Imarisai

Imai

Jehovap Nalunaajaasui

Oqaatsit toqqakkit Kalaallisut

Allanngorpit?

Allanngorpit?

‘Allanngoritsi isummassigut nutaanngortitaajuarlusi.’ — ROM 12:2.

1, 2. Perorsarneqarnerput avatangiisivullu inuunitsinnut qanoq sunniuteqartarpat?

TAMATTA perorsarneqarnitsinnit avatangiisitsinnillu, tassa ikinngutitsinnit, kulturitsinnit inuiaqatigiinnilu inuuffigisatsinnit, sunnerneqartarpugut. Taamaattumik nerisassat aalajangersimasut mamarisarpavut aalajangersimasumillu atisalersoriaaseqarlutalu iliuuseqartarpugut.

2 Atisalersoriaatsitsinnilli nerisartakkatsinnillu pingaarnerungaartoqarpoq. Assersuutigalugu peroriartornitsinni oqaluttuunneqartarpugut suna eqqortuunersoq sunalu eqqunngitsuunersoq. Kisianni suup eqqortuunera suullu eqqunngitsuunera assigiinngitsunik isumaqarfigineqarpoq. Aalajangiisarnitsinnut aamma nalunngeqatiginnissuterput sunniuteqartarpoq. Biibilimi allassimavoq ‘Guutimik nalusut inatsisit piginagit inatsisit peqqussutaat malillugit iliortartut’. (Rom 2:14) Guutili arlaannut tunngatillugu erseqqissumik inatsiseqanngippat taava ilaquttatta nunaqqatittaluunniit malittarisaat nalinginnaasut maleruaannarsinnaavavut?

3. Kristumiut silarsuarmi najoqqutarineqartunik maleruaaginnannginnissaannut pissutaasut marluk eqqaakkit.

3 Pingaarutillit ikinnerpaamik marluk pissutigalugit kristumiut malittarisassanik nalinginnaasunik maleruaaginnarneq ajorput. Siullermik, Biibilimi ima allassimavoq: “Ingerlavik angutip eqqortuusorisaralua toqumik isuliffeqarsinnaavoq.” (Uss 16:25) Naammalluinnanngitsuugatta alloriartarnitsinni kukkujuitsuusinnaanngilagut. (Uss 28:26; Jer 10:23) Aappassaanik, Biibilimi allassimavoq Saatani ‘silarsuup matuma guutigigaa’. Taassuma silarsuarmi najoqqutassiat, tassa silarsuarmi suna eqqortuusorineqassanersoq sunalu eqqunngitsuusorineqassanersoq aamma suut nuannarineqassanersut, aquppai. (2 Kor 4:4; 1 Joh 5:19) Jehova nuannaartikkusukkutsigu taassumanngalu pilluaqquneqarusukkutta oqaaqqissaarut Romamiut 12:2-mi allassimasoq maleruartariaqarparput. — Atuaruk.

4. Allaaserisami matumani suut sammissavavut?

 4 Allaaserisami matumani Romamiut 12:2-meersut pingaarutillit pingasut uku sammineqarput: (1) Sooq allanngortariaqarpugut? (2) Sutigut allanngortariaqarpugut? Aamma (3) qanoq allanngorsinnaavugut?

SOOQ ALLANNGORTARIAQARPUGUT?

5. Romamiut 12:2-mi Paulusi kikkunnik oqaaqqissaariva?

5 Paulusi ukiumi 56-imi Romamiunut allakkami inuit Romamiittut tamaasa allaffiginagit kristumiut tanitat tassani najugallit allaffigai. (Rom 1:7) Allanngoqqullugit ‘silarsuarmullu matumunnga naleqqussaqqunagit’ ilungersorluni kajumissaarpai. “Silarsuarmut” ilaapput inuit Romamiittut eqqortuusorisaat eqqunngitsuusorisaallu aammattaaq taakkua ileqqui, pissusilersortarnerat atisalersoriaasiallu. Kristumiut ilaat Romamiutut suli iliortarlutillu eqqarsartarmata Paulusip allaffigai ‘naleqqussassanngitsut’. Qanoq sunnerteqqagamik?

