Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Marsi 2013

Jehovamik asannittunut ‘naakkiuffissaqanngilaq’

Jehovamik asannittunut ‘naakkiuffissaqanngilaq’

“Pilluangaassapput inatsisinnik nuannarinnittut, naakkiuffissaqanngilarlu taakkununnga.” — TUSS 119:165.

1. Arpattartup unammeqataasarnerminut tunngatillugu tunniutiinnarusunnginnini qanoq ersersippaa?

MARY DECKER inuusuttuaranngorlaalluni arpannermik unammisitsinernut ilaasalersimavoq. 1984-imi arpallaqqingaarmat inuppassuit isumaqarsimapput OL-imi kuultinnakkumaartoq. Alianartumilli pisoqarpoq. 3000 meterisut takissusilimmik arpalluni unamminermi arpattup allap niua naaffigaa orlullunilu. Unamminermi tassani apuuffissaminut apuutinngilaq, tamannali unammeqataasarnerminut tunngatillugu tunniutiinnassutiginngilaa. Ukioq ataaseq qaangiutinngitsoq 1,6 kilometerisut takitigisumik arpalluni unammisitsineq arnanit allanit sukkanerpaalluni naammassivaa.

2. Kristumiut arpannermut qanoq ittumut ilaappat, qanorlu arpattariaqarpugut?

2 Kristumiutut inuunerput naassaanngitsumik inuunissamut arpannermut assersuunneqarsinnaavoq. Arpannermi tamatumani sunaluunniit unissutiginaveersaartariaqarparput. Sukkaniulluni naatsumik arpannerunngilaq. Aamma eqqissilluni ilaatigullu unillattaartarluni arparujoornerunngilaq. Maratonimili arpaqataavugut. Maratonimi arpaqataasoq apuuffissaminut apuussinnaajumalluni qasusuittariaqarpoq. Apustilip Paulusip kristumiut Korinthimiittut ima allaffigai: “Nalugassiuk arpaliuttarfimmi unammisut tamarmik arpattaraluartut, ataasiinnaalli ajugaasup pisassaa pissarsiarisaraa? Arpagitsi pissarsiariniarlugu!” — 1 Kor 9:24.

3. Kina naassaanngitsumik inuunissamut arpannermi ajugaasinnaava?

3 Arpannermi tamatumani arpaqataanissamut Biibilimi kajumissaarneqarpugut. (Atuakkit 1 Korinthimiut 9:25-27). Arpannermi inuuneq naassaanngitsoq akissarsiassaavoq. Arpannermi nalinginnaasumi  ataasiinnarmik ajugaasoqartaraluartoq arpannermi tamatumani peqataasut tamarmik naggatissamut qasusuikkunik akissarsiassaq pissarsiarisinnaavaat. (Matt 24:13) Arpaqataasoq aatsaat malittarisassat unioqqutikkunigit arpaliunnerluunniit suli naammassinngitsoq unikkuni ajorsassaaq. Arpaliunnermi tamatumaniinnaq inuuneq naassaanngitsoq akissarsiassaavoq.

4. Sooq naassaanngitsumik inuunissamut arpaqataaneq imaannaanngila?

4 Naassaanngitsumik inuunissamut arpaqataaneq imaannaanngitsuuvoq. Jiisusi Kristusi arpannermi ataasiarluniluunniit naakkiutinngilaq, uagulli taamaaliorsinnaanngilagut. Ajoqersugaq Jaaku allappoq ‘tamatta qassiinik naakkiuttartugut’. (Jaak 3:2, 1936) Naammalluinnanngitsuunerput allalluunniit naammalluinnanngissutaat arpannermi arriillissutigisinnaavavut unikkallassutigisinnaallugilluunniit. Taama pisoqarpat arpaliuteqataaleqqinnissatsinnut ikiorneqarnissarput pisariaqartissinnaavarput. Tamatta ilaannikkut naakkiuttarnerput tupaallaatigisariaqanngilarput. — 1 Kng 8:46.

Orluguit allanut ikiortigit nikueqqillutillu!

NAAKKIUNNERIT ARPAKKUNNAASSUTIGEQINAGU

5, 6. (a) Sooq kristumiunut ‘naakkiuffissaqanngila’, kristumiullu naakkiutereernermi kingorna ‘nikueqqinnissaminnut’ suna iluaqutigisinnaavaat? (b) Sooq inuit ilaat naakkiutereernermi kingorna ‘nikueqqinneq’ ajorpat?

