Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Januaari 2014

“Naalagaaffiit tikiulli” — Qaqugu?

“Naalagaaffiit tikiulli” — Qaqugu?

“Tamakku tamaasa takulerussigit ilisimassavarsi taanna tikiutilivissoq.” — MATT 24:33.

1, 2. (a) Sooq inuk ilaatigut tappiiffeqarsinnaava? (b) Guutip naalagaaffia pillugu sumik paasisaqarpugut?

IMMAQA maluginiarnikuuat pisimasumut isiginnittuusut assigiinngitsunik eqqaamasaqartartut. Aamma nakorsap nappaat suussusersereeraa napparsimasup nakorsaq qanorpiaq oqarnersoq eqqaamalluartarunanngilaa. Imaluunniit immaqa inuup matuersaatini isarussaniluunniit saaminiikkaluartut nanisinnaasanngilai. Sooq taamaattarpat? Ilisimatuut oqarput ataatsikkut arlalinnik sammisaqaraangatta ilaatigut tappiiffeqalersinnaasartugut, tassa maluginngitsuugaqarlutaluunniit puiortoorsinnaasartugut. Qarasarput ataasiinnarmik aallussaqarsinnaannguatsiarpoq.

2 Tamatumunnga assingusumik ullumikkut inuppassuit silarsuarmi pisartunut tunngatillugu “tappiitsuupput”. 1914-imiilli pissutsit allanngorujussuarnerat nassuerutigigaluarlugu tamakku qanoq paasisariaqarnersut “takusinnaanngilaat”, imaluunniit paasisinnaanngilaat. Uagut Biibilimik atuaqqissaartaratta paasivarput 1914-imi Jiisusi qilammi kunnginngortitaammat Guutip naalagaaffia tikiussimasoq. Qinnulli una suli tamakkiisumik akineqarsimanngilaq: “Naalagaaffiit tikiulli, piumasat qilammisut nunamissaaq pili.” (Matt 6:10) Qinnut taanna  tamakkiisumik akineqassaaq silarsuaq ajortoq manna atuukkunnaarsinneqarpat. Aatsaat taamaattoqarpat Guutip piumasaa nunami qilammisut pissaaq.

3. Guutip oqaasianik atuaqqissaartarnerput iluaqutigalugu suut paasivavut?

3 Guutip oqaasianik atuaqqissaartaratta paasivarput siulittuutit ullumikkut eqquuttut. Inuilli amerlanersaasa paasinnittaasiat allaalluinnarpoq! Inuunerminni ulapputeqangaaramik Kristusip 1914-imiilli naalakkersuilerneranut qanittukkullu silarsuarmik ajortumik piuneerutitsinissaanut uppernarsaatit erseqqissut takusinnaanngilaat. Imminut ima aperigit: ‘Suli upperaara silarsuup ajortup matuma suujunnaarnissaa qanillisoq taamaattoqarnissaalu nunarsuarmi pisartunit uppernarsarneqartoq?’ Aamma Nalunaajaasunngorlaajugaluarlutit sunik pingaartitaqarpit? Qanorluunniit akissagaluaruit Guutip nunarsuarmut piumasaata qanittukkut pinissaanik upperinninnissatsinnut pissutaasut pingasut samminissaat iluaqutigisinnaavat.

HESTERSUT TIKIUTEREERPUT

4, 5. (a) Jiisusi 1914-imiilli qanoq iliorpa? (Allaaserisap aallaqqaataani assiliaq takuuk). (b) Hestersut pingasut sunut assersuutaappat, siulittuullu qanoq eqquuppa?

