‘Alutornassutsinni ajugaajartorit.’ — TUSS 45:4, NW (45:5)

1, 2. Sooq Tussiaat 45 soqutigisariaqarparput?

KUNNGERSUAQ sorsukkiartorpoq sallusuissut naapertuilluarnerlu illersorniarlugit. Akeqqani inaarutaasumik ajugaaffigereerlugit pinnersumik nuliarpoq. Kinguaariikkuutaani eqqaamaneqarlunilu nersorneqarpoq. Pissanganartut tamakku Tussiaat 45-mi oqaluttuarineqarput.

2 Tussiaat 45 tassaaginnanngilaq oqaluttuaq pissanganartoq nuannersumik naanilik. Tamatumani eqqaaneqartut pingaaruteqarput, maannakkummi inuunitsinnut sunniuteqarput siunissatsinnullu sunniuteqassallutik. Taamaattumik Tussiaat tamanna misissoqqissaartigu.

“UUMMATIGA UTSERSORPOQ OQAATSINIK TUSARUMINARTUNIK”

3, 4. (a) ‘Oqaatsini tusaruminartuni’ tussiaasiortup allaatigisaani suna pineqarpa, uummatikkullu qanoq sunnerneqaatigisinnaavarput? (b) “Kunngi pillugu” qanoq erinarsorpugut, oqarpullu qanoq “allakkasuartartup allaataatut” ilisarpa?

3 Tussiaat 45:2 atuaruk. ‘Oqaatsit tusaruminartut’ tussiaasiortup uummataanik ‘utsersortitsisut’ tassaapput kunngi pillugu nutaarsiassat. Tussiaasiortup nutaarsiassat tamakku tusakkani nuannaarutigingaaramigit uummataa qiimmatsannermik utsersorporlusooq. Oqaalu “allakkasuartartup allaataatut” ilerpoq.

 4 Uagummi? Naalagaaffik Missiarsikkoortoq pillugu nutaarsiassaq nuannersoq uagutsinnut tusaruminartuullunilu killitsinnarpoq. Guutip naalagaaffia pillugu nutaarsiassaq pingaartumik 1914-imi ‘tusaruminartunngorpoq’. Taamanimi naalagaaffik pineqartoq taanna neriuutaaginnarunnaarluni piviusunngorpoq 1914-imiilli qilammi naalakkersuilersimasoq. Tamanna tassaavoq ‘Naalagaaffimmik iivangkiiliu silarsuarmi tamarmi oqaluussissutigisarput inuiannut tamanut nalujunnaarsillugu’. (Matt 24:14) Naalagaaffik pillugu tusarliussaq nuannaarutigalugu uummaterput ‘utsersorpa’? Naalagaaffimmik nutaarsiassaq nuannersoq pillugu oqaluussinitsinni aallussilluarpugut? Tussiaasiortutut “kunngi pillugu” — kunngerput Jiisusi Kristusi pillugu — erinarsorpugut. Tassa Jiisusip maanna naalagaaffimmi Missiarsikkoortumi kunngiunera oqaluussissutigaarput. Inuit tamaasa — allaat nunarsuarmi naalakkersuisut — Jiisusip kunngitut naalakkersuineranut naalatsigiteqqullugit kajumissaarpavut. (Tuss 2:1, 2, 4-12) Oqaluussinermilu Biibili atoraangatsigu oqarput “allakkasuartartup allaataatut” ittarpoq.

Kunngerput Jiisusi Kristusi pillugu oqaluussinerput nuannaarutigaarput

“OQAATSIT KUSANARTUT ANIAPPUT QARLUNNIT”

5. (a) Jiisusip ‘pinnernera’ qanoq paasisariaqarpa? (b) Jiisusi qanoq oqaluussisarpa, qanorlu ilaarsinnaavarput?