5 Naakkiunnitta orlunittaluunniit kingorna periartarnerput inuttut qanoq ittuunitsinnut ersiutaavoq. Naakkiussimasut orlusimasulluunniit ilaat peqqissimisarput Guutimullu kiffaaginnartarlutik. Allat peqqissiminiaratik aalajangertarput. Ussatit 24:16-imi ima allassimasoqarpoq: “Iluartoq arfineq-marloriarluni orlusinnaasaraluarpoq nikueqqittarlunili, iluanngitsulli naakkiullutillu orlusussaapput ajunaassallutillu.”

6 Naakkiussimagaluarutta orlusimagaluaruttaluunniit nikueqqissinnaavugut. Ajornartorsiuteqarnitsinni kukkusimanitsinniluunniit Jehova tatigiuarutsigu taassumannga ikiorneqartuarsinnaavugut. Asagitsinni nalunnginnamiuk ‘nikuiseqqissavaatigut’. Inuilli ajortut ‘nikueqqikkusunneq’ ajorput. Guutip anersaavanit illernartumit taassumalu innuttaanit ikiorneqarusunneq ajorput.  Biibilimi allassimavoq Jehovap inatsisaanik asannittunut ‘naakkiuffissaqanngitsoq’. Taamaattumillu naassaanngitsumik inuunissamut arpannermut ilaaqqilersinnaavugut. — Atuaruk Tussiaat 119:165.

7, 8. ‘Orlusimasoq’ qanoq Guutimit iluarisaajuarsinnaava?

7 Inuk sanngiissutini pissutigalugu kukkusinnaasarpoq. Kukkussutigisimasani kukkussutigeqattaarsinnaasarpaa. Tamatigulli nikueqqittarpat, tassa ilumoorluni peqqissimippat sapinngisanilu tamaat eqqortuliorniartuarpat, Jehovap naapertuilluartuutissavaa. Israelikkut kukkussutigisimasatik peqqissimissutigigaangamikkit Guutip naapertuilluartuutittuaannarpai. (Es 41:9, 10) Ussatit 24:16-imi kukkussutivut pingaartinneqaratik Jehovamit ‘nikuiseqqinneqarsinnaanerput’ pingaartinneqarpoq. (Atuaruk Esaja 55:7). Jehovap Jiisusillu qularutiginngilluinnarpaat sapinngisatsinnik iliuuseqartugut ‘nikueqqinnissatsinnullu’ kajumissaarpaatigut. — Tuss 86:5; Joh 5:19.

8 Arpattartoq maratonimi arpaqataasoq naakkiunnermi orlunermiluunniit kingorna nikueqqipallakkuni arpaqataaqqilernissaminut angumersisinnaavoq. Naassaanngitsumik inuunissamut arpannerup naammassineqarnissaanut ‘ulloq aamma nalunaaquttap-akunnera’ naluarput. (Matt 24:36) Sapinngisarpulli tamaat naakkiunnaveersaartarutta arpattuarnissarput apuuffissamullu apuunnissarput ajornannginnerulissaaq. Qanoq naakkiunnaveersaarsinnaagatta?

NAAKKIUSSUTIGISINNAASAVUT

9. Suut tallimat sammissavavut?

9 Naakkiussutigisinnaasavut tallimat uku sammissavavut: Sanngiissutivut, uinngup pilerigisai, ilagiinni naapertuilluanngitsuliorneq, naalliutsitsinerit qinuginninnerillu aamma allat naammalluinnanngissutaat. Naakkiussimaguit eqqaamassavat Jehova kamagittartuummat taassumalu ilumoorfiginninngitsutut ingerlaannaq eqqartuunnavianngimmatit.

10, 11. Daavip suna sanngiissutigaa?

10 Sanngiissutivut ujaqqanut aqqusinermiittunut assersuunneqarsinnaapput. Kunngip Daavip apustilillu Petrusip inuunerat sanngiissutinik marlunnik ilinniarfigisinnaavavut. Daavi ilaanni imminut naalakkersinnaaneq ajorpoq, Petrusillu inuit allat nammineq pilluni qanoq eqqarsarnerat annilaangatigisarpaa.

11 Kunngi Daavi ilaanni imminut naalakkersinnaaneq ajorpoq. Sanngiissutini tamanna pissutigalugu Batsebamik ajortulioqateqarpoq. Kingusinnerusukkut Nabali, imminik ajuallatsitsisimasoq, saassutingajappaa. Daavi ilaannikkut eqqarsaqqaarani iliuuseqartaraluarluni Jehovamit iluarisaaniartuarpoq. Allanit ikiorneqarnermigut kukkussuteqareernermi kingorna ‘nikueqqissinnaasimavoq’. — 1 Sam 25:5-13, 32, 33; 2 Sam 12:1-13.

