Ajornartorsiutit misilinneqarnerillu erloqissutigingaarsinnaasarpavut. Taakku isumaalutitsisinnaallutillu qasutitsisinnaallutillu inuunitsinnik isiginnittaatsitsinnik allannguisitsisinnaapput. Itsaq Israelimi kunngi Daavi erloqingaarsimavoq. Erloqinini qanoq naammagalugu atorpaa? Daavi killitsinnartumik ima tussiaasiorpoq: “Nipituumik Naalakkamut torlulavunga, Naalagaq qinnuigaara saammaateqqullunga. Kappialassutinnik aniatitsiffigaara, annikilliuutinnik eqqartuiffigalugu. Sapilivissagaluaruma nalunngilat aqqutiga.” Aap, Daavi maniguulluni Guutimut qinunikkut ikioqquvoq. — Tuss 142:2-4.

Daavi erloqinartorsiornermini maniguulluni ikioqqulluni Jehovamut qinusarpoq

Tussiaammi allami Daavi ima erinarsorpoq: ‘Ataaseq Naalakkamit qinnutigaara, tamanna piumaqaara: Naalakkap illuani ineqarumallunga ullut inuuffigisassakka tamaasa naallugit, Naalakkap alianaassusia qimerloorsinnaajumallugu naalaffiutaalu takorannaarsinnaajumallugu.’ (Tuss 27:41900) Daavi Levikkuunngilaq, illernartuutilli silarliata silataani, ilumoortumik pallorfiginnittarfiup eqqaani, nikorfasoq takorlooruk. Daavi qamannga pisumik qujamasungaarlunilu Jehovap ‘alianaassusia qimerloorniassagamiuk’ inuunermi sinnerani tassaniittuarusuppoq.

Oqaaseq “alianaatsoq” ilorrisimaarnermut, tassa eqqarsaatitsigut, misigissutsitsigut maluginiutitsigullu nuannersumik sunnerneqarnermut, attuumassuteqarpoq. Daavip Guutimik pallorfiginninneq qujamasuutigiuaannarsimavaa. Imminut ima aperigit: ‘Uanga Daavitut misigivunga?’

JEHOVAP NAALAFFIA ANERSAAKKUT ITTOQ ‘TAKORANNAARUK’

Ullumikkut Jehova naalaffimmi aalajangersimasumi pallorfigineqarneq ajorpoq, naalaffimmili anersaakkut ittumi — guutisiornermik aaqqissuussaanermi illernartumi — pallorfigineqartarpoq. * Aaqqissuussaaneq tamanna aamma ‘takorannaarutsigu’, tassa qujamasuutigigutsigu, Jehovap ‘alianaassusia qimerloorsinnaassavarput’.

Ikikkagassanik pilliivik kanngussamik qalligaq illernartuutip isaariaata sioraani inissisimavoq. (2 Mos 38:1, 2; 40:6) Pilliivik taanna Jiisusip inuunerminik pilliutiginninneranik Guutip kajumilluni akuersiumaarneranut assersuutaavoq. (Hebr 10:5-10) Tamanna uagutsinnut qanoq kinguneqartoq eqqarsaatigiuk. Apustili Paulusi ima allappoq: “Guutimut akeraatilluta ernerata toquagut saammaannartitaavugut.” (Rom 5:10) Aap, Jiisusip aavanik kuisamik upperinninnitsinnik ersersitsinitsigut Guutimut ikinngutaallualersinnaavugut. — Tuss 25:14.

‘Ajortuliavut piiarneqartarmata’ Jehovamit ‘ullunik inuummarissiffissanik’ tunineqartarnerput misigisarparput. (ApS 3:19, 20) Pissutsit atukkavut parnaarussap toqutassap iliuuserisimasaminik peqqissimissutiginnittup atugaanut assingupput. Pillaatitut toqunneqarnissani utaqqitillugu inuunerminik allannguingaarpoq, tamannalu pissutigalugu eqqartuussisup naakkittartup taassuma toqutassanngortinneqarnera atuukkunnaarsippaa. Takorlooruk parnaarussaq qanoq nuannaartigalunilu oqiliallatsigisimassasoq! Eqqartuussisup pisimaneratut Jehova inunnut peqqissimisunut naakkinnittuliortarpoq toqumillu pillagassanngortitsinermik atuukkunnaarsitsisarluni.

