Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Juuli 2013

 MISIGISALIKKERSAARUT

Sumiinneq apeqqutaatinnagu Jehovamut kiffartorusunneq

Sumiinneq apeqqutaatinnagu Jehovamut kiffartorusunneq

Kisimiillunga oqaluussinikuunngisaannarpunga. Oqaluussinerit tamaasa annilaangasangaarama niukka sajukulaartarput. Tamatuma saniatigut inuit oqaluussiffigineqartut inussiarniitsuupput. Allaat oqaluussiffigisamma ilaannit peqqarniitsumik pineqartarlungalu unatarneqarnissamik sioorasaarneqartarpunga. Qaammammi siullermi pioneritut kiffartorninni quppersakkamik ataasiinnarmik tunniussaqarpunga! — Markus.

TAMAKKU 1949-mi, ukiut 60-it matuma siorna, pisimagaluartut siusinnerujussuakkut pisut oqaluttuarerusuppakka. Ataataga Hendrikimik atilik Donderenimi, illoqarfeeqqami Hollandimi Drenthep avannaaniittumi, kamippaliortutut naatsiiviliortutullu sulisarpoq. Tassani 1927-mi inunngorpunga qatanngutigiinni arfineq-marluusuni akulliullunga. Illoqarfeeqqami nunaannarmiittumi ujaraaqqanik aqqusinilimmi illoqarpugut. Sanilivut amerlanerit naasorissaasuupput, naasorissaasutullu inuuneq nuannaraara. 1947-mi 19-inik ukioqarlunga sallusuissut pillugu sanilitta Theunis Beenip oqaluussiffigaanga. Eqqaamavara Theunis naapeqqaarakku nuannarinagu, sorsunnersuulli kingulliup kinguninngua Jehovap Nalunaajaasuinut ilaalerami inussiarnernerujussuanngortoq maluginiarpara. Kinaassutsiminik allannguinera soqutiginnilissutigigakku Guutip nunarsuarmi paratiiseqalernissaanik neriorsuutaa pillugu oqaluttuukkaanganga tusarnaaqqissaartarpunga. Sivitsunngitsoq nalunaajaasunngorpunga, inuunittalu sinnera ikinngutigilerpugut. *

Maajimi 1948-mi oqaluussisalerpunga qaammammilu tulliuttumi, juunip 20-anni, Utrechtimi ataatsimeersuarnermi kuisillunga. 1949-mi januaarip aallaqqaataani pionerinngorpunga ilagiinnullu anginngitsumut Borculomiittumut, Hollandip kangianiittumut, nooqquneqarlunga. Illoqarfik kilometerit 130-t missaanik ungasissuseqarmat sikkilerlunga taavunnarniarlunga aalajangerpunga. Isumaqaqqaaraluarpunga nalunaaquttap-akunneri arfinillit atorlugit illoqarfimmukarsinnaallunga, sialussuarnerali assorneralu pissutigalugit nalunaaquttap-akunneri 12-it atorlugit  illoqarfimmukarpunga, naak kilometerit 90-it kingulliit qimuttuitsoraluarlunga! Unnukkut kiisami tikiffissannut, ilaqutariinnut nalunaajaasunut sumiiffimmi tassani pioneriuninni najugaqarfissannut, apuuppunga.

Sorsunnersuup kingorna amerlanerit piitsuupput. Uanga assuutit angigisakka qarliillu mikigisakka pigisatuaraakka. Allaaserisap aallaqqaataani oqaatigeriikkattut Borculomut nooqqaarninni pissutsit imaannaanngitsuupput, Jehovalli arlalinnik Biibilimik atuaqqissaaqatigisartagaqalersinnikkut pilluaqquaanga. Qaammatit qulingiluat qaangiummata Amsterdamimut nooqquneqarpunga.

