“ILANNUT angerlarniarit, oqaluttuutikkillu Naalakkap ilinnut qanoq iliorsimanerinik tamanik ilinnillu nallittuisimaneranik.” Jiisusi Kristusi ajoqersuganngorusuttumut taama oqarami ilimanarpoq Galilæap Tasersuata kujataani-kangisissuani Gadaramiittoq. Jiisusip oqaasiinit erserpoq inuit soqutigisaminnik pingaarutilinnillu ilaquttaminnut oqaluttuarusuttarnerat nalunngikkaa. — Mark 5:19.

Ullumikkut aamma inuit oqaluttuarusussuseqartarput, kulturillu ilaanni tamanna malunnarnerusarpoq. Taamaattumik Guutimut ilumoortumut, Jehovamut, pallorfiginnilerlaap upperisani ilaquttaminut oqaluttuarerusuttarpaa. Qanorli taamaaliussava? Ilaquttami allamik upperisallit — upperisaqanngilluinnartulluunniit — uummataat qanoq killissinnaavai? Biibilimi piviusorsiortunik siunnersuutitsialaqarpoq.

“MISSIARSI NAAPIPPARPUT”

Jiisusip nalaani taassuma Missiarsiuneranik paasinneqqaartut ilagaat Andreasi. Paasisanilu pillugit kimut ingerlaannaq oqaluttuarpa? “Taassuma [Andreasip] naapeqqaarpaa qatanngunni Siimuut, oqarfigaalu: ‘Missiarsi naapipparput,’ — Missiarsi isumaqarpoq: Kristusi.” Andreasip Petrusi Jiisusimut ilisaritippaa Jiisusimut ajoqersuganngornissamut periarfissillugu. — Joh 1:35-42.

Tamatuma kingorna ukiut arfinillit missaat qaangiuttut Petrusi Joppemiitilluni Corneliusimut, sakkutuut naalagaannut, avannaani Cæsareami najugalimmut tikeraaqquneqarpoq. Petrusi tikimmat kikkut Corneliusikkunniippat? “Corneliusip [Petrusi angalaqataalu] ilimagigamigit eqqarlini ikinngutinilu qaninnerusut qaaqqusimavai.” Taamaalilluni Corneliusip ilaquttani Petrusip oqaasissaanut tusarnaarnissamut tusakkatillu tunngavigalugit aalajangernissamut periarfissippai. — ApS 10:22-33.

 Andreasip Corneliusillu ilaquttaminnik pinninnerat qanoq ilinniarfigisinnaavarput?

Andreasip Corneliusillu periarfissaqalernissartik utaqqiinnanngilaat. Andreasip nammineerluni Petrusi Jiisusimut ilisaritippaa, Corneliusillu ilaquttani Petrusip oqaasissaanut tusarnaarsinnaaqqullugit iliuuseqarpoq. Andreasilli Corneliusillu ilaquttatik kimigiiserfigalugit peqqusersusaarfigalugilluunniit Kristusimut ajoqersuganngortinniarsarinngilaat. Tamanna ilinniarfigisinnaavarput? Immaqa ilaquttavut ilumoortunik Biibilimeersunik oqaluttuussinnaavavut uppeqatitsinnillu ilisarisimasaqalernissaannut periarfissarsiorluta. Taamaakkaluartoq namminneq aalajangiisinnaanerat ataqqivarput tatinaveersaarlugillu. Ilaquttatsinnik qanoq ikiuisinnaanerput aappariit Tysklandimiut Jürgenip Petrallu misigisaannit erseqqippoq.

Petra Jehovap Nalunaajaasuinit Biibilimik atuaqqissaaqatigineqartareerluni kuisippoq. Uia Jürgen sakkutuunut naalagaavoq. Jürgenip nuliami aalajangernera aallaqqaammut nuannarinngilaa. Piffissalli ingerlanerani paasilerpaa Jehovap Nalunaajaasuisa oqaluussissutigisaat sallusuissutaasoq Biibilimeersoq. Jehovamut tunniulluinnarpoq ullumikkullu ilagiinni utoqqaanertaalluni. Ilaquttat uppeqatiginngisat uummataasa killinnissaat pillugu qanoq siunnersuuteqarpa?

