Imarisai

Imai

Jehovap Nalunaajaasui

Oqaatsit toqqakkit Kalaallisut

Allanik mianersoqqusiniarlutit iliuuseqarnerusinnaavit?

Allanik mianersoqqusiniarlutit iliuuseqarnerusinnaavit?

Filmi nipitaqanngitsoq alutornartorlu A Trip Down Market Street 1900-kkut aallartinneranni San Franciscomi, USA-miittumi, inuit ulluinnarni sulerisarnerannik filmiliaq isiginnaartut tiguartissutigaat. Filmiliortut aqqusineq angallaffiusoq filmiliariniarlugu assiliivik tigummiaannartagaq qimuttuitsup illoqarfikkoortartup saavanut ikkussimavaat. Qamutit hiistimik qimuttullit, biilit qangarnitsat, inuit pisinniarfilerisut nukappiaqqallu aviisinik tuniniaasartut filmiliarineqarput.

Filmi killitsinnarnerulerpoq 1906-imi apriilip 18-iat sioqqutitsiarlugu filmiliarineqarsimagunarmat. Ullormi tamatumani nunap sajorujussuarlunilu ikuallattoqarnera pissutigalugit inuit tusindilippassuit toqullutillu illoqarfiup ilaa filmiliarineqartoq suujunnaangajappoq. Inuit nuannaarpasissut filmiliarineqartut ilaat ullualuit qaangiummata ajunaarsimanissaat ilimanarpoq. Scott Miles, filmiliortut ilaannit kingoqqisoq, ima oqaluttuarpoq: “Inuit filmiliarineqartut ajunaartoqartussaaneranik ilimasuppasinngitsut takullugit nalligiummertarpakka.”

1906-imi nuna sajulermat tamatumalu kingorna ikuallattoqalermat San Franciscop annertunerpaartaa suujunnaarsinneqarpoq

Pisoq ullumikkumut assersuunneqarsinnaavoq. Uaguttaaq inoqativut nalligiummertarpavut. Ajunaartoqarnissaa — pissutsit aaqqissuussaanerata maanna atuuttup tamatumaniittullu tamarmik naggatissaat — ilisimanagu ulluinnarni suliassatik aalluttarpaat. Taamani nunap sajukkumaarneranik ilisimanninngitsut assiginagit uagut Jehovap ulloq eqqartuussiffissaa nalliukkumaarnera inunnillu mianersoqqusinissatsinnut piffissap sivikinnera nalunngilarput. Qularnanngitsumik sapaatit-akunneri tamaasa matumiit matumut oqaluussinissat pilersaarusiortarpat, allanilli mianersoqqusiniarlutit iliuuseqarnerusinnaavit?

JIISUSI OQALUUSSIUARPOQ

Jiisusi peqqissaartumik nalunaajaanissaminut piareersimajuartoq ilinniarfigingaarsinnaavarput. Naammattuukkani tamaasa, soorlu ilanngaaserisoq aqqusinermi sanioqqutani ulloqeqqarneranilu unillatsiarnermini arnaq puilasup eqqaani naapitani, oqaluussiffigisarpai. (Luk 19:1-5; Joh 4:5-10, 21-24) Allaat qasuersaarnissaminik pilersaaruteqaraluarluni allanik ilinniartitsisinnaajumalluni pilersaarutiminik allannguinissaminut piumassuseqartarpoq. Misiginneqatiginninnini pissutigalugu pisariaqartuinnarmik nalunaajaanissamininngarnit annerusumik iliuuseqartarpoq. (Mark 6:30-34) Inuppassuit Jiisusitut piffissap nukinginnassusianik eqqumaffiginninnertik qanoq ersersittarpaat?

 PERIARFISSARSIORTUARPUT

Melika inissiarsuarmi isumannaallisarluakkami najugaqarpoq. Saniliisa amerlanersaat allamiuupput ilinniartut, taakkulu nalunaarsorneqarsimanngitsunik mobileqarlutillu aqqi isaariami allattorsimanngillat. Najugaqatini isaariami elevatorimilu naapitani anersaakkut ittunik oqaloqatigisarnerisigut immikkut ittumik periarfissaqarnini atorluartarpaa. Ima oqarpoq: “Oqaluussiffigisartakkattut isigaara.” Melika atuagassianik allamiusoortunik arlalinnik nassataqartuaannarpoq, inuppassuillu naqitaaqqanik atuagassianillu pisarput. Nittartakkatsinnut jw.org-imut innersuussisarlunilu arlalinnik Biibilimik atuaqqissaaqateqartarpoq.

Soniap aamma naapitani tamaasa oqaluussiffiginiartarpai. Nakorsiartarfimmi sulisarpoq suleqatiminullu peqqissaartumik nalunaajaanissani anguniagaralugu. Aallaqqaammut suleqatini ataasiakkaat sunik soqutigisaqarnersut paasiniarpaa. Tamatuma kingorna ulloqeqqarsiornermini ataasiakkaarlugit anersaakkut tunngasunik oqaloqatigisalerpai. Tamatuma kingunerisaanik marlunnik Biibilimik atuaqqissaaqateqartalerpoq. Aamma unikkallartarnini peqqissaavimmi utaqqisarfimmiittunut oqaloqateqarnissaminut atorniarlugit pilersaaruteqarpoq.

PERIARFISSATIT TAMAASA ATORLUAKKIT

1906-imi nunap sajunneranit aniguisut ilaat oqarpoq pisoq “ajunaarnersuit naalagaaffimmi imaluunniit illoqarfimmi nalaanneqarsimasut ajornerpaartarigaat”. Qanittukkulli “Guutimik ilisimasaqanngitsunut” ulloq akiniaaffik nalliuppat ajunaarnersuit tamarmik suunngitsutut ilissapput. (2 Th 1:8) Jehovap inuit allamik isumataarnissaat mianersoqqussummillu nalunaajaasuminit oqaluussissutiginnitsitaminik eqqumaffiginninnissaat kissaatigilluinnarpaa. — 2 Petr 3:9; Saqq 14:6, 7.

Oqaluussiniarlutit periarfissatit tamaasa atorluarsinnaavigit?

Ulluni atugarliornartuni inuunerput pillugu allat paasitinnissaat namminnerlu soqutigisaminnik pingaartitsinatik Jehovamik ujarlernissaannut ikiornissaat immikkut pisinnaatitaaffigivat. (Sef 2:2, 3) Suleqatinnut, sanilinnut ulluinnarnilu naapittakkannut oqaluussinissannut periarfissatit tamaasa atorluarsinnaavigit? Allanik mianersoqqusiniarlutit iliuuseqarnerorusuppit?