“Ataqqissavara aqqit naassaanngitsumik.” — TUSS 86:12.

1, 2. Guutip aqqanut tunngatillugu Jehovap Nalunaajaasui kristumiuunerartunit allaanerulluinnartumik qanoq misigippat?

KRISTUMIUUNERARTUNI amerlanerni Guutip aqqa atorneqarumanngilaq. Assersuutigalugu Biibilimik nutsikkamut Revised Standard Version-imut siulequtsiussami allassimavoq Guutip aqqanik taaguuteqarnissaq ilagiinnut “naleqqutinngilluinnartuusoq”.

2 Taakkunannga allaanerulluinnarlutik Jehovap Nalunaajaasuisa Guutip aqqanik taaguuteqarnertik tulluusimaarutigaat aqqalu ataqqillugu. (Atuakkit Tussiaat 86:12; Esaja 43:10). Aamma Guutip aqqata qanoq isumaqarneranik illernarsisinneqarnissaatalu qanoq pingaaruteqartigineranik paasinninnerput tulluusimaarutigaarput. (Matt 6:9) Jehovamik ilisarisimanninnerup ataqqinaataanera puiunngisaannarniassagatsigu apeqqutit pingaarutillit pingasut uku misissoriartigik: Guutip aqqanik ilisimanninneq qanoq paasisariaqarpa? Jehovap aterminut angingaartumut qinngaqqunnartuunnginnini qanoq ersersippaa? Aamma qanoq ‘Jehovap aqqani inuusinnaavugut’?

GUUTIP AQQANIK ILISIMANNINNEQ QANOQ ISUMAQARTOQ

3. Guutip aqqanik ilisimanninneq qanoq isumaqarpa?

3 Guutip aqqanik ilisimanninneq tassaaginnanngilaq oqaatsimik “Jehova”-mik ilisimanninneq. Tassaavorli Jehovap Guutitut qanoq ittuuneranik ilisimanninneq. Aammattaaq ilisimasariaqarput ilisimaneqarnera, pissusii, siunertaa aamma pinninneriaasia, ingammik innuttaminik pinnittarnera. Jehovap siunertaminik piviusunngortitsiartuaarnermini paasinarsiartuaartippaa Guutitut qanoq ittuunini. (Uss 4:18) Nalunngilarput Guutip Adamimut Evamullu atini oqaluttuarigaa, Evap Kainimik ernertaareerluni Guutip aqqa atormagu. (1 Mos 4:1, NW) Aamma Jehovamut kiffaasut aalajaatsut Noap,  Aaperaap, Iisaap Jaakullu Guutip aqqa nalunngilaat. Guutitut qanoq ittuunersoq pillugu ilikkagaqarnerusarput taassumannga pilluaqquneqaraangamik, isumassorneqaraangamik siunertaanillu paasitinneqaraangamik. Kingusinnerujussuakkut Guutip aterminut tunngasoq immikkut ittoq Mosesimut saqqummersippaa.

Mosesip Guutip aqqata isumaa ilisimavaa, tamannalu uppernikkut nakussatsissutigaa

4. Sooq Mosesip Guutip aqqa apeqqutigaa, aamma sooq Israelikkut qularunnaarsikkusuppai?

4 Atuakkit Mosesimik allakkat aappaat 3:10-15Guutip Mosesi 80-inik ukioqartoq ima peqquaa: ‘Innuttakka Israelikkut Egyptenimit anisikkiartukkit.’ Taava Mosesip Jehova apeqqummik isumalerujussuarmik ima aperaa: “Guutip aqqa apeqqutigippassuk taava qanoq akissavakka?” Guutip innuttaasa taassuma aqqa qangarsuarli nalunngilaat, taavami sooq Mosesi taama aperiva? Jehova Guutitut qanoq ittuunera pillugu paasisaqarnerorusukkami. Mosesip Israelikkut Guutimit ilumut aniguisinneqarumaartut qularunnaarsikkusuppai. Taamaaliorusunnera paasinarpoq, Israelikkummi ukiorpassuarni inussiaataapput qularutigisimasinnaassavaallu Jehovap ikiorsinnaassaneraatik. Allaammi Israelikkut ilaat Egyptenimiut guutiinik pallorfiginnissimapput. — Ez 20:7, 8.

