Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Januaari 2014

Meeraaninni aalajangernera

Meeraaninni aalajangernera

Meeraallunga

1985-imi qulinik ukioqartunga meeqqat Cambodiamiit USA-mut nuussimasut atuarfinni Columbusimi Ohiomiittumi atualerput. Nukappiaqqat ilaata tuluttuulaalaarsinnaasup titartaalluni pisimasunik amiilaarnartunik — inuit naalliutsitsinneqarnerannik, toqutsinernik annanniarlutillu qimaasariaqartoqartarneranik — paasitippaanga. Unnukkut innareerlunga meeqqat taakku eqqarsaatigigaangakkit qiasarpunga. Atuaqatikka paratiisi makititaanissarlu pillugit paasitikkusukkaluarpakka, oqaatsikkali paasisinnaanngilaat. Taama ukiukitsigigaluarlunga aalajangerpunga atuaqatikka Jehova pillugu paasitissinnaaniassagakkit Cambodiamiusut ilinniarniarlunga. Aalajangernerma inuuninnut sunniuteqangaarumaarnera taamani paasilluanngilara.

Cambodiamiusut ilinniarneq imaannaanngeqaaq. Marloriarlunga aalajangeraluarpunga ilinniarniarnera taamaatiinnarniarlugu, Jehovalli angajoqqaakka aqqutigalugit taamaatiinnannginnissaanut kajumissaarpaanga. Kingusinnerusukkut ilinniartitsisuma atuaqatimalu aningaasarsiorluarnartumik suliffittaarnissara noqqaassutigeqqullugu tativaannga. Pionerinngorusuppungali, taamaattumillu aalajangerpunga highshoolimi pikkorissarniarlunga ullup ilaannaa suliffittaarsinnaaqqullunga. Atuareeraangama ualikkut pionerit oqaluusseqatigisarpakka. Aamma ilinniartut ilaat tuluttut ilinniarniartut ilinniartittarpakka — tamannalu kingusinnerusukkut iluaqutigingaarpara.

16-inik ukioqarlunga tusarpara Long Beachimi Californiamiittumi oqaluussisartoqatigeeqartoq Cambodiamiusut oqaluttunik. Taakku tikeraarpakka, Cambodiamiusullu atuarnermik ilinniarpunga. Atuarfimmit soraarummeerama ingerlaannaq pionerinngorpunga najukkannilu Cambodiamiunut oqaluussisarlunga. 18-inik ukioqarlunga Cambodiamut nuunnissara eqqarsaatigilerpara. Taamani Cambodia suli navianartorsiorfiuvoq, inoqarporli 10 millioninik, taakkualu amerlanersaasa nutaarsiassaq nuannersoq tusarsimanngisaannarpaat. Aamma nunami tamatumani ilagiit ataasiinnaapput 13-inik oqaluussisartullit. 19-inik ukioqarlunga Cambodiamut tikeraaqqaarnerma kingorna ukiut marluk qaangiuttut nuunniarlunga aalajangerpunga. Nutserisutut tuluttoornermillu ilinniartitsisutut ullup ilaannaa sulisalerpunga. Kingusinnerusukkut uattut anguniagalimmik nuliartaarpunga. Nuannaarutigingaarparput marluulluta Cambodiamiorpassuit Jehovamut Nalunaajaasunngornissaannut ikiornikuugatsigit.

Jehovap ‘uummatima kissaatigisaanik’ tuninikuuaanga. (Tuss 37:4) Oqaluussineq inuup iliuuserisinnaasaanit tamanit nalerisimaarnarnerpaavoq. Ukiut 16-it matuma siorna Cambodiamut nuunnerma nalaani ilagiit ataasiinnaapput 13-inik oqaluussisartullit, oqaluussisartulli amerlingaarmata maanna ilagiit 12-iupput, oqaluussisartoqatigiillu avinngarusimasumiittut sisamaapput! — Jason Blackwellimit oqaluttuarineqarpoq.