Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Septembari 2013

Pioneriuneq Guutimik attaveqarnitsinnik nakussatsitsisarpoq

Pioneriuneq Guutimik attaveqarnitsinnik nakussatsitsisarpoq

“Iluaqaaq Guuterput erinalimmik unnersiutigalugu.” — TUSS 147:1.

1, 2. (a) Asasavut eqqarsaatigigaangatsigit oqaluuserigaangatsigillu susoqartarpa? (Allaaserisap aallaqqaataani assiliaq takuuk). (b) Apeqqutit suut sammissavavut?

ASASARPUT eqqarsaatigigaangatsigu oqaluuserigaangatsigulu taassumunnga asanninnerulertarpugut. Jehovamik Guutimik ikinnguteqarnitsinnut tunngatillugu aamma taamaappoq. Daavip savanik paarsisuunermini unnuakkut ullorissanik isiginnaartarnermini Pinngortitsisup asseqannginnera eqqarsaatigeqqissaartarsimassavaa. Ima allappoq: “Takugaangakkit qilak pigisat, assappit pinngortitaat, qaammat ullorissallu tassani ivertitatit, taava inuk suummat eqqaasarpiuk, inuup qitornaa suummat isumagisarpiuk?” (Tuss 8:4, 5) Aamma Jehovap kristumiut tanitat pillugit siunertaminik nuanningaartumik piviusunngortitsinera apustilip Paulusip allaatigigamiuk qiimmattarluni ima allappoq: “Ilami Guutip pisuussusiata ilisimassusiatalu siuneqassusiatalu itissusiat!” — Rom 11:17-26, 33.

2 Oqaluussigaangatta Jehova eqqarsaatigisarlugulu oqaluuserisarparput. Tamanna taassuminnga ikinnguteqarnitsinnik nakussatsitsisarpoq. Pionererpassuit piffissaminnik oqaluussinermut atuinerunertik pissutigalugu Guutimut asanninnerulersutut misigisimapput. Pioneriuguit imaluunniit pionerinngorusukkuit apeqqutit uku eqqarsaatigikkit: Pioneriuneq qanoq Jehovamut attaveqarninnik nakussatsitsisinnaava? Pioneriuguit kiffartornermi immikkut ittumiiginnarnissannut suna iluaqutigisinnaaviuk? Suli pionerinngorsimanngikkuit pionerinngorumallutit susinnaavit? Siullermik pioneriunikkut Guutimik attaveqarnitsinnik qanoq nakussatsitsisinnaanerluta sammeriartigu.

 PIONERIUNEQ GUUTIMIK ATTAVEQARNITSINNIK QANOQ NAKUSSATSITSISARTOQ

3. Guutip naalagaaffiata pilluaqqussutissartaanik eqqartuisarnerput qanoq iluaqutigisarparput?

3 Guutip naalagaaffiata pilluaqqussutissartai eqqartoraangatsigit Jehovamut qaninnerulertarpugut. Illumit illumut oqaluussingaangavit allassimaffiit sorliit atussallugit nuannarineruigit? Immaqa allassimaffiit ukua ilaat nuannarineruatit: Tussiaat 37:10, 11; Danieli 2:44; Johannesi 5:28, 29; imaluunniit Saqqummersitat 21:3, 4. Neriorsuutit taakku allanut oqaluttuarigaangatsigit “tunissutit ajunngitsut naammalluinnartuusullu tamarmik” Guutitsinnit, Jehovamit, tukkortumit tunissutaanerannik eqqaasinneqartarpugut. Tamanna taassumunnga qaninnerulissutigisarparput. — Jaak 1:17.