5. Jehova atini pillugu Mosesi sumik paasitippaa?

5 Jehovap Mosesi qanoq akivaa? Mosesi Israelikkunnut ima oqaqquaa: “Jahvep siuaasassi Guutiata . . . ilissinnut aallartippaanga.” Aamma ima oqarfigaa: “Ilissinnut aallartippaanga Uangaasup.” * Guutip taama oqarluni imminut tunngasoq pingaarutilik saqqummersippaa. Neriorsuutini eqqortinniarlugit sunngorsinnaavorluunniit, imaluunniit pisariaqartoq sunaluunniit iliuuserisinnaavaa. Aamma Guutiuvoq neriorsuinermisut tamatigut iliortartoq. Taamaattumik Jehova ima nangippoq: “Tassa atera naassaanngitsumik aterisara, tassa ateriumasara kinguaariikkuutaani.” Mosesip oqaatsit taakku killinneqaatigingaarsimassavai uppernikkullu nakussatsinneqaatigisimassallugit!

JEHOVAP ATERMI ISUMAA EQQORTIPPAA

6, 7. Jehovap atermi angingaartup isumaa qanoq eqqorteqqissaarpaa?

6 Jehovap Mosesimik oqaloqateqarnermi kingunitsianngua neriorsuinermisut Israelikkut aniguisippai. Jehovap Egyptenimiut perlunnik qulinik pillarpai tamannalu Faraop Egyptenimiullu guutiisa soriarsinnaanngilaat. (2 Mos 12:12) Taava Jehovap Imaq Ivissuartooq (Imaq Aappalaartoq) qupillugu Israelikkut tassuuna  siulersorpai Faraolu taassumalu sakkutuui ipitillugit. (Tuss 136:13-15) Jehovap Israelikkut millionilikkuutaat inoqajuitsumi nerisassaqartillugillu imigassaqartillugit inuuginnartippai. Allaat atisaat aloqutaallu nungullanngillat. (5 Mos 1:19; 29:4) Tamakku tamarmik uppernarsaataapput Jehovap neriorsuutiminik eqquutititsiniarnermini akornuserneqarsinnaannginneranut. Kingusinnerusukkut Esajamut ima oqarpoq: “Uanga kisima tassaavunga Naalagaq [Jehova, NW], uangaanngitsumik annatsitsisinnaasoqanngilaq.” — Es 43:11.

7 Josva, Mosesip kingoraartaa, Jehovap Egyptenimi inoqajuitsumilu tupinnangaartuliaanut aamma takunnittuuvoq. Taamaattumik Josva inuunermi naalernerani Israelikkunnut ima oqarsinnaasimavoq: ‘Tamassi uummatissigut tarnissigullu ilisimassavarsi ajunngitsut Jehovap Guutissi ilissinnut oqaatigisaasa ilaat ataasinnguarluunniit qammuinnarsimanngitsoq. Tamarmik piviusunngorsimapput, oqaaseq ataasiinnarluunniit maangaannarsimanngilaq.’ (Jos 23:14) Jehova neriorsuinermisorluinnaq iliorpoq.

8. Ullumikkut Jehovap atermi isumaa qanoq eqqortippaa?

8 Aamma ullumikkut Jehova neriorsuinermisut iliortarpoq. Ernini aqqutigalugu siulittuivoq ullussani kingullerni Guutip naalagaaffia pillugu nutaarsiassaq nuannersoq “silarsuarmi tamarmi” oqaluussissutigineqassasoq. (Matt 24:14) Jehova kisimi tamatuminnga siulittuisinnaavoq kisimilu tamatuma piviusunngornissaata qulakkeernissaanut pissaaneqarluni. ‘Inuinnaallu immikkut ilinniagaqarsimanngitsut’ oqaluussitippai. (ApS 4:13) Tassa nutaarsiassaq nuannersoq oqaluussissutigigaangatsigu siulittuummik Biibilimeersumik eqquutsitseqataasarpugut. Taamaaliornerpullu Ataatatsinnut ataqqinaataasarpoq ersersittarparpullu qinnut una pimoorullutigu: “Aqqit illernartitaali, naalagaaffiit tikiulli, piumasat qilammisut nunamissaaq pili.” — Matt 6:9, 10.

