarparput’. Taamaaliornikkut eqqarsartaasia paasisinnaallugulu siulersuineranik maleruaasinnaallutalu taassumunnga attaveqarlualersinnaavugut. Najoqqutassianik Biibilimeersunik maleruaanerput anersaakkut iluaqutigiinnarnagu timikkut pisariaqartitatsinnik matussusiinissamut iluaqutigisarparput. — Uss 3:6.

11 Assersuutigalugu naasorissaasoq ilaquttanilu Filippinerini nunaateqarfimmik attartorput. Naasorissaasoq nulianilu pioneriupput. Ullulli ilaanni nunaateqarfimmik piginnittup allaffigai attartuisinnaajunnaartut. Tupattorujussuullutillu kingusinnerusukkut paasivaat tunngavissaqanngitsumik unneqqaserlussimanerarneqarsimallutik. Qatanngutip angutip sumi najugassinnissartik ernumassutigaa. Jehovamilli tatiginnilluni ima oqarpoq: “Jehovap isumassorumaarpaatigut. Qanorluunniit pisoqaraluaraangat pisariaqartitatsinnik tuniuaannarpaatigut.” Ilaqutariit najoqqutassianik Biibilimeersunik maleruaapput, unnerluutigineqaraluarlutillu ataqqinnittumik eqqissisimasumillu pissusilersorput. Ullualuit  qaangiummata nunaateqarfimmik piginnittoq oqarpoq nuuttariaqanngitsut. Piginnittup unnerluussummut qisuariarnerat tupigusuutigingaaramiuk isummani allanngortippaa allaallu nunaammik naggorissagassaannik annerusumik tunillugit. (1 Petrusi 2:12 atuaruk). Ersarippoq najoqqutassianik Biibilimeersunik maleruaasarutta piffissani artornartuni Jehovamit siulersorneqarumaarnerput.

IKINNGUT PINERTUSAARNISSATSINNUT IKIUUTTARTOQ

12, 13. Qaqugukkut Guutip uagutsinnik soqutiginninnera upperiuminaassinnaava?

12 Jehovamut kiffaagatta misilinneqartuartarpugut ilaannikkullu immaqa misilinneqarnerit, soorlu napparsimaneq, malersorneqarneq ilaquttanilluunniit akerlilersorneqarneq, sivisuumik atuuttussaarpasittarput. Inuttut pissuserineqartut pissutigalugit ilagiinniittunik annertuumik isumaqatigiinngissuteqarneq ajornartorsiutaasarpoq qaangeruminaappasinnerpaanut ilaasoq.

13 Assersuutigalugu immaqa qatanngutip oqaasii ajuallaatigaatit imalu eqqarsarlutit: ‘Guutip peqatigiissortaani taamatut pisoqartussaanngikkaluarpoq!’ Qatanngulli ilinnik ajuallatsitsisoq ilagiinni akisussaaffeqarnerulerpoq allanillu nuannarineqarluni. Immaqa ima oqassaatit: ‘Ilumoorsinnaanngilaq! Jehova takusaqarsinnaannginnami? Iliuuseqassannginnami?’ — Tuss 13:2, 3; Hab 1:2, 3.

14. Sooq Jehovap qatanngutitsinnit angutinit sukannersumik oqaaqqissaarneqarnerput akuerisinnaasarpaa?

14 Jehova pissutissaqarluarluni ilaannikkut akuliunneq ajorpoq. Assersuutigalugu oqaaqqissaarneqarnerput immaqa naleqqutinngitsorisinnaallugulu ajuallassutigisinnaavarput. Guutili pisumut allatut isiginnittaaseqarsinnaavoq. Oqaaqqissaarneqarnissarpulli naleqqussimasinnaava? Qatanngut Karl Klein misigisalikkersaarnermini oqarpoq ataasiarluni qatanngummit Rutherfordimit sukannersumik oqaaqqissaarneqarsimalluni. Tamatuma kingorna qatanngutip Rutherfordip inussiarnersumik ilassimmani narrujuummisimasutut akivoq. Qatanngutip Kleinip oqaaqqissaarneqarnerminik suli ajuallaatiginneqqanera qatanngutip Rutherfordip takusinnaagamiuk Diaavulumit pisarineqarsinnaanera pillugu mianersoqquaa. Qatanngutip Kleinip taamatut oqarfigineqarnini iluaqutigingaarpaa. Kingusinnerusukkut Siulersuisoqatigiinnut ilaasortanngorami oqarpoq qatanngutit angutit uagutsinnik oqaaqqissaarinissaminnut pisinnaatitaaffeqartut uagullu oqaaqqissaarinerat pillugu uumigigutsigit Diaavulumit pisarineqassasugut. *

15. Misilinneqaraangatta suna eqqaamasariaqarparput?

15 Piaarnerpaamik misilinneqarunnaarnissarput kissaatigisarparput. Utaqqisinnaassuseqarnissatsinnilli ilinniarnissarput pingaaruteqarpoq. Takorlooruk pisiniarfimmi akiliiniarlutit kinguleriiaattuni utaqqillutit. Naluat qaqugu tulliutissanerlutit. Utaqqikataleruit kinguleriiaattunut allanut nuukkusulersinnaavutit, imaassinnaavorli kinguleriiaattuni allani utaqqisut amerlanerusut. Kinguleriiaattunut allanut nuunnak kinguleriiaattuni utaqqiffigisanni nikorfaannarsimasuuguit pilertornerusumik immaqa akiliisimassagaluarputit. Misilinneqarnitsinnut tunngatillugu aamma taamaappoq. Utaqqisinnaassuseqaruit najoqqutassiallu Biibilimeersut maleruarukkit anguniakkat angussavat.

