Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Marsi 2013

‘Guuti ilisimalersimagakku’ susariaqarpit?

‘Guuti ilisimalersimagakku’ susariaqarpit?

‘Guuti ilisimalerparsi.’ — GAL 4:9.

1. Sooq timmisartortartup timmisartoq misissuleraangamiuk misissugassat allattorsimaffiat atortarpaa?

TIMMISARTORTARTUP aallannginnermini timmisartoq misissoqqissaartarpaa. Misissugassat tamarmik misissorneqarnissaannik qulakkeerinninniarluni misissugassat allattorsimaffiat atortarpaa. Timmisartoq misissorsimanngikkuniuk timmisartup nakkarsinnaaneranut pissutaasinnaasoq arajutsisinnaavaa. Ukiorpassuarni timmisartortartuusimasut allaat misissugassat allattorsimaffianni immikkoortut tamaasa misissortariaqartarpaat.

2. Suna misissortariaqarparput?

2 Timmisartortartup misissugassat allattorsimaffiata atortagaanut assingusumik illit uppernikkut, allaat ulluni ajornartorsiorfiusuni, aalajaattuarsinnaanerit qulakkeerniarlugu misissugassat allattorsimaffiannik atugassannik peqarpoq. Kuiserlaajugaluarutta ukiorpassuarniluunniit kuisimasuusimagaluarutta uppernerput misissortuartariaqarparput. Uppernitsinnik misissuikulasannginnerput aallussilluartuunnginnerpullu pissutigalugit Jehovamut attaveqarunnaarsinnaavugut. Biibilimi ima mianersoqquneqarpugut: “Kinaluunniit patajaatsuusorisoq mianersorli orloqqunani.” — 1 Kor 10:12.

3. Kristumiut Galatiamiittut susariaqarpat?

3 Jiisusip utertitsissutitut imminut pilliutiginera tunngavigalugu kristumiut Guuti immikkorluinnaq ittumik ilisarisimalersinnaavaat. Inuit maanna Guutip ernerisut toqqarneqarsinnaalerput! Kristumiulli Galatiamiittut uppernertik misissortuartariaqarpaat. (Gal 4:9) Ilagiinniittut ilaat oqarsimapput kristumiut Mosesip inatsisai maleruarpatigit aatsaat naapertuilluartuutitaasinnaasut. Kisianni Mosesip inatsisai Guutip atorunnaarsissimavai, aamma juutiunngitsut inatsisinik maleruaasussaatitaanikuunngillat! Juutit juutiunngitsullu ilagiinniittut anersaakkut ineriartortuartariaqarput.  Paasisariaqarpaat Mosesip inatsisaasa maleruarneqarnissaat Guutip piumasariunnaarsimagaa.

GUUTI ILISARISIMALERNIARLUGU ILIUUSERISIMASAVUT

4, 5. Paulusip Galatiamiut qanoq siunnersorpai, aamma allagai uagutsinnut sooq pingaaruteqarpat?

4 Apustilip Paulusip Jehovamit isumassarsisitaalluni allagaani Galatiamiut tamarmik eqqaasinneqarput sallusuissut Biibilimeersoq paasisimasartik qimassanngikkaat. Qimassimasavut uterfigeqqinngisaannartariaqarpavut. Galatiamiunut allakkat aalajaattuarnissatsinnut tamatta iluaqutigisinnaavavut.

5 Jehovamut kiffartorniarluta aalajangersimanerput tamatta eqqaamasariaqarparput. Apeqqutit marluk uku eqqarsaatigikkit: Kuisissinnaaniassagavit iliuuserisimasatit eqqaamavigit? Guuti qanoq ilisarisimalernerlugu taassumanngalu ilisarisimaneqaleravit qanoq misiginerlutit eqqaamaviuk?

6. Misissugassat allattorsimaffiat suna sammissavarput?

6 Sallusuissut malillugu inuuleratta assigiinngitsut qulingiluat iliuuseraavut. Taakku ungalusami  “Kuisinnissatsinnut anersaakkullu ineriartortuarniarluta iliuuserisimasavut”-mi allassimapput. Upperluarnerulernissatsinnut silarsuarmilu matumaneersunut uteqqinnginnissatsinnut iluaqutissatsitut iliuuserisimasavut misissugassat allattorsimaffiattut eqqarsaatigisinnaavavut. Timmisartortartup aallannginnermini misissugassat allattorsimaffiannik misissueqqaartuaannarneratut uagut misissugassanut allattorsimaffipput misissortuartariaqarparput.