AQQA ANGINGAARPOQ

Faraop akueriumanngilaa Jehova tassaasoq Guuti ajugaqanngitsoq

9, 10. Jehovap Israelikkunnik pinnittarneranit taanna pillugu sunik allanik ilikkagaqarpugut?

9 Israelikkut Egyptenimit aninerisa kingunitsianngua Jehovap imminut tunngasunik allanik taakku paasitippai. Jehovap Inatsisit tunngavigalugit angerfigeqatigai neriorsorlugillu isumassorumallugit uiusup nuliaminik pisarneratut. Israelikkullu Jehovamut nuliaasutut ipput. Inuiaapput aqqanik taaguutillit. (Es 54:5, 6) Peqqussutai naalakkunikkit taassumannga pilluaqquneqarlutillu illersorneqarlutillu eqqissisinneqassapput. (4 Mos 6:22-27) Inuiaqatigiit allat tamarmik paasissavaat Jehovatut ittumik allamik Guuteqanngitsoq. (Atuakkit 5 Mosesi 4:5-8; Tussiaat 86:7-10). Israelikkut Guutimit innuttaatillugit  allamiorpassuit Jehova pallorfiginiarlugu aalajangerput. Ruthip Moabikkuusup No’omimut oqarneratut ima oqarput: “Inuiaqatitit uangattaaq inuiaqatigissavakka, illillu Guutit uangattaaq Guutigissavara.” — Ruth 1:16.

10 Ukiuni 1500-nit amerlanerusuni Jehovap Israelikkunnik pinnittarnermigut Guutitut qanoq ittuunerminut tunngasorpassuit allat paasitippai. Imminut naalanngittuartaraluartut nallittungaartarpai naammagittangaartarlunilu. (2 Mos 34:5-7) Jehovalli naammagittarnera killeqarpoq. Israelikkut inuiattut Jiisusi upperiumanngimmassuk toqummassullu Guutip aqqanik taaguuteqarsinnaajunnaarput. (Matt 23:37, 38) Jehovamut orpittut toqungasutut ilerput. (Luk 23:31) Taamaalernerat Guutip aqqanik isiginnittaasiannut qanoq sunniuteqarpa?

11. Sooq Israelikkut Guutip aqqa atortarunnaarpaat?

11 Oqaluttuarisaanermit erserpoq juutit Guutip aqqanut tunngatillugu kukkusumik isiginnittaaseqaleriartortut. Isumaqalerput Guutip aqqa taaneqarnissamut illernarpallaartoq. (2 Mos 20:7) Tamatuma kingunerisaanik Guutip aqqa atorunnaariartuaarpaat. Jehova ajuallassimassaqaaq aqqi taama ataqqinninngitsigisumik pineqartoq takullugu. (Tuss 78:40, 41) Jehovap aqqa taassumunnga pingaaruteqangaarpoq. Aap, Biibilimi allassimavoq aterminut tunngatillugu ‘sangiattuusoq’. Israelikkut Jehovap aqqanik ataqqinninngitsuliornertik pissutigalugu taassuma aqqanik taaguuteqarnissamut naleqqukkunnaarput. (2 Mos 34:14, NW) Tamatumannga ilinniarparput Pinngortitsisitta aqqanik ataqqinningaartuunissaq pingaaruteqarluinnartuusoq.