Jürgen ima oqarpoq: “Ilaquttavut tusarnaaqqullugit pinngitsaalissanngilavut oqaluussiffigiinnaaviinnarnagillu. Taamaalioraluaruttami tusarusunnginnerulersiinnassavavut. Siunissaq eqqarsaatigalugu pitsaanerussaaq ilaannikkuinnaq Biibilimeersumik oqaluttuutilaartarutsigit. Aamma iluaqutaassaaq ilaquttavut uppeqatitsinnut ukioqatigisaannut soqutigisaqaqatigisaannullu ilisaritikkutsigit. Tamannami soqutiginninnerulissutigisinnaavaat.”

“Ilaquttavut tusarnaaqqullugit pinngitsaalissanngilavut.” — Jürgen

Apustilip Petrusip Corneliusillu ilaqutaasa tusarliussaq Biibilimeersoq ingerlaannaq upperilerpaat. Jiisusilli nalaani sallusuissummik tusartut allat piffissaqarnerusariaqarput.

JIISUSIMMI QATANNGUTAI?

Jiisusip nunami kiffartornerani ilaqutaasa arlallit taanna upperfigilerpaat. Assersuutigalugu Jiisusip Salome ajagigunarlugu taassuma erneri Jaaku Johannesilu apustilinngortut illoorarigunarpai. Salome arnarpassuit ‘namminneq pigisaminnik taakkuninnga [Jiisusimik apustiliinillu] isumaginnittartut’ ilagigunarpaat. — Luk 8:1-3.

Jiisusilli ilaqutaasa allat taanna ingerlaannaq upperfigilinngilaat. Ilaanni Jiisusip kuisinnerata kingorna ukioq ataaseq qaangiutereersoq inuppassuit illumi katersuupput taanna tusarnaarniarlugu. “Eqqarliisa tamanna tusaramikku ornippaat aallugu, paatsiveerutivissimasorigamikku.” Kingusinnerusukkut Jiisusip affarmik qatanngutaasa taanna sumunnarniarnersoq paaserusummassuk Jiisusip iluamik akinngilai. Sooq? ‘Qatanngutimi upperfiginngimmanni.’ — Mark 3:21; Joh 7:5.

Jiisusip ilaquttaminik pinnittarnera qanoq ilinniarfigisinnaavarput? Silaarussorineqarami mamiatsanngilaq. Aamma toqutaareerluni makititaanermi kingorna affarmik qatanngumminut Jaakumut takutinnermigut ilaquttaminik kaammattuivoq. Tamanna Jiisusip Missiarsiuneranik Jaakup qatanngutaasalu allat qularunaassutigisimassagunarpaat. Taakkuami apustilit uppertullu allat Jerusalemimi inimi qullermi isersimaqatigaat anersaamillu illernartumik tunineqarlutik. Piffissap ingerlanerani Jaaku Judasilu, Jiisusip affarmik qatanngutaa alla, nuanningaartumik  immikkut pisinnaatitaaffeqalerput. — ApS 1:12-14; 2:1-4; 1 Kor 15:7.

ILAAT PIFFISSAQARNERUSARIAQARPUT

“Nikallujuinnikkut aammaaqqillunilu nikallujuinnikkut angusaqarluartoqarsinnaavoq.” — Roswitha

Jiisusip nalaanisulli ullumikkut ilaqutaasut ilaat ukiorpassuit qaangiukkaangata aatsaat inuunerup aqqutaatiguulertarput. Assersuutigeriartigu Roswitha uini 1978-imi Jehovap Nalunaajaasuisa ilaattut kuisimmat katuuliunerminik pimoorussisoq. Taamaattumik aallaqqaammut uini akerlilersorpaa. Ukiulli ingerlaneranni akerlilersuivallaarunnaarpoq. Paasileramiuk Nalunaajaasut sallusuissut ilinniartitsissutigigaat 2003-mi kuisippoq. Allanngorneranut suna pissutaaqataava? Akerlilersuinera uiata mamiatsaatiginagu nuliani isummaminik allannguinissaanut periarfissippaa. Roswitha qanoq siunnersuuteqarpa? “Nikallujuinnikkut aammaaqqillunilu nikallujuinnikkut angusaqarluartoqarsinnaavoq.”