6, 7. Sooq Paulusip nalaani Romami kristumiuuneq unamminiagassartaqarpa?

6 Takornariat ullumikkut Romamiikkaangamik naalaffiit, ilerrit eqqaassutissiallu kristumiut siulliit nalaanni piusut amiakkui takusinnaasarpaat. Tamakku iluaqutigalugit itsaq Romami inuit inuunerat guutisiortarnerallu pillugit paasisaqarfigisinnaavavut. Oqaluttuarisaaneq pillugu atuakkiani isiginnaartitsivinni peqqarniitsumik sakkuaattut, qamutinik sorsuutinik sukkaniuuttut isiginnaartitsinerillu nalinginnaasut nipilersuutitallillu ilaannikkut kinguaassiuutitigut kanngunartuliornertallit allaaserineqarput. Taamani Roma illoqarfiuvoq pigissaarfiusoq inuit aningaasarsiorluarnissaminnut periarfissarpassuaqarfigisaat. — Rom 6:21; 1 Petr 4:3, 4.

7 Romamiut naalaffippassuaqaraluarlutik guuterpassuartalinnik guutisiorfigisaminnut qanittumik attaveqarfiginninniartartutut ilisimaneqanngillat. Romamiut upperisarsiornerminni pingaarnerpaatippaat ileqqulersuutit — soorlu inuuissiornernut, katittorsiornernut ilisinernullu tunngasut. Tamakku katerisimaarnernut tunngaviusarput. Takorlooriaruk kristumiunut Romamiittunut qanoq unamminiarnartigisimanersoq. Taakkua ilarpassui guutipilussiortussatut perorsagaapput, taamaattumillu kristumiunngorumallutik allanngortariaqarput. Allaat kuisinnermik kingorna suli allannguisariaqarput.

8. Sooq ullumikkut silarsuaq kristumiunut navianartuua?

8 Taamatuttaaq ullumikkut silarsuaq kristumiunut navianartuuvoq. Sooq? Silarsuup anersaava sumi tamaniimmat. (Efesosimiut 2:2, 3; 1 Johannesi 2:16 atuakkit). Silarsuup kissaatiminik, eqqarsartaatsiminik, malittarisassiaminik ileqqussatigullu najoqqutassiaminik ullut tamaasa sunnerniarsarisarmatigut silarsuarmut ilannguttooriaannaavugut. Taamaattumik ‘silarsuarmut matumunnga naleqqussannginnissamik  allanngornissamillu’ oqaaqqissaarut naalattariaqarparput. Allanngorniarluta susariaqarpugut?

SUTIGUT ALLANNGORTARIAQARPUGUT?

9. Inuppassuit kuisissinnaalerumallutik qanoq allannguisarpat?

9 Inuup Biibilimik atuaqqissaartarnermigut ilikkakkanilu malillugit inuulernermigut Jehova qanilliartortarpaa. Upperisarsiorneq eqqunngitsoq qimallugulu inuunerminik allannguisarpoq. Inuk nutaaq atiniarlugu Jiisusitullu pissuseqalerumalluni ilungersortarpoq. (Ef 4:22-24) Ukiut tamaasa inuit 100.000-it arlallit taamatut siumukarlutillu Jehovamut tunniulluinnarlutillu kuisittarmata nuannaarutigaarput. Aamma Jehovap tamanna nuannaarutigisarpaa. (Uss 27:11) Allannguinerilli tamakku naammappat?

