Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Septembari 2013

Jehovap oqaaqqissaarutai uummatikkut tipaatsuutigikkit

Jehovap oqaaqqissaarutai uummatikkut tipaatsuutigikkit

“Oqaaqqissaarutitit pigilerpakka pigiuagassattut, tipaatsuutigimmagit uummatima.” — TUSS 119:111.

1. (a) Inuit oqaaqqissaarneqarnertik qanoq isigisarpaat, aamma sooq? (b) Inuup makitasuup oqaaqqissaarneqarnini qanoq isigisarpaa?

INUIT oqaaqqissaarneqarnerminnut assigiinngitsumik isiginnittaaseqartarput. Inuit ilaasa inummit oqartussaassuseqartumit oqaaqqissaarneqaraangamik oqaaqqissaarneqarnertik akuerisarpaat, ukioqatiminnilli imaluunniit oqartussaassuseqarpianngitsumit oqaaqqissaarneqaraangamik oqaaqqissaarneqarnertik akuerineq ajorpaat. Oqaaqqissaarneqartut siunnersorneqartulluunniit ilaat immaqa aliasulertarput, imaluunniit nikallungalertarput kanngusulerlutilluunniit. Inuilli allat oqaaqqissaarneqarnertik kajumississutigalugulu ajunnginnerusumik iliuuseqarusulertarput. Sooq inuit oqaaqqissaarneqarnerminnut assigiinngitsumik isiginnittaaseqarpat? Makitaneq pissutaasinnaavoq. Inuup makitasuup oqaaqqissaarneqaraangami oqaaqqissaarneqarnini suusupagisarpaa iluaqutigisarnagulu. — Uss 16:18.

2. Sooq kristumiut ilumoortut siunnersuutit Guutip oqaasianeersut qujamasuutigaat?

2 Kristumiulli ilumoortut siunnersuutitsialaat, ingammik Guutip oqaasianeersut, qujamasuutigaat. Eqqunngitsuliorneq qanoq navianartigisoq Jehovap oqaaqqissaarutaanit paasisinnaavarput. Assersuutigalugu uagutsinnut ajoqutaasut, soorlu pigisalerituneq, kinguaassiuutitigut inuunerlunneq, ikiaroornartunik atuineq imerajuttuunerlu, pinaveersaarnissaannut Jehovap oqaaqqissaarutai iluaqutigisarpavut. (Uss 20:1; 2 Kor 7:1; 1 Th 4:3-5; 1 Tim 6:6-11) Aamma Guutip peqqussutaanik maleruaagatta ‘uummatitta iluunngaannit qiimmattarpugut’. — Es 65:14.

3. Tussiaasiortutut qanoq isiginnittaaseqassaagut?

3 Ataatatsinnut qilammiusumut attaveqarluartuarumalluta taassuma siunnersuutai iluaqutaasut maleruartuartariaqarpavut.  Tussiaasiortup isiginnittaasiatut isiginnittaaseqartariaqarpugut, taannami ima allappoq: “Oqaaqqissaarutitit pigilerpakka pigiuagassattut, tipaatsuutigimmagit uummatima.” (Tuss 119:111) Tussiaasiortutut Jehovap oqaaqqissaarutaanik maleruaanerit nuannaarutigaajuk? Imaluunniit ilaannikkut maleruaruminaatsittarpigit? Siunnersorneqarnitit akueriuminaatsittarukkit nikalluutigissanngilatit. Guutimik tatiginninnerit aamma Guutip peqqussutaasa ilinnut iluaqutaajuarneranik tutsuiginninnerit nakussatsissinnaavat. Tatiginninnerulissutaasinnaasut pingasut sammeriartigit.

QINUSARNERIT TATIGINNINNERULISSUTIGIUK

4. Daavip suna aalajangiusimalluinnarpaa?

4 Kunngi Daavi ilaannikkut ajunngitsunik atugaqartarpoq, ilaannikkulli atugarliortarpoq. Taamaakkaluartorli tamatigut Pinngortitsisini tatigilluinnartarpaa. Daavi ima allappoq: “Eriniffigaakkit Naalagaq, tatigaakkit illit Guutiga.” (Tuss 25:1, 2) Daavip suna Ataataminik qilammiusumik tatiginnilissutigaa?