5 Tussiaat 45:3 atuaruk. Jiisusip isikkua Biibilimi allaatigineqarpianngilaq. Angutaagami naammalluinnartoq ‘pinnersuusimassaaq’. Jehovamulli assuarnaatsuunini aalajaanninilu pissutigalugit pinnersutut allaatigineqarpoq. Aamma Jiisusip inussiarnerluni “oqaatsit kusanartut” inuit killitsissutigisaat atorlugit naalagaaffik pillugu tusarliussaq oqaluussissutigisarpaa. (Luk 4:22; Joh 7:46) Jiisusip oqaluussinera sapinngisatsinnik ilaarniartarparput? — Kol 4:6.

6. Guutip Jiisusi qanoq “naassaanngitsumik” pilluaqquaa?

6 Jiisusip aalajaannera Ataataminullu asanningaarnera pissutigalugit nunarsuarmi kiffartornera Jehovap pilluaqquaa pilliutitullu toqunerata kingorna akilerlugu. Apustili Paulusi Jiisusi pillugu ima allappoq: “Saqqummerami inuttut nikanartippoq naalalluni toqumut, sanningasulimmi [nappakkami anniartitaaffimmi, NW] toqumut allaat. Taamaattumik akitsingaartippaa Guutip tunillugu atermik akimuisumik tamanik, Jiisusip aqqani seeqqummissammata tamarmik qilammiittut nunamiittullu nunallu ataaniittut, tamarmillu oqqat nassuissallutik: Jiisusi-Kristusi tassaavoq Naalagaq, Guutip Ataatap ataqqinaatissaanik.” (Fil 2:7-11) Jehovap Jiisusi toqujuitsutut makitillugu “naassaanngitsumik” pilluaqquaa. — Rom 6:9.

KUNNGI ‘NALIGISAMINIT’ PINGAARNERULERSINNEQARPOQ

7. Guutip Jiisusi ‘naligisaanit’ salliutillugu tanikkaa qanoq paasisariaqarpa?

7 Tussiaat 45:7, 8 atuakkit. Jiisusip eqqortumik nuannarinningaarnera Ataataminullu nikanarsaataasinnaasunik tamanik uumiginninnera pissutigalugit Jehovap naalagaaffimmi Missiarsikkoortumi kunnginngortippaa. Jiisusi ‘naligisaminit’ — Judami kunngiusunit Daavikkut siuaasaqatiminit — salliutinneqarluni “uuliamik nuannaarnerup pianik” taninneqarpoq. Qanoq? Siullermik, Jehovap nammineerluni Jiisusi tanippaa. Aappassaanik, Jehovap Jiisusi kunngitut aamma palasiunertut tanippaa. (Tuss 2:2;  Hebr 5:5, 6) Pingajussaanik, Jiisusi uuliamik taninneqarnani anersaamik illernartumik taninneqarpoq. Kiisalu qilammi, nunarsuarmiunngitsoq, kunngiuvoq.

8. Sooq upperilluinnarsinnaavarput Jiisusip naalakkersuinera naapertuilluinnartuusoq, aamma sooq Jiisusip naalakkersuisinnaatitaanera qularineqartussaanngila?

8 1914-imi Jehovap ernini Missiarsiusoq qilammi kunnginngortippaa. Jiisusip ‘kunngisut tigumiaa tassaavoq tigumiaq naapertuilluarnerup nalunaaqutaa’, taamaattumik upperilluinnarsinnaavarput naalakkersuinera naapertuilluartuujuaannassasoq. Kunngiunissaq pisinnaatitaaffigaa, Jehovammi kunnginngortitaraa. Jiisusip issiavissaarsua “atassaaq naassaanngitsumik”. Jehova taassuma kunnginngortitaa naalallugu kiffartorfigisinnaagatsigu tulluusimaarutigaarput!

KUNNGIP PANANI MAKITSIMINUT AALAJANGERPAA

9, 10. (a) Qanga Kristusip panani aalajangerpaa, qanorlu atorpaa? (b) Kristusip panani siunissami qanoq atussavaa?