12. Petrusi kukkusaraluarluni qanoq arpattuarsinnaasimava?

12 Petrusi inuit allat nammineq pilluni qanoq eqqarsarnerat annilaangatigisarpaa. Jiisusimut Jehovamullu aalajaattuarpoq, ilaannikkulli annilaangasarnini kukkussutigisarpaa. Assersuutigalugu pingasoriarluni misiarluni Jiisusi ilisarisimannginnerarpaa. (Luk 22:54-62) Ilaanni kristumiut ilaat kristumiunit allanit pingaaruteqarnerusutut pivai. Petrusi eqqunngitsumik isiginnittaaseqarpoq, ilagiinnilu allat tassunga maleruutiinnarsimasinnaagaluarput. Taamaattumik Paulusip Petrusi sukannersumik oqaaqqissaarpaa. (Gal 2:11-14) Petrusip oqaaqqissaarneqarnini ajuallaatigaa inuunissamullu arpakkunnaassutigalugu? Naamik. Paulusip oqaasiinik eqqarsaatiginneqqissaarpoq, isiginnittaatsiminillu allannguilluni arpattuarpoq.

13. Peqqiilliorneq qanoq naakkiussutigisinnaavarput?

13 Peqqiilliorneq erloqissutaasinnaavoq. Tamatumalu kingunerisaanik inuit ilaat inuunissamut arpaqataajunnaarsimapput.  Assersuutigalugu qatanngut arnaq kuisereernermi kingorna ukiut 17-it qaangiummata napparsimalluni perululerpoq. Peqqiilliornini anersaakkut sanngiillissutigaa unittuussutigalugulu. Utoqqaanertat marluk pulaarpaat tuppallersarlugulu. Ataatsimiigiaqqittalerami qatanngutinit ilassilluarneqarnini nuannaarutigalugu qissaserpoq. Qatannguterput arnaq massakkut inuunissamut arpaqataavoq.

14, 15. Eqqunngitsunik kissaateqarutta susariaqarpugut? Assersuuteqarit.

14 Inuppassuit uinngup pilerigisai naakkiussutiginikuuaat. Pilerigisavut usserneqaatigisaratsigit sapinngisarput tamaat eqqarsaativut iliuutsivullu Guutip najoqqutassiaanut minguitsunut naapertuutsittuarniartariaqarpavut. Jiisusi oqarpoq assapput isigappulluunniit naakkiussutigigutsigu ‘igittariaqaripput’. Arpaqataajunnaassutigisinnaasatsinnik kanngunartunik eqqarsaateqarnaveersaartariaqarlutalu iliuuseqarnaveersaartariaqarpugut. — Atuaruk Matthæusi 18:8.

15 Qatanngut angut oqaluttuarpoq anguteqatiminik atoqateqarnissani kissaatigisarsimallugu. Sallusuissummi peroriartorsimagaluarluni inunnit allanit allaanerusutut misigisarsimavoq. 20-nik ukioqarluni pionerinngorpoq ilagiinnilu kiffartortunngorluni. Ingasattumilli ajortuliorami perorsaatissinneqarpoq utoqqaanertanillu ikiorneqarluni. Qinusarnermigut, Biibilimik atuaqqissaartarnermigut allanillu ikiuinissaminik sulissutiginninnermigut nikueqqippoq anersaakkullu siuariartulerluni. Ukiorpassuit qaangiutereersut ima oqarpoq: “Ilaannikkut suli taamatut misigisarpunga, misigissutsinnilli aqunneqarnaveersaartarpunga. Paasinikuuara Jehovap artukkatsinnik misilinneqartinnavianngikkaatigut. Taamaattumik upperaara Guutip aqqusaakkakka naammagalugit atorsinnaagikka qularutiginngikkaa.” Qatanngut taanna qanorluunniit pisoqassagaluarpat arpattuarusuppoq. Nalunngilaa silarsuassami nutaami inuulerumalluni maanna pinertusaarnini imminut akilersinnaasoq. Ima oqarpoq: “Tamanna nalliutserlugu akiuuttuassaanga.”

16, 17. (a) Qatanngutip naapertuilluanngitsumik pineqarsorisimasup suna iluaqutigaa? (b) Naakkiukkusunngikkutta ilagiinnut tunngatillugu suna eqqaamasariaqarparput?