Monika 1974-imi kuisippoq, tamatumalu kingorna ukiut qulit missaat qaangiuttut erneri marluk Nalunaajaasunngorput. Uia Hans ilaquttaminik akerlilersuinngisaannaraluarluni aatsaat 2006-imi kuisippoq. Pereersut eqqarsaatigalugit ilaqutariit taakku ima siunnersuuteqarput: “Jehovamut ilumoorfiginnittuarit, Biibilimilu najoqqutassianut akerliusunik akuersiinnaqinak.” Soorunami Hansip nuliata ernerisalu taassuminnga asannittuarnertik ersersittuartariaqarpaat. Neriuutigiuaannarpaallu Hans sallusuissummik ilassinnikkumaartoq.

SALLUSUISSUTIP ERNGANIK INUUMMARISSITIKKIT

Ilaanni Jiisusip sallusuissummik tusarliussaq imermut naassaanngitsumik inuussutaasumut assersuuppaa. (Joh 4:13, 14) Ilaquttavut sallusuissutip ernganik nillaarissumik minguitsumillu imernikkut inuummarississasut kissaatigaarput. Soorunami kissaatiginavianngilarput pinngitsaalillugit sukkavallaartumik imertippallaarlugit tupissasut. Inuummarissisutut tupittutulluunniit misigissanersut apeqqutaavoq upperisatsinnik qanoq nassuiaannerivut. Biibilimi allassimavoq ‘iluartoq oqalulersinnani qamuuna eqqarsaqqaartartoq’ aamma ‘ilisimasup uummataata qarnga silatuunngortittaraa ilisimassuserlu qarluiniittoq annerulersittarlugu’. Tamanna qanoq maleruarsinnaavarput? — Uss 15:28; 16:23.

Immaqa nuliaasup upperisani uiminut oqaluttuarerusuppaa. ‘Oqalulersinnani qamuuna eqqarsaqqaartaruni’ oqaasissani mianersuullugit isumaatsumik oqaaseqartassanngilaq. Uiusoq misiginngisaannartariaqarpoq nuliani pingaakujuttuullunilu imminut iluartuutittoq. Nuliaasup oqaasii eqqarsaatigilluakkat inuummarissinarlutillu eqqissisitsisinnaapput. Uiusoq qaqugukkut eqqissisimaarlunilu oqalukkusunnerusarpa? Suut pillugit eqqartuerusuttarpa atuarusuttarlunilu? Ilisimatusarneq, politikki timersornerluunniit soqutigaa? Nuliaasup uimi misigissusii isumaalu innimigiitigalugit qanoq ililluni Biibili pillugu paasisaqarnerorusulersissinnaavaa? Tamakku eqqarsaatigisarunigit ilisimassuseqartumik iliuuseqarnissamut oqaaseqarnissamullu iluaqutigissavaa.

Ilaquttatta suli Nalunaajaasuunngitsut uummataat killissagutsigit upperisarput pillugu nassuiaanitsinni oqaatsinik killilersimaarineq eqqarsaatigisassatuaanngilaq. Oqaatsivut iliuutsivullu naapertuuttariaqarput.

PISSUSERINNEQ

“Najoqqutassiat Biibilimeersut ullut tamaasa maleruartuakkit. Taamaaliornermi sunniuteqarluartarpoq, ilaqutaasummi uppinngitsup, immaqa nassuerutigerusunngikkaluarlugu, maluginiarsinnaammagu,” Jürgen eqqaaneqareersoq oqarpoq. Hans, nuliami kuisinnerata kingorna ukiut 30-t missaata kingorna kuisittoq, isumaqataalluni ima oqarpoq: “Kristumiutut pissuserinneq pingaaruteqarpoq, ilaqutaasut malugisinnaaniassammassuk sallusuissut inuunitsinnut ajunngitsumik sunniuteqartoq.” Ilaquttatta malugisussaavaat uppernerput inunnit allanit ajunngitsumik ajortumiunngitsoq allaanerussutigigipput.

