‘Guutip erneri’ ulersuaq sioqqullugu piusut Mosesimik allakkat siulliit 6:2, 4-mi eqqaaneqartut kikkuuppat?

Ilimanarluinnarpoq tassaasimassasut Guutip erneri anersaajusut. Sooq?

Versi 2-mi ima allassimavoq: “Guutit [Guutip, 1900] ernerisa inuit panii isigilerpaat pinnaralugit pileritsaassatillu nulissiuttarlugit.” — 1 Mos 6:2.

Allakkat Hebræerisuut allassimaqqaarfiini oqaatsit ‘Guutip erneri’ ukunani atorneqarput: 1 Mosesi 6:2, 4; Jobi 1:6; 2:1; 38:7; Tussiaat 89:7. Allassimaffiit taakku najoqqutaralugit ‘Guutip erneri’ kikkuusimassappat?

Erseqqippoq “Guutip erneri” Jobi 1:6-imi allaatigineqartut tassaasut pinngortitat anersaajusut Guutip saani katersorsimasut. Taakkua ilagaat Saatani ima oqartoq: “Nunarsuaq angalaffigeqqissaarakku.” (Job 1:7; 2:1, 2) Jobi 38:4-7-imi allassimavoq ‘Guutip erneri nipertik illugalugu qiimmattartut’ Guutip nunarsuaq pinngortillugu ‘ujarak teqeqqussaq inissimmagu’. Qiimmattartut tassaasimassapput Guutip erneri inngiliusut, taamanimi inuit suli pinngortitaanngillat. Erseqqilluinnarpoq ‘Guutip erneri’ (1900) Tussiaat 89:7-imi eqqaaneqartut tassaasimassasut pinngortitat anersaajusut Guuti najorlugu qilammiittut — tassaanatik inuit.

Taavami ‘Guutip erneri’ Mosesimik allakkat siulliit 6:2, 4-mi eqqaaneqartut kikkuuppat? Assersuutinut Biibilimeersunut allaaserisami matumani sammeriikkatsinnut naapertuuttumik isummersinnaavugut pineqartut tassaasut Guutip erneri anersaajusut nunarsuarmukartut.

Inngilit kinguaassiuutitigut atoqatigiinnermut tunngasunik soqutiginnissinnaanerat inuit ilaasa akueriuminaatsippaat. Jiisusip oqaasiinit Matthæusi 22:30-miittunit erserpoq qilammiittut aappartaartarnatillu atoqateqarneq ajortut. Inngililli ilaannikkut inuttut timeqalertarsimapput, allaallumi inuit nereqatigalugillu imeqatigisimavaat. (1 Mos 18:1-8; 19:1-3) Taamaattumik inuttut timeqarlutik arnanik atoqateqarsinnaanerisa upperinissaa tunngavissaqarpoq.

Inngilit arnanik atoqateqarsimanerat upperissallugu Biibilimi tunngavissaqarpoq. Angutit Sodomamiut ajortuliornerat Judasi 6, 7-mi inngilit taakkua ajortuliornerannut sanilliunneqarpoq. Sodomamiut pissusissamisuunngitsumik atoqateqarniarput, inngilillu pillugit allassimavoq “suliassaminnik pingaaqisunik nakkutiginninnatik inigisassaraluaminnik qimatsisut”. Taakku tamarmik, inngilit aamma Sodomamiut, ‘kinguaassiuutitigut inuunerlupput pisarnermillu allaasumik atoqatigiinniarlutik’. Petrusip allagai siulliit 3:19, 20-mi inngilit naalanngitsut ‘Noap nalaani’ pisunut atassuserneqarput. (2 Petr 2:4, 5) Tassa inngilit naalanngitsut Noap nalaani iliuuserisaat naleqqiunneqarsinnaapput Sodomami Gomorramilu innuttaasut ajortuliaannut.

Taamatut isummerneq uppernarsisarpoq paasigaanni ‘Guutip erneri’ Mosesimik allakkat siulliit 6:2, 4-mi eqqaaneqartut tassaasut inngilit inuttut timeqalerlutik arnanik kinguaassiuutitigut inuunerloqateqartut.

 Biibilimi allassimavoq Jiisusi “anersaanut parnaarussaasunut” oqaluussisoq. (1 Petr 3:19) Tamanna qanoq paasisariaqarpa?

Apustili Petrusi anersaat taakku pillugit allappoq ‘Noap nalaani Guuti nikallujuilluni utaqqitillugu naalasseriitsuusut’. (1 Petr 3:20) Ersarippoq Petrusip inngilit Saatanip pikitsitsineranut ilannguttut pigai. Judasip “inngilit suliassaminnik pingaaqisunik nakkutiginninnatik inigisassaraluaminnik qimatsisut” pillugit allappoq Guutip taakku “taartumi kalunnernik qilersorsimajuartussanngortikkai ullussarsuarmi eqqartuussinissap tungaanut”. — Jud 6.

Inngilit Noap nalaani qanoq naalanngippat? Ulersuaq sioqqullugu anersaat ajortut taakku inuttut timeqalerput — Guutillu taamaaliornerat siunertarinngilaa. (1 Mos 6:2, 4) Aamma inngilit taakkua arnanik atoqateqarnerat pissusissamisoortuunngilaq. Guutip anersaat pinngortinngilai arnanik atoqateqartartussatut. (1 Mos 5:2) Inngilit ajortuullutillu naalanngitsuusut taakku Guutip piffissarititaani suujunnaarsinneqassapput. Maannakkulli Judasip allassimaneratut ‘taartumiipput’ — anersaakkut qilersorneqarsimallutillusooq.

Qanga qanorlu Jiisusi “anersaanut parnaarussaasunut” oqaluussiva? Petrusi allappoq Jiisusi makititaanermi kingorna taamaaliortoq. (1 Petr 3:18, 19) Aamma malugiuk Petrusi allattoq Jiisusi ‘oqaluussiartortoq’. Versit ataqatigiinnerannit erserpoq Petrusip allakkani siulliit suli allanngikkai Jiisusi oqaluussisoq. Tassa Jiisusip makititaanermi kingorna anersaat ajortut naapertuilluartumik pillarneqarnissaat taakkununnga nalunaarutigisimassagunarpaa. Oqaluussineq tamanna neriuutissaqalersitsinani eqqartuussummik nalunaarutaavoq. (Jon 1:1, 2) Jiisusi toqussi tikillugu uppertuullunilu ilumoorfiginnittuugami makititaagamilu — tassa Diaavulup pissaaneqarfiginngilluinnaraani uppernarsisikkamiuk — tunngavissaqarluarluni eqqartuussut tamanna nalunaarutigisinnaavaa. — Joh 14:30; 16:8-11.

Siunissami Jiisusip Saatani inngilillu ajortut qilersorlugillu itinersuarmut nakkartissavai. (Luk 8:30, 31; Saqq 20:1-3) Taamaalineqarnissamik tungaanut inngilit naalanngitsut taakku anersaakkut taggarissumiiginnassapput naggataatigullu suujunnaarsinneqarluinnassallutik! — Saqq 20:7-10.