Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Aggusti 2013

Angajoqqaat — qitornasi naalungiarsuuneranniit ilinniartissigit

Angajoqqaat — qitornasi naalungiarsuuneranniit ilinniartissigit

“ERNERIT tassaapput Naalakkap tunissutai, illissap inerittui tassaapput akissarsiarititaasut,” Biibilimi allassimavoq. (Tuss 127:3) Qitornartaarneq angajoqqaanut nuanningaarpoq.

Angajoqqaanngorlaanut nuannersuuginnarani akisussaaffittaqarpoq pimoorunneqartussanik. Meeraq inersimasutut peqqissuussaguni alliartornermini peqqinnartunik ullut tamaasa nerisariaqarpoq. Jehovamullu attaveqarluassaguni angajoqqaaminit anersaakkut ilinniartinneqarlunilu siulersorneqartariaqarpoq najoqqutassiallu Guutip oqaasianeersut ilinniartariaqarlugit. (Uss 1:8) Qaqugu qitornartik ilinniartillugu aallartissappat, sunillu ilinniartissavaat?

 ANGAJOQQAAT SIUNNERSORNEQARTARIAQARPUT

Biibilimi oqaluttuarineqarpoq angut Manoamik atilik itsaq Israelimi illoqarfimmi Sorami najugalik. Jehovap inngiliata Manoap nulia ernisuitsuusoq oqarfigaa ernertaassasoq. (Eqq 13:2, 3) Manoakkut tamanna nuannaarutigigaluarlugu qitornartaassartik qanoq pitsaanerpaamik perorsarsinnaassanerlugu eqqarsaatigaat. Taamaattumik Manoa ima qinuvoq: “Naalagaq, tusannga! Guutip kiffaa aallartitat maannaqqilli ajoqersuullutalu nukappiaraq inunngortussaq qanoq iliuuseqarfigissagipput.” (Eqq 13:8) Manoakkut ernertik, Samsoni, Guutip inatsisaanik ilinniartippaat, ilungersornerallu kinguneqarluarsimagunarpoq. Biibilimimi allassimavoq Jehovap anersaava illernartoq iluaqutigalugu Samsoni Israelikkunnut eqqartuussisuulluni tupinnartunik iliuuseqartarsimasoq. — Eqq 13:25; 14:5, 6; 15:14, 15.

Manoa meeqqap inunngortussap qanoq perorsarneqarnissaanik ilinniarteqqulluni Guutimut qinuvoq

Angajoqqaat qanoq siusitsigisukkut qitornartik ilinniartilissavaat? Timotheusi ‘naalungiarsuuneraniilli’ (NW) arnaata Eunikep aanaavatalu Loisip Jehova pillugu ilinniartippaat. (2 Tim 1:5; 3:15) Aap, Timotheusi meeraalluni Allakkanik Illernartunik ilinniartinneqaliaarpoq.

Angajoqqaat kristumiut silatusaassapput siulersorneqarnissartik Guutimut qinnutigigunikku qitornartillu ‘naalungiarsuuneraniilli’ ilinniartinnissaat pilersaarusiorunikku. “Eqiasuitsup pilersaarusiai iluanaarutissarsisitsisarput,” Ussatit 21:5-imi allassimavoq. Ilimanarluinnarpoq meeraq inunngortinnagu angajoqqaat piareersaqqissaarsimassasut. Allaat immaqa naalungiarsuup pisariaqartitassai allattorpaat. Aammali Jehova pillugu ilinniartinnissaata pilersaarusiornissaa pingaaruteqarpoq. Suli naalungiarsuutillugu ilinniartilernissaa siunertarisariaqarpaat.

Atuakkami meeqqat qanoq inersimasunngoriartortarnerannik nassuiaatitalimmi allassimavoq naalungiarsuup qaammataani siullerni qarasaani attaveqaatit nutaat pilertupallattartut. Taamaattumik pingaaruteqarluinnarpoq qaammatini taakkunani angajoqqaat qitornamik Jehova taassumalu najoqqutassiai pillugit ilinniartinnissaat!

Anaanaq pioneriusoq inuusuttumik panilik ima oqarpoq: ‘Ataatsimik qaammateqartorli oqaluussinermi ilagisalerpara. Oqaluussitillunga ilaagaangami susoqarnera paasisanngikkaluaraa isumaqarpunga iluaqutigisaraa. Marlunnik ukioqarluni oqaluussitilluta naapitatsinnut naqitaaqqanik neqeroornissani annilaangaginngilaa.’

