Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Maaji 2013

 ATUARTARTUT APEQQUTAAT

Atuartartut apeqqutaat

Israelikkut pinerluttunik nappakkamut nivinngaanikkut toqumik pillaasarpat?

Itsaq inuiappassuit pinerluttunik aalajangersimasunik qisummut nappakkamut nivinngaanikkut toqumik pillaasarput. Romamiut pinerluttoq nappakkamut kikiattorluguluunniit qilersortarpaat, tassanilu — immaqa aatsaat ullut arlallit qaangiukkaangata anniaateqangaarlunilu qilalerlunilu perlilerluni silalu pissutaalluni — toqusarpoq. Romamiut nappakkamut kikiattorneqarneq qilersorneqarnerlu pillaataasutut nikanarsaataasutut isigisarpaat, pinerluttupalaallu kisimik taamatut pineqartussaanerarpaat.

Itsaq Israelikkut qanoq iliortarpat? Israelikkut pinerluttunik nappakkamut nivinngaanikkut toqumik pillaasarpat? Mosesip inatsisaani ima peqqussutigineqarpoq: “Angut ajortuliorsimappat toqumik pillaateqartussaasumik, toqunneqarpallu timaalu qisummut nivinngarneqarluni, taava timi taanna toqungasoq unnuaq tamaat qisummi nivingatissanngilat, ullormili toqunneqarfiani ilissavat.” (5 Mos 21:22, 23) Tamatumannga erserpoq itsaq Israelikkut nalaanni inuk toqumik pillaatissinneqarsimasoq toqutaareeruni qisummut orpimmulluunniit nivinngarneqassasoq.

Aamma Mosesimik allakkat pingajuanni 20:2-mi ima allassimavoq: “Israelikkuusup takornartaasulluunniit Israelimi najugaqartup qitornami ilaat Molokimut pilliutigiguniuk toqussaaq. Nunaqqataasa ujaqqanik milloorlugu toqussavaat.” Aamma “angut arnarluunniit timaajagarsiortut siulittuisartulluunniit anersaavannik pigisaqartoq toqunneqassaaq”. Qanoq toqunneqassava? ‘Ujaqqanik milloorlugu.’ — 3 Mos 20:27.

Mosesimik allakkat tallimaanni 22:23, 24-milu ima allassimavoq: “Angutip arnaq inuusuttoq niviarsiaasoq uissiaqartorlu illoqarfimmi naapillugu innaassimappagu taakku marluk illoqarfiup isaaffianukaatissavasi ujaqqanillu milloorlugit toqussallugit — tassa arnaq illoqarfimmiikkaluarluni ikioqqulluni nilliasimanngimmat angullu angutip allap nuliassaanik pinngitsaaliilluni innaassisimammat. Taamaalillutit ajortoq akornassinnit piiassavat.” Itsaq Israelikkunni ujaqqanik milloorineq peqqarniitsumik pinerluttuliortunik toqutseriaasiuvoq amerlanertigut atorneqartartoq. *

Itsaq Israelikkut nalaanni inuk toqumik pillaatissinneqarsimasoq toqutaareeruni qisummut orpimmulluunniit nivinngarneqartarpoq

Mosesimik allakkat tallimaanni 21:23-mi allassimavoq ‘qisummi nivinngagaasoq Guutimit perloqqusaasoq’. Pinerluttup ‘Guutimit perloqqusaasup’ toqungasup timaa qisummut orpimmulluunniit nivinngarneqartoq kikkunnit tamanit takuneqarsinnaammat Israelikkunnut mianersoqqussutaasimassaaq.

^ par. 6 Ilisimatoorpassuit aamma isumaqarput Mosesip inatsisaasa atuunnerata nalaani pinerluttoq qisummut nivinngarneqannginnermini toqutaasartoq. Uppernarsaateqarporli ukiuni hundredelinni siullerni pinerluttut ilaat suli toqunngitsut juutinit nivinngarneqartartut aatsaallu nappakkami toqullutik.