‘Kajumittumik tunisisoq Guutimit nuannarineqartuuvoq!’ — 2 KOR 9:7.

1. Inuppassuit suut pillugit pilliuteqartarpat, aamma sooq?

INUIT pingaartitatik pillugit pilliuteqarumasarput. Angajoqqaat piffissartik, aningaasaatitik nukitillu meeqqamik iluaqutissaannut atortarpaat. Timersortartut inuusuttut ikinngutimik pinnguarlutillu nuannisaqatigiinneranni OL-imut ilaarusullutik ullormut nalunaaquttap-akunnerpassuit sungiusarnermut atortarpaat. Jiisusi aamma pingaartitani pillugit pilliuteqarpoq. Taassuma inuulluataarnissani qitorniornissaniluunniit anguniagarinngilai. Nukinili tamaasa Guutip naalagaaffianik tapersersuinermut atorusuppai. (Matt 4:17; Luk 9:58) Jiisusip ajoqersugai aamma amerlasuunik pilliuteqarput. Guutip naalagaaffia inuunerminni pingaarnerpaatikkamikku taanna pillugu pilliuteqarput. (Matt 4:18-22; 19:27) Imminut ima aperisariaqarpugut: ‘Inuuninni suna pingaarnerpaatippara?’

2. (a) Kristumiut tamarmik sunik pilliuteqartariaqarpat? (b) Ilaat immikkut qanoq pilliuteqartarpat?

2 Kristumiut tamarmik Guutimik qanimut ikinnguteqarusukkunik pilliutinik aalajangersimasunik pilliuteqartariaqarput. Qinunermut, Biibilimik atuarnermut, ilaqutariittut atuaqqissaaqatigiinnermut, ataatsimiinnernut najuunnermut oqaluussinermullu piffissatsinnik nukitsinnillu atuisarnivut pilliutaapput pilliutigineqartariaqartut. * (Jos 1:8; Matt 28:19, 20; Hebr 10:24, 25) Iliuuserisartakkavut Jehovallu pilluaqqusisarnera pissutigalugit oqaluussineq siumukarluarlunilu inuit amerliartuinnartut ‘qaqqamut Jehovap naalaffiata inaanukarnermikkut’ Guutimik pallorfiginnipput. (Es 2:2) Qatannguterpassuit Guutip naalagaaffianik tapersersuiniarlutik Betelimi kiffartornikkut, naalagaaffilersaarfinnik ataatsimeersuartarfinnillu sanaartoqataanikkut, ataatsimeersuarnernik aaqqissueqataanikkut pinngortitamiluunniit ajunaarnersuaqarnerani eqqugaasunik ikiuinermikkut pilliuteqartarput. Taamatut  immikkut suliniarnerit piumasaqaataanngikkaluartut Guutip naalagaaffianik tapersersuinermut pingaaruteqarput.

3. (a) Guutip naalagaaffianut pilliuteqartarnerput qanoq iluaqutigisarparput? (b) Apeqqutit suut sammissavavut?

3 Ullumikkut sapinngisatsinnik Guutip naalagaaffianik tapersersuinissarput aatsaat taama pingaaruteqartigivoq. Qatannguterpassuit Jehovamut pilliuteqarnissamut kajuminnerat tipaatsuutigaarput. (Tussiaat 54:8 atuaruk). Uaguttaaq taamaaliorutta Guutip naalagaaffiata tikiunnissaata utaqqinerani qiimmattassallutalu pilluaqqussutit nuannaarutigissavavut. (5 Mos 16:15; ApS 20:35) Tamatta imminut misissoqqissaarnissarput imatullu aperinissarput pingaaruteqarpoq: Guutip naalagaaffianut pilliuteqarnerusinnaavugut? Piffissarput, aningaasaativut, nukivut piginnaanivullu qanoq atortarpavut? Suut mianersuutigisariaqarpavut? Kajumissutsimik pilliuteqarneq pillugu najoqqutassiat ilinniarfigisinnaasavut misissoriartigit. Tamanna nuannaartuarnissatsinnut iluaqutigissavarput.

