Imarisai

Imai

Jehovap Nalunaajaasui

Oqaatsit toqqakkit Kalaallisut

Silatusaartumik aalajangiisarit

Silatusaartumik aalajangiisarit

“Naalagaq tatigiuk uummatikkut iluunngarlutit, namminerlu paasisimasaqassutsit tatigeqinagu!” — USS 3:5.

1, 2. Aalajangiineq nuannaraajuk, aalajangiinitillu iluariuaannarpigit?

ULLUT tamaasa aalajangigassarpassuaqartarpugut. Aalajangigassaqartillutit qanoq misigisarpit? Inoqarpoq sunik tamanik aalajangeerusuttartunik. Isumaqarput namminneq aalajangiisinnaaneq pisinnaatitaaffigalugu nuannarisanngilaallu allanit aalajangiissunneqaraangamik. Allat pingaarutilinnut tunngatillugu aalajangiinissartik annilaangagisarpaat. Inuit ilaasa atuakkani siunnersuisartuniluunniit siunnersortissarsiortarput immaqalu taamaaliornerminni iluaqutigisinnaasorisaminnut aningaasarpassuit atortarlugit.

2 Ilarpassuatta nalunngilaat aalajangigassat ilaat uagut aalajangiiffigisinnaatitaaffiginngikkivut, inuunitsinnili sorpassuartigut nammineq aalajangiisinnaatitaavugut. (Gal 6:5) Nalugunanngilarpulli ilaannikkut silatusaanngitsumik iluaqutaanngitsumilluunniit aalajangiisarluta.

3. Aalajangiinissamut suut iluaqutigisinnaavavut, aamma sooq aalajangiiniarneq ajornaatsuujuaannanngila?

3 Jehovamut kiffaasutut nuannaarutigisinnaavarput inuunermi pingaarutilippassuarnut tunngatillugu Jehova erseqqissunik peqqussuteqarmat. Nalunngilarput peqqussutai maleruarutsigit taassuma nuannaarutigisaanik uagullu iluaqutigisatsinnik aalajangiisinnaalluta. Nalaataqarsinnaavugulli Guutip oqaasiani toqqaannartumik eqqartorneqanngitsunik. Taavami taamaattoqaraangat sussanerluta qanoq aalajangersinnaavugut? Assersuutigalugu Biibilimi allassimavoq tillissanngitsugut. (Ef 4:28) Oqartoqartarporli arlaannik nammineq piginngisamik akisuujunngitsumik pisariaqartilluinnagarisamilluunniit tigusineq ilaannikkut ajortuliornerunngitsoq. Oqartoqaraangat pineqartumut tunngatillugu erseqqissumik maleruagassaqanngitsoq qanoq aalajangertassaagut? Suna iluaqutigisinnaavarput?

 SILATUSAARTUMIK AALAJANGIISARIT

4. Aalajangigassaqaraangatta ilaannikkut qanoq siunnersorneqartarpugut?

4 Pingaarutilimmik aalajangigassaqarluta kristumioqaterput oqaluttuukkutsigu immaqa oqassaaq silatusaartumik taamaaliussasugut. Soorunami tamanna siunnersuutitsialaavoq. Aalajangiiniapallannermut Biibilimi mianersoqquneqarpugut: ‘Tuaviorpallaartoq ajorsaateqalersarpoq.’ (Uss 21:5) Silatusaartumilli aalajangiineq qanoq paasisariaqarpa? Isumaqaannarpa pineqartoq eqqarsaatigeqqissaassagipput aamma silappaarilluta naliliilluarsinnaassuseqassasugut? Taamaaliorneq pingaaruteqarpoq, silatusaassagaannili tamanna naammanngilaq. — Rom 12:3; 1 Petr 4:7.

