Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Aggusti 2013

 TOQQORSIVITSINNIT

Kunngi nuannaangaarpoq!

Kunngi nuannaangaarpoq!

AGGUSTIMI 1936-mi Swazilandimi nunaqarfimmi kunngip najugaqarfiani Robertip aamma George Nisbetip biilimit højtaleritalimmit nipilersuutit qatanngutillu J.F. Rutherfordip oqalugiaataa inunnut tusarnaarteqqammerpaat. Kunngi Sobhuza II nuannaangaarpoq. George ima oqaluttuarpoq: “Kunngip oqaluttartoq, oqaluttartup nuutaa, højtalerilu pisiarerusukkaluarpai!”

Robertip ajuusaarluni kunngi paasitippaa taakku pisiarineqarsinnaanngitsut. Sooq? Atortut taakku allamit pigineqaramik. Kunngip paaserusuppaa kimit pigineqarnersut.

Robertip kunngimit allamit pigineqarnerarmagit Sobhuzap kunngi taanna kinaanersoq paaserusuppaa. Robertip ima akivaa: “Tassa Jiisusi Kristusi Guutip naalagaaffiani Kunngiusoq.”

Sobhuzap tamanna ataqqinningaarluni miserratiginngilaa ima oqarami: “Aah, Kunngi taanna pissaaneqangaarpoq. Taassuma pigisaanik tiguserusunngilanga.”

Robert ima allappoq: ‘Kunngip Sobhuzap inuttut qanoq ittuunera ajasoorutigaara. Pingaakujunnani tuluttut oqallorissorujussuuvoq ilakkuminartorujussuulluni. George silataani nipilersuummik tusarnaartitsisoq uanga minutsit 45-t missaat kunngi allaffianeeqatigaara.’

Robert ima nangippoq: ‘Ulloq taanna kingusinnerusukkut atuarfimmi The Swazi National School-imi pulaaratta nuanningaartumik misigisaqarpugut. Atuarfimmi pisortaasoq oqaluussiffigigatsigu tusarnaaqqissaarpoq. Eqqaagatsigu oqaluttartuuteqarluta atuarfimmilu tusarnaatitserusulluta pisortaasoq nuannaangaarpoq, atuartullu hundredet pallillugit tusarnaariaqqullugit aggersarpai. Paasitinneqarpugut atuarfimmi nukappiaqqat naasorissaanermik, naatsiivinni naatitsisarnermik, sanaartornermik, illuliornermik, tuluttoornermik matematikkimillu ilinniartinneqartartut. Niviarsiaqqallu napparsimasunik paarsinermik, illulerinermik, sulianillu allanik atorfissaqarsinnaasunik ilinniartinneqartarput.’ Atuarfik taanna kunngip Sobhuzap aanaavanit pilersinneqarsimavoq.

Swazilandimi 1936-mi atuartut tamanut ammasumik oqalugiaammut tusarnaartut

Aamma 1933-mi kunngip Sobhuzap pionerit allat nunaqarfimmut oqaluussiartortut tusarnaaqqissaarsimavai. Ilaanni allaat kunngip sakkutuut paarsisuni 100-it nutaarsiassamik nuannersumik immiussaq tusarnaariaqqullugit aggeqqusimavai.  Atuagassiaativut pisartagarilerpai Biibililersaarutinillu piumalluni. Sivitsunngitsoq kunngi teokratiimut tunngasumik atuagaaterpassuaqalerpoq! Aamma sorsunnersuup kingulliup ingerlanerani tuluit nunasiaataasa naalakkersuisa Biibililersaarutivut inerteqqutigileraluaraat taassuma Biibililersaarutini tamaasa pigiinnarpai.

Kunngip Sobhuzap II-ta nalunaajaasut nunaqarfimmut Lobambamiittumut tikilluaqqujuaannarpai allaat palasit Biibilimik oqalugiaatinut tusarnaariaqqusarlugit. Nalunaajaasoq tassani najugalik Helvie Mashazi Matthæusi kapitali 23 pillugu oqalugiarmat palasit arlallit nikuipput pinngitsaalillugu ingisinniarsaralugu. Kunngili akuliuppoq oqarlunilu qatanngutip Mashazip oqalugiaatini ingerlateqqiinnassagaa. Aammattaaq kunngip tusarnaartut oqarfigai oqalugiaammi allassimaffiit innersuussutigineqartut tamaasa allaqqullugit!

Ulloq alla qatanngut angut pioneriusoq alla oqalugiarmat palasit sisamat najuuttut ilupaaminni qungasianiittoq palasiunerminnut ilisarnaataasoq kaajallatsillugu toqqorpaat imalu oqarlutik: “Palasiujunnaarluta Jehovamut Nalunaajaasunngorpugut.” Taava qatanngut pioneriusoq aperaat kunngip pigisaata assinganik atuagaateqarnersoq.

Kunngi 1930-miit 1982-imi toqussi tikillugu Jehovap Nalunaajaasui ataqqiuarpai. Aamma taakkua Swazimiut ileqqulersuutaannut peqataajumannginnertik pissutigalugu malersorneqarnissaat akuersaarumanngilaa. Taamaattumik nalunaajaasut taassumunnga qujamasungaarnissaminnut pissutissaqarluarput, toqummallu aliasuutigingaarpaat.

2013-ip aallartilaarnerani Swazilandimi 3000-it sinnerlugit oqaluussisartoqarpoq. Inuttaasut 1 millionit sinnilaarlugit amerlassuseqarput nalunaajaasorlu ataasiugaangat innuttaasut 384-iusarput. Ilagiinni 90-ini pionerit 260-it sinnerlugit kiffartorput, 2012-imilu eqqaaniaanermut najuuttut 7469-iupput. Erseqqippoq amerliartortoqarnissaanik ilimanaateqartoq. 1930-kkunni nalunaajaasut Swazilandimukaqqaarnerat pissutigalugu nalunaajaalluarnissamut tunngaviliilluarsimapput. — Sydafrikami toqqorsivitsinnit.