Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Juuni 2013

Jehovap ilumoorfiginnittuunera isumakkeerfiginnittarneralu pingaartikkit

Jehovap ilumoorfiginnittuunera isumakkeerfiginnittarneralu pingaartikkit

“Naalagaq, illimmi ajunngitsuuvutit isumakkeerfiginnikkumasarlutillu, ilumoorsutsit angeqaaq ilinnik torlorfiginnittunut tamanut.” — TUSS 86:5.

1, 2. (a) Sooq ikinngutit ilumoorfiginnittut isumakkeerfiginnikkumasartullu pingaartippavut? (b) Allaaserisami matumani apeqqutit suut akissutissarsissavavut?

IKINNGUT ilumoortoq qanoq ittuua? Qatanngut arnaq Ashleymik atilik oqaluttuarpoq ikinngut ilumoortoq qaqugukkulluunniit ikiuerusuttarlunilu kukkusoqarsimagaangat isumakkeerfiginnikkumasartoq. Ikinngutit taama ittut tamatta pingaartippavut. Taakkua toqqissisimasutut asaneqartutullu misigitittarpaatigut. — Uss 17:17.

2 Jehova ikinngutitsinnit tamanit ilumoorfiginninnerpaallunilu isumakkeerfiginnikkumanerpaavoq. Tussiaasiortup allaatigisaatut ittuuvoq: “Naalagaq, illimmi ajunngitsuuvutit isumakkeerfiginnikkumasarlutillu, ilumoorsutsit angeqaaq ilinnik torlorfiginnittunut tamanut.” (Tuss 86:5) Ilumoorfiginninneq isumakkeerfiginnikkumanerlu qanoq paasisariaqarpat? Jehovap pissusini nuannersut taakkua qanoq ersersittarpai? Taanna qanoq ilaarsinnaavarput? Apeqqutit taakku akissutissarsigutsigit Ikinngutiginerpaasatsinnik, Jehovamik, asanninnerulissaagut. Qatanngutitsinnut aamma attaveqarluarnerulissaagut. — 1 Joh 4:7, 8.

JEHOVA ILUMOORFIGINNITTUUVOQ

3. Ilumoorfiginninneq qanoq paasisariaqarpa?

3 Inuk ilumoorfiginnittoq asasaminut aalajaatsuuvoq. Ilumoorfiginnittup asanninnini ikiuiuarnermigut tapersersuiuarnermigullu ersersittarpaa. Inuk ilumoorfiginnittoq allaat pissutsini artornartuni ikiuerusunnerusarlunilu tapersersuerusunnerusarpoq. Biibilimi Jehova ‘Ilumoorfiginnittuusutut’ allaatigineqarpoq. Taassumannga allamik ilumoorfiginninnerusoqanngilaq. — Saqq 16:5, NW.

4, 5. (a) Jehovap ilumoorfiginnittuunini qanoq ersersittarpaa? (b) Sooq Jehovap ilumoorfiginnittuuneranik eqqarsaatiginnittarnerput qiimmaallaatigisarparput?

 4 Jehovap ilumoorfiginnittuunini qanoq ersersittarpaa? Kiffani aalajaatsut tapersersortuartarpai. Kiffaata ilaata, kunngip Daavip, Jehovap ilumoorfiginnittuunera unnersiutigaa. (Tussiaat 101:6 atuaruk). Daavip annikilliungaarnerani Jehovap ilumoorluni siulersorlugulu illersorlugulu aniguisippaa. (2 Sam 22:1) Jehovap oqaasiinnartiguunngitsoq iliuutsikkulli aamma ilumoorfiginnittarnera Daavip nammineerluni misigaa. Sooq Jehova Daavimut ilumoorfiginnippa? Daavi namminerminut ilumoorfiginnimmat. Jehovap kiffani ilumoorfiginnitsini asallugillu ilumoorfigai. — Uss 2:6-8.