5. Sooq eqqarsartaatsikkut peqqilluinnartuunngilagut?

5 Arlaannattaluunniit silatusaaqqissaartuaannarneq inunnguuserinngilaa. Tamatta ajortiliugatta naammalluinnanngitsuullutalu timikkut eqqarsartaatsikkullu peqqilluinnartuunngilagut. (Tuss 51:7; Rom 3:23) Aamma ilarpassuavut Jehova taassumalu najoqqutassiai pillugit ilinnianngikkallaramik Saatanimit ‘tappiillisinneqarsimapput’. (2 Kor 4:4; Tit 3:3) Taamaattumik aalajangiitinnata suna silatusaarnerunersoq sivisuumik eqqarsaatigigaluarutsiguluunniit eqqunngitsumik aalajangiisinnaavugut. — Uss 14:12.

6. Silatusaarnissamut suna iluaqutigisinnaavarput?

6 Uagutsitut naammalluinnanngitsuusutut innani Jehova Ataatarput qilammiusoq sutigut tamatigut naammalluinnartuuvoq. (5 Mos 32:4) Qujanartumik isumatsigut allanngornissatsinnik ajornarunnaarsitsivoq silatusaartumillu aalajangiisinnaanermik ilikkarsinnaatilluta. (2 Timotheusi 1:7 atuaruk). Kristumiutut eqqarsartaatsikkut, tunngavilersuisarnikkut iliuutsikkullu silatusaarusuppugut. Taamaattumik eqqarsartaatsitsinnik misigissutsitsinnillu aqutsineq ilikkartariaqarparput aamma eqqarsartaatsitsigut, misigissutsitsigut iliuuserisartakkatsigullu Jehova ilaartariaqarlugu.

7, 8. Tatineqaraluarluni ajornartorsiuteqaraluarluniluunniit silatusaartumik aalajangiisinnaasoqarnera oqaluttuariuk.

7 Assersuuteqariarta. Nalinginnaavoq nunasisut ilaasa meerartaaraangamik meeraq mikisuuneraniit eqqarliminnut nunavigisaminniittunut paaritittarnerat. Taamaalillutik angajoqqaajusut nunasiffimminni aningaasarsiorniarlutik suliinnarsinnaapput. * Arnaq nunasisoq inequnartumik ernertaarpoq. Tamatuma nalaani Biibilimik atuaqqissaartalerpoq ilinniakkanilu malerualerlugit. Uinilu ikinngutiminnit eqqarliminnillu tatineqartalerput meeraq aatakkuinut tiguteqqullugu. Arnalli atuaqqissaartarnerminit paasivaa qitornami perorsarnissaanik Guutip akisussaatikkaani. (Tuss 127:3; Ef 6:4) Ileqqoq kikkunnit tamanit eqqortuusorineqarmat malissavaa? Imaluunniit ilikkakkani Biibilimeersut malissavai, naak aningaasatigut ajornartorsiulersinnaagaluarluni allanillu isornartorsiorneqalersinnaagaluarluni? Illit qanoq iliussagaluarpit?

8 Arnap inuusuttup taassuma tatineqartutut misigaluni uummammiuni Jehovamut aniatippai siunnersoqqullunilu qinulluni. Imminik Biibilimik atuaqqissaaqatiginnittartoq ilagiinniittullu allat oqaloqatigereerlugit paasilerpaa Jehova qanoq isiginnittaaseqarnersoq. Aamma paasilerpaa ernermi peroriartornermini angajoqqaani najunngikkunigit misigissutsikkut ajoqutigisinnaagaa. Pissutsit atukkani pillugit Biibilimi qanoq allassimasoqarnersoq eqqarsaatigeqqissaariarlugu isummerpoq ernini tigummiunnaaruniuk eqqortuliornerunngitsoq. Uiata paasigamiuk ilagiinniittut qanoq ikiuiumatutigisut qitornartillu qanoq peqqitsigisoq Biibilimik atuaqqissaaqatigineqarnissaminut  akuersivoq nulianilu ataatsimiigiaqatigisalerlugu.

9, 10. Silatusaarneq qanoq paasisariaqarpa, qanorlu silatusaarsinnaavugut?