ILLOQARFEEQQAMIIT ILLOQARFIMMUT

Illoqarfeerarmiooreerlunga Amsterdamimut, Hollandimi illoqarfimmut annerpaamut, nuuppunga. Oqaluussininni angusaqarluarpunga. Qaammatini kingullerni qulingiluani Biibililersaarutit tunniussannit amerlanerusunik qaammammi siullermi tunniussaqarpunga. Sivitsunngitsoq arfineq-pingasunik Biibilimik atuaqqissaaqateqartalerpunga. Ilagiinni kiffartortutut (maanna utoqqaanertaqaqatigiinnik ataqatigiissaarisutut taaneqartartoq) toqqarneqareerlunga siullermeerlunga tamanut oqalugiartussanngortinneqarpunga. Oqalugiarnissara merserigakku oqalugiarnissara sioqqutitsiarlugu ilagiinnut allanut nuutsinneqarama annakkuummerpunga. Sunaaffali ukiut ingerlaneranni 5000-init amerlanerusunik oqalugiarnialerama!

Markus (talerperleq) 1950-imi Amsterdamip eqqaani aqqusinermi oqaluussisoq

1950-imi maajip qaammataani Haarlemimut nooqquneqarpunga. Tamatuma kingorna nakkutilliisutut angalasartunngorusunnersunga aperineqarpunga. Ulluni pingasuni sininngitsuungajappunga. Robert Winkler, qatanngut immikkoortortaqarfimmi kiffartortoq, oqarfigaara piukkutinngitsutut misigalunga taassumali ima akivaanga: “Immersugassat immersuunnakkit. Ilikkarumaarpat.” Tamatuma kinguninngua nakkutilliisutut angalasartutut kiffartulernissannut qaammat ataaseq ilinniartinneqarpunga. Ilagiit ilaat tikeraartillugu Janny Taatgen, pioneri inuusuttoq qiimasoq Jehovamik asanningaarlunilu imminut pilliutigeriaannaasoq, naapippara. 1955-imi katippugut. Misigisalikkersaaqqinnginninni Jannyp qanoq pionerinngorsimanerluni oqaluttuarissavaa.

NULIARIITTUT KIFFARTORNEQ

Janny: 1945-mi aqqanilinnik ukioqarlunga anaanaga nalunaajaasunngorpoq. Meeqqaminik pingasunik Biibilimik atuaqqissaaqateqartariaqarnini ingerlaannaq paasivaa, ataatagali sallusuissummut akerlilersuisuummat aatsaat angerlarsimanngikkaangat ilinniartittarpaatigut.

1950-imi Haagimi ataatsimeersuarnermi siullermeerlunga ataatsimeeqataavunga. Tamatuma sapaatip-akunnera ataaseq qaangiummat Assenimi (Drenthemi) naalagaaffilersaarfimmi siullermeerlunga ataatsimeeqataavunga. Tamanna pissutigalugu ataataga kamattorujussuanngorpoq angerlarsimaffitsinniillu anisillunga. Anaanama ima oqarfigaanga: “Nalunngilat kikkunni najugaqarsinnaanerlutit.” Ingerlaannaq paasivara anersaakkut qatanngutikka pigai. Siullermik ilaqutariinnut nalunaajaasuusunut ungasinngitsumi najugaqartunut nuuppunga, ataatagali  suli uannik akerlilersuiuarmat ilagiinnut Deventerimut (Overijsselimut) 95 kilometerinik ungasissusilimmut nuuppunga. Ukiukippallaartungali ataatama anisissimammanga ataataga pisortanit attavigineqarpoq. Tamatuma kingunerisaanik oqarfigaanga angerlarsinnaasunga. Ataatama, nalunaajaasunngornikuunngikkaluarluni, ataatsimiigiartarnera oqaluusseqataasarneralu akuerai.