Inuppassuit Saatanip silarsuaanut ilaajunnaarlutillu allanngortittariaqarput (Immikkoortoq 9 takuuk)

10. Sooq allanngorneq tassaaginnanngila siumukarneq?

10 Allanngorneq tassaaginnanngilaq siumukarneq inuttulluunniit ineriartorneq. Assersuutigalugu nioqqutissap puuani allassimagaluartoq ‘pitsanngortitaq’ nioqqutissaq taanna allanngortinneqalaaginnarsimavoq. Immaqa akuginngisaanik allamik akuneqaannarsimavoq puualuunniit allanngortinneqarsimalluni. Oqaatsinik Biibilimeersunik qinerlerfissiaq naapertorlugu oqaaseq ‘allanngoritsi’ Romamiut 12:2-mi atorneqartoq isumaqarpoq anersaap illernartup ikiuineratigut eqqarsartaatsimik nutarterineq allannguinerluunniit. Taamaattumik kristumiup allanngornera tassaaginnanngilaq ileqqupiloqarunnaarnera, oqaasipalaanik atuisarunnaarnera inuunerlukkunnaarneralu. Inuimmi Biibilimik ilisimanninngitsut ilaat tamakkuninnga aamma ingalassimanninniartarput. Taavami kristumiut allanngortariaqarnerat qanoq paasisariaqarpa?

11. Paulusi naapertorlugu inuk allanngorumalluni susariaqarpa?

11 ‘Allanngoritsi isummassigut nutaanngortitaajuarlusi,’ Paulusi allappoq. ‘Isuma’ eqqaaneqaraangat pineqartarpoq eqqarsartaaseq, Biibilimili aamma pineqartarput eqqarsaatigeqqajaasartakkavut, isiginnittaaserput isummeriaaserpullu. Paulusip Romamiunut allakkami aallaqqaataata tungaani inuit ‘sussaanngitsumik eqqarsartaasillit’ eqqartorpai. Inuit taamaattut ‘iluaassusermik, ajussusermik, piumatussusermik, ileqqorlunnermillu tamanik ilumioqangaarput ulikkaarlutillu sinnganermik, inuarniarnermik, saqitsaakkumatussusermik, unneqqaserlunnermik naakkittaassusermik’ taakkualu assigisaannik. (Rom 1:28-31) Kristumiut inuit taamaattut akornanni inuusut ‘isummakkut nutaanngortitaanermikkut allanngoqqullugit’ Paulusip oqaaqqissaarmagit paasinarpoq.

‘Puffajanerit, kamannerit, nipiliornerit mitalliinerillu eqqaasassanngilasiluunniit.’ — Ef 4:31

12. Inuppassuit qanoq isumaqarpat, taamatullu isiginnittaaseqarneq sooq kristumiunut ulorianartuua?

12 Ajoraluartumik silarsuarmi avatangiisitsinni inuppassuit Paulusip allaatigisaatut eqqarsartaaseqarput. Isumaqarput malittarisassat najoqqutassiallu Biibilimeersut malillugit inuuneq qangarnisaavallaartoq  taakkualu malillugit inooqqullutik kialluunniit pinngitsaalissanngikkaatsik. Ilinniartitsisorpassuit angajoqqaarpassuillu meeqqat qanorluunniit iliorusukkaangata kissaatigisaattut iliorsinnaatittarpaat. Allaat ilinniartittarpaat suna eqqortuunersoq sunalu eqqunngitsuunersoq inuup nammineq aalajangersinnaagaa. Inuit taamaattut isumaqarput sunaluunniit eqqortuusinnaasoq. Allaat inuppassuit oqaraluarlutik Guuti upperalugu isumaqarput Guutip eqqortuuneragaatut iliortariaqarnatik. (Tuss 14:1) Taamatut isiginnittaaseqarneq kristumiunut ulorianartuuvoq. Mianersunngikkuttami ilitsersuutit Guutip peqatigiissortaaneersut maleruarunnaarsinnaavavut allaalluunniit nuannarinngisatsinnik sunilluunniit isornartorsiuisalerluta. Immaqaluunniit aliikkusersorneq, internetimik atuineq qaffasinnerusumillu ilinniagaqarneq pillugit siunnersuutit Biibilimeersut isumaqatigivallaanngilavut.