9 Tamanna assersuutaannaavoq, tamatumanngali erserpoq silatusaarneq tassaaginnanngitsoq uagut silatusaarnerusorisarput allalluunniit pitsaanerusorisaat ajornannginnerusorisaalluunniit. Isumarput uummaterpullu naammalluinnanngitsut nalunaaquttatut siuarsimasutut kinguarsimasutulluunniit issinnaapput. Nalunaaqutaq taamaattoq tatigigutsigu ajornartorsiorujussualersinnaavugut. (Jer 17:9) Ajornartorsiorumanata eqqarsartaaserput misigissutsivullu Guutip najoqqutassiaanut naapertuutitittuartariaqarpavut. — Esaja 55:8, 9 atuakkit, 1900. *

10 Biibilimi pitsaasumik ima siunnersuuteqarpoq: “Naalagaq tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.” (Uss 3:5, 6) Malugiuk allassimammat ‘nammineq paasisimasaqassutsit tatigeqinagu’. Taava allassimavoq Jehova “eqqarsaatigiuartaruk”. Taannatuaavoq eqqarsartaatsikkut naammalluinnartuusoq. Taamaattumik aalajangigassaqaraangatta Biibilimik atuartariaqarpugut Guutip isiginnittaasia paasiniarlugu, taavalu tamanna naapertorlugu aalajangiilluta. Taamaaliorneq — tassa Jehovap eqqarsartaasianik ilaarsineq — silatusaarneruvoq.

PAASINNISSINNAANERIT SUNGIUSARUK

11. Silatusaartumik aalajangiisarneq ilikkarumallugu susariaqarpugut?

11 Silatusaartumik aalajangiisinnaanermik aalajangikkallu malillugit iliornermik ilinniarneq oqitsuunngilaq. Tamanna ingammik kuiserlaanut sallusuissummiluunniit siumukalerlaanut artornarsinnaavoq. Inuit taamaattut Biibilimi anersaakkut ‘naalungiarsunnik’ taaneqarput, taakkuli siumukarsinnaapput. Meeraaraq pisunnialerlaaq eqqarsaatigiuk. Allulaartarluni alloriaqqittaqattaarlunilu pisunneq ilikkartarpaa. Silatusaartumik aalajangiisarnermik ilinniartut taamatullusooq iliortarput. Apustili  Paulusi allappoq inuit inersimalluartut tassaasut ‘piginnaassutsimik [paasinnissinnaassutsimik, NW] atortuinnarnerisigut sungiussillutik ajunngitsumik ajortumillu immikkoortitsisinnaalersimasut’. Oqaatsit “atortuinnarnerisigut” aamma “sungiussisimasunit” atorneqarnerannit erserpoq iliuuseqartuartariaqartugut. Tassa anersaakkut ‘naalungiarsuit’ silatusaartumik aalajangiisarneq ilikkarumallugu iliuuseqartuartariaqarput. — Hebræerit 5:13, 14 atuakkit.

Ulluinnarnut tunngasutigut eqqortumik aalajangiigaangatta paasinnissinnaassuserput sungiusartarparput (Immikkoortoq 11 takuuk)

12. Silatusaartumik aalajangiisarneq qanoq ilinniarsinnaavarput?

12 Ullut tamaasa annikitsunik annertuunilluunniit aalajangigassarpassuaqartarpugut. Inuit qanoq aalajangiisarnerannik misissueqqissaarsimasut oqarput aalajangikkatta affangajaat sungiussimasavut naapertorlugit aalajangertarivut eqqarsaatiginneqqissaarneq tunngaviginagu. Assersuutigalugu ullaat tamaasa suna atissanerlugu aalajangertarputit. Tamanna soqutaarpasinngissinnaavoq eqqarsaatigivallaartariaqarsimagunanngilallu. Atisalersoriaatsilli Jehovamut kiffaasumut tulluarnersoq eqqarsaatigissallugu pingaaruteqarpoq. (2 Kor 6:3, 4) Atisarsiniaraangavit pisiarerusutatit mutiunersut torrannersullu eqqarsaatigisarsimassagunarpat. Aammali eqqarsaatigisarpiuk atisat isornaatsuunersut akissaqartinnerlugillu? Annikitsutigut silatusaartumik aalajangiisarnerput paasinnissinnaassutsitsinnik sungiusaatigisinnaavarput. Taamaaliortarutta pingaaruteqarnerusunut tunngatillugu eqqortumik aalajangiisarnissatsinnut iluaqutigissavarput. — Luk 16:10; 1 Kor 10:31.