ITSAQ ISRAELIMI PILLIUTIGINEQARTARTUT

4. Itsaq Israelikkut pilliuteqartarnertik qanoq iluaqutigaat?

4 Itsaq Israelikkut ajortiliunerminnik isumakkeerfigineqaqqullutik pilliuteqartartussaapput. Jehovamit iluarisaajumallutik pilliuteqartariaqarput. Pilliutit ilaat piumasaqaataapput allallu kajumissutsimik pilliutigineqarsinnaallutik. (3 Mos 23:37, 38) Pilliutit ikikkagassat Jehovamut kajumissutsimik pilliutigineqarsinnaapput, imaluunniit tunissutigineqarsinnaapput. Tamatumunnga tunngatillugu Salomop nalaani naalaffiup atoqqaarfissiortinneqarnerani Jehovamut pilliuteqarneq assersuutissaalluarpoq. — 2 Nal 7:4-6.

5. Jehovap piitsut qanoq pilliuteqarsinnaatippai?

5 Inuit tamarmik assigiimmik tunissuteqarsinnaannginnerat Jehovap nalunngilluarpaa. Israelikkut taamaallaat sapinngisaminnik tunissuteqaqquai. Jehovap inatsisaani uumasunik pilliuteqartarnissaq taakkualu aavisa kuineqartarnissaat piumasarineqarpoq. Pilliutit taakkua Jiisusikkut ‘ajunngitsuutit nalliuttussat tarraannaraat’. (Hebr 10:1-4) Jehovali piumasaqaatiminut tunngatillugu ingasaassinianngitsuuvoq. Assersuutigalugu Guutip inuit savamik savaasamilluunniit angutivissamik pilliuteqarnissaminnut akissaqanngitsut tuinik quluartartunik pilliuteqarsinnaatippai. Piitsut nuannaarlutik aamma Jehovamut pilliuteqarsinnaapput. (3 Mos 1:3, 10, 14; 5:7) Jehova uumasunik assigiinngitsunik pilliuteqartoqarsinnaanera akuerigaluarlugu kajumissutsimik pilliuteqartunut tamanut marlunnik piumasaqaateqarpoq.

6. Pilliuteqarnissamut suut marluk piumasaqaataappat, taakkuninngalu maleruaanissaq qanoq pingaaruteqartigaa?

 6 Siullertut, inuk pigisaminik pitsaanerpaamik pilliuteqartussaavoq. Jehovap pilliut akuerinavianngilaa uumasoq napparsimappat innarluuteqarpalluunniit. (3 Mos 22:18-20) Aappaattut, inuk pilliuteqartoq inatsisini nassuiarneqartutut mingussimassanngilaq. Mingussimaguni Jehovamit iluarisaaqqilerumalluni ajortaaruteqqussummik imaluunniit taarsiissutissamik pilliuteqaqqaartariaqarpoq. Aatsaat taamaalioreerpat Jehovap kajumissutsimik pilliutaa akuerisinnaavaa. (3 Mos 5:5, 6, 15) Tamanna pingaaruteqarluinnarpoq. Jehova peqqusivoq inuk kinaluunniit mingussimanermini pilliummik nereqatigiissutissamik, kajumissutsimik pilliutigineqartumik, nerisoq toqunneqassasoq. (3 Mos 7:20, 21) Akerlianilli inuk mingussimanngitsoq innarluuteqanngitsumik pilliuteqartoq ilerasuuteqarnani nuannaangaassaaq. — 1 Nalunaarsuutit 29:9 atuaruk.

ULLUMIKKUT PILLIUTIGINEQARTARTUT

7, 8. (a) Guutip naalagaaffianut pilliuteqartartut suna nuannaarutigaat? (b) Jehovamut suna pilliutigisinnaavarput?

7 Ullumikkut qatannguterpassuit Jehovamut kiffartornermi kajumillutik sulisarput, tamannalu Jehovap iluaraa. Qatanngutitsinnik ikiuiniarluta tamaviaarnerput nuannaalissutigisarparput. Qatanngutip angutip naalagaaffilersaarfinnik sanaartornermi pinngortitamilu ajunaarnersuaqarsimatillugu ikiuutaasartup qatanngutinik ikiuinerup nalerisimaarnarnera nassuiaruminaatsinnerarpaa. Ima oqarpoq: “Qatanngutit illoqarfimminni nutaamik naalagaaffilersaarfimmik nappaanermik imaluunniit pinngortitami ajunaarnersuaqarsimatillugu ikiorneqarnerminnik nuannaarutiginninnerat qujamasuutiginninnerallu takullugu pilluarnangaarpoq.”