5 Jehovap kiffaminut ilumoorfiginnittuuneranik eqqarsaatiginnittarnerput qiimmaallaatigisarparput. Qatanngut aalajaatsoq Reedimik atilik oqaluttuarpoq Daavip artornartorsiornerani Jehovap ikiuisarnera pillugu atuartarnini iluaqutigisarlugu. Ima nassuiaavoq: “Allaat Daavip qaarusunni qimarngunerani Jehovap tapersersortuarpaa. Tamanna qiimmaallaatigingaartarpara! Aamma qanorluunniit atugaqaraluaruma qanorluunniillu siunissara neriunarpasinngitsigigaluarpat Jehovamut ilumoortuaruma taassumannga najorneqartuarumaarninnik eqqaasitsissutigisarpara.” Qularnanngitsumik aamma illit taamatut misigivutit. — Rom 8:38, 39.

6. Jehovap ilumoorfiginnittuunini aamma qanoq ersersittarpaa, tamannalu kiffaasa qanoq iluaqutigisarpaat?

6 Jehovap ilumoorfiginnittuunini aamma qanoq ersersittarpaa? Nammineq najoqqutassiaminik maleruaajuarnermigut. (Es 46:4) Najoqqutassiani allanngunngisaannartut tunngavigalugit tamatigut aalajangiisarpoq. (Mal 3:6) Jehovap neriorsuisimanermisut iliortuarnermigut aamma ilumoorfiginnittuunini ersersittarpaa. (Es 55:11) Jehovap ilumoorfiginnittuunera kiffaasa tamarmik iluaqutigaat. Qanoq? Sapinngisatsinnik Jehovap inatsisai naalattuarniartarutsigit uagutsinnik pilluaqqusiumaarnerminik neriorsuutiminik eqquutitsiumaarnera qularinngilluinnarsinnaavarput. — Es 48:17, 18.

JEHOVATUT ILUMOORFIGINNITTUUGIT

7. Jehovatut ilaatigut qanoq ilumoorfiginnittuusinnaavugut?

 7 Qanoq Jehovatut ilumoorfiginnittuusinnaavugut? Ilaatigut artorsaateqartunut ajunngitsuliortarnitsigut. (Uss 3:27) Qatanngummik peqqiilliuuteqarnerminik, ilaquttaminik akerlilersorneqarnerminik sanngiissuteqarnerminilluunniit nikallungassutiginnittumik nalunngisaqarpit? Qatanngut ‘oqaatsit tuppallernartut’ atorlugit qiimmassarsinnaavat. (Zak 1:13) * Taama ilioruit ersersissavat ikinngutitut ilumoorfiginnillutillu ilumoortuullutit, ikinngutaallutit ‘qatanngummit tatiginarnerusoq’. — Uss 18:241990.

8. Ilaatigut katisimanitsinni qanoq ilumoorfiginnissinnaavugut?

8 Asasatsinnut aamma allatigut ilumoorfiginnittuusinnaavugut. Assersuutigalugu katisimagutta aappatsinnut aalajaattariaqarnerput nalunngilarput. (Uss 5:15-18) Taamaattumik allasiornaveersaaginnarata allasiortitsilersinnaasut suulluunniit ingalassimasarpavut. (Matt 5:28) Qatanngutivut ajortumik oqaluuserinnginnerisigut salluliuutiginnginnerisigullu aamma taakkununnga ilumoorfiginninnerput ersersittarparput. Allaat taamatut oqaluttunut tusarnaarusunneq ajorpugut. — Uss 12:18.

9, 10. (a) Ingammik kimut ilumoorfiginnikkusuppugut? (b) Sooq Jehovamut naalanneq ajornaatsuujuaannarsinnaanngila?

9 Ingammik Jehovamut ilumoorfiginnikkusuppugut. Qanoq taassumunnga ilumoorfiginnittuusinnaagatta? Jehovap iluarisai iluarinerisigut uumigisaalu uumiginerisigut. Jehovallu iluarisaatut inuunitsigut. (Tussiaat  97:10 atuaruk). Jehovatut eqqarsarsinnaanerujartortilluta taassumunnga naalannissaq ajornannginnerulissaaq. — Tuss 119:104.