EQQORTULIORUSUSSUSEQARIT

13. Aalajangiussatsitut iliornissamut suna iluaqutigissavarput?

13 Eqqortumik aalajangerneq oqitsuusinnaavoq, aalajangiussatulli iliorneq oqitsuujuaannanngilaq. Assersuutigalugu pujortartarunnaarusuttut ilaat pujortartarunnaanngitsoortarput naammattumik piumassuseqannginnamik. Aalajangiussavut naapertorlugit iliuuseqarnissamut piumassuseqangaartariaqarpugut. Oqartoqartarpoq piumassuseqarnerulersinnaasugut nukkassarnertulli. Nukiit atornerujartortillugit nukittunerulissaagut, atornerli ajorutsigit nukillaariartussaagut. Aalajangiussatsitut iliornissamut piumassuserput qanoq ‘nukittortissinnaavarput’? Ikioqqulluta Jehova saaffigisariaqarparput. — Filippimiut 2:13 atuaruk.

14. Sooq Paulusi eqqortuliorsinnaava?

14 Paulusip nammineq misiginikuugamiuk nalunngilaa eqqortuliorniarneq ajornakusoortuusoq. Ilaanni ima ajuusaarpoq: “Piumassuseqaraluarpunga, ajunngitsumilli iliuuseqarneq saperpunga.” Sorusunnerluni susariaqarnerlunilu nalunngilaa, ilaannikkulli taamaaliorsinnaaneq ajorpoq. Ima nassuerpoq: “Guutimmi inatsisai inuutsikkut ilorlikkut nuannarigaluarpakka, kisianni paasisarpara inatsisinik allanik avatinniittoqartoq, taakkulu inatsisinut eqqarsaatinniittunut akerartortuusut ajortillu inatsisaanit avatinniittunit tiguagaatillunga.” Neriuutaarussimannginnamili ima allappoq: “Guutili qujanarsili Jiisusi-Kristusikkut Naalakkatsigut!” (Rom 7:18, 22-25) Aamma ima allappoq: “Tamaasa pissatsitsisikkut atussallugit sapinngilakka.” — Fil 4:13.

15. Sooq eqqortuliornissaq aalajangiusimasariaqarparput?

15 Guuti nuannaartikkumallugu aalajangertariaqarpugut eqqortuliorniarluta aalajangiussatsitullu iliorluta. Eliap Ba’alisiortut Israelikkullu tunussisut qaqqami Karmelimi qanoq oqarfigigai eqqarsaatigiuk: “Qanoq sivisutigisumik kina malissanerlugu aalajangerniarusaartuassavisi? Naalagaq [Jehova, NW] Guutiuppat taava taanna malissiuk; Ba’ali Guutiuppat taanna malissiuk!” (1 Kng 18:21) Israelikkut nalunngikkaluarpaat Jehova kisiat pallorfigisussaallugu. Jehova Ba’alilu ataatsikkut pallorfiginiarsarigamikkit ‘aalajangerniarusaartuarput’. Josva taamaanngilluinnarpoq, siusinnerusukkummi Israelikkut ima oqarfigai:  ‘Jehova Guutisiorfigiumanngikkussiuk taava ullumi aalajangerniaritsi sorliit guutisiorfigiumagisi. Uanga inoqutimalu Jehova kiffartuukkumavarput.’ (Jos 24:15) Josvakkut aalajangiusimanninnerat qanoq kinguneqarpa? Nunamut neriorsuutigisamut, ‘immummik tungusunnitsuummillu kuuttumut’, isersinnaatitaapput. — Jos 5:6.