4 Jiisusi Kristusi 1914-imi qilammi niaqoruserneqarpoq, tassa Guutip naalagaaffiani kunnginngorpoq. Saqqummersitani kapitali 6-imi Jiisusi hestimik qaqortumik hestersutut allaatigineqarpoq. Kunnginngorami ingerlaannaq Saatanip silarsuaa ajortoq sorsukkiartorfigaa. (Saqqummersitat 6:1, 2 atuakkit). Siulittuutigineqarpoq Guutip naalagaaffiata naalakkersuilernerata kingorna silarsuarmi pissutsit ajornerulipallassasut. Sorsunnerit, kaannersuit, nappaassuit toqussutaasullu allat aatsaat taama atugaatigilissapput. Pissutsit alianaqisut tamakku siulittuummi hestersunut pingasunut Kristusi malisungaannarlugu hesterlutik aallartunut assersuunneqarput. — Saqq 6:3-8.

5 Siulittuutigineqartutut sorsunnerit ‘nunarsuarmi eqqissineerutitsipput’. Inuiaat amerlasuut suleqatigiinniarlutik eqqisseqatigiittuarniarlutillu neriorsuisimagaluartut sorsunnersuaq siulleq sorsunnerpassuit ajoqutaaqisut siullersaraat. 1914-imiilli aningaasatigut ilisimatusarnikkullu siumukarluartoqaraluarsimasoq kaannersuit silarsuarmi toqqissisimajunnaarsitsisarput. Aamma assortorneqarsinnaanngilaq ukiut tamaasa inuit millionillit nappaassuit, pinngortitami ajunaarnersuit alianaqisullu allat toqussutigisaraat. Pissutsit tamakku tamarmik aatsaat taama navianartigaat amerlatigalutillu, aatsaallu inuit taama amerlatigisut tamakku toqqutigaat. Tamanna qanoq paasisariaqarnersoq eqqumaffigaajuk?

Hestersut hestertillugit silarsuarmi pissutsit ajorneruleraluttuinnarput (Immikkoortut 4 aamma 5 takukkit)

6. Kikkut siulittuutit Biibilimiittut eqquutitinneqarnerat eqqumaffigisimavaat, tamannalu sunissamut kajumississutigaat?

6 1914-imi ukiualunnguanilu tulliuttuni sorsunnersuup siulliup aallartinnera nuallussuarlu (aamma Spaniamiut nappaataannik taaneqartoq) inuppassuit allamut saasaatigaat. Kristumiulli tanitat ‘Guutimik nalusut piffissarititaasa’ 1914-imi naanissaat erinisullutik utaqqivaat. (Luk 21:24) Tanitat qanorpiaq pisoqassanersoq nalugaluarlugu paasivaat Guutip naalagaaffiani 1914-imi pingaarutilimmik pisoqassasoq. Siulittuullu paasillualeriaramikku Guutip naalakkersuilereernera allanut sapiillutik nalunaarutigilerpaat. Guutip naalagaaffianik tusarliussaq pillugu oqaluussisut ilarpassui sakkortuumik malersorneqarput. Tamannattaaq Biibilimi siulittuutit eqquunneraat. Ukiuni qulikkuutaani tulliuttuni Guutip naalagaaffianut akeraasut inatsiliornermikkut, nakuusernermikkut, parnaarussassanngortitsinermikkut allaallu toqutitsinermikkut oqaluussisoqarunnaarsitsiniarsuaarput. — Tuss 94:201990; Saqq 12:15.

7. Sooq inuit amerlanersaasa ullumikkut pisartut qanorpiaq paasisariaqarnersut paasisinnaanngilaat?

 7 Guutip naalagaaffiata qilammi naalakkersuilersimaneranut uppernarsaaterpassuaqaraluartoq soormitaava inuit amerlanersaasa tamanna qanoq paasisariaqarnersoq akueriumanngikkaat? Sooq takusinnaanngilaat silarsuarmi pisartut Biibilimi siulittuutit eqquunnerigaat? Takorusutatik kisiisa takusarpaat? (2 Kor 5:7) Inuunerminni ulapputeqangaaramik Guuti qanoq iliortoq takusinnaanngilaat? (Matt 24:37-39) Taakkua ilaasa eqqarsaataat Saatanip silarsuaata isumaanit anguniagaanillu allamut saasarneqarpat? (2 Kor 4:4) Guutip naalagaaffiata naammassisai takusinnaaqqullugit upperneq anersaakkullu paasisimasaqarluarneq pisariaqartippavut. Anersaakkut tappiillisinneqannginnerput qujamasuutigingaarparput, ilaa?