Pilliutit amerlasuut, soorlu ullumikkut pilliutitut, kajumissutsimik pilliutaapput (Immikkoortut 7-imiit 13-imut takukkit)

8 Jehovap peqatigiissortaa nunarsuarmiittoq Guutip naalagaaffianik tapersersuinissamut periarfissarsiortuaannarsimavoq. 1904-mi qatanngut C. T. Russell ima allappoq: “Kinaluunniit piffissaminut, sunniuteqarsinnaanerminut, aningaasaatiminut il.il. Naalakkamit pilittanngortinneqarsimasutut isigisariaqarpoq, kialuunniillu piginnaanerit taakku Naalakkaminut ataqqinaatissatut sapinngisaminik atortariaqarpai.” Jehovamut pilliuteqarniarluta iliuuseqangaartarnivut pilluaqquneqaatigingaartarpavut. (2 Sam 24:21-24) Jehovamut pilliutigisartakkavut pitsaanerulersinniarsinnaavavut?

Australiami Betelimi kiffartortut

9. Piffissatsinnik atuisarnitsinnut tunngatillugu Lukasi 10:2-miit 4-mut allassimasut qanoq ilinniarfigisinnaavavut?

9 Piffissarput. Saqqummersittakkatsinnik  nutserinermut aamma naqiterinermut, naalagaaffilersaarfinnik aamma ataatsimeersuartarfinnik sanaartornermut, ataatsimeersuarnernik aaqqissuussinermut, pinngortitami ajunaarnersuaqarsimatillugu ikiuinermut allanillu pisariaqartunik suliaqarnermut piffissarujussuaq nukippassuillu atorneqartarput. Ullormut nalunaaquttap-akunneri 24-ugaluartut Jiisusip piffissatsinnik silatusaartumik atuisarnissatsinnut najoqqutassiuuppaatigut. Jiisusip ajoqersukkani oqaluussiartoqqullugit aallartikkamigit ‘aqqutaani naapitaminnik ilassisaqartaqqunngilai’. (Luk 10:2-4) Sooq Jiisusi taamatut peqqusiva? Jiisusip nalaani inuit ilasseqatigiikkaangamik sikiinnaratik assammiinnaratilluunniit arlaleriarlutik eqittarlutilluunniit nunamut pallortarput. Taamaaliorneq piffissartornartorujussuuvoq. Jiisusip ajoqersukkani soqqusaatsuunissaannut kajumissaanngilai. Piffissaqarpallaannginnerminnik paasinninnissaannut, taamaalillutillu piffissaminnik atuilluarnissaannut pingaaruteqarnerusumillu suliaqarnissaannut, ikiorpai. (Ef 5:16) Piffissarput Guutip naalagaaffianik tapersersuilluni sulinermut atornerusinnaaniassagatsigu najoqqutassiaq taanna maleruarsinnaavarput?

Kenyami, Afrikamiittumi, oqaluussisartut naalagaaffilersaarfimmiittut

10, 11. (a) Silarsuaq tamakkerlugu suliamut tunissutivut ilaatigut qanoq atorneqartarpat? (b) Paulusip Korinthimiunut allagaani siullerni 16:1, 2-mi najoqqutassiaq allassimasoq suna iluaqutigisinnaavarput?

10 Aningaasaativut. Silarsuaq tamakkerlugu suliamik tapersersuinissamut aningaasarpassuit pisariaqartinneqarput. Ukiut tamaasa millionillit qulikkuutaat nakkutilliisunik angalasartunik, specialpionerinik ajoqersuiartortitanillu tapersersuinermut atorneqartarput. 1999-imiilli naalagaaffilersaarfiit 24.500-nit amerlanerusut nunani pigisagissaarfiunngitsuni sanaartorneqarsimapput. Sulili naalagaaffilersaarfiit 6400-t pisariaqartinneqarput. Qaammatit tamaasa atuagassiat Napasuliaq Alapernaarsuiffik aamma Vågn op! 100 millionit missaanniittut naqiterneqartarput. Suliat taakku tamarmik kajumissutsimik tunissutinit aningaasalersorneqartarput.