SILATUSAARTUMIK AALAJANGIISARUIT PILLUAQQUSAASSAATIT

16, 17. Guutip piumasaanut naapertuuttumik aalajangiisarnerup iluaqutissartaanik assersuuteqarit.

16 Misigisamik nalitsinneersumik assersuuteqariarta. Qatanngut kuiserlaaq nulianilu pingasunik mikisunik qitornaqarput. Suliffimmini akissarsiarissaarpallaanngilaq, namminerli sapaatip-akunnerata naanerani sulisariaqannginnami suliffik tamanna toqqarsimavaa ilaquttani ataatsimiigiaqatigisarlugillu oqaluusseqatigisarniassagamigit. Ilaanni suleqataata suliffik alla akissarsiarissaarfiunerusoq ajunngitsorsiassartaqarnerusorlu eqqartulerpaa qatannguterpullu tassunga suliffissarsioqatigerusullugu. Qatanngutitta tamanna eqqarsaatigaa Jehovamullu qinnutiminut ilanngullugu. Taamaaliornermini paasivaa taanna suliffittaarissaguniuk sapaatip-akunnerata naanerani sulisariaqartassalluni. Illit qanoq iliussagaluarpit?

17 Allamik suliffittaassagaluaruni Jehovamut attaveqarnerminut qanoq sunniuteqassanersoq eqqarsaatigereerlugu suliffini allanngortikkumanagu aalajangerpoq. Kingusinnerusukkut peqqissimisimasoraajuk? Anersaakkut pilluaqqussutissartai aningaasarsiaqarnerunerminngarnit imminut ilaquttaminullu iluaqutaangaarnerusorigamigit peqqissiminngilaq. Qatanngut nulianilu nuannaangaarput panitsik qulinik ukiulik oqarmat angajoqqaani, ilagiit Jehovalu asangaarlugit. Oqarpoq Jehovamut tunniulluinnarumalluni kuisikkumallunilu. Ataatami inuunermini Jehovamik pallorfiginninnermik salliutitsinikkut maligassiuilluarnera iluaqutigaa.

Silatusaartumik aalajangiisaruit Guutip innuttaanut nuannaartunut ilaassaatit (Takuuk immikkoortoq 18)

18. Sooq ullut tamaasa silatusaartumik aalajangiisarnissarput pingaaruteqarpa?

18 Soorlu Mosesip Israelikkut inoqajuitsukkut siulersorai taamatuttaaq Jiisusip Kristusip ukiorpassuarni Guutip innuttai Saatanip silarsuaani inuusut siulersorpai. Saatanip silarsuaa piuneerussaangajalerpoq. Aamma soorlu Josvap Israelikkut nunamut neriorsuutigisamut siulersorai taamatuttaaq Jiisusip ajoqersukkani silarsuassamut nutaamut neriorsuutigisamut naapertuilluassuseqarfiusumut siulersussavai. (2 Petr 3:13) Taamaattumik siornatigut eqqarsartaaserput, ileqquvut, najoqqutavut anguniakkavullu uteqqiaffigigutsigit sianiilliussaagut. Guutip uagutsinnut piumasaa paasinerujartuaartariaqarparput. (Rom 12:2; 2 Kor 13:5) Ullut tamaasa illit silatusaartumik aalajangiisarnikkut ersersiguk Jehovamit naassaanngitsumik pilluaqquneqarusullutit. — Hebræerit 10:38, 39 atuakkit.

^ par. 7 Taamaaliortarnermut pissutaasoq alla tassaavoq aatakkuusut ernutartik ikinngutiminnut eqqarliminnullu nittarsaanniassammassuk.

^ par. 9 Esaja 55:8, 9, 1900: ‘Massa eqqarsaatikka ilissi eqqarsaatiginngilasi, aqqutisilu uanga aqqutiginngilakka, oqarpoq Naalagaq. Soorlu qilak nunamit qutsissoq, taamattaaq aqqutikka qutsipput aqqutissinnit, eqqarsaatikkalu eqqarsaatissinnit.’