Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Aggusti 2013

Isumageqatigiillutalu kajumissaaqatigiinniarta

Isumageqatigiillutalu kajumissaaqatigiinniarta

“Immitsinnut isumageqatigiinniarta asaqatigiinnermut ajunngitsuliornermullu kajumissaaqatigiittarluta.” — HEBR 10:24.

1, 2. Jehovamut Nalunaajaasut 230-t sorsunnersuup kingulliup naggataatungaani toqumut ingerlaarnermit aniguinissaminnut suna iluaqutigaat?

SORSUNNERSUUP kingulliup naggataatungaani Hitlerip sakkutuuisa ajorsaqqajaalerneranni parnaarussat tusindillit suli tigusanut inissiarsuarniittut toqorarnissaat nazistit naalakkersuisuinit peqqussutigineqarpoq. Sachsenhausenimi tigusanut inissiarsuarniittut parnaarussat illoqarfimmut umiarsualivittalimmut ingerlaarteriarlugit umiarsuarnut kivisitassanut ikisinneqartussaapput. Pilersaarusiaasunut ilaasoq tamanna kingusinnerusukkut toqumut ingerlaartitsinerusutut ilisimaneqalerpoq.

2 Parnaarussat 33.000-it Sachsenhausenimi tigusanut inissiarsuarniittut Lübeckimut, Tysklandimi illoqarfimmut umiarsualivittalimmut, 250 kilometerisut ungasitsigisumiittumut ingerlaartussaapput. Taakkunannga 230-t Jehovamut Nalunaajaasuusut nunanit arfinilinneersuusut sakkutuunit ataatsimoorlutik ingerlaaqatigeeqquneqarput. Tigusat tamarmik napparsimagamik nerisassaqannginnamillu sanngiipput. Qatanngutivulli tamarmik ingerlaarneq anigorpaat. Qanoq ilillutik? Ilaat ima oqarpoq: “Uniinnannginnissatsinnut kajumissaaqatigiittuaratta.” Asaqatigiinnertik aniguinissaminnullu Guutimit ‘pissaanermik asseqanngitsumik’ tunineqarnertik aniguinissaminnut iluaqutigaat. — 2 Kor 4:7.

3. Sooq immitsinnut kajumissaaqatigiinnissarput pisariaqartipparput?

3 Ullumikkut uagut toqumut ingerlaanngilagut, ajornartorsiuterpassuilli pinertusaarluta atortariaqartarpavut. 1914-imi Guutip naalagaaffia naalakkersuilermat Saatani qilammit nunamut igitaavoq. “Piffissakissutsi nalunnginnamiuk” kamattorsuuvoq. (Saqq 12:7-9,12) Harmagedoni qanilliartortillugu Saatanip Jehovamik ikinnguteqarnerput sanngiillisinniarlugu misilittarlutalu ulluinnarni ulapisinnerulerniartuarpaatigut. (Job 14:1; Oqal 2:23) Ilaannikkut ajornartorsiuterpassuavut sanngiillissutigigaangatsigit  qanorluunniit ilioraluarlutta nikallungasutut misigisinnaasarpugut. Assersuutigalugu qatanngutip angutip ukiut ingerlaneranni inuppassuit Jehovamut aalajaattuarnissaannut kajumissaartarsimavai. Utoqqaligamili nulianilu napparsimallutik perululeramik nikallungangaalerpoq. Qatanngutitut taassumatut tamatta “pissaaneq asseqanngitsoq” Jehovameersoq immitsinnullu kajumissaaqatigiinnissarput pisariaqartippavut.