INUIAAT NUTAAT GUUTIP AQQANIK TAAGUUTILLIT

12. Kikkut Guutip aqqanik taaguuteqalerpat?

12 Jeremia aqqutigalugu Jehova neriorsuivoq inuiaat nutaat ‘nutaamik angerfigeqatigiumallugit’, imaluunniit isumaqatigiissuteqarfigiumallugit. Inuiannut taakkununnga ilaasut tamarmik “minnernit annernut” ‘Jehova ilisimajumaarpaat’. (Jer 31:31, 33, 34) Qanga Jehovap angeruseq nutaaq taanna angerusiliaraa? Ukiumi 33-mi piinsip ulluani. Kikkut nutaamik angerfigeqatigai? Angerfigeqatigisai Biibilimi ‘Israeli Guutip pigisaanik’ taaneqarput taakkununngalu ilaasut inuiannit tamaneersuupput. Jehovap taakku ‘aterminik taasiffigineqartunik’, imaluunniit aterminik taaguuteqartunik, taavai. — Gal 6:16; Atuakkit Apustilit Suliaat 15:14-17; Matt 21:43.

13. (a) Kristumiut siulliit Guutip aqqa atortarpaat, tamannalu qanoq nalunngilarput? (b) Guutip aqqata oqaluussinermi atortarnera qanoq isumaqarfigaajuk?

13 Kristumiut siulliit, inuiannut nutaanut taakkununnga ilaasut, Guutip aqqa atortarpaat. Assersuutigalugu Allakkat Hebræerisuut issuaraangamikkit aqqa atortarpaat. * Apustili Petrusi ukiumi 33-mi piinsip ulluani inuppassuarnut Israelikkuusunut taakkulu upperisaannut ilanngussimasunut oqalugiarami Guutip aqqa arlaleriarluni atorpaa. (ApS 2:14, 20, 21, 25, 34, NW) Kristumiut siulliit ataqqimmanni Jehovap taakkua oqaluussinerat pilluaqquaa. Ullumikkut Jehovap aqqa allanut oqaluttuarigaangatsigu Biibiliannilu takutikkaangatsigu Jehovap oqaluussinerput aamma pilluaqqusarpaa. Taamaaliornikkut Jehova inunnut ilisaritikkaangatsigu uagutsinnut ataqqinaataasarpoq. Jehovamillu ilisarisimannilersunut tamanna aallarniutaalersinnaavoq, Jehovamut qanilliartortuartumik naassaanngitsumillu, taassuminnga ikinnguteqalernermut.

14, 15. Qanoq nalunngilarput Jehovap aqqi tammatsaalisimagaa?

 14 Kingusinnerusukkut, ingammik apustilit toqunerisa kingorna, ilagiit kristumiut ajoqersuinerluutinik sunnerneqarput. (2 Th 2:3-7) Allaat juutit Guutip aqqanik atuiumannginnerat ajoqersuinerluttunit ilaarneqartalerpoq. Jehovalli atermi tammavinnissaa akueraa? Naamerluinnaq! Sooq taama oqarsinnaavugut? Nalugaluarparput Guutip aqqa itsaq qanoq taaneqartarnersoq, aqqali tammanngilaq. Piffissap ingerlanerani Guutip aqqa Biibilimik nutsikkani assigiinngitsuni Biibilimillu ilisimatuut allagaanni atorneqartarsimavoq. Assersuutigalugu 1757-imi Charles Peters allappoq Guutip taaguutaanit allanit tamanit taassuma aqqata ersersilluarnerugaa Jehova Guutitut qanoq ittuunersoq. Guutimik pallorfiginninneq pillugu atuakkami 1797-imeersumi Hopton Haynesip kapitali 7 ima aallartippaa: “GUUTIP aqqa [taassumunnga] naleqquttoq JEHOVA juutinit atorneqarpoq; taannalu kisiat pallorfigaat; taamaaliorputtaaq Kristusi taassumalu ajoqersugai.” Henry Grewip (1781-1862) Guutip aqqa atuinnarnagu aamma paasisimavaa ataqqinninngitsuliorfigineqarsimasoq illernarsisinneqartariaqartorlu. Aamma George Storrsip (1796-1879) Charles T. Russellillu, suleqatigiissimasut, Guutip aqqa atortarpaat.

