Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Aggusti 2013

Illernartitaavusi

Illernartitaavusi

“Minguiarneqarpusi, illernartitaavusi.” — 1 KOR 6:11.

1. Nehemia Jerusalemimut uterami suut takuai? (Allaaserisap aallaqqaataani assiliaq takuuk).

JERUSALEMIMI inuit oqallipput. Sooq? Takornartaq tusaamanerlugaasoq naalaffiup initaasa ilaanni ineqarpoq. Levikkut suliassatik suliariunnaarsimavaat. Utoqqaanertat Jehova salliukkunnaarlugu sabbatimi niuerneq ulapputigaat. Guutillu innuttaasa ilarpassui juutiunngitsunik aappartaarsimapput. Tamakku Nehemiap Jerusalemimut uterami ajornartorsiutit takusaasa ilaannaraat. — Neh 13:6.

2. Sooq Israelikkut inuiaappat illernartitaasut?

2 Ukiut tusindit missaasa tamatuma siorna Israelikkut Jehova naalakkumasimavaat, ima oqarlutik: “Naalakkap peqqussutai tamaasa maleruarumavavut.” (2 Mos 24:3) Taamaattumik Guutip illernarsisippai, tassa innuttamisut toqqarlugit immikkoortippai. Tamanna ataqqinaataangaarpoq! Ukiut 40-t qaangiuttut Mosesip ima eqqaasippai: “Inuiaavutit Naalakkamut Guutinnut pigititaallutit illernartitaasoq. Illit Naalakkap Guutivit nunarsuarmi inuiaat tamarmik akornanni qinersimavaatit pigisariumallutit.” — 5 Mos 7:6.

3. Nehemia aappassaanik Jerusalemimukarmat juutit anersaakkut qanoq ippat?

3 Ajoraluartumik Israelikkut neriorsuinermissut iliunngillat. Inunnik ataasiakkaanik Guutimut kiffartortoqartuaannarpoq, juutilli amerlanerit illernartuusuusaaginnarput Jehovalu naalakkumanagu. Amiakkuusut aalajaatsut Jerusalemi sanaqqinniarlugu, pallorfiginninneq ilumoortoq pilerseqqinniarlugu, Babylonimit uternerisa kingorna ukiut 100-t missaat qaangiuttut Nehemia aappassaanik Jerusalemimukarpoq. Israelikkut anersaakkut aallussilluarunnaaqqissimapput.

4. Illernartuujuarumalluta iluaqutigisinnaasavut suut sammissavavut?

4 Jehovap Nalunaajaasui, Israelikkutulli, Guutimit illernartitaapput. Aap, kristumiut tanitat aamma ‘amerlangaartut’ tamarmik illernartuupput Jehovalu kisiat  kiffartorfigalugu. (Saqq 7:9, 14, 15; 1 Kor 6:11) Israelikkut illernartitaanertik attattuannginnamikku Jehovamut attaveqarnertik annaavaat. Uagut taamaalerusunngilagut. Taamaattumik qanoq illernartuujuarsinnaavugut Jehovamillu iluarisaajuarsinnaalluta? Allaaserisami matumani Nehemiap allagaani kapitali 13-imi iluaqutigisinnaasavut sisamat uku sammissavavut: (1) Sunniuteqapiluttunik ilagisartagaqarnaveersaarit; (2) Jehovap suliareqqusaa tapersersoruk; (3) Jehovamut kiffartorneq salliuguk, kiisalu (4) kristumiutut kinaassutsit attattuaruk. Taakkua ataasiakkaarlugit sammeriartigik.

SUNNIUTEQAPILUTTUNIK ILAGISARTAGAQARNAVEERSAARIT

Nehemiap Jehovamut ilumoorfiginnittuarnini qanoq ersersippaa? (Immikkoortut 5 aamma 6 takukkit)

5 Nehemia 13:4-9 atuakkit. Sunniuteqapiluttunik avatangiiseqaratta illernartitaanitsinnik attassiuarnissaq imaannaanngitsuuvoq. Palasiuneq Eljashibi angullu Tobijamik atilik, Ammonikkuusoq Perserit kunngianni atorfeqarunartoq Biibilimi oqaluttuarineqarput. Tobijap ikinngutaasalu Nehemia Jerusalemip qarmarsuinik qammaqqiisoq unitsinniaraluarpaat. (Neh 2:10) Ammonikkuusut Guutip inatsisai naapertorlugit naalaffimmut iseqqusaanngillat. (5 Mos 23:4) Taamaattumik palasiunerup qanoq ililluni Tobija naalaffiup initaasa ilaanni ineqartissinnaavaa?