10 Soorunami Jehovamut naalanneq ajornaatsuujuaannanngilaq. Taassumunnga ilumoorfiginnittuarumalluta tamaviaartariaqarsinnaavugut. Assersuutigalugu imaassinnaavoq qatanngut arnaq katikkusuttoq qatanngummik angummik uiulluarsinnaasumik suli nassaarsimanngitsoq. (1 Kor 7:39) Immaqa suleqataasa uppinngitsut angummut tulluarsorisaminnut naapeqatigiisinniartarpaat. Tamatumalu saniatigut katikkusuttoq kiserliortorujussuusarsinnaavoq. Taamaakkaluartorli Jehovamut ilumoorfiginnittuarniarnini aalajangiusimavaa. Kristumiut arnatut taassumatut ittut ilumoorfiginninnermut tunngatillugu maligassaalluarput. Artornartorsioraluarlutik Jehovap imminut kiffartortuartut pilluaqqujumaarpai. — Hebr 11:6.

‘Ikinngutaasoqartarpoq qatanngummit tatiginarnerusunik.’ — Uss 18:24, 1990. (Takuuk immikkoortoq 7)

‘Isumakkeerfigeqatigiittaritsi.’ — Ef 4:32. (Takuuk immikkoortoq 16)

JEHOVA ISUMAKKEERFIGINNIKKUMASUUVOQ

11. Isumakkeerfiginnikkumasuuneq qanoq paasisariaqarpa?

11 Isumakkeerfiginnikkumasuuneq qanoq paasisariaqarpa? Inuk isumakkeerfiginnikkumasuusoq ajuallatsinneqarsimanerminik narrujuummissuteqarunnaarniarluni aalajangertarpoq. Tamanna iliuuserineqarsimasunik iluarinninnertut susoqarsimanngitsutulluunniit pissusilersornertut paasisariaqanngilaq. Akerlianilli narrujuumminiarnani aalajangernertut paasisariaqarpoq. Isumakkeerfiginnikkumasuuneq Jehovap pissusiisa nuannersut ilagaat. Biibilimi allassimavoq Jehova ilumoorlutik allamik isumataartunut ‘isumakkeerfiginnikkumasartoq’. — Tuss 86:5.

12. (a) Jehova qanoq isumakkeerfiginnikkumasartigiva? (b) Inuup ajortuliaasa ‘piiarneqartarnerat’ qanoq paasisariaqarpa?

12 Jehova qanoq isumakkeerfiginnikkumasartigiva? Biibilimi allassimavoq Jehova ‘isumakkeerfiginnittuartartoq’. Tassa isumakkeerfiginnilluinnartarlunilu qaqugorsuarmut isumakkeerfiginnittarpoq. (Es 55:7) Jehovap isumakkeerfiginnilluinnartartoq qanoq ililluta nalunngissinnaagatsigu? Apustilit Suliaat 3:19, 20-mi neriorsuut eqqarsaatigiuk. (Atuakkit). Apustili Paulusi allappoq  ajortuliorsimasup ilumoorluni allamik isumataartup ajortuliani peqqissimissutigisarai. Qanoq inuk ajortuliorsimasoq Jehovamit isumakkeerfigineqarsinnaava? Petrusi allappoq ajortuliorsimasoq ‘allamik isumataartariaqarlunilu’ Guutimut ‘saattariaqartoq’. Inuk ilumoorluni allamik isumataartoq aalajangertarpoq ajortuliarisimasani ajortuliareqqinniarnagu. (2 Kor 7:10, 11) Taamaalilluni inuk Guutimut saattarpoq, tassa ajortumik inooriaaseqarunnaartarpoq sapinngisanilu tamaat Guutip iluarisaanik inuunialertarluni. Tamatuma kingorna ajortuliai ‘piiarneqartarput’. Taamaattumik Jehovap isumakkeerfigigaangatigut ajortuliavut nungutertarpaalusooq. Tamatuma kingunerisaanik Jehova inummik isumakkeerfiginnilluinnartarpoq. — Hebr 10:22; 1 Joh 1:7.