9 Tussiaat 45:4 atuaruk. Jehovap kunngi oqarfigaa panani makitsiminut aalajangissagaa. Taama oqarnermigut naalakkersuinerminut akerliusut piuneerukkiartorlugit Jiisusi sorsukkiartoqquaa. (Tuss 110:2) Kristusi ‘pissarsuartut’ taaneqarpoq sorsuttartuullunilu kunngiugami ajugaaffigineqarsinnaanngitsoq. 1914-imi panani aalajangerpaa Saatani anersaapiluillu ajugaaffigalugit qilammiit nunamut igikkamigit. — Saqq 12:7-9.

10 Tamanna kunngip ajugaalluinnarnissaanut aallaqqaataannaavoq. Suli ‘ajugaalluinnanngilaq’. (Saqq 6:2, NW) Jehova aalajangereerpoq Saatanip silarsuaa piuneerunneqassasoq Saatanillu taassumalu anersaapilui ajoqutaasinnaajunnaarsinneqassasut. Siullermik, Babylonersuaq, upperisarsiornerup eqqunngitsup silarsuarmi tamarmi naalagaaffissua, piuneerussaassaaq. Jehovap silarsuarmi politikkikkut naalakkersuisut atorlugit “arnaq atortittartoq” ajortoq taanna piuneerutissavaa. (Saqq 17:16, 17) Taava Saatanip silarsuaani naalakkersuisut tamaasa Kristusip suujunnaarsilluinnassavai. Taavalu Jiisusi, ‘itinersuup inngiliatut’ taaneqartoq, ajugaalluinnassaaq Saatani anersaapiluillu itinersuarmut igillugit. (Saqq 9:1, 11; 20:1-3) Pissanganartut tamakku Tussiaat 45-mi qanoq siulittuutigineqarnersut misissoriartigu.

KUNNGIP ‘SALLUSUISSUT ILLERSORIARTORPAA’

11. Kristusi “sallusuissut” illersorniarlugu qanoq sorsukkiartorpa?

11 Tussiaat 45:4, NW (45:5) atuaruk. * Kunngip sorsunnissaa nunamik tiguaaniarluni inunnilluunniit inussianngortitsiniarluni sorsunnerussanngilaq. Naapertuilluartumik sorsukkiartornera pissutissaqarluarpoq. “Sallusuissut maniguunnerlu naapertuilluarnerlu” illersorniarlugit sorsukkiartorpoq. “Sallusuissut” illersugassaq pingaarnerpaaq tassaavoq Jehovap kisimi qilammi nunamilu naalakkersuisinnaatitaanera. Saatani pikitsitsigami Jehovap naalakkersuisinnaatitaanera apeqquserpaa. Taamanimiilli ilumoortoq tunngaviusoq tamanna anersaapilunnit inunnillu assortorneqarpoq. Maanna piffissanngorpoq Jehovap kunngitut tanitaata sorsukkiartornissaanut Jehovap naalakkersuisinnaatitaaneranik uppernarsaajartorluni.

12. Kunngi ‘maniguunneq’ illersorniarlugu qanoq sorsukkiartorpa?

12 Aamma ‘maniguunneq’ illersorniarlugu kunngi sorsukkiartorpoq. Jiisusi maniguunnermigut Ataataminullu naalannermigut maligassiuilluinnarnerpaajuaannarpoq. (Es 50:4, 5; Joh 5:19) Kunngip innuttai tamarmik taassuma maligassiaa malittariaqarpaat  maniguullutik sutigut tamatigut Jehova kisimi oqartussaasoq naalallugu. Taamaaliortut kisimik Guutip silarsuassaani nutaami inuusinnaatitaassapput. — Zak 14:16, 17.

13. Kunngi ‘naapertuilluarneq’ illersorniarlugu qanoq sorsukkiartorpa?

13 Aamma ‘naapertuilluarneq’ illersorniarlugu Kristusi sorsukkiartorpoq. Naapertuilluarneq tamanna tassaavoq “Guutip iluarnera”, imaluunniit Jehovap suup eqqortuuneranik suullu eqqunngitsuuneranik najoqqutassiai. (Rom 3:21; 5 Mos 32:4) Esaja Jiisusi Kristusi pillugu ima siulittuivoq: “Kunngiusoq naalagaajumaarpoq iluartuulluni.” (Es 32:1) Jiisusip naalakkersuinermini “qilaat nutaat nunalu nutaaq” kikkut tamarmik naapertuilluartuliorfigisaat pilersissavai. (2 Petr 3:13) Silarsuassami nutaami innuttaasussat tamarmik piumaffigineqassapput Jehovap najoqqutassiaanik maleruaassasut. — Es 11:1-5.