Janny (talerperleq) 1952-imi sulinngiffeqarnermini ikiorti-pioneriusoq

Angerlarsimaffitsinnit anisitaaqqareerlunga angerlarsimatsiaannartunga anaanaga napparsimalluni perululermat angerlarsimaffimmi suliassat tamaasa isumagisariaqalerpakka. Taamaakkaluartorli anersaakkut ineriartortuarlungalu 1951-imi 17-inik ukioqarlunga kuisippunga. 1952-imi anaanaga napparsimajunnaarmat qatanngutit arnat pingasut qaammatini marlunni ikiorti-pioneritut kiffartoqatigilerpakka. Umiatsiami angerlarsimaffeqarpugut Drenthemilu illoqarfinni marlunni oqaluussisarluta. 1953-imi pionerinngorpunga. Ukioq ataaseq qaangiummat nakkutilliisutut angalasartoq inuusuttoq ilagiitsinnut tikeraarpoq. Taanna Markusimik ateqarpoq. Nuliariittut Jehovamut kiffartoqatigiissinnaalluarsorigatta 1955-imi maajip qaammataani katippugut. — Oqal 4:9-12.

1955-imi katikkatta

Markus: Katernaajulluta Veendamimut (Groningenimut) pioneritut kiffartoqqulluta nooqquneqarpugut. Ineeqqami 2 meterisut takissusilimmi 3 meterisullu silissusilimmi najugaqarpugut. Jannyp ineeraq ingerlaannaq najoruminarsisillugulu nuannersisippaa. Unnuit tamaasa siniffipput napparlugu iigartittagaq inissaqartissinnaajumallugu nerrivipput issiavigullu mikisut marluk illikartariaqartarpavut.

Qaammatit arfinillit qaangiummata Belgiami nakkutilliisutut angalasartutut kiffartorusunnersugut aperineqarpugut. 1955-imi Belgiami taamaallaat 4000-inik oqaluussisartoqarpoq. Ullumikkut 24.000-init amerlanerusunik oqaluussisartoqarpoq! Flandernimi, Belgiap avannaa-tungaani, inuit Hollandimiusut oqaluttarput. Taamaakkaluartorli Belgiamiut sumiorpaluutaat allaanerulluinnarpoq, taamaattumillu aallaqqaammut oqaatsit atorneqartut sungiunniaqqaartariaqarpavut.

Janny: Nakkutilliisutut angalasartutut kiffartornermi imminut pilliutigeriaannaanissaq pingaaruteqarluinnarpoq. Sikkilerluta ilagiit tikeraartarpavut qatanngutitsinnilu najugaqartarluta. Nammineq angerlarsimaffeqannginnatta ilagiit tikeraaraangatsigit ataasinngorneq naallugu inisimaffigisatsinniittarpugut marlunngornikkullu ullaakkut ilagiinnut tulliuttunukarniarluta aallartarluta. Kiffartornerpulli Jehovamit pilluaqqussutitut isigiuaannarparput.

Markus: Aallaqqaammut qatanngutit ilagiinniittut ilisarisimanngilavut, qatanngutilli inussiarnersorujussuullutillu inoroorsaarput. (Hebr 13:2) Ukiut ingerlaneranni ilagiit Belgiami Hollandimiusut oqaluttut tamaasa arlaleriarluta tikeraarpavut. Tamanna amerlasuutigut pilluaqquneqaatigaarput. Assersuutigalugu qatanngutit Hollandimiusut oqaluffiusumi oqaluussisartut ilisarisimallualerlugillu asangaalerpavut. Inuusuttut hundredelippassuit timikkut aamma anersaakkut inersimallualerlutillu Jehovamut tunniulluinnarsimasut, Guutip naalagaaffianut attuumassuteqartunik inuunerminni salliutitsisut, malinnaavigisimavavut. Taakkua amerlanersaat aalajaallutik Jehovamut kiffartornermi piffissartik tamaat atortaraat takullugu qiimmattaatigisarparput. (3 Joh 4)  Tamanna ‘kajumissaaqatigiinneq’ uummatikkut iluunngarluta suliuarnissatsinnut ajornannginnerulersitsivoq. — Rom 1:12.