13. Jehovap ‘ajortuliatsinnik eqqaaqqiiniarnani’ oqarnera qanoq ilinniarfigisinnaavarput?

13 Qanoq ililluta nalunngissinnaavarput Jehovap ajortuliatsinnik qaqugorsuarmut isumakkeerfigisaraatigut? Jehovap kristumiut tanitat pillugit Jeremiamik siulittuisitsineranit qanoq isumakkeerfiginnikkumasartiginera pillugu ilikkagaqarsinnaavugut. (Jeremia 31:34 atuaruk). Jehova ima oqarpoq: “Iluanngitsuliaannik isumakkeerfigissagakkit ajortuliaallu eqqaaqqinnagit.” Taamaattumik Jehovap isumakkeerfigigaangamisigut unnerluutigeqattaarniarluta pillataqqaarniarlutaluunniit ajortuliavut eqqaaqqinneq ajorpai. Ajortuliatsinnik qaqugorsuarmut isumakkeerfigisarpaatigut. — Rom 4:7, 8.

14. Sooq Jehovap qanoq isumakkeerfiginnikkumasartigineranik eqqarsaatiginneqqissaartarnerput tuppallersaatigisinnaavarput? Assersuuteqarit.

14 Jehovap qanoq isumakkeerfiginnikkumasartigineranik eqqarsaatiginneqqissaartarnerput tuppallersaatigisinnaavarput. Qatanngut arnaq ukiorpassuit matuma siorna ilagiinnut ilaajunnaarsitaasimasoq assersuutigeriartigu. Ukiualuit qaangiuttut ilagiinnut ilaaleqqinnissaa akuerineqarpoq. Taamaakkaluartorli qatanngutip Jehovamit isumakkeerfigineqarsimanini upperivallaanngilaa. Misigivoq Jehovap allat namminerminit asanerugai. Jehovalli isumakkeerfiginnittarnera pillugu Biibilimi allassimasunik eqqarsaatiginneqqissaartarnini tuppallersaatigaa. Assersuutigalugu atuarpaa Jehova isumakkeerfiginnikkaangami ajortitsinnik minguiarluta uffartaraatigullusooq. Ajortuliorsimanerput inuunitta sinnerani pisuusutut misigissutigisariaqanngilarput. * Qatanngut ima nangippoq: “Paasivara Jehovamit isumakkeerfigineqarluinnarsinnaanera upperisimanagulu tamanna inuunerma sinnerani nanertuutigisussaasorisimallugu. Nalunngilara tamanna imaaliallaannaq qaangersinnaanagu, kisianni Jehovamut ilumut qanillisinnaasutut nanertuutaaruttutullu misigivunga.” Ilumut Jehova Guutiuvoq asannittuullunilu isumakkeerfiginnikkumasoq! — Tuss 103:9.

JEHOVATUT ISUMAKKEERFIGINNITTUUGIT

15. Isumakkeerfiginnikkumanermut tunngatillugu Jehova qanoq ilaarsinnaavarput?

15 Allanik isumakkeerfiginnikkumasarnitsigut Jehova ilaarsinnaavarput. (Lukasi 17:3, 4 atuakkit). Eqqaamajuk Jehovap isumakkeerfigigaangamisigut iliuuserisimasavut puiorluinnartarmigit. Uaguttaaq allanik isumakkeerfiginnikkaangatta iliuuserisimasaat kingusinnerusukkut eqqarsaatigisassanatigillu eqqaaqqittassanngilagut.

16. (a) Allat kukkussutaannik isumakkeerfiginnittarneq qanoq paasisariaqarpa, qanorlu paasineqartussaanngila? (b) Jehovamit isumakkeerfigineqarusukkutta susariaqarpugut?

 16 Allat kukkussutaannik isumakkeerfiginnittarnerput iliuuserineqarsimasunik iluarinninnertut naapertuilluanngitsumilluunniit pineqarsimanitsinnik nuannarinninnertut paasineqartussaanngilaq. Kukkusimasumilli kamaassiniannginnertut paasisariaqarpoq. Pingaaruteqarportaaq eqqaamassallugu uagut Jehovamit isumakkeerfigineqarusukkutta allat isumakkeerfigeqqaartariaqaratsigit.  (Matt 6:14, 15) Jehovap “eqqaamavaa pujualaasugut”. Nalunngilaa naammalluinnanngitsuusugut. (Tuss 103:14) Taamaattumik oqaatsitsigut iliuutsitsigulluunniit uagutsinnik ajuallatsitsisut uagutsitut naammalluinnanngitsuunerat eqqaamasariaqarlugulu ilumoorluta isumakkeerfigisariaqarpavut. — Ef 4:32; Kol 3:13.