AJUSSUSEQARALUTTUINNARPOQ

8-10. (a) Timotheusimut allakkat aappaat 3:1-5-imi allassimasut qanoq eqquuppat? (b) Sooq oqarsinnaavugut ajussuseqaraluttuinnartoq?

8 Guutip naalagaaffiata qanittukkut nunarsuarmut naalakkersuinissaanik ilisimanninnitsinnut pissutaasut aappaat tassaavoq: Silarsuup aatsaat taama ajortiginera ajorneruleraluttuinnarneralu. Siulittuutip Timotheusimut allakkat aappaanni kapitali 3-mi allassimasup eqquunnera ukiuni 100-ingajanni takusimavarput. Ileqqulersuutit versini tallimani siullerni allaatigineqartut nunarsuarmut tamarmut siammarsimapput. Illittaaq tamanna maluginiarpiuk? Ajussuseqaraluttuinnarnermut ersiutaasut ilaat sammeriartigit. — 2 Timotheusi 3:1, 13 atuakkit.

9 Inuit 1940-kkunni 1950-ikkunnilu ingasagisaat inuit ullumikkut suliffimmi aamma aliikkusersuinerup, timersornerup atisalersoriaatsillu tungaasigut ingasagisaannut naleqqiutikkit. Ingasattumik nakuuserneq kinguaassiuutitigullu inuunerlungaarneq nalitsinni ulluinnarsiutaapput. Inuit nakuusernermikkut, inuunerlunnermikkut ileqqorlunnermikkullu allanit soqqusaalliorneruniartarput. Fjernsynikkut aallakaatitat 1950-ikkunni ajorineqartartut ullumikkut ilaqutariit aliikkutarisassaattut ajunngitsuunerarneqartarput. Inuppassuit maluginiarsimavaat anguteqatiminoortartut  arnaqatiminoortartullu aliikkusersuinermut atisalersoriaatsimullu sunniuteqangaartartut inooriaatsiminnillu kikkunnut tamanut nittarsaassisarlutik. Uagut Jehovap tamatumunnga isiginnittaasia nalunnginnatsigu qujamasungaarpugut! — Judasi 14, 15 atuakkit.

10 Aamma inuusuttut siornatigut pikitsitsiumatunerat inuusuttut ullumikkut iliuuserisartagaannut naleqqiuguk. Assersuutigalugu 1950-ikkunni angajoqqaat qitornamik pujortartarnerat, imigassartortarnerat qiteriaasiallu isumakuluutigisarpaat. Ullumikkulli nutaarsiassat tupannartut soorlu makku nalinginnaapput: 15-inik ukiullip atuaqatini marluk aallaallugit toquppai 13-illu ajoquserlugit. Inuusuttuaqqat aalakoortut niviarsiaraq qulingiluanik ukiulik peqqarniitsumik toquppaat, aamma ataataa illortaavalu unatarujussuarpaat. Nunamilu Asiamiittumi ukiut qulit ingerlaneranni pinerlunnerit tamarmik affaat inuusuttuaqqanit piliarineqartarput. Ullumikkut pissutsit ajornerulingaarnerat ilumuunnginnerarneqarsinnaanngilaq.