GUUTIMIT ILISARISIMANEQARTUT ANERSAAKKUT INERIARTORTUARPUT

7. Najoqqutassiaq suna malittariaqarparput, aamma sooq?

7 Timmisartortartup aallannginnermini misissugassat allattorsimaffiannik misissueqqaartuaannarneratut uaguttaaq anersaakkut ineriartornerput misissortuarsinnaavarput. Paulusi Timotheusimut ima allappoq: “Najoqqutassiaq oqaatsinit peqqissinartunit, uannit tusakkannit, pisoq aalajangiusimajuk, Kristusimi Jiisusimi upperlutit asannillutillu.” (2 Tim 1:13, NW) ‘Oqaatsit peqqissinartut’ eqqartugai Guutip oqaasianiipput. (1 Tim 6:3) Ilusilersuinnarlugu titartagaq takugaangatsigu titartagaq tamarmi qanoq iluseqassanersoq takusinnaasarparput. Taamatuttaaq ‘oqaatsit peqqissinartut’ iluaqutigalugit Jehovap uagutsinnut piumasaqaatai paasisinnaasarpavut. Kuisinnginnitsinni iliuuserisimasavut sallusuissummullu najoqqutassiaq qanoq maleqqissaartiginerlutigu maanna sammissavavut.

8, 9. (a) Sooq ilisimasaqarneruleriartortuartariaqarlutalu uppernitsinnik nakussatitsisariaqarpugut? (b) Sooq kristumiutut ineriartornissarput pingaaruteqarpa, aamma sooq tamanna orpimmut assersuunneqarsinnaava?

8 Siullertut ilisimasaqalerpugut, tamatumalu kingunerisaanik uppernerput ineriartulerpoq. Kisianni ilisimasaqarneruleriartortuartariaqarlutalu uppernitsinnik nakussatitsisariaqarpugut. (2 Th 1:3) Kuisereernitta kingorna Guutimut attaveqarnerput ineriartortittariaqarlugulu nakussatsittuartariaqarparput.

Orpiup naajartortuarneratut kristumiut anersaakkut ineriartortuartariaqarput

9 Tamanna orpiup naajartortarneranut assersuunneqarsinnaavoq. Orpik, ingammik sorlaqarluartoq, portusoorujussuanngorsinnaavoq. Assersuutigalugu Libanonimi cederit kusanartut ilaat inissiatut quleriinnik aqqaneq-marlunnik initalittut portutigilersinnaapput, orpiullu kanaartaa 12 meterisut silitsigilersinnaasarpoq. (Erin 5:15) Aallaqqaammut orpik sukkasuumik naajartortarpoq. Sorlai talliartortillugit orpiup kanaartaa silinnerulerlunilu portunerulertarpoq. Piffissap ingerlanerani orpiup naajartornera malunnarpallaarunnaartarpoq. Kristumiut ineriartornerannut tunngatillugu  aamma taamaappoq. Biibilimik atuaqqissaartaleratta amerlasuutigut allannguivugut. Taava kuisippugut. Ilagiinniittut anersaakkut ineriartornerput malugaat. Imaassinnaavoq pionerinngortugut imaluunniit ilagiinni akisussaaffeqalertugut. Piffissap ingerlanerani imaassinnaavoq anersaakkut ineriartornerput allanut malunnarpallaarunnaartoq. Tamattali ‘inuttut inerluarsimasunngornissatta’ tungaanut, tassa piumasaqaatit naapertorlugit kristumiutut inersimalluartunngornissatta tungaanut, ilisimasaqarneruleriartortuartariaqarlutalu uppernitsinnik nakussatitsisariaqarpugut. (Ef 4:13) Taamaattumik kristumiutut ineriartornerput naatsiiassamut mikisumut orperujussuanngorluni naajartortumut assersuunneqarsinnaavoq.

10. Sooq kristumiut inersimalluartut aamma anersaakkut ineriartortuartariaqarpat?

10 Ineriartortuartariaqarpugulli. Ilisimasaqarnerput uppernerpullu sorlaqarluartariaqarput. Taamaattumik sorlavut Guutip oqaasiani naajartortittariaqarpavullusooq. (Uss 12:3) Qatannguterpassuit taamatut ineriartortuarsimapput. Qatanngut angut ukiut 30-t sinnerlugit utoqqaanertaasoq oqarpoq suli anersaakkut ineriartortuarluni. Ima nangippoq: “Biibilimik qujamasuutiginninneruleriartuinnarpunga. Najoqqutassiat inatsisillu Biibilimiittut assigiinngitsutigut maleruarnissaannut paasisakka amerliartuinnarput. Aamma oqaluussinermik qujamasuutiginninneruleriartuinnarpunga.”