4. Sooq allanut oqaluussigaangatta Guutip ajunngisaartarnera qujamasuutiginerulertarparput?

4 Inuit qanoq naalliutsigalutillu neriuutissaqanngitsiginerat takugaangatsigu sallusuissummik ilisimanninnerput qujamasuutiginerulertarparput. Inuit silarsuarmiittut iluatsilluarnissaminnut pillualivinnissaminnullu tutsuiginartumik ilitsersorneqarneq ajorput. Amerlanerit siunissaq pillugu ernumallutillu neriuutissaqanngillat. Inuuneq sumik siunertaqarnersoq paaserusuppaat. Allaat inuit upperisamik sammisaqartartut Biibili pillugu annikitsuinnarmik ilisimasaqarput. Inunnut Ninevemiunut eqqaanarput. (Jona 4:11 atuaruk). Piffissarput inunnut oqaluussinermut atornerujartortillugu Jehovamit qanoq isumassorluarneqartigaluta paasinerujartortarparput. (Es 65:13) Jehovali innuttami pisariaqartitaanik isumassuinermit suli annerusumik iliuuseqartarpoq. Inuit tamarmik tuppallersarneqarnissaannut piviusumillu neriuutissaqalernissaannut periarfissippai. Tamanna Jehovap qanoq ajunngitsigineranik eqqaasitsissutigisarparput. — Saqq 22:17.

5. Allat sallusuissut pillugu ilinniartikkaangatsigit nammineq ajornartorsiutivut pillugit qanoq misigilertarpugut?

5 Allat sallusuissut pillugu ilinniartikkaangatsigit nammineq ajornartorsiutitsinnik isumakuluutiginnippallaannginnissarput ilinniartarparput. Trisha, pioneriusoq, oqaluttuarpoq angajoqqaami avinnerat nanertisimassutigingaarsimallugu. Ullut ilaanni aliasunnerungaarpoq oqaluussinissaminullu piumassuseqarpallaarnani. Taamaakkaluartorli Biibilimik atuaqqissaaqateqariartorpoq. Meeqqat ilaqutariinni ajornartorsiuterpassualinni peroriartortut atuaqqissaaqatigai. Ataataminnit qimanneqarsimallutillu qatanngutiminnit angummit ajorluinnartumik pineqartarput. Trisha ima oqarpoq: “Ajornartorsiutikka uummatikkulluunniit anniaatikka taakkua ajornartorsiutaannut sanilliullugit suunngillat. Atuaqqissaaqatigiinnitsinni isaat nuannaarpasilerlutillu qiimmatsannermit nuannaarnermillu tissitsapput. Meeqqat taakku, ingammik ulloq taanna, Jehovamit tunissutaapput.”

6, 7. (a) Sallusuissutinik Biibilimeersunik ilinniartitsigaangatta uppernerput qanoq nakussatsinneqartarpa? (b) Atuaqqissaaqatigisartakkatta najoqqutassiat Biibilimeersut iluaqutigalugit inuunerminnik pitsaanerulersitsinerat takugaangatsigu qanoq misigisarpugut?

6 Allat sallusuissutinik Biibilimeersunik ilinniartikkaangatsigit upperinninnerput nakussatsinneqartarpoq. Apustili Paulusi juutit nalimini ajoqersuinermissut iliuuseqarneq ajortut pillugit ima allappoq: “Illit allamik ilinniartitsisartutit imminut ilinniartinneq ajorpit?” (Rom 2:21, NW) Pionerit sallusuissut pillugu allanut ilinniartitsinissaminnut Biibilimillu atuaqqissaaqateqarnissaminnut periarfissarpassuaqartarput. Pitsaanerpaamik taamaaliorsinnaajumallutik imminut ilinniarteqqaartariaqarput. Atuaqqissaaqateqannginnerminni tamatigut piareersartariaqarlutillu apeqqutinut akissutissarsiniarlutik immaqa misissueqqaartariaqarput. Pioneri Janeenimik atilik nassuiaavoq sallusuissut pillugu allanik ilinniartitsinerit tamaasa sallusuissutinik ilinniartitsissutigisaminik upperinninnerulertarluni.

7 Atuaqqissaaqatigisartakkatta najoqqutassiat Biibilimeersut iluaqutigalugit inuunerminnik  pitsaanerulersitsinerat takugaangatsigu Guutip ilisimassusia qujamasuutiginerulertarparput. (Es 48:17, 18) Tamanna najoqqutassianik taakkuninnga maleruaarusunnerulissutigisarparput. Adrianna, pioneriusoq, ima oqarpoq: “Inuit namminneq ilisimassusertik tutsuigileraangassuk ingerlanerlulertarput. Jehovamilli tatiginnilernertik ingerlaannaq iluaqutigisarpaat.” Pioneri Philimik atilik oqarpoq inuit Jehovap ikiuineratigut inuunerminnik allannguisitsisinnaanerat tupigusuutigisarlugu.