4. Allanik kajumissaarerusukkutta apustilip Paulusip siunnersuutaa suna maleruartariaqarparput?

4 Allanik kajumissaarerusukkutta apustilip Paulusip kristumiunut Hebræerinut siunnersuutaa maleruartariaqarparput. Ima allappoq: “Immitsinnut isumageqatigiinniarta asaqatigiinnermut ajunngitsuliornermullu kajumissaaqatigiittarluta, ilagiittut katisimasarnivut tamatigut peqataanngitsoorfigisarnatigit, soorlu ilaat taama ileqqoqartut, oqaaqqissaaqatigiittarniartali [kajumissaaqatigiilluta pisa, NW] taamaaliornissaq suli pisariaqarnerulermat nalunnginnassiuk ullussaq qanillisoq.” (Hebr 10:24, 25) Siunnersuut pingaarutilik tamanna qanoq maleruarsinnaavarput?

“ISUMAGEQATIGIINNIARTA”

5. ‘Isumageqatigiinneq’ qanoq paasisariaqarpa, qanorlu taama iliorsinnaavugut?

5 ‘Isumageqatigiinneq’ allat pisariaqartitaannik eqqarsaatiginninnertut paasisariaqarpoq. Qatanngutivut naalagaaffilersaarfimmi ilassipallaannartarutsigit imaluunniit pingaaruteqanngitsut taamaallaat pillugit oqaloqatigisarutsigit qatanngutitta pisariaqartitaat ilisimasinnaanngilavut. Soorunami ‘nammineq pisassavut aalluttussaallugillu’ ‘susassarinngisatsinnut akuliuttussaanngilagut’. (1 Th 4:11; 1 Tim 5:13) Qatanngutivulli ilisarisimallualerusuppavut. Atugaat, piginnaaneri, nukittuffii, sanngiiffii sallusuissullu pillugu misigissusii paaserusuppavut. Paasisariaqarpaat ikinngutigalugillu asagivut. Ajornartorsioraangata nikallungagaangatalu taamaallaat ilagisarnagit aamma piffissani allani ilagisariaqarpavut. — Rom 12:13.

6. Utoqqaanertap ilagiinniittunik ‘isumaginninnissaminnut’ suna iluaqutigisinnaavaa?

6 Biibilimi allassimavoq utoqqaanertat ilagiinniittut pisariaqartitaannik isumaginninnissamut piumassuseqartariaqarlutillu kajumittariaqartut. (1 Petr 5:1-3) Utoqqaanertat taama iliorsinnaajumallutik qatanngutitik ilisimalluartariaqarpaat. (Ussatit 27:23 atuaruk). Utoqqaanertat qatanngutiminnik ikiueriaannaanerminnik taakkuninngalu peqateqassallutik nuannarinninnerminnik ersersitsisarpata ilagiinniittut pisariaqartitsisoqartillugu ikioqqunerminni toqqissisimanerulissapput. Aamma misigissutsitik isumakuluutitillu pillugit utoqqaanertanik oqaloqateqarnissartik ajornannginnerutilissavaat. Tamatuma kingunerisaanik utoqqaanertat pisariaqartitsisunik tamanik ikiuilluarsinnaalissapput.

7. Nikallungasut ‘isumaatsumik oqaluleraangata’ suna eqqaamasariaqarparput?

7 Paulusi Thessalonikami ilagiinnut ima allappoq: “Isumaginiarsigit sanngiitsut.” (1 Thessalonikamiut 5:14 atuaruk). “Ernumasut” nikallungasullu sanngiitsunut ilaapput. Ussatit 24:10-mi ima allassimavoq: “Ullormi annikilliorfiusumi sapiissuseerukkuit taava nukitit annikillissapput.” Nikallungangaartunik tuppallersaarusukkutta eqqaamasariaqarparput taakkua ‘isumaatsutut oqalulersinnaasarnerat’. (Job 6:2, 3) Kingusinnerusukkut peqqissimissutigisaminnik oqaaseqarsinnaasarput. Rachelle nikallungarujussuartartumik anaanalik taama misigisaqarsimavoq. Rachelle ima oqarpoq: “Anaanama ajuallannangaartunik oqaaseqarfigikulasarpaanga. Amerlanertigut anaanama kinarpiaanera — asannittuunera, inussiarnersuunera tukkortuuneralu — eqqaamaniarsarisarpara. Paasivara nikallungarujussuartartut amerlanertigut kingusinnerusukkut peqqissimissutigisassaminik oqaaseqartartut. Oqaatsitigut iliuutsitigulluunniit  akiniaasarneq iliuuserineqarsinnaasunit tamanit ajornerpaapput.” Ussatit 19:11-mi ima allassimavoq: “Inuk silatussusiata kamajaatsunngortittarpaa, pingaartittaqaa unioqqutitsisimasut asattuunneqarnissaat.”