5, 6. Daavip Jehovamut ikinngutaalluartuunera qinnutaanit qanoq erserpa?

5 Inuppassuit ingasattumik ajornartorsiuteqaleraangamik aatsaat Guutimut qinusarput. Taakkua assigaat ikinngut aningaasanik ikiorneqarnissaminilluunniit pisariaqartitsileraangami aatsaat ilinnut saaffiginnittartoq. Piffissap ingerlanerani ikinngutinnit ilumut asaneqarnersutit immaqa qularilissavat. Daavilli Jehovamut ikinngutaanera taamaanngilaq. Daavip qanorluunniit atugaqaraluarluni qinusarnermigut Jehovamik asannillunilu tatiginninnini ersersittarpaa. — Tuss 40:9.

6 Maluginiaruk qanoq Daavip Jehova unnersiutigalugulu qutsavigigaa. “Naalagaq [Jehova, NW] Naalagarput! Naalannangaarpoq aqqit nunarsuarmi tamarmi, illit alutornassutsinnik qilammut ivertitsisutit!” (Tuss 8:2) Daavip Ataataminut qilammiusumut attaveqarluangaarnera erserpoq, ilaa? Daavip Jehovap alutornassusia naalannassusialu ajasoorutigingaaramigit “ulloq tamaat” Jehova unnersiutigisarpaa. — Tuss 35:28.

7. Jehovamut qinukulasarnerput qanoq iluaqutigaarput?

7 Daavitut Jehova tatiginerulerniassagatsigu qinunikkut saaffigikulasariaqarparput. Biibilimi ima allassimavoq: “Guuti qaninniarsiuk, taava taanna ilissinnut qanillissaaq.” (Jaak 4:8) Aamma anersaamik illernartumik tunineqassagutta qinunikkut Jehovamut qanillisariaqarpugut. — 1 Johannesi 3:22 atuaruk.

8. Sooq qinnutivut uteqattaarnaveersaartariaqarpavut?

8 Qinnutitit uteqattaartarpigit? Uteqattaarisaruit qinutinnak qinunikkut qanoq oqassanerlutit eqqarsaatigiuk. Takorlooruk ikinngutit naapikkaangakku tamatigut oqaatsitit uteqattaartaritit. Ikinngutit qanoq misigissasoraajuk? Imaassinnaavoq tusarusukkunnaaraatit. Soorunami Jehovap kiffami ilumoorfiginnittup qinnutaa sumiginnarumanavianngilaa. Oqaatsivulli uteqattaaginnarnaveersaartariaqarpavut.

9, 10. (a) Suut qinnutigisinnaavavut? (b) Qinnutitta isumaqarluarnerulernissaannut suut iluaqutigisinnaavavut?

9 Pingaaruteqarpianngitsuinnaat pillugit qinusarutta Guutimut qanillinerunavianngilagut. Jehova tatiginerulissavarput qinunikkut eqqarsaativut misigissutsivullu ilorlerpaat pillugit taanna aniatitsivigisarutsigu. Suut qinnutigissavavut? Apeqqut tamanna Guutip oqaasiani ima akineqarpoq: “[Kissaatigisasi] qanoq ittukkulluunniit Guutimut saqqummiuttarsigit qinullusi torlulallusilu qujallusilu.” (Fil 4:6) Tassa Guutimut ikinngutaanitsinnut inuunitsinnullu sunniuteqarsinnaasut suulluunniit qinnutigisinnaavavut.

10 Itsaq angutit arnallu aalajaatsut qinnutaat ilinniarfigilluarsinnaavavut. (1 Sam 1:10, 11; ApS 4:24-31) Assersuutigalugu Tussiaatini Jehovamut qinnuterpassuaqarpoq  erinarsuuterpassuaqarlunilu. Taakkunanilu inuttut misigissutsit assigiinngitsorpassuit, assersuutigalugu naalliungaarneq qiimmattangaarnerlu, allaatigineqarput. Qinnutit taakku atuaqqissaartarutsigit qinnutivut isumaqarluarnerulissapput.