UNAMMINIARNANGAARTOQ PILLUAQQUSSUTAANGAARTORLU

Markus: Katikkattali Ilinniarfimmi Gileadimi ilinniartinneqarnissarput kissaatigingaarsimavarput. Ullut tamaasa sivikinnerpaamik nalunaaquttap-akunnera ataaseq atorlugu tuluttut atuartarpugut. Atuarnerinnakkut tuluttut ilinniarniarneq ajornaatsuinnaanngimmat aalajangerpugut Tuluit Nunaannut feeriarniarluta taamaalilluta oqaluussinitsinni tuluttut sungiusarniassagatta. 1963-imi kiisami qullersaqarfitsinnit Brooklynimiittumit allakkat-puuanik nassinneqarpugut, iluaniippullu allakkat marluk, aappaa uannut aappaalu Jannymut. Allagarsianni Gileadimi immikkut ittumik qaammatini qulini ilinniarnissamut qaaqquneqarpunga. Pikkorissartitsinermi tamatumani qatanngutit angutit aaqqissuussaaneq pillugu ilinniartinnissaat pingaarnertut siunertarineqarpoq. Taamaattumik qaaqquneqartunit 100-sunit 82-it angutaapput qatanngutit.

Janny: Ullormi tassani allagarsianni aperineqarpunga Markus Gileadimi ilinniartinneqarnerani Belgiamiiginnarnissara qinunikkut eqqarsaatigeqqissaarusunneriga. Aallaqqaammut pakatseqqaarnera nassuerutigisariaqarpara. Anguniakkannik piviusunngortitsiniarlunga iliuuseqarnera Jehovamit pilluaqquneqarpasinngilaq. Gileadimili ilinniartut nunarsuaq tamakkerlugu nutaarsiassamik nuannersumik oqaluussissutiginninnissaannik ilinniartinnissaat siunertarineqartoq imminut eqqaasitsissutigaara. Taamaattumik angerlarsimaannarnissannut Belgiamilu illoqarfimmi Gentimi Anna aamma Maria Colpaert, qatanngutit arnat marluk ukiorpassuarni specialpioneriusimasut, peqatigalugit specialpioneritut kiffartornissannut akuersivunga.

Markus: Tuluttut pikkorissaqqittariaqarnera pissutigalugu ilinniarnissama aallartinnginnerani qaammatit tallimat Brooklynimeeqquneqarpunga. Nassiussisarfimmi Kiffartornermillu Nakkutilliisoqarfimmi sulivunga. Qullersaqarfimmi kiffartorninni saqqummersittakkatsinnillu Asiamut, Europamut Amerikamullu Kujallermut nassiussassanik piareersaaqataasarninni nunarsuaq tamakkerlugu qatanngutigiissuartut kiffartornerput ilisimaarilluarnerulerpara. Qatanngut A. H. Macmillan, qatanngut Russellip nalaani nakkutilliisutut angalasartutut kiffartorsimasoq, ingammik eqqaamalluinnarpara. Utoqqaagaluarluni tutsarlungaaraluarlunilu aalajaalluni ataatsimiinnernut tamanut najuuttarpoq. Maligassiuinera killinneqaatigingaarpara paasivaralu kristumiutut peqatigiittarnitta qanoq pingaaruteqartiginera eqqaamajuartariaqaripput. — Hebr 10:24, 25.

Janny: Markusilu sapaatip-akunneranut arlaleriarluta allaqatigiittarpugut. Immitsinnut maqaasingaarpugut! Markusilli Gileadimi ilinniartinneqarnini nuannaarutigaa uangalu oqaluussininnik qiimmattaatiginningaarpunga. Markus USA-mit angerlarmat 17-inik Biibilimik atuaqqissaaqateqartarpunga! Qaammatini 15-ini avissaaqqanerput soorunami unamminiarnarpoq, takusinnaavarali Jehovap pilliuteqarsimanerput pillugu pilluaqqugaatigut. Markusip ulloq taanna timmisartoq ilaaffigisaa nalunaaquttap-akunnerini arlalinni kinguaattoorpoq, kiisamilu tikimmat eqisimaarluta qiavugut. Taamanimiilli avissaaqqinngisaannarnikuuvugut.