8. Ingammik kiap asanninnitsinnik ‘aalajangiisuutitsinissarput’ pisariaqartippaa, aamma sooq?

8 Siornatigut ajortuliarisimasaminik nikallungassutiginnittoq qanoq ‘isumagisinnaavarput’? Imaassinnaavoq ajortumik inooriaaseqarunnaarsimagaluarluni iliuuserisimasaminik suli kanngusuutiginnittoq. Siornatigut ajortuliarisimasaminik peqqissimissutiginnittoq pillugu Paulusi qatanngutinut Korinthimiittunut ima allappoq: “Pillaanerup akerlianik isumakkeerfigalugulu tuppallersarniarsiuk aliasunnermit suli annerusumit sapilersinneqaqqunagu. Taamaattumik kajumissaarumavassi taassumunnga pissutsissinni asanninneq aalajangiisuuteqqullugu.” (2 Kor 2:7, 8) Oqaaseq “aalajangiisuuteqqullugu” ‘ersersitsinermik’ imaluunniit ‘uppernarsaanermik’ isumaqarpoq. Qatannguterput asanninnermik oqaatsitigut iliuutsitigullu ersersitsivigineqanngikkuni asaneqartutut misiginavianngilaq.

“ASAQATIGIINNERMUT AJUNNGITSULIORNERMULLU KAJUMISSAAQATIGIITTARLUTA”

9. ‘Asaqatigiinnermut ajunngitsuliornermullu kajumissaaqatigiinneq’ qanoq paasisariaqarpa?

9 Paulusi ima allappoq: “Immitsinnut isumageqatigiinniarta asaqatigiinnermut ajunngitsuliornermullu kajumissaaqatigiittarluta.” Qatanngutitsinnut asannittuliortarnitsigut ajunngitsuliortarnitsigullu taama iliortarpugut. Assersuut: Inneq ikumaannartikkumallugu aamarsuit aalatertariaqarsinnaallugillu inneq supoortariaqarsinnaavarput. (2 Tim 1:6) Taamatuttaaq qatanngutivut aallussilluarlutik Jehovamut kiffartortuarnissaannut ikiorumallugit iliuuseqarsinnaavugut. Ilaatigut pitsaanerpaamik taama iliorsinnaavugut qatanngutivut ajunngitsuliaat pillugit nersualaartarnerisigut.

Allat oqaluusseqatiginerisigut kajumissaartakkit

10, 11. (a) Kikkut nersualaarneqarnissaminnik pisariaqartitsippat? (b) Eqqortuliulernissamut kajumissaariniarluni nersualaarinerup iluaqutaasimaneranik ersersitsisumik assersuuteqarit.

10 Nikallungagaluarutta nikallunganngikkaluaruttaluunniit tamatta nersualaarneqarnissarput pisariaqartipparput. Qatanngut  angut ima allappoq: “Ataatama nersualaanngisaannarpaanga, taamaattumillu imminut tatiginanga peroriartorpunga. Maanna 50-inik ukioqaraluarlunga utoqqaanertaalluarninnut ikinngutinnit nersualaarneqaraangama qujamasuttarpunga. ... Nersualaarisarnissap pingaaruteqarneranik ersersitsisumik misigisaqarnikuunera pissutigalugu allanik nersualaarinissannut periarfissarsiortuaannarpunga.” Ajunngitsuliorneq pillugu nersualaarneqarneq tamanut soorlu pionerinut, ukioqqortusisimasunut nikallungasunullu qiimmaallaataasarpoq. — Rom 12:10.

