Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Maaji 2013

 TOQQORSIVITSINNIT

‘Ulluni misilinneqarfiusuni’ aalajaapput

‘Ulluni misilinneqarfiusuni’ aalajaapput

SORSUNNERSUUP siulliup ingerlanerani inuppassuit paasivaat Biibilimik Atuaqqissaartartut sorsunnermut peqataajumanngitsut. (Es 2:2-4; Joh 18:36; Ef 6:12) Guutimmi kiffai Tuluit Nunaanniittut qanoq nalaataqarpat?

Henry Hudson

1916-imi Tuluit Nunaanni inatsit akuerineqarmat angutit katissimanngitsut 18-iniit 40-nik ukiullit sorsukkiartoqquneqarput. Inatsit tamanna naapertorlugu angutit upperisarsiornertik nalunngeqatiginnissutertilluunniit pissutigalugit sakkutuujujumanngitsut sakkutuunngortariaqanngillat. Naalakkersuisut eqqartuussisoqatigiinnik pilersitsipput kikkut sakkutuunngortariaqanngitsut qanorlu annertutigisumik sakkutooqarnermut tunngatillugu suliaqassanerannik naliliisinnaasunik.

Inatsit tamanna akuerineqaraluartoq Biibilimik Atuaqqissaartartut ilaat sakkutuujujumannginnerat akuerineqanngilaq, taamaattumillu angutit 40-t missaaniittut parnaarussaapput, angutillu arfineq-pingasut Frankrigimut sorsuffiusumukaanneqarput. Taakkua naapertuilluanngitsumik pineqarnerat pissutigalugu qatanngutit Tuluit Nunaanniittut ministeriuneq Herbert Asquith allaffigaat parnaarussaanerat maalaarutigalugu, maalaarullu 5500-nik atsiornilik ilannguppaat.

Taava nalunaarutigineqarpoq Frankrigimukaanneqartut arfineq-pingasut taakku sorsuffiusumi sakkutuujujumannginnertik pissutigalugu aallaallugit toqutaasussatut eqqartuunneqarsimasut. Aallaaneqaliivillutilli taakkua pillaatisiaat allanngortinneqarpoq Tuluit Nunaanni parnaarussivimmi ukiuni qulini parnaarussassanngortillugit.

James Frederick Scott

Sorsunnersuaq sivisunaarneqarmat aamma angutit katissimasut sorsukkiartoqquneqarput. Tuluit Nunaanni Manchesterimi misiligummik suliassiinermi illersuisuusussaq tassaavoq Henry Hudson, nakorsaasoq Biibilimillu Atuaqqissaartartoq. 1916-imi aggustip ulluisa pingajuanni eqqartuussivimmi aalajangerneqarpoq taanna suliassaminik isumaginninngitsuusoq, akiliisinneqarlunilu sakkutuunut tunniunneqarpoq. Tamatumunnga peqatigitillugu Skotlandimi Edinburghimi misiligummik suliassiineq alla eqqartuussivikkut suliassiissutigineqarpoq. James Frederick Scott, pioneri 25-nik ukiulik, pinngitsuutinneqarpoq. Unnerluussisussaatitaasut eqqartuussut suliareqqitassanngortikkaluariarlugu unitsiinnarpaat misiligummik suliassiineq alla Londonimi ingerlanniarlugu. Maanna qatanngut angut Herbert Kipps pisuutinneqarluni akiliisinneqarpoq sakkutuunullu tunniunneqarluni.

Septembari 1916 tikillugu qatanngutit angutit 264-it sakkutuunngortitaannginnissartik pillugu qinnuteqarsimapput. Taakkua ilaasa tallimat sakkutuujujumannginnerat akuerineqarpoq, 154-it inuiaqatigiinnut tunngasunut suliassanik pingaarutilinnik suliassinneqarput, 23-t sakkuaannatik sakkutooqarfinni suliassinneqarput, 82-it sakkutuunut tunniunneqarput, taakkualu ilaat unnerluutigineqarlutillu parnaarunneqarput. Angutit taakku parnaarussivimmi naakkittaatsumik pineqarnerat pissutigalugu  inuppassuit akerliliimmata naalakkersuisut angutit sakkutuut parnaarussivianniit pinngitsaaliissummik sulisitsivinnut nuutsippaat.

Pryce Hughes

Pryce Hughes, kingusinnerusukkut Tuluit Nunaanni immikkoortortaqarfimmi nakkutilliisutut kiffartulersoq, aamma Edgar Clay Walesimi sapusioqataasimapput. Herbert Seniorili, Frankrigimiit arfineq-pingasut utertinneqartut ilaat, Wakefieldimi Yorkshiremiittumi parnaarussivimmukaanneqarpoq. Allat Dartmoorip parnaarussiviani pissutsini imaannaanngitsuni pillagaallutik sulisitaasarput, taakkunanilu nalunngeqatiginnissusertik pissutigalugu sakkutuujujumanngitsut amerlanerit Biibilimik Atuaqqissaartartuupput.

Frank Platt, Biibilimik Atuaqqissaartartoq sakkuaannani sakkutooqarfimmi suliassinneqarnissaminik akuerinnissimasoq, sorsukkiartoqquneqarnissani akueriumannginnamiuk sivisuumik ingasattumillu naalliutsinneqarpoq. Atkinson Padgett, sakkutuunngornissamut allatsissimanermi kinguninngua sallusuissummik paasinnissimasoq, akiuunnermi peqataajumannginnami aamma sakkutuunit naalliutsinneqarpoq.

Herbert Senior

Sorsunnersuup siulliup nalaani qatanngutivut kalluunnaveersaarneq pillugu paasisimanninngikkaluarlutik Jehovamit iluarisaarusussimapput. Allaaserisami matumani qatanngutit eqqaaneqartut ‘ulluni misilinneqarfiusuni’ unamminiarnartuni kalluunnaveersaarnermut tunngatillugu maligassaalluarput. (Saqq 3:10) — Toqqorsivitsinnit Tuluit Nunaanniittumit.