GUUTIP OQAAQQISSAARUTAI EQQARSAATIGEQQISSAARTAKKIT

11. Sooq Biibilimi oqaaqqissaarutit eqqarsaatigeqqissaartariaqarpavut?

11 Daavi ima allappoq: “Jehovap oqaaqqissaarutaa tutsuiginartuuvoq, misilittagakitsumik ilisimassuseqalersitsisarpoq.” (Tuss 19:7, NW [19:8]) Misilittagakitsuugaluarluta Guutip oqaaqqissaarutaanik maleruaanikkut ilisimassuseqalersinnaavugut. Guutilli oqaaqqissaarutaasa ilaat iluaqutigilluassagutsigit eqqarsaatigeqqissaartariaqarpavut. Assersuutigalugu najoqqutassianik Biibilimeersunik eqqarsaatiginneqqissaartarnerput atuarfimmi suliffimmiluunniit ussernartorsiornitsinni ilumoorfiginnittuarnissatsinnut iluaqutigisinnaavarput. Aamma Guutip aak pillugu inatsisaanut naalannissatsinnut kristumiutullu kalluunnaveersaanissatsinnut najoqqutassianillu Biibilimeersunik atisalersoriaatsitsinnut tunngasunik maleruaanissatsinnut iluaqutigisinnaavarput. Aap, Guutip oqaaqqissaarutaanik eqqarsaatiginneqqissaartarnerput tamakkununnga tunngatillugu piareersarnissatsinnut iluaqutaavoq. Taava ussernartorsiunnginnitsinni qanoq iliorniarnerluta aalajangersinnaavugut. Taamaaliorutta aliasuutigisinnaasatsinnik kukkunaveersaarsinnaavugut. — Uss 15:28.

12. Guutip oqaaqqissaarutaanik maleruaajuarumalluta apeqqutit suut eqqarsaatigeqqissaarsinnaavavut?

12 Guutip neriorsuutigisaasa eqquunnissaat utaqqitillugu tamakkuninnga upperinnilluinnarnerput Guutillu piumasaanik pingaartitsinerput ersersittuarparput? Assersuutigalugu Babylonersuup suujunnaarsinneqangajalernera upperilluinnarparput? Siunissami pilluaqqussutissat, soorlu nunarsuarmi paratiisiusumi inuunissaq naassaanngitsoq toqusunillu makititsinissaq, ilinnialeqqaarnitsitut piviusuutigaat? Oqaluussinitsinni suli aallussilluarpugut, imaluunniit kissaatigisavut salliuppavut? Jehovap aqqanik illernartitaaneq taassumalu kisimi oqartussaanerata eqqortuuneranik uppernarsaaneq suli pingaarnerpaatittarpavut? Apeqqutit taama ittut eqqarsaatigeqqissaarnissaat Guutip ‘oqaaqqissaarutaanik pigiuagassatut piginnilernissatsinnut’ iluaqutigisinnaavarput. — Tuss 119:111.

13. Sooq kristumiut siulliit ajoqersuutit ilaat paasiuminaatsippaat? Assersuuteqarit.

13 Biibilimi allaatigineqartut ilaat tamakkiisumik paasisinnaanngilavut Jehovammi nassuiaanissaminut suli piffissaasorinngimmagu. Jiisusip anniartitaanissaminik toqutaanissaminillu ajoqersukkani arlaleriarluni oqarfigai. (Matthæusi 12:40; 16:21 atuakkit). Apustililli tamanna qanoq isumaqarnersoq paasinngilaat. Aatsaat Jiisusi makititaareerlunilu ajoqersukkaminut saqqummereerlunilu Missiarsi pillugu siulittuutinik paasinninnissamut ikiuereermat taassuma oqaasii paasivaat. (Luk 24:44-46; ApS 1:3) Aamma aatsaat ukiumi 33-mi piinsip ulluani Kristusip ajoqersugai anersaamik illernartumik taninneqareeramik Guutip naalagaaffiata qilammit naalakkersuinissaa paasivaat. — ApS 1:6-8.

14. 1900-kkut aallartinneranni qatanngutivut uagutsinnut qanoq maligassiuilluarsimappat?