11 Ajortuliorsimasup utoqqaanertanit ikiorneqarnermini siornatigut ajunngitsuliarisimasaminut nersualaarneqarnini kukkusumik eqqarsartaatsiminik aaqqiinissaminut iluaqutigisinnaavaa. (Gal 6:1) Qatanngutip arnap Miriamimik atillip tamanna iluaqutigaa. Ima allappoq: “Inuunerma ilaani ajorluinnartunik atugaqarpunga ikinngutiginerpaasama ilaasa sallusuissut qimammassuk ataatagalu qaratsamigut aanaartoormat. Nikallungasorujussuanngorpunga.” Nikallunganerminik qaangiiniarsaritilluni Jehovamik pallorfiginninngitsumik angutaateqalerpoq. Jehovamilli asaneqarnissaminut qinngaqqunnartutut misigilerpoq sallusuissummillu qimatsinissaminik eqqarsaateqalerluni. Utoqqaanertalli Jehovamut kiffartornermi iliuuserisimasarpassuanik eqqaasippaa oqarfigalugulu Jehovamit asaneqartuarumaartoq. Tamatuma kingunerisaanik Jehovamut asanninnera nakussatsinneqarpoq. Angutaatini qimappaa Jehovamullu kiffartortuarluni.

Asaqatigiinnermut ajunngitsuliornermullu kajumissaaqatigiittaritsi

12. Qatanngutitsinnik sanillersuussisarnerput, isornartorsiuisarnerput ilerasuuteqalersitsiniartarnerpulluunniit qanoq kinguneqarsinnaava?

12 Qatanngutivut Guutimut kiffartornerminni aallussilluartuunissaannut ‘kajumissaareriaaserput’ mianersuutigisariaqarparput. Allanut sanillersuuttassanngilagut, nammineq malittarisassiatsinnik maleruaarusunnginnerat pillugu isorisassanngilagut iliuuseqarnerunnginneralluunniit pillugu ilerasuuteqalersinniartassanagit. Taamami iliornerput piffissami sivikitsuinnarmi pitsanngoriaatigissavaat. Qatanngutit nersualaartarnerisigut Guutimullu asanninnerput pissutigalugu taassumunnga kiffartornitsinni sapinngisatsinnik iliuuseqarusunnitsinnik paasitinnissaannut ikiornerisigut pitsaanerpaamik kajumissaarsinnaavavut. — Filippimiut 2:1-4 atuakkit.

‘KAJUMISSAAQATIGIINNEQ’

13. Allanik kajumissaarineq qanoq paasisariaqarpa? (Allaaserisap aallaqqaataani assiliaq takuuk).

13 Paulusi allappoq ‘kajumissaaqatigiilluta pisariaqartugut’. Allanik nersualaarisarneq innermik ikummarissaaniarluni orsussamik kuisinermut assersuunneqarsinnaavoq. Qatanngutinik nersualaarinninneq taakku Guutimut kiffartortuarsinnaaniassammata taakkuninnga nakussassaanertut tuppallersaanertullu paasisariaqarpoq. Nikallungasunik tuppallersaaniaraangatta asannittumik inussiarnersumillu oqaluttariaqarpugut. (Uss 12:18) Aamma ‘tusarasuartariaqarlutalu oqalukkumaataartuusariaqarpugut’. (Jaak 1:19) Qatannguterput tusarnaartarutsigu taassumalu  misigissusii paasiniartarutsigit sooq nikallunganersoq paasisinnaassallugulu iluaqutissaanik oqaaseqarsinnaassaagut.