KUNNGI ‘TUPINNANGAARTUNIK’ NAAMMASSISAQARPOQ

14. Kristusip talerpiata “tupinnangaartut” qanoq naammassissavai? (Allaaserisap aallaqqaataani assiliaq takuuk).

14 Tussiaasiortoq allappoq kunngi panani makitsiminut aalajangerlugu sorsukkiartortoq. (Tuss 45:4) Taava panani talerpimminik tigullugu atulerpaa. Tussiaasiortoq Jiisusi pillugu ima siulittuivoq: ‘Talerpippit tupinnangaartut naammassissavai.’ (Tuss 45:4, NW [45:5]) Jiisusi Kristusi Jehovap eqqartuussutai naammassiniarlugit Harmagedonimi sorsukkuni akeqqani tupinnangaartuliorfigissavai. Naluarput kunngi Saatanip silarsuaanik qanorpiaq suujunnaarsitsissanersoq. Nalunngilarpulli Jiisusi qanorluunniit ilioraluarpat tamanna Guutip mianersoqqussutaanik sumiginnaasut kunngillu naalakkersuineranik akuersinngitsut annilaarutigissagaat. (Tuss 2:11, 12) Jiisusi naggatissaq pillugu siulittuilluni oqarpoq inuit sapingajalivissasut “annilaanganermit silarsuarmilu qanoq pisoqarumaarneranut ersinermit, qilaammi nukingi aalatinneqarumaarmata”. Imalu nangippoq: “Taamaalippallu isigiumaarpaat Inuup Ernera nuissamiilluni aggersoq pissarsuulluni naalannassuseqangaarlunilu.” — Luk 21:26, 27.

15, 16.  “Qilammiorpassuit” Kristusimik malinnillutik sorsoqataasussat kikkuussappat?

15 Kunngi aggerpoq “pissarsuulluni naalannassuseqangaarlunilu” Guutimut akeraasut ajugaaffigiartorlugit, tamannalu Saqqummersitani ima nalunaarutigineqarpoq: “[Takuara] qilak ammasoq takuallu, tassaniippoq hesti qaqortoq, hestersorlu ateqarpoq: Ilumoortoq Sallusuitsorlu. Eqqartuussinermini sorsunnerminilu naapertuilluartumik iliortarpoq. Qilammiorpassuit malippaat qaqortunik hesteqarlutik ilupaassianillu qaallorissunik minguitsunik atisaqarlutik. Qarnanit anillassimavoq pana ipittorsuaq inuiaqatigiinnut panartaatissaa, naalakkersussavaalu naalagaasutut tigumiani saviminiusoq atorlugu, viinnimillu tunguiaaffimmi Guutip Ajugaqanngitsup uumitsannerata kamanneratalu piani tullaassissalluni.” — Saqq 19:11, 14, 15.

16 “Qilammiorpassuit” Jiisusimik malinnillutik sorsoqataasussat kikkuussappat? Jiisusi siullermik panani aalajangerlugu Saatanimik anersaapiluinillu qilammiit igitsimmat inngilit Jiisusimik ikiuipput. (Saqq 12:7-9) Taamaattumik pissusissamisuussaaq isummissalluni Kristusip Harmagedonimi sorsunnerani inngilit illernartut sorsoqataassasut. Allanik sorsoqataasoqassava? Jiisusip qatanngutini tanitat ima neriorsorpai: “Ajugaasoq aalajaallunilu ilissinnut suliareqqusannik naggatissaq tikillugu isumaginnittoq taanna inuiaqatigiinnut naalagaassuseqartikkumaarpara. Taassuma kunngisut tigumiani saviminiusoq atorlugu paarissavai, immersakkatut marraasutut sequmisissallugit, soorlu taamaaliornissamut ataatama piginnaaneqartikkaanga.”  (Saqq 2:26-28) Tassa Kristusip sorsoqataanut ‘qilammiorpassuarnut’ aamma ilaassapput taassuma qatanngutai tanitat taamanikkussamut qilaliartitaasimasut. Tanitat Jiisusi ilagissavaat taanna inuiaqatigiinnik suujunnaarsitsilluni ‘tupinnangaartunik’ naammassinnippat.