Angajoqqaat qitornatik naalungiarsuuneranniilli ilinniartileraangamikkit angusaqarluarsinnaapput. Nalunngilaalli ilinniartitsineq oqitsuinnaanngitsoq.

ILINNIARTITSINERMUT “PIFFISSAQQISSOQ ATORNIARSIUK”

Meeqqat allamut saaqqajaasarmata ilinniartinnerat angajoqqaanut imaannaanngitsuusinnaavoq. Meeqqat alapernaatsuugamik avatangiisiminniittut paasiniarsarisarpaat. Angajoqqaat qitornaminnik ilinniartitsinerminni meeqqat allamut saasannginnissaannut qanoq ikiorsinnaavaat?

Eqqarsaatigikkit Mosesip oqaasii. Mosesimik allakkat tallimaat 6:6, 7-imi ima allassimavoq: “Oqaatsit taakku peqqussutillu ullumi ilinnut tunniussakka aalajangiutissavatit. Erninnut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.” Aap, angajoqqaat qitornaminnut ilinniartitsissutigisatik oqaatigeqqeqattaartassavaat. Meeraaraq naasutut naajartortussatut akuttuallaanngitsumik imerterneqartariaqartutut ippoq. Inersimasut pingaarutilinnik eqqaamanninnissaminnut uteqqiineq iluaqutigisarmassuk qularnanngivippoq aamma meeqqat uteqqiineq iluaqutigissagaat!

Angajoqqaat qitornaminnik Guutip sallusuissutaanik ilinniartitsinissaminnut piffissaqartariaqarput. Ullutsinni silarsuarmi ulapaarfiusumi piffissaqarniarneq ajornakusoorsinnaavoq. Apustilip Paulusip kristumiunut inassutigaa pingaarutilinnut ‘piffissaqqissoq atussagaat’. (Ef 5:15, 16) Angajoqqaat qanoq taamaaliorsinnaappat? Qatanngutip utoqqaanertaasup pioneriusumik ulapittumik nuliallip qitornaminik ilinniartitsinerminut, ilagiinni akisussaaffimminik isumaginninnissaminut suliffimminullu tunngasunik oqimaaqatigiissaarinissani unamminiarnartippaa. Panimmik ilinniartinnissaanut qanoq piffisaqarsinnaappat? Ataataasoq ima  oqarpoq: ‘Ullaat tamaasa suliartortinnanga nuliaralu panipput atuffattarparput Biibilimik oqaluttuaatikka imaluunniit Ullut tamaasa Allakkat misissortakkit atorlugit. Unnukkut innartinnagu atuffattarparput oqaluussigaangattalu ilagisarlugu. Mikisuuneraniilli ilinniartinnissaanut periarfissaq annaarusunngilarput.’

‘ERNERIT QARSUTUT IPPUT’

Kissaatigaarput qitornarput inersimasunngussasoq akisussaassuseqartoq. Ilinniartinneranulli pissutaasoq pingaarnerpaaq tassaavoq Guutimik asanninnermik uummatimini ineriartortitsinissaa. — Mark 12:28-30.

Tussiaat 127:4-mi ima allassimavoq: “Qarsutut sorsuttartup tigumiaasut ipput ernerit inuusutsilluni erniarisat.” Biibilimi qitornavut qarsunut ummiuteqqissaagassanut assersuunneqarput. Piseriartup qarsoq sivisugisassaanngitsumi tigummisarpaa, piseriareerunilu qarsoq utertissinnaanngilaa. Taamatuttaaq angajoqqaat piffissami sivisugisassaanngitsumi qitornatik inersimasunngortinnagit perorsartarpaat. Taamaattumik angajoqqaat qitornatik Guutip inatsisaanik maleruaarusulersillugillu nuannarinnilersillugit piffissaagallartillugu ilinniartitsinissaat pingaaruteqarluinnarpoq.

Apustili Johannesi anersaakkut qitornani pillugit ima allappoq: “Qitornakka sallusuissummi inuusut tusarlugit tassa tamanit uannut nuannernerpaaq.” (3 Joh 4) Aamma angajoqqaat kristumiut qitornamik ‘sallusuissummi inuunerat’ qujamasuutigalugulu nuannaarutigisarpaat.