“Kristumiutut pissuserinneq pingaaruteqarpoq, ilaqutaasut malugisinnaaniassammassuk sallusuissut inuunitsinnut ajunngitsumik sunniuteqartoq.” — Hans

Apustilip Petrusip nuliaasut uiminnik upperisaqaqatigiinngitsut pitsaasumik ima siunnersorpai: “Uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit Guutimik mianerinnillusi inuunersi minguitsoq takulerunikku. Pinnissusersi qallikkut ersiuteqartissanngilarsi, soorlu perlaajassinnik, pinnersaatinik kuultiusunik atisanilluunniit pinnersunik, ersiuteqartissavarsili uummammi, inummi isertugaasumi, anersaap piuaatsup qanilaartullu  kusanassusiani aserortussaanngitsumi, Guutip isaani erlinnaqisumi.” — 1 Petr 3:1-4.

Apustili Petrusi allappoq uiusoq nuliami pissuserinneratigut ilataarineqarsinnaasoq. Najoqqutassiaq Biibilimeersoq tamanna eqqarsaatigalugu qatanngutip arnap Christamik atillip 1972-imi kuisinnermi kingornali pissuserinnermigut uimi uummataata killinnissaa sulissutigaa. Uia siornatigut Nalunaajaasunit atuaqqissaaqatigineqartaraluarluni sallusuissut suli aalajangiutinngilaa. Kristumiut ataatsimiinnerinut arlaleriarluni ataatsimiigiarpoq, ilagiinniittullu nuannarai. Taakkualu nammineq aalajangersinnaatitaanera ataqqivaat. Christap uimi uummataa qanoq killinniarpaa?

“Jehovap aqqutigeqqusaatigoornissara aalajangiusimavara. Taamaaliuutigalunga uiga ‘oqaluffiginngikkaluarlugu’ pissuserinnikkut ilataariniarpara. Najoqqutassianut Biibilimeersunut akerliunngikkaangat uima kissaataatut sapinngisannik iliorniartarpunga. Soorunami aamma nammineq piumasamisut iliorsinnaatitaanera ataqqivara susinnaanngisakkalu Jehovamut isumagitillugit.”

Christap periaasianit naleqqussarsinnaanerup pingaaruteqassusia erserpoq. Anersaakkut ittunut tunngatillugu ineriartornartumik aalajangersimasumik sammisaqartarpoq, soorlu ataatsimiinnernut najuuttarnikkut oqaluusseqataalluarnikkullu. Oqimaaqatigiissaarigamili nalunngilaa uini asasariaqarlugulu piffissaqarfigisariaqarlugulu isumassortariaqarlugu. Uppinngitsunik ilaqutaqartugut tamatta silatusaassaagut taakkununnga tunngatillugu naleqqussarsinnaassuseqarutta paasinnittuullutalu. “Suut tamarmik aalajangersimasumik piffissaligaapput,” Biibilimi allassimavoq. Ilaquttanik uppeqatiginngisanik, ingammik aapparmik, piffissaqarfiginninnermut tunngatillugu aamma taamaappoq. Piffissaqarfigeqatigiinnikkut attaveqarfiginnillualertoqartarpoq. Ilaquttat attaveqarfigilluarnerisigut kiserliortutut immikkoortitaasutulluunniit misigisinnaanerigaluat sinngasinnaanerigalualluunniit pinaveersaartinneqarsinnaavoq. — Oqal 3:1.

NERIUTTUARIT

Holger, ilaquttaminit ukiunit 20-nit kingusinnerulluni kuisittumik ataatalik, ima oqarpoq: “Ilaquttanik asannittuliornissaq qinnussinissarlu pingaaruteqarput.” Christa aamma oqarsimavoq ‘uimi Jehovamik pallorfiginnikkusulernissaa sallusuissummillu aalajangiussinissaa neriuutigiuarlugu’. Neriuttuarluta ilaquttatsinnut uppeqatiginngisatsinnut isumalluartumik isiginnittaaseqartuartariaqarpugut.

Ilaquttatsinnut attaveqarluartuarnissarput, taakkua sallusuissummik ilinniarnissaat tusarliussamillu Biibilimeersumik killinnissaat anguniagaraavut. Qanorluunniillu ilioraluarutta ‘qanilaarlutalu mianerinnittuussaagut’. — 1 Petr 3:15, 16.