GUUTIMIK IKINNGUTEQARNERIT NAKUSSATSIGUK

11. Qanoq Jehovamik ikinnguteqarnerput nakussatsinniartuarsinnaavarput?

11 Kristumiutut ineriartortuassagutta Jehovamut qaninneruleriartortuartariaqarpugut. Meeqqap angajoqqaaminik asannittunik peqateqaraangami misigisarneratut imaluunniit ikinngutigilluakkatsinnik peqateqaraangatta misigisarnitsitut toqqissisimanissarput asaneqartutullu misiginissarput Jehovap kissaatigaa. Soorunami toqqissisimasutut asaneqartutullu misigissaguit Jehovamut qanittumik attaveqarniarnerit ilungersuutigisariaqarpat. Taamaattumik ullut tamaasa Biibilimik atuartarnissannut piffissaqarniartarit. Jehovallu tunissutai atuagassiat, atuakkat atuagassiaaqqallu nutaat tamaasa atuartakkit. Taamaaliortaruit Jehova ilisarisimallualissavat taassuminngalu ikinnguteqarnerit nakussatsissavat.

12. Guutimik ikinnguteqarnerput nakussatsikkumallugu susariaqarpugut?

12 Qinusarnikkut pitsaasunillu ilagisartagaqarnikkut Guutimik ikinnguteqarnerput nakussatsissinnaavarput. (Atuakkit  Malaki 3:16). Guutip ikinngutini qinugaangata “ikioqqullutik nillianerat” tusartarpai. (1 Petr 3:12) Qamannga pisumik ikioqqulluta qinugaangatta Jehovap angajoqqaatut asannittutut tusarnaartarpaatigut. Taamaattumik ‘qasusuilluta qinusariaqarpugut’. (Rom 12:12) Guutimit ikiorneqanngikkutta kristumiutut inersimalluartuusinnaanngilavut. Guuti qinunikkut saaffigissaarutsigu nukissamik pisariaqartitatsinnik tunineqartarunnaassaagut. Silarsuarmit matumannga ajortumit nikallortinneqarsinnaallutaluunniit ajortuliornissatsinnut usserneqarsinnaavugut. Jehovalli qinnuigigutsinni sutigut tamatigut pisariaqartitatsinnik ikiorusuppaatigut. Jehova ikinngutitut tatigisatut oqaluuttarpiuk? Qinusarnitit arlaatigut pitsanngorsarsinnaavigit? — Jer 16:19.

13. Sooq Guutimik ikinnguteqarnerput nakussatsikkumallugu ataatsimiigiartuartariaqarpugut?

13 Jehovamut ikinngutaasut ilagisinnaajumallugit ilagiit qanittumik attavigisariaqarpavut. Jehovap ikinngutini ‘imminut qimarnguffissarsiortuarmata’ asavai. (Nah 1:7) Silarsuarmi ajortumi inuunerput pissutigalugu qatanngutigiilluta nukittunissatsinnut ikioqatigiissinnaajumalluta imminut qanimut attaveqatigiittariaqarpugut. Qatanngutitta ‘asaqatigiinnissamut ajunngitsuliornissamullu’ kajumissaassavaatigut. (Hebr 10:24, 25) Ilagiinniittunik peqateqarneq ajorutta Paulusip siunnersuutaa maleruarsinnaassanngilarput. Taamaattumik ataatsimiigiartuartarit ataatsimiinnernilu akisarlutit.