5, 6. Eljashibi Tobijalu kikkuuppat, aamma sooq Eljashibi Tobijalu peqatigiittarsimagunarpat?

6 Tobijap Eljashibi qanitarilersimavaa. Tobija taassumalu ernera Johanani juutinik nuliaqarput, juuterpassuillu Tobija “nersualaartarpaat” (1990). (Neh 6:17-19) Eljashibip ernutaasa ilaat Sanballatimut, Samariami naalagaatitaasumut Tobijap peqatinnaavanut, ningaajuvoq. (Neh 13:28) Taamatut qanitariinnerat pissutaasinnaavoq palasiunerup Eljashibip Tobijamit Israelikkuunanilu akerlilersuisumit sunnertissimaneranut. Nehemialli Jehovamut ilumoorfiginninnini ersersippaa Tobijap pigisai inimit eqqarlugit.

7. Guutip innuttaasa, ilaatigut utoqqaanertat, illernartuujuarnissartik qanoq qulakkeertarpaat?

7 Uagut Guutip innuttaatut taassumunnga tunniulluinnarsimasuugatta Jehovamut ilumoorfiginninnerput inuunitsinni pingaarnerpaasariaqarpoq. Ilaannikkulli najoqqutassiat Biibilimeersut sumiginnarusussinnaavavut ilaquttatsinnut ilumoorfiginnikkusukkatta. Najoqqutassialli Biibilimeersut maleruarunnaarutsigit Jehovap isaani illernartuujunnaassaagut. Kristumiut utoqqaanertat Jehovap eqqarsartaasia naapertorlugu aalajangiisarput, namminneq isumartik allanulluunniit misigissutsitik naapertornagit. (1 Tim 5:21) Utoqqaanertat Jehovamut attaveqarnerminnik ajoqusiisinnaasunik iliuuseqannginnissartik eqqumaffigisarpaat. — 1 Tim 2:8.

8. Peqatigisartakkavut pillugit suna eqqaamasariaqarparput?

8 Puiunngisaannartigu ‘ikinngutipalaaqarneq ileqqorikkaluartunut aseruutissiisartoq’. (1 Kor 15:33) Immaqa eqqarlitta ilaat inuunitsinnut sunniuteqarnerat nalunakujuppoq. Eljashibi Nehemiamik Jerusalemip qammarsuinik qammaqqiisumik tapersersuinermigut juutinut maligassaalluarsimavoq. (Neh 3:1) Kisianni Eljashibi Tobijamit allanillu ajortumik sunnertikkiartuaarsimagunarluni Jehovap isaani illernartuujunnaassutigisaminik iliuuseqartalerpoq. Inuit ajunngitsuliornissatsinnut — Biibilimik atuartarnissamut, ataatsimiigiartarnissamut oqaluussisarnissamullu — kajumissisitsisut peqatigisariaqarpavut. Ilaquttat ajunngitsuliornissatsinnut kajumissisitsisut pingaartingaarlugillu asangaarpavut.

JEHOVAP SULIAREQQUSAA TAPERSERSORUK

9. Naalaffimmi pissutsit qanoq ippat, Nehemialu aaqqiiniarluni qanoq iliorpa?

9 Nehemia 13:10-13 atuakkit. Levikkut naalaffimmi suliassatik suliarinngilaat. Sooq? Inuit naalaffimmut aningaasanik tunissutaat  ikittuararsuummata Levikkut ilaquttatik pilersorniarlugit narsaatiminni sulisariaqarput. Naalagaanerillu pissarsiat qulinginik tunissutinik katersisussat katersisarunanngillat katersisarunillu naalaffimmukaassisarunarnatik. (Neh 12:44) Taamaattumik Nehemiap tunissutit tamakku katersorneqartarnissaat qulakkeerpaa angutit tatiginartut tunissutinik Levikkunnukaassisartussat toqqarlugit.

