Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Aggusti 2013

Atuartartut apeqqutaat

Atuartartut apeqqutaat

Kristumiut angajoqqaajusut qitornartik ilaajunnaarsitaasimasoq ataatsimiinnerni sanilerisarsinnaavaat?

Ilaajunnaarsitaasimasup naalagaaffilersaarfimmi sumi issianersoq isumakuluutigivallaarnissaanut pissutissaqanngilaq. Napasuliaq Alapernaarsuiffik-mi angajoqqaat qitornaminnik ilaajunnaarsitaasimasumik suli imminni najugaqartumik anersaakkut isumaginninnissaannut, taama iliornissaq naleqquppat, arlaleriarluni kajumissaarisoqartarsimavoq. Soorlu Napasuliaq Alapernaarsuiffik 1. juuni 1989-imoortumi quppernermi 15-imi 16-imilu eqqaaneqartutut allaat angajoqqaat qitornaminnik ukiukitsumik ilaajunnaarsitaasimasumik suli imminni najugaqartumik Biibilimik atuaqqissaaqateqartarsinnaapput. Taama iliornikkut qitornaasup inooriaatsiminik allannguinissaminut kajumissisinneqarnissaa neriuutigineqartarpoq.

Naalagaaffilersaarfimmi issiaqateqartarnermut tunngatillugu ukiukitsup eqqissilluni angajoqqaaminik issiaqateqarnera ajortuunngilaq. Ilaajunnaarsitaasimasut naalagaaffilersaarfimmi issiavinni tunorlerpaani issiasarnissaat piumasaqaataanngimmat qitornap ilaajunnaarsitaasimasup angajoqqaaminik, sumi issianerat apeqqutaatinnagu, sanileqarnera akerlilerneqarsinnaanngilaq. Angajoqqaat qitornamik anersaakkut pisariaqartitaanik isumaginnittussaammata soorunami aamma ataatsimiinnermi taassuma pissarsiaqarluarnissaa qulakkeertariaqarpaat. Tamatumunnga tunngatillugu meeraq kisimiitillugu allami issiatinnissaaninngarnit taassuminnga issiaqateqarnerat iluaqutaasinnaavoq.

Taavami qitornaq ilaajunnaarsitaasimasoq angajoqqaamini najugaqarunnaarsimappat? Tamanna pissutigalugu angajoqqaani sanilerisinnaassanngilai? Siusinnerusukkut Napasuliaq Alapernaarsuiffik-mi kristumiup ilaquttaminik ilaajunnaarsitaasimasumik angajoqqaaminnilu najugaqarunnaarsimasumik peqateqartarnissamut qanoq eqqortumik isiginnittaaseqartuassanersoq ersarissumik allaatigineqarnikuuvoq. * Ilaajunnaarsitaasimasup allanik akornusersuinani ataatsimiinnermi ilaquttaminik issiaqatiginninnera ilaqutaasut ilaajunnaarsitaasimasumik pisariaqanngitsumik peqateqarniarnerannit allaanerulluinnarpoq. Ilaqutariit aalajaatsut ilaquttamut ilaajunnaarsitaasimasumut tunngatillugu eqqortumik isiginnittaaseqarlutillu taassuminnga peqateqartannginnissamik maleruaqqusaq Biibilimeersoq sapinngisaminnik maleruarniartarpassuk isumakuluuteqarnissamut pissutissaqanngilaq. — 1 Kor 5:11, 13; 2 Joh 11.

Ilaajunnaarsitaasimasup pissuserissaarluni ilaquttaminik issiaqatiginninnera ilagiinnulluunniit ilaasortaasunik allanik issiaqatiginninnera isumakuluutigineqartariaqanngilaq. Pissutsit atugarineqartut apeqqutaatillugit inuup naalagaaffilersaarfimmi sumi issiaqqusaaneranik killilersuineq ajornartorsiutinik assigiinngitsunik pilersitsisinnaavoq. Najuuttut tamarmik, aamma ilaqutaasut aalajaatsut, ilaajunnaarsitsisarnermut tunngatillugu najoqqutassianik Biibilimeersunik ataqqinnippata tamannalu qatanngutinut naakkiussutaanngippat kristumiut ataatsimiinnerinut najuuttartut sumi issiasarnerannik isumakuluuteqarpallaarnissamut pissutissaqanngilaq. *

^ par. 5 Takuuk Vagttårnet 15. novembari 1981-imoortumi quppernerit 21 aamma 22.

^ par. 6 Tamanna Vagttårnet 15. juuli 1953-imoortumi quppernermi 224-mi allassimasunut tunngatillugu aaqqiineruvoq.