16. Sooq Jehovap misilinneqarnissarput akuerisinnaavaa?

16 Jehovap misilinneqarnitsigut sungiusarneqarniassagatta misilinneqarnissarput akuerisinnaavaa. (1 Petrusi 5:6-10 atuakkit). Misilinneqarnitsinnut Guuti pisuutinngisaannartariaqarparput.  (Jaak 1:13) ‘Akerartortinuna Diaavulu’ naalliuutinut amerlanernut pisuusoq. Jehovalli naalliunnitsinnik maluginiaasarnera uagutsinnillu asanninnera ilisimasariaqarparput. Misilinneqarnitta qaqugorsuarmut atuutinnginnissaat qulakkiissavaa. ‘Sivikitsuinnarmik’ atuuttussaapput. Jehovamit soqutigineqarnerit taassumalu naggatissamut pinertusaarnissannut nukissaqartitsiumaarnera qularinngilluinnaruk. — 2 Kor 4:7-9.

JEHOVAMIT AKISSARSIAQ

17. Sooq Jehovap inuit uummataat tamaasa misissuiffigisarpai?

17 Jehovap kikkunnit asaneqarnerluni paasiniarlugu inuit uummataat tamaasa misissuiffigisarpai. Pruffiitip Hananip kunngi Asa ima oqarfigaa: “[Naalakkap] nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit.” (2 Nal 16:9) Jehovap ‘pissaanermigut ikiussavaatit’, tassa illersorlutillu akissarsisissavaatit.

18. Sooq qularinngilluinnarsinnaavarput ajunngitsuliortarnivut pillugit Jehovamit akissarsisinneqarumaarluta? (Allaaserisap aallaqqaataani assiliaq takuuk).

18 Jehovap ‘saamasaarfigerusuppaatigut’, tassa akissarsisikkusuppaatigut. Taassumannga iluarisaarusukkutta ‘ajunngitsoq ujartariaqarlugulu’ ‘ajunngitsoq nuannarisariaqarlugulu’ ‘ajunngitsuliortariaqarpugut’. (Am 5:14, 15; 1 Petr 3:11, 12) Jehovap inuit naapertuilluartut, naak ajunngitsuliornerat allanit takuneqarneq ajoraluartoq, akissarsisittarpai. (Tuss 34:16) Tamanna Israelikkut ernisussiortut marluk, Shifra Pualu, pillugit oqaluttuamit erserpoq. Taakku Faraomit Israelikkunnik nukappiaqqanik inoorlaanik toqutseqquneqarput. Arnat taakku Farao naalannagu Guuti naalallugu inoorlaanik inuutitsiinnartarput. Jehovap Shifrap Puallu ajunngitsuliornerat maluginiaramiuk qitornartaartinnerisigut akissarsisippai. (2 Mos 1:15-17, 20, 21) Ilaannikkut imaassinnaavoq misigisartugut ajunngitsuliornivut maluginiarneqarneq ajortut, Jehovalli ajunngitsuliornivut tamaasa maluginiartarpai. Akissarsisikkumaarpaatigut. — Matt 6:4, 6; 1 Tim 5:25; Hebr 6:10.

19. Qatanngut arnaq sumik misigisaqarsimava?

19 Ilaannikkut misigisarsinnaavugut Jehovap oqaluussinermi iliuuserisavut maluginiarneq ajorai, maluginiartarpaali. Qatanngut arnaq Ungarnimiu Østrigimi najugalik arnamut Ungarnimiumut pulaartussanngortinneqarpoq. Qatanngut arnaq ingerlaannaq arnamut kasuttoriartorpoq, mappiunneqarnanili. Ukiup ataatsip affallu ingerlanerani arlaleriarluni alakkartaraluarlugulu Biibililersaarutinik, allakkanik oqarasuaatimilu normuanik qimatsivigisarpaa. Ilaannikkut eqqarsartarpoq angerlarsimasoqaraluartoq mappiunneqarneq ajorluni. Ullut ilaanni kasuttormat arnap inussiarnersup mappiuppaa imalu oqarfigalugu: “Tamassa. Tunniuttakkatit tamaasa atuartarlugillu aggeqqinnissat utaqqiinnarpara.” Arnaq taanna kemortinnikuugami inunnik oqaloqateqarusussimanngilaq. Biibilimik atuaqqissaaqatigineqartalernissaminik akuersivoq. Qatanngut arnaq misigivoq Jehovamit maluginiarneqarsimallunilu iliuutsini pillugit akissarsisinneqarsimalluni.

20. Jehovap ilinnik soqutiginninnera qanoq isumaqarfigaajuk?

20 Allaaserisami matumani sammeriikkatsitut Jehovap iliuutsivut tamaasa maluginiartarlugillu inuit uummataat tamaasa misissortarpai. Isumaqanngilagut taassuma inuit kukkunersiortarlugillu kukkussutaat filmiliarisai. Akerlianik Jehovamut qanillisarpugut nalunnginnatsigu taassuma soqutigalutalu ikiorusullutalu ajunngitsuliavut pillugit akissarsisikkusukkaatigut.

^ par. 14 Qatanngutip Kleinip misigisalikkersaarnera Vagttårnet 15. septembari 1985-imoortumi atuarneqarsinnaavoq.