11. Sooq inuit amerlanerit pissutsit ajorneruleraluttuinnarnerat paasisinnaanngilaat?

11 Apustilip Petrusip oqaasii uku ilumoorluinnarput: “Ullussani kingullerni [tikiukkumaarput] mitallersut pilerissusertik maliinnarlugu inuusut mitallerlutillu ima oqartut: ‘Tikiunnissaaninguna neriorsuut qanoq piniartoq? Siuaasat toqummatali suut tamarmik pinngortinneqaqqaarnermissut ittuaannarsimapput.’” (2 Petr 3:3, 4) Sooq inuit ilaat taamatut isiginnittaaseqarpat? Pisut aalajangersimasut nalinginnaaneruleriartortillugit soqutigineqarpallaarunnaariartortarunarput. Ikinngutitta ilaat allatut pissusilersuleriataarpat immaqa tupassaagut. Inuilli amerlanerit isiginnittaasiat pissusilersornerallu ukiut arlallit ingerlaneranni arriitsumik allanngorpat arajutsissagunarparput. Taamaakkaluartorli taamatut arriitsumik allannguineq navianartorujussuuvoq.

12, 13. (a) Sooq silarsuarmi pissutsit nikallungassutigisariaqanngilavut? (b) Ullut kingulliit ‘atugarliungaarfiusut’ naammagalugit atornissaannut suna iluaqutigissavarput?

12 Apustilip Paulusip mianersoqquaatigut ullut kingulliit ‘atugarliungaarfiujumaartut’. (2 Tim 3:1) Pissutsilli naammagalugit atornissaat ajornanngilaq, taamaattumillu toqqorluta inuusariaqanngilagut. Pakatsissutivut annilaangagisavullu suulluunniit qaangersinnaavavut. Jehova, taassuma anersaava kristumiullu ilagiit ikiortigalugit Jehovamut aalajaattuarsinnaavugut. Guutip “pissaaneq asseqanngitsoq” uagutsinnut tunniukkumavaa. — 2 Kor 4:7-10.

13 Paulusip ullut kingulliit pillugit siulittuut ima aallarnerpaa: ‘Ilisimassavat’. Tamanna siulittuutip eqquunnissaanut uppernarsaataavoq. Ilisimavarput pissutsit Jehovap silarsuarmik suujunnaarsitsinissaata tungaanut ajorneruleraluttuinnassasut. Inuit oqaluttuarisaanerannit erserpoq nunat ileqqussatigut ajorneruleraangata tamanna ajalusoornermik kinguneqartartoq. Silarsuarmi tamarmi ileqqussatigut pissutsit aatsaat taama ajortigaat. Inuppassuit tamanna qanoq paasineqassanersoq soqutiginngikkaluaraat uagut 1914-imiilli pisut pissutigalugit qularutiginngilluinnarparput Guutip naalagaaffiata ajussuseq qanittukkut atuukkunnaarsikkumaaraa.

KINGUAARIISSOQATIGIIT TAAKKU NUNGUSSANNGILLUINNARPUT

14-16. Guutip naalagaaffiata ‘tikiunnissaanik’ upperinninnitsinnut pissutaasut pingajuat suua?

14 Naggatissap qanillineranik upperinninnitsinnut pissutaasut pingajuat Guutip innuttaasa oqaluttuarisaanerannit erserpoq. Assersuutigalugu Guutip naalagaaffiata qilammi naalakkersuilernera sioqqullugu tanitat ikittunnguit aalajaallutik Guutimut kiffartorput. 1914-imi ilimagisamissut  pisoqanngimmat qanoq iliorpat? Taakkua amerlanersaat misilinneqaraluarlutik malersorneqaraluarlutillu aalajaallutik Jehovamut kiffartortuarput. Ukiut ingerlaneranni tanitat taakkua amerlanersaat, immaqaluunniit tamarmik, nunarsuarmi aalajaallutik toqoreersimapput.

15 Jiisusi Saatanip silarsuaata naggatissaa pillugu siulittuigami ima oqarpoq: “Tamakku tamaasa pereersinnagit kinguaariissoqatigiit taakku nungussanngilluinnarput.” (NW) (Matthæusi 24:33-35 atuakkit). Paasivarput Jiisusip “kinguaariissoqatigiit” eqqaagamigit kristumiut tanitat eqimattat marlunnut immikkoortinneqartut pigai. Eqimattat siulliit 1914-imi inuusimallutillu ukiumi tamatumani Kristusi kunngitut naalakkersuilersoq paasivaat. Taakku 1914-imi imaluunniit ukioq tamanna sioqqullugu anersaamit illernartumit taninneqarsimapput. — Rom 8:14-17.