8. Qatanngutitsinnik oqaluusseqatiginninnerput qanoq iluaqutigisarparput?

8 Qatanngutitsinnik oqaluusseqatiginninnerput nakussatsissutigisarparput. (Uss 13:20) Pionerit nalunaaquttap-akunnerpassui qatanngutiminnik oqaluusseqatiginninnermut atortarpaat. Tamanna ‘kajumissaaqatigiinnissaminnut’ periarfissarpassuaqalissutigisarpaat. (Rom 1:12; Ussatit 27:17 atuaruk). Pioneri Lisamik atilik oqaluttuarpoq suliffimmini allanit iluarneruniarneq sinngasarnerlu nalinginnaasorujussuusut. Ullut tamaasa ajortumik oqaluuserinnittoqartoq kannguttaatsumillu oqaluttoqartoq tusaasarpaa. Ima nangippoq: “Ilaanni kristumiutut pissuseqarnerit pissutigalugu illaruaatigineqartarlutillu mitaatigineqartarputit. Kristumioqatinilli oqaluusseqateqarneq ineriartornartorujussuuvoq. Qanorluunniit qasutigigaluarlunga angerlaraangama inuummarinnerujuaannarpunga.”

9. Aappariit pionerioqatigiinnerat aappariinnerannut qanoq iluaqutaasarpa?

9 Aappatsinnik pionerioqatiginninnerput aappariinnitsinnik nakussatsitsisarpoq. (Oqal 4:12) Madeline, uiminik pionerioqatiginnittoq, ima oqaluttuarpoq: “Uigalu ullup ingerlanerani oqaluussinitsinni pisimasut Biibilimilu atuarsimasavut oqaluussinitsinni atorsinnaasavut oqaloqatigiissutigisinnaavavut.  Ukiut pionerioqatigiiffivut amerliartortillugit imminut qaninnerulertarpugut.” Pioneri Trishamik atilik oqaluttuarpoq uinilu aalajangersimallutik akissaqartinngisaminnik pisisarniaratik. Tamatuma kingunerisaanik aningaasat assortuussutigineq ajorpaat. Aamma marluullutik pulaaqqeeqatigiittarlutillu Biibilimik atuaqqissaaqateqartarput. Tamanna aappariinnerminnik nakussatsitsinerunissaminnut iluaqutigisimavaat.

Piffissaq tamaat kiffartortuugutta nalerisimaalersinnaavugut (Takuuk immikkoortoq 9)

10. Guutip naalagaaffianik salliutitsigaangatta Guutillu tapersersuinera misigigaangatsigu Jehovamik tatiginninnerput qanoq sunnerneqartarpa?

10 Guutip naalagaaffianik salliutitsigaangatta, Jehovamit tapersersorneqarnerput misigigaangatsigu qinnutivullu akineqartut takugaangatsigit Jehovamik tatiginninnerulertarpugut. Kristumiut ilumoorfiginnittut tamarmik Jehovamik tatiginninnerat ilumoorpoq. Pioneriusulli paasisarpaat Jehovamik tatiginninnikkuinnaq pioneriujuarsinnaallutik. (Matthæusi 6:30-34 atuakkit). Curt, pioneriusoq ilagiinnillu nakkutilliisumut taartaasoq, ilagiinnut angerlarsimaffimminit biilerluni nalunaaquttap-akunnerinik marlunnik affarmillu ungasissusilimmut tikeraarnissaminut akuersivoq. Nulianilu, aamma pioneriusoq, ilagiinnukarnissaminnut biiliminni orsussaqaqqarput, angerlaqqinnissaminnulli orsussaqaratillu aatsaat sapaatip-akunnera ataaseq qaangiuppat akissarsisussaapput. Curt oqarpoq aallarnissartik nangaassutigisimallugu. Qinoreerlutik aalajangerput suliassiissut naammassiniarlugu Guutillu pisariaqartitaminnik isumaginnikkumaarnera tatiginiarlugu. Aallanngitsiartut qatanngut arnaq sianerpoq oqarfigalugillu tunissuteqarfiginiarlugit. Angalanissaminnut aningaasanik pisariaqartitarpiaminnik tunineqarput. Curt oqarpoq taama ittunik arlaleriarluni misigisaqartaraanni Jehovap pisariaqartitatsinnik tunisisarnera ersarissisartoq.