14 Tamatumunnga assingusumik 1900-kkut aallartinneranni kristumiut ilumoortut “ullussani kingullerni” pisussat pillugit kukkusumik ilimagisaqarsimapput. (2 Tim 3:1) Assersuutigalugu 1914-imi ilaat isumaqarsimapput qilaliartitaangajalerlutik, ilimagisamisulli qilaliartitaanngillat. Kristumiut taakku Biibilimik misissueqqissaaqqikkamik paasilerpaat nunarsuaq tamakkerlugu oqaluussineq suliarineqaqqaartariaqartoq. (Mark 13:10) Taamaattumik 1922-mi J.F. Rutherford, taamani oqaluussinermi  siuttuusoq, ataatsimeersuarnermi nunanit tamalaanit peqataaffigineqartumi Cedar Pointimi, Ohiomi, USA-miittumi oqalugiaatimini ima oqarpoq: “Ata, kunngi naalakkersuivoq! Ilissi oqariartortigaasi. Taamaattumik kunngi taassumalu naalagaaffia oqaluussissutigisigik, oqaluussissutigisigik, oqaluussissutigisigik.Taamanimiilli Jehovap kiffai Guutip naalagaaffia pillugu ‘nutaarsiassamik nuannersumik’ oqaluussissutiginnittutut ilisimaneqarput. — Matt 4:23; 24:14, NW.

15. Sooq Jehovap innuttaminut iliorfiginnittarneranik eqqarsaatiginneqqissaartarneq iluaqutaava?

15 Pitsaassaaq Jehovap itsaq ullumikkullu innuttaminut neriorsuutigisaminik eqquutitseriaasia eqqarsaatigeqqissaarutsigu. Taamaaliornikkut Jehovap siunertaminik siunissami naammassinnissinnaanera tutsuiginerusinnaavarput. Guutip neriorsuutaanik eqqarsaatiginneqqissaartarutta taakkua piviusunngornissaat qilanaarutigiuarsinnaallugulu tutsuiginerulersinnaavarput.

GUUTIMIK PALLORFIGINNINNIKKUT ILIUUSEQARNERIT TATIGINNINNERULISSUTIGIUK

16. Guutimut kiffartornermi ulapputeqaraangatta qanoq pilluaqquneqartarpugut?

16 Jehova Guuterput Guutiuvoq suliuartoq pissaanilik. Tussiaasiortoq ima aperivoq: ‘Kina ilittut pissarsuua?’ (1900) Imalu nangippoq: “Nakuuvoq assat, talerpiit qullarsimavoq.” (Tuss 89:9, 14) Jehova Guutiugami iliuuseqartartoq uagut sapinngisarput tamaat kiffartornermi iliuuseqaraangatta iluarisarlutalu pilluaqqusarpaatigut. Kiffani tamaasa, angutit arnallu, inuusuttut utoqqaallu, eqiasuillutillu ulapputtut takusarpai. (Uss 31:27) Teokratiimut tunngasunik ulapputeqartuarnitsigut Pinngortitsiserput ilaartarparput. Sapinngisarput tamaat Guutimut kiffartornitsinni iliuuseqarnerput nuannaarutigisarparput, Jehovallu tamanna aamma nuannaarutigisarpaa. — Tussiaat 62:13 atuaruk.

17, 18. Sooq oqartoqarsinnaava upperluta iliuuseqarnerput Jehovamik tatiginninnerulissutaasoq? Assersuuteqarit.

 17 Sooq upperluta iliuuseqarnerput Jehovamik tatiginninnerulissutigaarput? Israelikkut nunamik neriorsuutigisamik tiguaangajalerneranni qanoq pisoqarnersoq eqqarsaatigeriaruk. Jehovap palasit ‘angerutsip illerfianik ersuttut’ kuussuakkut Jordanikkut ikaaqquai. Kuussuarmut qanilliartortillutik takuaat upernaakkut siallerujussuarsimanera pissutigalugu kuussuaq sarfaqangaarlunilu qarsussimasoq. Israelikkut qanoq iliorpat? Tammaarlutillu sapaatip-akunneri arlallit kuussuup qarsutsiunnaarnissaa utaqqivaat? Naamik, Jehova tatigilluinnarpaat peqqussutaalu maleruarlugit. Taava qanoq pisoqarpa? Biibilimi ima oqaluttuarineqarpoq: “[Palasit] Jordanip ernga isikkaminnik attorniariarmassuk imeq qulaanit kuuttoq unerarpoq.” Taavalu palasit “Jordanip qeqqani panertumi qeqarput Israelikkut qaasiinatik ikaartillugit, inuit tamarmik Jordanikkut ikaareerserlugit”. (Jos 3:12-17) Takorlooriaruk Israelikkut kuussuaq paqqerluinnartoq takugamikku qanoq nuannaartigisimassasut. Taakkua Jehovap peqqussutaanik maleruaanertik Jehovamik upperinninnerulersutigaat.