14. Sooq allamik isumataariaannaasariaqarlutalu inooriaatsitsinnik allanngueriaannaasariaqarpugut?

14 Kristumiunngorniaqqaaleratta allamik isumataarpugut aamma ajortumik inooriaaseqarunnaarpugut. Allamilli isumataariaannaasariaqarlutalu inooriaatsitsinnik allanngueriaannaasariaqarpugut. Naammalluinnanngitsuunerput sanngiissuteqartarnerpullu pissutigalugit ajortulioqqajaasarpugut. Ajorti pulateriaarsummut kiiseriaannaasumut assersuunneqarsinnaavoq. (Rom 3:9, 10; 6:12-14) Taamaattumik sanngiissuteqanngitsuusaarsinnaanngilagut. Sanngiissutitsinnik akiuiniarnitsinni Jehovap kamagittarfigisarpaatigut. (Fil 2:12; 2 Petr 3:9) Piffissat nukitillu namminissarsiortumik atornagit Jehovamut kiffartorninnut atukkit. Qatanngut arnaq ima allappoq: “Sallusuissummi peroriartorpunga, taamaakkaluartorli Jehovamut tunngatillugu kukkusumik isiginnittaaseqarpunga. Isumaqarpunga Jehova siooragineqartariaqartoq, misigivungalu taassumannga iluarisaanaviarnanga.” Jehova qanimut attaveqarfiginnginnamiuk ajortuliortalerpoq. Ima nangippoq: “Tamatumunnga Jehovamik asanninnginnera pissutaanani taassuma kinaassusivianik ilisarisimanninnginnera pissutaavoq. Qamannga pisumik qinoqattaareerlunga allannguivunga. Paasivara Jehovap meeqqamisut siulersoraanga unamminiarnartitakkalu ataasiakkaarlugit qaangernissaannut ikiortaraanga qanorlu iliortariaqarnera asannilluni paasitittaraa.”

15. Jiisusip aamma Jehovap suut maluginiartarpaat?

15 Petrusi apustilillu allat Guutip inngilianit oqarfigineqarput nutaarsiassaq nuannersoq nalunaajaatigiuassagaat. (ApS 5:19-21) Sapaatit-akunneri tamaasa oqaluusseqataasarnerput misissugassat allattorsimaffianni immikkoortunut ilaavoq. Jiisusip aamma Jehovap uppernerput oqaluusseqataasarnerpullu maluginiartarpaat. (Saqq 2:19) Oqaluusseqataasarnerput inuunitsinni pingaaruteqarluinnartut ilagaat.

16. Sooq tunniulluinnarsimanerput eqqarsaatigikulasassavarput?

16 Tunniulluinnarsimanerit eqqarsaatigikulasaruk. Jehovamut attaveqartarnerput sunit tamanit pingaarnerpaavoq. Jehovap pigisani tamaasa nalunngilai. (Atuaruk Esaja  44:5). Jehovamut attaveqarnerit misissoruk attaveqarluartuarnissarsilu qinnutigisaruk. Aamma kuisinnerit eqqarsaatigisassavat ullorlu kuisiffiit puiunngisaannarlugu. Kuisikkavit Jehovamut tunniulluinnarnerit kikkunnut tamanut ersersippat. Tamanna aalajangersimasannit tamanit pingaaruteqarnerpaavoq.

JEHOVAMUT QANITTUARUMALLUTA PINERTUSAARTARIAQARPUGUT

17. Sooq Jehovamut qanittuarumalluta pinertusaartariaqarpugut?

17 Paulusip Galatiamiut pinertusaaqquai. (Gal 6:9) Misilinneqarnerit nalaattartussaagatsigit aamma uagut pinertusaartariaqarpugut. Jehovap ikiorumaarpaatigut. Guutip anersaava illernartoq qinnutigiuaruk taassumalu nuannaartuaqqullutit qamuunalu eqqisseqqullutit ikiorumaarpaatit. (Matt 7:7-11) Una eqqarsaatigiuk: Jehovap timmissat isumassortarmagit, taava illit taassuminnga asanninnerit taassumunngalu tunniulluinnarsimanerit pissutigalugit isumassornerungaassavaatit, ilaa? (Matt 10:29-31) Qaangeruminaassinnaasunik ajornartorsiuteqaraluarlutilluunniit pinertusaartarit. Qimassimasatit pissutigalugit sallusuissut qimanngisaannaruk. Jehovamit ilisarisimaneqaratta pilluaqqussutisiassarpassuaqarpugut.

18. Guutimik ilisarisimannittut susariaqarpat?

18 Kuiserlaajugaluaruit ukiorpassuarniluunniit kuisimasuusimagaluaruit maanna susariaqarpit? Jehova ilisarisimanerulerniartuassavat anersaakkullu ineriartortuarlutit. Eqqarsanngisaannarit Guutimik ilisarisimanninnerusariaqarnak taassumunngalu attaveqarninnik pitsanngorsaasariaqarnak. Jehovamut, Ataatatsinnut asannittumut, ikinngutitsinnut Guutitsinnullu qanittuarumallutit allaaserisami matumani sammisatsinnik ilaanneeriarlutit uteqqiisarit. — Atuakkit 2 Korinthimiut 13:5, 6.