11. Pionerit pilluaqqussutit misigisartagaat ilaat suuppat?

11 Pionerit oqarajupput Guutimut qanilliartornertik taassumunngalu kiffartornermi iliuuseqarnerunertik ilutigalugu pilluaqqussutit amerliartortartut. (5 Mos 28:2) Pioneriunerli unamminiarnartoqarsinnaavoq. Naammalluinnanngitsuunerput silarsuarlu manna ajortoq pissutigalugit tamatta naalliuuteqartarpugut. Ilaannikkut pionerit ajornartorsiutitik pissutigalugit kiffartornerminnik unititsigallarsinnaasarput, amerlanertigulli ajornartorsiutit taakku aaqqinneqarsinnaallutillu pinngitsoortinneqarsinnaasarput. Pionerit kiffartornermi immikkut ittumiiginnarnissaminnut suna iluaqutigisinnaavaat?

QANOQ PIONERIUSOQARTUARSINNAASOQ

12, 13. (a) Pioneri nalunaaquttap-akunneri piumasaqaataasut angumeriuminaatsikkunigit susariaqarpa? (b) Sooq nammineerluni atuaqqissaartarneq, eqqarsaatiginneqqissaartarneq ullullu tamaasa Biibilimik atuartarneq taama pingaaruteqartigippat?

12 Pionerit amerlanerit ulapittorujussuusarput. Pisassat tamaasa angumeriuminaassinnaasarmata pilersaarusiorluarsinnaaneq pisariaqarpoq. (1 Kor 14:33, 40) Pionerip nalunaaquttap-akunneri piumasaqaatigineqartut angumeriuminaatsikkunigit piffissamik qanoq atuisarnini eqqarsaatigeqqissaartariaqarpaa. (Ef 5:15, 16) Imminut ima aperisinnaavoq: ‘Aliikkutassat piffissartorfigivallaarpakka? Sulisarnikka allanngortissinnaavakka? Pisariaqanngitsut piffissartorfigivallaartarpakka?’ Pionerit taamatut imminut aperikulasariaqarput pisariaqaraangallu allannguisariaqarlutik.

13 Pioneri nammineerluni atuaqqissaartarnissaminut, eqqarsaatiginneqqissaartarnissaminut ullullu tamaasa Biibilimik atuartarnissaminut pilersaarusiortariaqarpoq. Pionerip qulakkeertariaqarpaa pingaaruteqannginnerusut pingaaruteqarnerusuninngarnit salliutinneqannginnissaat. (Fil 1:10) Assersuutigalugu takorlooruk pioneri ulloq naallugu oqaluussereerluni angerlartoq. Tulliani ataatsimiinnermi sammineqartussanik unnukkut piareersarniarluni pilersaaruteqarpoq.  Siullermilli allagarsiani atuaqqaarpai. Taava qarasaasiaq ikeriarlugu e-mailisiani atuarlugillu akivai. Interneternermini pilerigisani qanoq akeqarnersut misissorpai. Pileriallarpaa nalunaaquttap-akunnerini marlunni ataatsimiinnissamut piareersarnani allanik sammisaqarsimalluni. Sooq tamanna ajornartorsiutaava? Timersortartoq sivisuumik timersornermik inuussutissarsiuteqarusukkuni peqqinnartunik neriuartariaqarpoq. Taamatuttaaq pioneri pioneriujuarsinnaajumalluni nammineerluni atuaqqissaartuartariaqarpoq. — 1 Tim 4:16.

14, 15. (a) Sooq pionerit pilimanianngitsumik inuusariaqarpat? (b) Pioneri ajornartorsiuteqaruni susariaqarpa?