SULIASSIISSUTIGINEQARTUT TAMAASA QUJAMASUUTIGAAVUT

Markus: Decembarip qaammataani 1964-imi Gileadimit angerlarama Betelimi kiffartoqquneqarpugut. Sunaaffali utaqqiisaannaagallartumik suliassinneqarluta. Qaammatit pingasut qaangiutiinnartut Flandernimi  ilageeqatigiinnik arlalinnik nakkutilliisutut kiffartoqquneqarpugut. Aalzen aamma Els Wiegersma Belgiamut ajoqersuiartortitatut aallartinneqaramik ilageeqatigiinnik arlalinnik nakkutilliisutut kiffartoqquneqarput, Betelimut uteqqikkatta Kiffartornermik Nakkutilliisoqarfimmi kiffartulerpunga. 1968-imiit 1980-imut Betelimi kiffartortarlutalu nakkutilliisutut angalasartutut kiffartortarpugut. 1980-imiit 2005-imut ilageeqatigiinnik arlalinnik nakkutilliisutut kiffartoqqilerpunga.

Kiffartornitsinni suliassavut allanngoqattaartaraluartut uummatitsigut iluunngarluta Jehovamut kiffartorniarluta aalajangiussinikuusimanerput puiunngisaannarparput. Suliassiissutigineqartut tamaasa nuannaarutigisarpavut qularutiginngittuaannarlugulu allannguutit tamatigut Guutip naalagaaffianut attuumassuteqartunut iluaqutaasartut.

Janny: 1977-imi Brooklynimi 1997-imilu Pattersonimi Markus immikkoortortaqarfimmi ataatsimiititaliamut ilaasortaasutut annerusumik piginnaanngorsarneqarumalluni pikkorissartinneqarmat peqataanera immikkut pisinnaatitaaffiusoq nuannaarutigaara.

JEHOVAP PISARIAQARTITAVUT SUUNERSUT NALUNNGILAI

Markus: 1982-imi Janny anigorluakkaminik pilatsippoq. Ukiut pingasut tamatuma kingorna Louvainimi ilagiit naalagaaffilersaarfiup qulaani najugaqarsinnaanitsinnik neqeroorfigaatigut. Ukiut 30-t ingerlaneranni aatsaavissuaq nammineq ineqalerpugut. Marlunngornikkut ilagiinnut tikeraarnissatsinnut poortuereerluta angalanermi nassatassavut aqqussuunniarlugit majuartarfik 54-inik tummeqqalik majuarfigeqattaartariaqarpara! 2002-mi inimi allermi najugaqarnissarput qujanartumik isumagineqarpoq. 78-inik ukioqarlunga illoqarfimmi Lokerenimi specialpionerinngorpugut. Taamatut kiffartorsinnaanerput ullullu tamaasa suli oqaluusseqatigiissinnaanerput nuannaarutigingaarparput.

‘Sumi kiffartornerput sumillu suliassaqarnerput pinnagit kimulli kiffartornerput pingaaruteqartoq qularutiginngilluinnarparput’

Janny: Marluulluta katillugu ukiuni 120-ni piffissaq tamaat kiffartoqatigiinnikuuvugut! Jehovap uagutsinnik ‘iperaajumanani’ aalajaallutalu kiffartorfigigutsinni ‘sumilluunniit amigaateqannginnissatsinnik’ neriorsuisimanerminik eqquutitsisimanera nammineq misiginikuuarput. — Hebr 13:5; 5 Mos 2:7.

Markus: Inuusuttuulluta aalajangerpugut Jehovamut kiffartortuarniarluta. Nunap piinik angisuunik pigisaqalernissarput anguniagarinngisaannarnikuuarput. Sumi kiffartornerput sumillu suliassaqarnerput pinnagit kimulli kiffartornerput pingaaruteqartoq qularutiginngilluinnaratsigu uagutsinnut suliassiissutigineqartut tamaasa kajumilluta naammassiumasarpavut.

^ par. 5 Ukiut ingerlaneranni ataataga, anaanaga, aleqara nukkammalu ilaat marluk aamma nalunaajaasunngorput.