10, 11. Pallorfiginninneq ilumoortoq qanoq tapersersorsinnaavarput?

10 Oqaluttuaq tamanna qanoq ilinniutigisinnaavarput? Jehovap suliareqqusaa tapersersorniarlugu pigisatsinnik nalilinnik atuinerput ataqqinaataavoq. (Uss 3:9) Tunissuteqaraangatta Jehovap pigeriigai taassumunnga utertittarpavut. (1 Nal 29:14-16) Immaqa eqqarsarpugut tunissutiginiagarput annikingaarmat Jehovamut ataqqinaataanavianngitsoq. Tuniserusussuseqaruttali Jehovap tunissuterput nuannaarutigissavaa. — 2 Kor 8:12.

11 Ukiorpassuarni aappariit arfineq-pingasunik qitornallit sapaatip-akunneranut aalajangersimasumik aappariit utoqqaat specialpioneriusut neriartoqqusarpaat. Anaanaasoq oqartarpoq inuit qulit iggattaramigit marlunnik ilagaluarpata soqutaavallaanngitsoq. Tamanna soqutaarpasinngikkaluartoq pionerit taakku qujamasoqaat! Taakku ilaqutariinnik taakkuninnga nuannersunik misigisalikkersaarlutillu meeqqat sallusuissummi siumukarnissaannik kajumissaarlugit qiimmassaasarput. Kingusinnerusukkut meeqqat tamarmik piffissaq tamaat kiffartortunngorput.

12. Utoqqaanertat ilagiinnilu kiffartortut qanoq maligassiuilluarpat?

12 Nehemiamik oqaluttuamit aamma paasivarput utoqqaanertat ilagiinnilu kiffartortut Jehovamut pallorfiginninnermi maligassiuilluartuussasut. Tamanna ilagiinniittut iluaqutigisarpaat. Apustili Paulusi ilagiinniittunut maligassiuilluartuuvoq. Taassuma pallorfiginninneq ilumoortoq tapersersorpaa iluaqutaasunillu siunnersuuteqartarluni. Assersuutigalugu tunissuteqarnissamut qanoq pilersaarusiortoqarsinnaaneranik atoriaannaasunik siunnersuuteqarpoq. — 1 Kor 16:1-3; 2 Kor 9:5-7.

JEHOVA SALLIUGUK

13. Juutit ilaat sabbatimi sulerisarpat?

13 Nehemia 13:15-21 atuakkit. Pigisat eqqarsaatigivallaarlugillu pissarsiariumallugit sulivallaarutta anersaakkut ittunik pingaartitsiunnaariartuaarsinnaavugut. Mosesimik allakkat aappaat 31:13 naapertorlugu sabbati Israelikkunnut eqqaasitsissutaavoq Israelikkut inuiattut illernartitaanerannut. Juutit  sabbati ilaqutariittut pallorfiginninnermut, qinunermut Guutillu inatsisaanik eqqarsaatiginneqqissaarnermut atortussaavaat. Nehemialli nalaani Israelikkut ilaasa sabbati nalinginnaatillugu niuernermut atortarpaat. Taamaattumik Nehemiap niuertut takornartat illoqarfimmit anisippai isaaffiillu sabbati sioqqullugu matullugit.

14, 15. (a) Aningaasarsiorniarnerput killilersimaanngikkutsigu susinnaavugut? (b) Guutip qasuersaarfissarititaanut qanoq isersinnaavugut?