16 ‘Kinguaariissoqatigiinnut’ ilaasut eqimattat siulliit ilaat suli nunarsuarmiitillugit eqimattat aappaat tamarmik inuullutillu anersaamit illernartumit taninneqarsimapput. Taamaattumik ullumikkut tanitat ilaannaat ‘kinguaariissoqatigiinnut’ Jiisusip eqqaasaanut ilaapput. Ullumikkut eqimattat aappaat utoqqaliartorput. Jiisusilli oqaasiinit Matthæusip allagaani 24:34-miittunit qularunnaarsinneqarpugut ‘kinguaariissoqatigiinnut’ ilaasut ilaat annikilliornartussarsuaq sioqqullugu ‘nungussanngilluinnartut’. Taamaalillutalu qularutiginngilluinnarparput Guutip naalagaaffiani kunngi qanittukkut ajortunik suujunnaarsitsillunilu silarsuarmik nutaamik naapertuilluarfiusumik pilersitsissasoq. — 2 Petr 3:13.

KRISTUSIP AJUGAANISSAA QANILLIVOQ

17. Uppernarsaatit sammeriikkavut sumik paasinninnissatsinnut iluaqutigaavut?

17 Uppernarsaatit pingasut sammeriikkavut tunngavigalugit qanoq isummersinnaavugut? Jiisusip uagutsinnik mianersoqqusineratut naggatissap nalliunnissaanut ulloq nalunaaquttap-akunneraluunniit naluarput. (Matt 24:36; 25:13) Paulusilli eqqaavaa ‘annannissarput maanna qaninnerulersoq’. (Romamiut 13:11 atuaruk). Piffissami Paulusip eqqaasaani maanna inuuvugut. Siulittuutit Biibilimiittut Jehovallu Guutip Jiisusillu Kristusip iliuuserisai eqqumaffigigutsigit silarsuup ajortup matuma naggatissaata qanillineranut uppernarsaatit erseqqissut takusinnaassavavut.

18. Jiisusimik Kristusimik kunngimissut akuerinnikkumanngitsut qanoq pineqassappat?

18 Jiisusip Kristusip hestimik qaqortumik hestersup oqartussaassusianik akuerinnikkumanngitsut kukkunertik qanittukkut nassuerutigisariaqassavaat. Qanittumik eqqartuussaanissaminnit qimaasinnaanngillat. Taamanikkussamut inuppassuit annilaangaqalutik nillerumaarput: ‘Kina atasinnaassava?’ (1936) (Saqq 6:15-17) Saqqummersitani kapitali 7-imi apeqqut tamanna akineqarpoq. Tanitat aamma nunarsuarmi inuunissamik neriugisallit Guutimit iluarineqaramik ‘atassapput’. Taava savat allat ‘amerlangaartut’ annikilliornartussarsuarmit aniguissapput Guutillu silarsuaani nutaami inuulissallutik. — Saqq 7:9, 13-15.

19. Naggatissap qanillineranik upperinnilluinnartutit, suna qilanaaraajuk?

19 Siulittuutit Biibilimiittut nalitsinni eqquuttut eqqumaffigiuarutsigit Saatanip silarsuaanit tammartinneqarnavianngilagut. Silarsuarmi pisartunut tunngatillugu “tappiitsuunavianngilagut”. Qanittukkut Kristusip ajugaalluinnassallunilu sorsunnermi naapertuilluartumi Harmagedonimi silarsuaq ajortoq manna suujunnaarsissavaa. (Saqq 19:11, 19-21) Tamanna nalliutereerpat nuannaangaarnissarput takorlooriaruk! — Saqq 20:1-3, 6; 21:3, 4.