KUNNGI AJUGAALLUINNARPOQ

17. (a) Kristusip hestia qaqortoq sumut assersuutaava? (b) Pana pisisserlu sumut assersuutaappat?

17 Tussiaat 45:6 atuaruk. Saqqummersitat 6:2-mi ima allassimavoq: “[Takuara] hesti qaqortoq, tassanilu hestersoq pisisseqarpoq. Taanna niaqoruserneqarpoq, aallarporlu ajugaajuarlunilu [aallarporlu ajugaalluni ajugaalluinnassallunilu, NW].” Kunngip hestia qaqortoq assersuutaavoq sorsunnermut naapertuilluartumut Guutimit iluarisaasumut. (Saqq 19:11) Kunngi panami saniatigut aamma pisisseqarpoq. Pana pisisserlu Kristusip akeqqaminik suujunnaarsitseriaasissaanut assersuutaapput.

Timmissat nunarsuarmik minguiaaqquneqassapput (Immikkoortoq 18 takuuk)

18. Kristusip ‘qarsuni’ atorpagit qanoq pisoqassava?

18 Tussiaasiortoq taalliarpalaartumik kunngi pillugu ima siulittuivoq: “Qarsutit silisimasut kappussimapput kunngip akeraasa uummataanni, inuiaat orlorarput illit eqqanni.” Nunarsuarmi sumi tamani suujunnaarsitsineqassaaq. Jeremia ima siulittuivoq: “Naalakkap toqutitai ullussami tassani uppigarsimassapput nunarsuarmi tamarmi.” (Jer 25:33) Pisussaq tamanna pillugu siulittuummi allami ima allassimavoq: “Takuaralu inngili seqinermi qeqartoq. Taassuma timmissat pavani qilaap ataani timmisut tamaasa nipitoqisumik torlulaffigai: ‘Qaallusi Guutip nerisassarpassuarnik sassaalliiffianut katersuukkitsi neriartorlugit kunngit neqaat sakkutuullu naalagarsuisa neqaat naalagartallu neqaat hestillu taakkunanilu hestersut neqaat kiisalu inussiaanngitsut inussiaatillu, angisuut mikisullu neqaat.’” — Saqq 19:17, 18.

19. Kristusi qanoq ajugaalluinnassava?

19 Saatanip silarsuaanik ajortumik suujunnaarsitsereeruni kunngersuaq Jiisusi Kristusi ‘ajugaajartussaaq’. (Tuss 45:4, NW [45:5]) Saatanimik anersaapiluinillu itinersuarmut igitsinermigut ajugaalluinnassaaq. Taakku itinersuarmiissapput Jiisusip 144.000-illu ukiuni 1000-ini qilammiit naalakkersuineranni. (Saqq 20:2, 3) Diaavulu anersaapiluilu itinersuarmi parnaarussaaqqanerminni ajoqusiisinnaassannginnamik toqungasutut issapput. Nunarsuarmiittut tamarmik Saatanimit anersaapiluinillu ajortumik sunnerneqarnatik kunngip naalakkersuinera nuannaarutigisinnaavaat. Nunarsuup tamarmi paratiisinngunnginnerani kunngimik 144.000-inillu nuannaaqateqarnissamut allamik pissutissaqarpoq. Pisussaq pissanganartoq tamanna allaaserisami tulliuttumi sammineqassaaq.

^ par. 11 Tussiaat 45:4, NW (45:5): “Alutornassutsinnilu ajugaajartorit; sallusuissut maniguunnerlu naapertuilluarnerlu illersoriartukkit, talerpippillu tupinnangaartut naammassissavai.”