13. Sooq inuttut qanorpiaq ittuunerluta unneqqarilluta eqqarsaatigisariaqarparput?

13 ‘Silarsuarmut matumunnga naleqqussarunnaarniarutta’, tassa eqqarsartaaserput misigissutsivullu silarsuarmit aalajangertikkunnaarniarutsigit, inuttut qanorpiaq ittuunersugut unneqqarilluta eqqarsaatigisariaqarparput. Misigissutsivut ilorlerpaat, isiginnittaaserput, anguniakkavut malittarisavullu misissortariaqarpavut. Inuttut qanorpiaq ittuunersugut takuneqarsinnaajuaannanngilaq. Inuit allat ingerlalluarnerarsinnaavaatigut. Inuulli nammineq kisimi nalunngilaa ilikkakkani Biibilimeersut iluaqutigalugit allanngorsimanerluni taamaaliortuarnerlunilu. — Jaaku 1:23-25 atuakkit.

QANOQ ALLANNGORSINNAASUGUT

14. Qanoq paasisinnaavarput sutigut allanngortariaqarnersugut?

14 Allanngorumalluta uummammiugisatsinnik, tassa inuttut qanoq ittuunitsinnik, allannguisariaqarpugut. Taamaaliornitsinni suna iluaqutigisinnaavarput? Biibilimik atuaqqissaaraangatta ilinniartarparput Jehovap qanoq ittuutikkusunneraatigut. Biibilimi atuakkatsinnut qanoq qisuariarnitsinnit paasissavarput qanorpiaq uummammioqarnerluta. Tamannalu iluaqutigalugu ‘Guutip piumasaa naammalluinnartoq’ naapertorlugu iliorumalluta sutigut allannguisariaqarnersugut paasissavarput. — Rom 12:2; Hebr 4:12.

15. Jehovap ilusilersoraangatigut sutigut allanngortarpugut?

15 Esaja 64:7 atuaruk. Pruffiitip Esajap assersuusiaa pingaarutilimmik ilinniarfigaarput. Uagut marrartut ippugut, Jehovalu marriortuuvoq. Marriortutut ilusilersoraangamisigut isikkorput allanngortinnagu ilorlikkut pissuserput allanngortittarpaa. Ilusilersortikkaangatta ilorlikkut taassumannga allanngortitittarpugut, tassa misigissutsitsinnik eqqarsartaatsitsinnillu allannguinissamut ikiortarpaatigut. Silarsuup sunniisarnera akiorsinnaajumallugu tamannarpiaq pisariaqartipparput. Jehovap qanoq ilusilersortarpaatigut?

16, 17. (a) Kusanartuliorniaruni marriortup marraq susarneraa nassuiaruk. (b) Jehovap isaani naleqangaartunngorumalluta Guutip oqaasia qanoq iluaqutigaarput?

16 Marriortup kusanartuliorniaruni marraq pitsaalluinnartoq atortariaqarpaa. Marriortorli marraq ilusilersortinnagu marlunnik iliuuseqaqqaartariaqarpoq. Siullermik, marraq minguiartariaqarpaa. Taava marriassaq imermik akoortariaqarpaa ilusilersoreeruniuk ilusia allanngujaanniassammat.