Josvap nalaani Israelikkut tatiginninnerattut tatiginnissavit? (Immikkoortut 17, 18-ilu takukkit)

18 Ullumikkut Jehovap taamatut innuttaminut tupinnartuliortanngikkarluarluni upperluta peqqussutaanik maleruaajuarnerput pissutigalugu pilluaqqusarpaatigut. Nunarsuaq tamakkerlugu Guutip naalagaaffia pillugu tusarliussamik oqaluussissutiginninniassagatta Guutip anersaava uagutsinnik sapiissuseqalersitsisarpoq. Jehovap nalunaajaasuisa pingaarnersaata, Jiisusip Kristusip, ajoqersukkani neriorsorpai oqaluussinermi pingaarutilimmi tapersersorumaarlugit. Ima oqarfigai: “Taamaattumik aallaritsi inunnillu inuiannit tamaneersunik ajoqersuganngortitsigitsi ... Ullut tamaasa najorpassi pissutsit aaqqissuussaanerata naggataatungaanut allaat.” (Matt 28:19, 20, NW) Oqaluussisartorpassuit ittoortut allamilluunniit oqaloqateqarnissamik ernumasut misigisimapput Guutip anersaavanit illernartumit oqaluussinermi inunnik nalusaminnik oqaloqateqarnissaminnut sapiissuseqalersinneqarsimallutik. — Tussiaat 119:46; 2 Korinthimiut 4:7 atuakkit.

19. Pisinnaasavut killeqaraluartut suna qularutiginngilluinnarsinnaavarput?

19 Qatanngutitta ilaat napparsimanertik utoqqalinertilluunniit pissutigalugu Guutimut kiffartornerminni iliuuseriumasamissut iliuuseqarsinnaanngillat. Qularinngissinnaavaalli ‘Ataatap nallittuisup Guutillu tuppallersaajuartup’ pissutsit atugaannik paasinninnera. (2 Kor 1:3) Taassumunnga kiffartornitsinni iliuuserisinnaasavut tamaasa pingaartingaarpai. Tamattalu eqqaamasariaqarparput pingaarnerpaamik Kristusip utertitsissutitut pilliutaanik upperinninnerput pissutigalugu aniguisinneqarsinnaalluta. — Hebr 10:39.

20, 21. Jehovamik tatiginninnerput qanoq ersersissinnaavarput?

20 Pisinnaasavut naapertorlugit piffissarput, nukivut pigisavullu Guutimik pallorfiginninnitsinni atorusuppavut. Aamma sapinngisarput tamaat oqaluusserusuppugut. (2 Tim 4:5) Inuit ‘sallusuissummik eqqorluartumik ilisimasaqalernissaannik’ ikiuinerput nuannaarutigaarput. (1 Tim 2:4, NW) Jehovamik ataqqinnillutalu unnersiutiginninnerput anersaakkut pisuunnguutigaarput. (Uss 10:22) Aamma qanorluunniit pisoqassagaluarpat Pinngortitsisitsinnik tatiginnilluinnarnissatsinnut iluaqutigaarput. — Rom 8:35-39.

21 Soorlu sammereeripput Jehova tatigiumallugu taassumalu siunnersuutitsialai tutsuigiumallugit iliuuseqartariaqarpugut. Taamaattumik qinusarnerit Jehovamik tatiginninnerulissutigiuk. Jehovap neriorsuutiminik itsaq eqquutitsisarnera siunissamilu qanoq eqquutitsinissaa eqqarsaatigeqqissaakkit. Aamma Jehovamik pallorfiginninnikkut iliuuseqarnerit taassuminnga tatiginninnerulissutigiuaannaruk. Eqqaamajuk Jehovap oqaaqqissaarutai naassaanngitsussamut atajuassasut. Oqaaqqissaarutillu taakku maleruartuarukkit naassaanngitsumik inuusinnaavutit!