11 Jehovap apustili Paulusi isumassarsisinneratigut tunissuteqarnitsinni najoqqutassiamik maleruarsinnaasatsinnik allatsippaa. (1 Korinthimiut 16:1, 2 atuakkit). Paulusip qatanngutini Korinthimiittut sapaatip-akunnerata naanissaanut utaqqeqqaarnatik sapaatilli-akunnerata aallaqqaataani aningaasanik tunniussassaminnik immikkoortitsisarnissaannut kajumissaarpai. Ukiuni hundredeni siullerni qatanngutit pisimanerattut ullumikkut qatannguterpassuit sapinngisaminnik tukkortumik tunissuteqarnissaminnut pilersaarusiortarput. (Luk 21:1-4; ApS 4:32-35) Jehovap innuttami tukkortuunerat erlinnartutut isigaa.

Tuxedomi, USA-miittumi, kajumissutsimik sanaartoqataasoq

12, 13. Sooq ilaat nukiminnik piginnaanerminnillu atuilluarnerunissaminnut tunuarsimaartarpat, Jehovalli taakku qanoq ikiussavai?

12 Nukivut piginnaanivullu. Guutip naalagaaffiata suliaani nukitsinnik piginnaanitsinnillu atuiniarnitsinni Jehovap tapersersortarpaatigut, nukissaaruttutullu misigigaangatta ikiortassalluta neriorsorpaatigut. (Es 40:29-31) Guutip naalagaaffiata suliaani tapersersuinissamut ajukkuttarpugut imaluunniit allat piukkunnarnerusutut isigisarpavut? Eqqaamajuk Jehovap, soorlu Besal’elimut Oholiabimullu tunngatillugu pisimanermisut, piginnaaneqarnerulersissinnaammatigut. — 2 Mos 31:1-6; allaaserisap aallaqqaataani assiliaq takuuk.

13 Jehovap tunuarsimaarnata pigisatsinnik pitsaanerpaamik tunissuteqartarnissatsinnut kajumissaarpaatigut. (Uss 3:27) Jerusalemimi naalaffiup qarmaqqinneqarnerani Jehovap juutit Jerusalemimiittut suliamik tapersersuiniarlutik qanoq iliuuseqarsimatiginerminnik eqqarsaatiginneqqissaarnissaannut kajumissaarpai. (Hagg 1:2-5) Allamut saasarneqarlutillu Jehovap suliaa inuunerminni pingaarnerpaatinngilaat. Imminut ima aperisariaqarpugut: Jehovap piumasaatut iliornissarput sunit tamanit pingaarnerpaatipparput?  Qanoq inooriaaseqarnerluta eqqarsaatigeqqissaarsinnaavarput ullunilu kingullerni makkunani Guutip naalagaaffianik tapersersuinerunissatsinnut pilersaarusiorluta?

SAPINNGISARPUT NAAPERTORLUGU PILLIUTEQARNEQ

14, 15. (a) Qatanngutit pigisarpassuaqanngitsut tunissuteqartarnerat qanoq ilinniarfigisinnaavarput? (b) Sunissarput kissaatigisariaqarparput?

14 Nunani, soorlu piitsuunermik, atugarliuuteqangaarfiusuni ajornartorsiuteqangaarfiusunilu inuppassuit najugaqarput. Peqatigiiffitta qatanngutivut nunani taamaattuni ikiuunnissartik tamaviaarutigaat. (2 Kor 8:14) Qatanngutivulli pigisarpassuaqanngitsut tunisineq immikkut pisinnaatitaaffittut isigaat. Taakkua nuannaarlutik sapinngisaminnik tunisisarnerat Jehovap nuannaarutigaa. — 2 Kor 9:7.