Qatanngutitit ilisarisimalerumallugit piffissaqarfigikkit

14. Qanoq utoqqaanertap qatanngut nikallungasoq ikiorpaa?

14 Utoqqaanertaq inussiarnersoq qatanngummik angummik ukiuni arlalinni unittooqqasimasumik qanoq ikiuisinnaasimasoq eqqarsaatigiuk. Utoqqaanertap tusarnaarnermini paasilluarnerulerpaa qatanngut suli Jehovamik asanningaartoq. Napasuliaq Alapernaarsuiffik-nik tamanik atuaqqissaartarlunilu ataatsimiigiartuarnissani sulissutigaa. Ilagiinniittulli ilaat pakatsissutigingaakkaminik narrujuummissutigisaminillu iliuuseqarsimavoq. Utoqqaanertap tusarnaaqqissaarlugulu isummiussereernani misigissusii paasiniarsarai asaneqarnerarlugulu. Piffissap ingerlanerani qatanngutip paasivaa siornatigut nuanninngitsumik misigisaqarsimanini Guutimik asasaminik kiffartorfiginnikkunnaassutiginissaa akuerisimallugu. Utoqqaanertap qatanngut angalaaqatiserivaa. Utoqqaanertap ikiuineratigut qatanngut oqaluusseqataasaqqilerlunilu kingusinnerusukkut utoqqaanertanngoqqippoq.

Kajumissaarneqarnissaminik pisariaqartitsisoq tusarnaaqqissaartaruk (Takuuk immikkoortut 14 aamma 15)

15. Allanik kajumissaarisarnermut tunngatillugu Jehova qanoq ilinniarfigisinnaavarput?

15 Imaassinnaavoq inuk nikallungasoq ingerlaannaq ajunnginnerusutut misigileranilu ikiortikkusunngitsoq, taamaattorli tapersersortuartariaqarparput. Paulusi ima allappoq: ‘Sanngiitsut illersorsigik, tamanullu kamajuillusi.’ (1 Th 5:14, 1936) Sanngiitsut imminiiginnarnagit ikiortuarnerisigut ‘illersortigik’. Itsaq Jehovap kiffami ilaat nikallungasut kamagittarfigai. Assersuutigalugu Guutip Elia kamagittarfigalugulu taassuma misigissusii ataqqigamigit kiffartortuarnissaanut pisariaqartitaanik tunivaa. (1 Kng 19:1-18) Daavi ilumoorluni peqqissimimmat Jehovap inussiarnerluni isumakkeerfigaa. (Tuss 51:9, 19) Guutip aamma Tussiaat 73-imik allattoq, imminerminut kiffartorfiginnikkunnaangajattoq, ikiorpaa. (Tuss 73:13, 16, 17) Jehovap, ingammik nikallungagaangatta, inussiarnerfigisarlutalu kamagittarfigisarpaatigut. (2 Mos 34:6) Biibilimi allassimavoq Jehovap nallittuinera ‘ullut tamaasa nutaajullunilu qaangiutissanngitsoq’. (Upp 3:22, 23) Jehovap maligassiuinerminik ilaarsillutalu nikallungasunut inussiarnertarnissarput naatsorsuutigaa.

INUUNERMUT AQQUMMIITTUARNISSAMUT KAJUMISSAAQATIGIITTA

16, 17. Aaqqissuussinerup ajortup naggatissaa qanilliartortillugu susariaqarpugut, aamma sooq?

16 Sachsenhausenimi tigusanut inissiarsuarmi parnaarussanit 33.000-iusunit tusindillit toqupput. Jehovamulli Nalunaajaasuusut 230-t tamarmik inissiarsuarmit anisut aniguipput. Kajumissaaqatigiittaratillu tapersersorsimanngitsuugunik anguisimanavianngikkaluarput.

17 Ullumikkuttaaq uagut ‘inuussummut aqqummiippugut’. (Matt 7:14) Qanittukkut Jehovamik pallorfiginnittut tamarmik nunarsuarmut nutaamut naapertuilluassuseqarfiusumut aniguisinneqassapput. (2 Petr 3:13) Saatanip pissutsinik aaqqissuussinerata ajortup naggatissaa qanilliartortillugu inuunermut aqqummiittuarnissamut ikioqatigiittariaqarpugut.