14 Tamanna qanoq ilinniutigisinnaavarput? Ilaatigut ilinniutigaarput aningaasarsiorniarnerput killilersimaartariaqaripput. Sulinerput, ingammik nuannarigutsigu, allamut saasaatigisinnaavarput. Eqqaamajuk Jiisusi oqartoq naalakkat marluk kiffartorfigisinnaanngikkivut. (Matthæusi 6:24 atuaruk). Nehemia aningaasarsiorluarsinnaagaluarpoq niuertullu Tyrusimiut allallu niueqatigisinnaagaluarlugit. Taamaaliornanili qanoq iliorpa? (Neh 5:14-18) Qatanngutini ikiorniarlugit Jehovallu aqqanik illernarsisitseqataaniarluni ilungersorpoq. Taamatulli ullumikkut kristumiut utoqqaanertat ilagiinnilu kiffartortut piffissartik nukitillu ilagiinnik ikiuiniarnermut atortarpaat. Tamanna ilagiinniittunit asaneqaatigaat. Tamatuma kingunerisaanik Guutip innuttai asaqatigiillutillu eqqisseqatigiillutillu toqqissisimapput. — Ez 34:25, 28.

15 Kristumiut sabbati pillugu inatsit maleruartussaanngikkaluaraat Paulusi allappoq ‘Guutip innuttaanut suli sabbatimik qasuersaarfissamik ilimagisassaqartoq’. Imalu nangippoq: Guutip ‘qasuersaarfissarititaanut isertoq aamma suliani naammassereerlugit nammineq qasuersaarpoq.’ (Hebr 4:9, 10) Kristumiutut ‘sabbatimi qasuersaarsinnaavugut’ — ‘Guutip qasuersaarfissarititaanut isersinnaavugut’ — Jehovamut naalannikkut siunertaalu tapersersorniarlugu iliuuseqarnikkut. Illit ilaquttavillu ilaqutariittut atuaqqissaaqatigiittarnikkut, ataatsimiigiartarnikkut oqaluussisarnikkullu Jehova salliutippisiuk? Sulisitsisorput suleqativullu isumaqarsinnaapput tamakku pingaaruteqanngitsuusut. Taamaattumik Jehovap suliareqqusaa uagutsinnut pingaaruteqarnerpaajusoq aalajangersimarpasilluta taakkununnga erseqqissartariaqarsinnaavarput. Taamaaliorutta Nehemia aalajangersimarpasilluni Tyrusimiunik illoqarfimmit anisitsisoq isaaffinnillu matusisoq ilaassavarput. Nehemiap Jehova salliutippaa. Guutip innuttarimmatigut illernartitaallutalu immikkoortitaasut imminut ima aperisariaqarpugut: ‘Inooriaatsikkut ersersippara Jehova salliutillugu?’ — Matt 6:33.

KRISTUMIUTUT KINAASSUTSIT ATTATTUARUK

16. Nehemiap nalaani Israelikkut Guutip innuttaatut illernartitaallutillu immikkoortitatut kinaassusertik qanoq annaaqqajaavaat?

16 Nehemia 13:23-27 atuakkit. Nehemiap nalaani Israelikkut allamiunik nuliartarput. Nehemiap siullermik Jerusalemimiinnerani ilagiinnut sinniisutut angutit utoqqaat tamarmik isumaqatigiissut atsiorpaat neriorsuillutik Israelikkut takornartanik nuliassanngitsut. (Neh 10:1; 10:31) Aappassaanilli Jerusalemimiikkami Nehemiap paasivaa juutit takornartanik nuliarsimasut Guutillu innuttaatut illernartitaallutillu immikkoortitaasutut kinaassusertik annaaqqajaagaat. Arnat takornartat taakkua qitornaat hebræerisut oqalussinnaanatillu atuarsinnaanngillat. Meeqqat taakku alligunik imminut Israelikkutut isigissappat? Imaluunniit Asdodimiutut, Ammonikkutut Moabikkutulluunniit imminut isigissappat? Hebræerisut paasisinnaanngikkunik Guutip inatsisai paasisinnaanavianngilaat. Taamaattumik Jehova ilisarisimaleruminaatsissagamikku ilimanarnerussaaq anaanamik guutii pallorfiginiarlugit aalajangissasut. Nehemia Israelikkut kinaassusiat illersorniarlugu iliuuseqapallappoq. — Neh 13:28.