15 Guutip innuttaanut ukioq 1931 pingaaruteqangaarpoq. Taakku ukioq tamanna sioqqullugu Biibilimik Atuaqqissaartartut Nunanit Tamalaaneersut taaguutigivaat. Ukiumili tamatumani Jehovap Nalunaajaasui taaguutigilerpaat. (Es 43:10-12) Nunarsuarmiunut paasitippaat Guutip ‘aterminut innuttassarsiarisimagaatsik’ Guutillu aqqanik unnersiutiginninnertik tulluusimaarutigalugu. (ApS 15:14) Jehovap aqqi qanoq tammatsaalisimagaa eqqarsaatigigaangatsigu Malaki 1:11-mi allassimasoq una eqqaasarparput: “Kangianiit kitaanut atera inuianni angeqaaq.”

JEHOVAP AQQANI INUUGIT

16. Jehovap Nalunaajaasuinik taaguuteqarnerput qanoq isigissavarput?

16 Pruffiiti Mika ima allappoq: “Inuiaat allat tamarmik inuupput namminneq guutimik aqqanni; uagulli inuujumavugut Naalakkami Guutitta aqqani naassaanngilluinnartumik.” (Mika 4:5) Taamanikkut Guutip innuttaanut taassuma aqqanik taaguuteqarneq ataqqinaaterujussuuinnarnani aamma Guutimit iluarisaanermut ersiutaavoq. (Atuakkit Malaki 3:16-18). Aamma illit taama isumaqarpit? ‘Jehovap aqqani inuuniarneq’ ilungersuutigaajuk?

17. ‘Jehovap aqqani inuuneq’ qanoq paasisariaqarpa?

17 ‘Jehovap aqqani inuussagutta’ minnerpaamik pingasut iliuuserisariaqarpavut. Siullermik, ‘Jehovap aqqanik torlorfiginnittut’ kisimik annaanneqassammata taassuma aqqa allanut oqaluttuarisariaqarparput. (Rom 10:13) Aappassaanik, Jehovap pissusiisa, ingammik asanninnerata, assinganik pissuseqartariaqarpugut. Pingajussaanik, kajumilluta Guutip inatsisai naalattariaqarpavut taamaaliornikkullu Ataatatta aqqa ataqqillutigu. (1 Joh 4:8; 5:3) ‘Jehovap Guutitta aqqani naassaanngilluinnartumik’ inuunissat aalajangiusimaviuk?

18. Sooq Jehovap aqqanik ataqqinnittut tamarmik siunissaq isumalluarfigaat?

18 Jehovamik soqutiginninngitsut assortuisullu tamarmik qanittukkut paasissavaat taanna kinaanersoq. (Ez 38:23) Taakku Faraotut ima oqartutut ipput: “Naalagaq [Jehova, NW] kinaammat naalassavara?” Faraop nassuerutigisariaqarsimavaa Jehova Guutitut pissarsuusoq. (2 Mos 5:1, 2; 9:16; 12:29) Uagulli aalajangerpugut Jehova ilisarisimarusullutigu taassumunngalu ikinngutaajumalluta. Tulluusimaarutigaarput taassumunnga naalalluta innuttaanerput aqqanillu taaguteqarnerput. Siunissaq qilanaaralutigulu Tussiaat 9:11-mi neriorsuut tatigaarput: “Atinnik ilisimannittut tatigaatsit, qimannaviannginnakkit ilinnik ujarlersut, Naalagaq [Jehova, NW].”

^ par. 5 Guutip aqqa “Jahve” imaluunniit “Jehova” tassaavoq hebræerit oqaluutaat isumaqartoq “-nngortippoq” (imaluunniit: “-tippaa”). — 1 Mosesi 2:4, NW, qupp. ataani ilanngussaq.

^ par. 13 Allakkani Hebræerisuuni kristumiut siulliit atortagaanni Jehovap aqqa atorneqarpoq. Aamma ilimanarpoq Septuaginta, Allakkanik Hebræerisuunik grækerisuunngortitaq, assilillugu allatani siullerni Jehovap aqqata atorneqarsimanissaa.