14 Pionerit iluatsilluartut sapinngisaminnik inuunerminnik pilimanianngitsuutitsiniartarput. Jiisusip ajoqersukkani taamaaliornissaannut kajumissaarpai. (Matt 6:22) Jiisusi oqaluussinerminik aallussilluartuarumalluni pilimanianngitsumik inuuvoq. Ima oqarsinnaasimavoq: “Terianniat siseqartarput qilaallu timmiai ulloqartarlutik, Inuulli Ernera niaqquminut iigarfissaqanngilarluunniit.” (Matt 8:20) Pionerit Jiisusimik ilaarsiniartut eqqaamasarpaat pigisatik amerliartortillugit aserfallatsaaliugassatik, iluarsaatassatik taarsiinissatillu amerliartuinnartartut.

15 Pionerit paasivaat kiffartornertik immikkut ittuusoq, allanilli pitsaanerusutut eqqarsarneq ajorput. Nalunngilaat pioneritut kiffartorneq Jehovamit tunissutaasoq. Pionerit taamatut kiffartortuarumallutik Jehovamik tatiginnittariaqarput. (Fil 4:13) Ajornartorsiuteqartartussaapput. (Tuss 34:20) Pionerit ajornartorsiuteqaleraangamik ingerlaannaq pioneritut kiffartorunnaaratik Jehovamut siulersortittariaqarlutillu taanna ikiuinissaanut periarfissittariaqarpaat. (Tussiaat 37:5 atuaruk). Jehovamit asannittumik ikiorneqarnertik misiginerujartortillugu taassuminnga ikinnguteqarnerat nakussatsikkiartussaaq. — Es 41:10.

PIONERITUT KIFFARTULERSINNAAVIT?

16. Pionerinngorusukkuit susariaqarpit?

16 Pionerinngorusunnerit pionerisullu pilluaqquneqarusunnerit Jehovamut qinnutigiuk. (1 Joh 5:14, 15) Pionerit oqaloqatigisakkit. Pionerinngornissannut iluaqutissannik anguniagaqarit. Keith Erikalu taama iliorput. Aappariippassuartut peqatimissut ulloq naallugu sulisarlutillu katereernermik kinguninngua illusillutillu nutaamik biilisipput. Ima oqarput: “Isumaqaqqaaraluarpugut tamakku nalerisimaalissutigissallugit — nalerisimaalissutiginngilavulli.” Keith soraarsitaareernermi kingorna ikiorti-pioneritut kiffartulerpoq. Ima oqarpoq: “Pioneriuneq oqaluussinerup qanoq nuannaalernartigineranik eqqaasitsissutigaara.” Aappariit pioneriusut ikinngutigiligaasa pioneriunerup pilimanianngitsumillu inuuneqarnerup qanoq nuannaalernartigineranik paasinninnissaannut ikiorpaat. Keith Erikalu qanoq iliorpat? Anguniakkatik allattoriarlugit nillataartitsivimmut nivinngarpaat anguniakkatillu angugaangamikkit nalunaaqutsertarlugit. Piffissap ingerlanerani pionerinngorsinnaanngorput.

17. Sooq pionerinngorsinnaaninnik eqqarsaatiginneqqissaarnerit silatusaarnerussava?

17 Pionerinngorsinnaavit? Massakkorpiaq pionerinngorsinnaanngikkuit Jehovamut qanilliartortuarumallutit sapinngisat tamaat oqaluussinermi iliuuseqarit. Jehovamut qinuguit atukkatillu eqqarsaatigeqqissaarukkit immaqa paasissavat inuuninnik allannguinikkut pionerinngorsinnaallutit. Pionerinngoruit nuannaarnerit pilliutigisimasannit tamanit annerungaalissaaq. Nammineq soqutigisannik salliutitsinak Guutip naalagaaffianik salliutitsinerit nalerisimaarnerungaalissutigissavat. (Matt 6:33) Jehovamik eqqarsaatiginninnerulernissannut oqaluuserinninnerulernissannullu periarfissaqalissaatit, tamannalu taassuminnga asanninnerulissutigissallugulu taassumannga iluarisaalissutigissavat.