15 Afrikami nunat piitsuungaarfiusut ilaanni qatanngutit ilaat naatsiivimminni immikkoortumit aalajangersimasumit naatitat inerittuinik tuniniaasarput, taakkuninngalu tuniniaanermi aningaasat isertitatik tamaasa Guutip naalagaaffiata sulineranut tunissutigisarpaat. Nunami tamatumani aamma qatanngutit angutit arnallu naalagaaffilersaarfinnik sanaartornerni ikiuukkusupput. Siaruarterillunili ulapaarfiup nalaani sanaartortoqartussaavoq. Ikiuunnissartilli aalajangiusimagamikku ullukkut naalagaaffilersaarfimmiittarput unnukkullu inerittussanik siaruarterisarlutik. Ila tukkussusiat! Tamanna itsaq Makedoniami qatanngutinik eqqaasitsissutigaarput. Qatanngutit ‘piitsuungaaraluarlutik’ Paulusi kimigiiserfigaat qatanngutinut aningaasanik tunissuteqarnissaminnik. (2 Kor 8:1-4) Uaguttaaq Jehovamit pilluaqqussutinik tunineqartarnitsinnik qujamasuutiginninnerput sapinngisatsinnik ersersinniartariaqarparput. — 5 Mosesi 16:17 atuaruk.

16. Pilliutitta Jehovamit akuerineqarsinnaanerat qanoq qulakkeersinnaavarput?

16 Pilliuteqaraangatta pingaaruteqangaartunik, soorlu ilaquttatsinnik, sumiginnaasannginnissarput eqqaamasariaqarparput. Itsaq Israelikkut pisimanerattut kajumissutsimik pilliutitta Guutimit akuerineqarsinnaanerat qulakkeertariaqarparput. Ilaquttatsinnik isumaginninnitta namminerlu Jehovamik pallorfiginninnitta pingaarnertut akisussaaffiginerat eqqaamajuartariaqarparput. Imaassinnaavoq naalagaaffilersaarfinnik sanaartornermi pinngortitamilu ajunaarnersuaqarsimatillugu ikiuunnissatsinnut allatigulluunniit Guutip naalagaaffianik tapersersuinissatsinnut periarfissaqartugut. Taamaaliornerpulli ‘qujarunneqassanngilaq’ ilaquttatta Jehovamik pallorfiginninneranni ikiunngikkutsigit timikkulluunniit pisariaqartitaat isumaginngikkutsigit. Tamanna piginngisatsinnik tunissuteqarnertut issaaq. (2 Korinthimiut 8:12 atuaruk). Jehovamit iluarisaajuarumalluta taassumunnga attaveqarnitsinnik aamma nakussatsitsiuartariaqarpugut. (1 Kor 9:26, 27) Najoqqutassiat Biibilimeersut inuunitsinni maleruartarutsigit pilliuteqartarnitsinnik nuannaarutiginninnissarput pilliutivullu Jehovamit ‘qujarunneqarnissaat’ qularinngissinnaavarput.

PILLIUTIVUT NALEQANGAARPUT

17, 18. Guutip naalagaaffianut pilliuteqartunut tunngatillugu qanoq isiginnittaaseqarpugut, sunalu tamatta eqqarsaatigisariaqarparput?

17 Qatannguterpassuavut namminissarsioratik piffissartik, nukitik aningaasaatitillu Guutip naalagaaffiata sulineranik tapersersuinermut atortarpaat. (Fil 2:17) Taakkua tukkorlutik tunissuteqartarnerat qujamasuutigingaarparput. Qatanngutit angutit Guutip naalagaaffiata sulinerani siulersuisut nuliaat qitornaallu tukkorlutik pilliuteqartarnerat pillugu aamma nersualaartarpavut.

18 Guutip naalagaaffiata sulineranik tapersersuineq suliarujussuuvoq. Qanortoq tamatta Jehovamut sapinngisatsinnik qanoq tunissuteqarnerusinnaanerput qinunikkut eqqarsaatigeqqissaarisigu. Taamaaliorutta maanna ‘silarsuartaassamilu’ pilluaqquneqangaassaagut. — Mark 10:28-30.

^ par. 2 Napasuliaq Alapernaarsuiffik 1. januaari 2012-imoortumi qupp. 23-miit 27-miittumi allaaserisaq “Tarnikkut iluunngarluni Jehovamut pilliuteqarneq” atuaruk.