Ilinnik ajuallatsitsisimasumik ilumoorlutit qinnussisarit (Takuuk immikkoortoq 17)

17. Ilinnik ajuallatsitsisimasumik kamaassiunnaarnissannut suna iluaqutigisinnaaviuk?

 17 Soorunami ilaannikkut allanik isumakkeerfiginninneq ajornaatsuinnaasanngilaq. Allaat Paulusip nalaani kristumiut tanitat ilaasa tamanna ajornartittarsimavaat. (Fil 4:2) Qatanngutip ajuallatsitsisimasup isumakkeerfiginissaanut suna iluaqutigisinnaaviuk? Jobi eqqarsaatigiuk. Elifazi, Bildadi Sofarilu Jobimut ikinngutaanerarput. Taamaakkaluartorli ajuallatsillugulu ajortuliorsimanerarlugu unnerluutigaat. Jobi ajuallatsinneqangaarpoq. (Job 10:1; 19:2) Naggataatigut Jehovap angutit pingasut taakkua oqarfigai iliuusaat eqqunngitsuusoq Jobimukassasullu ajortuliornertik pillugu pilliuteqassasut. (Job 42:7-9) Jehovalli aamma Jobi iliuuseqaqquaa. Qanoq? Oqarfigaa angutit qinnutissagai. Jobi peqquneqarnermisut iliorpoq, Jehovallu isumakkeerfiginnikkumasuunera pillugu pilluaqquaa. (Jobi 42:10, 12, 16, 17 atuakkit). Oqaluttuaq qanoq ilinniarfigisinnaavarput? Ilinnik ajuallatsitsisimasumik ilumoorlutit qinnussinerit taassuminnga kamaassiunnaarnissannut iluaqutigisinnaavat.

JEHOVAP PISSUSII MISISSORTUARLUGILLU ILAARTUAKKIT

18, 19. Sunissarput aalajangiusimavarput?

18 Jehovap pissusiinik misissuisimanerput iluaqutigaarput. Saaffigiuminartuunera, kinaassusersiortuunnginnera, tukkortuunera, ingasaassinianngitsuunera, ilumoorfiginnittuunera isumakkeerfiginnittarneralu sammereerpavut. Soorunami Jehova pillugu ilinniarneqarsinnaasut amerlanerujussuupput. Taassuminnga naassaanngitsumut ilinniartuarnerput nuannaarutigissavarput. (Oqal 3:11) Apustili Paulusi ima allattoq isumaqatigaarput: “Ilami Guutip pisuussusiata ilisimassusiatalu siuneqassusiatalu itissusiat!” Guutip asanninnera pissusiilu arfinillit allaaserisani makkunani misissoriikkavut pillugit Paulusitut oqarsinnaavugut.— Rom 11:33.

19 Qanortoq tamatta Jehovap pissusiinik misissuiuarlutalu eqqarsaatiginneqqissaartarlutalu ilaarsiuarisa. (Ef 5:1) Tamatuma kingunerisaanik Jehovamik asanninnerulerlutalu taassumunnga qaninnerulissaagut. Tussiaasiortoq ima allattoq isumaqatiginerulissavarput: ‘Uannut pitsaanerpaavoq Guutimut qanillineq.’ — Tuss 73:28, NW.

^ par. 7 Napasuliaq Alapernaarsuiffik-mi allaaserisani 1. februaari 1995-imoortumi “Qanittukkut arlaannik qiimmassaasimavit?” aamma 1. apriili 1995-imoortumi “Asanninnermut ajunngitsuliornermullu kajumissaaqatigiinneq — qanoq ililluni?”-mi atoriaannaasunik siunnersuuteqarpoq.

^ par. 14 Takuuk atuakkami Kom nær til Jehova-mi kapitali 26-mi immikkoortoq 10.