ILUMOORTUMIK PALLORFIGINNINNEQ NUANNAARUTIGIUK

Jehovap illuani Israelikkut amerlangaartut pallorfiginnittut, Inatsisinik atuaasut tamatumalu kingorna nassuiaasut, tipigissaatilliissutinik ikikkaasut aamma palasit Levikkullu illernartumik kiffartortut Daavip qimerloortarsimasaasa ilagaat. (2 Mos 30:34-38; 4 Mos 3:5-8; 5 Mos 31:9-12) Itsaq Israelikkut ilumoortumik pallorfiginninnermi iliuuserisartagaat taakku tamarmik ullutsinnut sanilliunneqarsinnaapput.

 Ullumikkut ‘qatanngutigiit peqatigiillutik ineqaraangata iluartarlunilu nuannertarpoq’, soorlu itsaq taamaassimasoq. (Tuss 133:11900) Ullumikkut nunarsuaq tamakkerlugu qatanngutigiissuit amerliartupiloorput. (1 Petr 2:17) Ataatsimiinnitsinni Guutip oqaasia atuarneqartarlunilu nassuiarneqartarpoq. Jehova peqatigiissortani aqqutigalugu ilinniartitsinermik aaqqissuussamik annertuumik pilersitsisimavoq. Anersaakkut nerisassat naqiterneqartartut nammineq ilaqutariittulluunniit atuaqqissaarnitsinni atorsinnaasavut aamma sinnilissuupput. Siulersuisoqatigiinni ilaasortaq ima allappoq: “Jehovap oqaasianik eqqarsaatiginneqqissaartarneq, tamatumalu qanoq paasisariaqarneranik eqqarsaatiginninneq aamma ilisimassuseqalerniarneq paasisimassuseqalerniarnerlu inuuninni anersaakkut pisuunnguutigalugillu nalerisimaalissutigaakka.” Aap, ‘ilisimasaqarneq nuannaalissutigisinnaavarput’. — Uss 2:10.

Ullumikkut Guutip kiffaasa qinnutaat akuerineqarsinnaasut ullut tamaasa Jehovamut annguttarput. Jehovap qinnutit taakku tipigissaatilliinertut isigai. (Tuss 141:2) Jehovap Guutip maniguulluta qinnutitsinnik tusarnaartarnerminik tipaatsuutiginnittarneranik eqqarsaatiginninnerput qamannga pisumik nuannaalissutigisarparput!

Mosesi Jehovamut ima qinuvoq: “Naalagaq, Guutitta naalannassusiata najorlisigut! Assatsinnik sulinitsinni pissatsitsigut.” (Tuss 90:17) Nakimaalluta kiffartorutta suliavut Jehovamit pilluaqquneqassapput. (Uss 10:22) Immaqa soqutiginnittoq sallusuissummik ilassinninnissaanut ikiornikuuarput. Imaassinnaavoq inuppassuit soqutiginninngikkaluartut, peqqiillioraluarluta, misigissutsikkut anniaateqaraluarluta malersorneqaraluarlutaluunniit ukiorpassuarni oqaluussisarsimasugut. (1 Th 2:2) Taamaakkaluartorli ‘Jehovap alianaassusia’ Ataatattalu qilammiusup suliatsinnik qiimmattaatiginninnera takusarparput, ilaa?

Daavi ima erinarsorpoq: “Naalagaq, illit tassaasutit pisassara aalajangersimasoq ermuseralu, pissarsiassara illit qularnaallisippat. Ussersaatit nunaatissarsivaannga pitsaalluartunik.” (Tuss 16:5, 6) Daavip ‘pisassani’, tassa Jehovamut qanimut attaveqarnini taassumunngalu kiffaasinnaanermik immikkut pisinnaatitaaffeqarnini, qujamasuutigaa. Uagut Daavitut misilinneqangaarsinnaavugut, taamaakkaluartorli aamma anersaakkut amerlasoorpassuarnik pilluaqqussutisiaqartarpugut! Taamaattumik ilumoortumik pallorfiginninneq nuannaarutigiuarlugulu Jehovap naalaffia anersaakkut ittoq ‘takorannaarutigiuartigu’.

^ par. 6 Takukkit Napasuliaq Alapernaarsuiffik 1. juuli 1996-imoortumi qupp. 14-imiit 24-mut.