17 Marriortup imeq minguiaatigiinnarnagu aamma ilusilersoruminaatigisarpaa marrialiarerusutaminik sumilluunniit, allaat qajannartumik, sanasinnaajumalluni. Erngup marrarmut sunniutaa Guutip oqaasiata uagutsinnut sunniuteqartarneranut  assersuunneqarsinnaavoq. Guuti pillugu ilinnialeratta Biibili iluaqutigalugu eqqarsartaaserput allanngortillugu Guutip eqqarsartaasiatut eqqarsartalerpugut. Taamaattumillu nammineq atorsinnaasamisut naleqangaartunngortissinnaalerpaatigut. (Ef 5:26) Kristumiut ataatsimiinnerinut najuuttuartarnissatsinnik ullullu tamaasa Biibilimik atuartarnissatsinnik eqqaasinneqartuartarpugut. Sooq taamaaliortarnissatsinnut kajumissaarneqartarpugut? Taamaaliortarnikkut Jehovamit ilusilersortittaratta. — Tuss 1:2; ApS 17:11; Hebr 10:24, 25.

Allanngornikkut ajornartorsiutinik siornatigorninngarnit aaqqiilluarnerusinnaavusi (Immikkoortoq 18 takuuk)

18. (a) Sooq Guutip oqaasianit allanngortinneqarusukkutta eqqarsaatiginneqqissaartariaqarpugut? (b) Apeqqutit suut iluaqutigisinnaavavut?

18 Guutip oqaasianit allanngortinneqarumagutta tamatuma atuartarnera ilinniartarneralu naammanngillat. Inuppassuit Biibilimik atuartarput tamatumanilu allassimasunik ilisimasarpassuaqarlutik. Immaqa oqaluussininni inunnik taamaattunik naapitaqarsimavutit. Allaat ilaasa Biibilimi allassimasunik alanngaarfigisinnaavaatigut. Taamaakkaluartoq Biibilimik ilisimasatik eqqarsartaatsiminnut inuunerminnullu sunniuteqartippallaarneq ajorpaat. Sooq? Guutip oqaasia aatsaat allannguisitsisarmat inuit killinneqartippata. Killinneqassagutta ilinniakkavut Biibilimeersut eqqarsaatigeqqissaartariaqarpavut. Imminut ima aperisariaqarpugut: ‘Upperilluinnarpara tamanna tassaaginnanngitsoq upperisarsiornikkut ajoqersuut? Tamatuma ilumut sallusuissutaanera nammineq uppernarsinikuuara? Ilinniakkakka allanut ilinniartitsissutigiinnarnagit nammineq maleruarpakka? Misigisarpunga Jehovap uanga inuttut oqaluuttaraanga?’ Apeqqutinik taamaattunik eqqarsaatiginneqqissaartarutta Jehovamut qaninnerulissaagut. Ilinniakkavut killinneqaatigigaangatsigit Guutip nuannaarutigisaanik inuunitsinni allannguerusulertarpugut. — Uss 4:23; Luk 6:45.

19, 20. Biibilimi oqaaqqissaarutinik maleruaanerput qanoq iluaqutigissavarput?

19 Aalajangersimasumik Biibili atuartarutsigu eqqarsaatigeqqissaartarutsigulu iluaqutigissavarput Paulusip allanneratut iliortuarnissatsinnut: “Inuttut pissusitoqqasi ileqqui ilanngullugit peerniarsigik, atiniarsiullu inuttut pissuseq nutaaq, eqqorluartumik ilisimasaqarnikkut pinngortitsisini assilillugu nutartertoq.” (Kol 3:9, 10, NW) Biibilimi ajoqersuutigineqartut ilumut paasigutsigit ilikkakkavullu maleruarutsigit kristumiutut pissuserineqartussanik pissuseqalissaagut, tamannalu Saatanip nakutitsiniutaanut illersuutigisinnaavarput.

20 Apustilip Petrusip ima eqqaasippaatigut: “Meeqqatut naalattutut nalusuugallarassi kajungerisasi ileqquliunniaqinasigit, ... inuunissigut tamatigut illernartuussaasi.” (1 Petr 1:14, 15) Eqqarsartaatsitsinnik isiginnittaatsitsinnillu allanngorumalluta sapinngisatsinnik iliortarutta pilluaqquneqassaagut, tamannalu allaaserisami tulliuttumi sammissavarput.