Qitornatit Jehovamut qanittumik attaveqarsinnaaqqullugit ikiukkit (Immikkoortut 17 aamma 18 takukkit)

17. Angajoqqaat qitornatik Jehovamut qanillinissaannut qanoq ikiorsinnaavaat?

 17 Ullumikkut qitornavut kristumiutut kinaassuseqaqqullugit kajumissinartumik ikiortariaqarpavut. Angajoqqaajususi imminut ima aperigitsi: “Qitornakka ‘oqaatsit minguitsut’ atorlugit qanoq oqalloritsigippat? Tassa sallusuissut Biibilimeersoq qanoq paasilluartigalugulu qanoq eqqartortigisarpaat? (Sef 3:9, NW) Qitornama eqqartortagaannit erserpa Guutip anersaavanit silarsuulluunniit anersaavanit sunnerteqqasut?” Nikalloqinak paasigukku qitornatit sulissutissaqartut. Oqaatsinimmi ilinniarneq sivisunaarnarsinnaavoq ingammik allamut saasaataasinnaasut amerlappata. Qitornatit silarsuarmit tatineqartarput Guutimut naalanngitsinniarneqarlutik. Taamaattumik nikallujuillutit ilaqutariittut atuaqqissaaqatigiinneq periarfissallu allat qitornavit Jehovamut qanillinissaminnut iluaqutigisinnaasaat atorluartakkit. (5 Mos 6:6-9) Eqqaasikkit sooq Saatanip silarsuaanit immikkoorneq iluaqutaasoq. (Joh 17:15-17) Sapinngisallu tamaat taakkua uummataat killinniakkit.

18. Sooq kristumiut angajoqqaat ikiuilluarnerpaasinnaappat qitornamik Jehovamut tunniulluinnarnissamut piareersarneranni?

18 Qitornassi Guutimut kiffartorusunnerlutik kiffartorusunnginnerlutilluunniit namminneq aalajangertussaavaat. Angajoqqaatulli ilissi sorpassuartigut ikiorsinnaavasi. Assersuutigalugu maligassiuilluartuusariaqarpusi, iliuutsit suut akuerineqarsinnaanngitsut pillugit erseqqissumik nassuiaattariaqarpasi paasitillugillu aalajangiinerlunnerit qanoq kingunipiloqartartut. Angajoqqaajususi, qitornasi kristumiutut kinaassuseqalissagunik ilissinnit ikiorneqartariaqarput. Ilissi ikiuilluarnerpaasinnaavusi qitornassi Jehovamut tunniulluinnarnissaminnut piareersarneranni. Tamatta Guutip najoqqutassiaanik maleruaanikkut taassumalu iluarisaanik pissuseqarnikkut kristumiutut kinaassuserput attattuartariaqarparput. — Saqq 3:4, 5; 16:15.

JEHOVAP EQQAAMAJUASSAVAATIGUT

19, 20. Jehovamit eqqaamaneqartuarumalluta qanoq iliorsinnaavugut?

19 Pruffiitip Malakip nassuiarpaa Jehovap ‘mianerinnitsini aterminillu ataqqinnittut’ eqqaamasarai taakkualu atii ‘mappersakkanut allakkai’. (Mal 3:16, 17) Guutip mianerinnitsini aterminillu nuannarinnittut puiunngisaannassavai. — Hebr 6:10.

20 Nehemia ima qinuvoq: “Guutiga, eqqaaginga, qanorlu iliorsimanikka uannut iluaqutissanngortikkigit!” (Neh 13:31) Nehemiap kissaatigaa kiffartorsimanini pillugu Jehovap eqqaamassagaani. Uaguttaaq Guutimit eqqaamaneqarsinnaavugut. Aap, aterput mappersakkani allanneqassaaq sunniuteqapiluttunik ilagisartagaqarnaveersaarutta, Jehovap suliareqqusaa tapersersorutsigu, Jehova salliutikkutsigu kristumiutullu kinaassuserput attattuarutsigu. ‘Immitsinnik paasiniaaffigisariaqarpugut uppernermiinnerluta.’ (2 Kor 13:5) Jehovap innuttaanut immikkoortitaallutillu illernartitaasunut ilaajuarumalluta sapinngisatsinnik iliuuseqartarutta ‘uagut iluaqutissatsinnik’ taassuma eqqaamajuassavaatigut.