16 Uppeqatitta naapertuilluanngitsuliornerat naakkiussutigisinnaavarput. Frankrigimi qatanngut angut utoqqaanertaasimasoq naapertuilluanngitsumik pineqarsorisimavoq. Narrutsakkami ataatsimiinnerit najuuffigisarunnaarlugillu oqaluusseqataasarunnaarpoq. Utoqqaanertat marluk pulaarpaat qanorlu pisoqarsimasorinninneranik oqaluttuarmat tusarnaaqqissaarlugu. Jehovamik tatiginninnissaanut kajumissaarpaat eqqaasillugulu Guutip iluarisaanik iliornissaq sunit tamanit pingaaruteqarnerpaaneranik. Siunnersuutit maleruarpai sivitsunngitsorlu arpaqataaqqilerluni.

17 Inuit naammalluinnanngitsut isiginiannginnissaat ilagiinni niaquusutut toqqarneqarsimasoq, Jiisusi Kristusi, isiginiarnissaa kristumiut tamarmik eqqaamasariaqarpaat. Jiisusip isai “ikualanertut ipput”. Ilagiinni pisut tamaasa uagutsinnit paasilluarsinnaanerungaarpai. (Saqq 1:13-16) Assersuutigalugu naapertuilluanngitsoqarsorinninnerput paatsuuisimanitsinnik pissuteqaannarsinnaavoq. Jiisusip ilagiinni ajornartorsiutit eqqortumik piffissarlu eqqorlugu aaqqikkumaarpai. Uppeqatitta iliuuserisimasaat arpannitsinni naakkiussutiginngisaannartariaqarpavut.

18. Naalliutsinneqarnitsinni qinugineqarnitsinnilu qanoq aalajaattuarsinnaavugut?

18 Naakkiussutigisinnaasavut allat marluk tassaapput naalliutsitsinerit qinuginninnerillu aamma ilagiinniittut naammalluinnanngissutaat. Jiisusip angut naatsiiassanik siaruarterisoq pillugu assersuusiamini ersersippaa inuit ilaat Guutip innuttaanut ilaanertik pissutigalugu “naalliutsitsinerit qinuginninnerillu” misigisartakkatik naakkiussutigiumaaraat.  Ilaquttatta, sanilitta oqartussaasulluunniit naalliutsissinnaavaatigut sallusuissulluunniit pissutigalugu qinugisinnaalluta. Inuup ingammik ‘immini sorlaqannginnini’, tassa uppernikinnini, naakkiussutigeriaannaasarpaa. (Matt 13:21) Jehovamulli qanittuarnissarput aalajangiusimagutsigu Guutip naalagaaffianik tusarliussaq sorlaqarluarnissatsinnut iluaqutigissavarput. Taamaattumik erloqinartunik atugaqaraangavit ‘nersornartut’ eqqarsaatigeqqissaartakkit. (Atuakkit Filippimiut 4:6-9). Arpaqataanitsinni naakkiutinnginniassagatta Jehovap annikilliornitsinni aalajaattuarnissatsinnut nakussatsissavaatigut.

Apuuffissamut apuunniarninni sunaluunniit akornutigeqinagu!

19. Allanit ajuallatsinneqaraangatta qanoq naakkiunnaveersaarsinnaavugut?

19 Ajoraluartumik Jehovap Nalunaajaasuisa ilaasa inuit allat naammalluinnanngissutaat kiffartorunnaassutigisimavaat. Inuup nalunngeqatigiinnissutini naapertorlugu iliuusererusunngisamisut allat iliuuseqarnerat naakkiussutigisinnaavaa. (1 Kor 8:12, 13) Ajuallatsinneqarnerput pissutigalugu sallusuissut qimassavarput? Biibilimi kristumiut eqqartuussisarunnaarnissaannik, allanik isumakkeerfiginnittarnissaannik inuttullu pisinnaatitaaffinnik aalajangiusimannittuarnermik ingalassimanninnissaannik oqaaqqissaarneqarput. (Luk 6:37) Ajuallatsinneqaruit imminut ima aperissaatit: ‘Iluarisakka taamaallaat naapertorlugit allanik eqqartuussivunga? Qatanngutikka naammalluinnanngitsuunerat pissutigiinnarlugu sallusuissut qimassavara?’ Jehovamik asanninnerput allat iliuusaat pissutigalugit inuunissamut arpakkunnaannginnissatsinnut iluaqutigisinnaavarput.

ARPANNINNI QASUSUIGIT NAAKKIUNNAVEERSAARLUTILLU

20, 21. Naassaanngitsumik inuunissamut arpanninni suniarlutit aalajangiusimaviuk?

20 ‘Arpaffissaq naarusuppiuk’? (2 Tim 4:7, 8) Taava suut naakkiussutigisinnaanerlugit paasiniarlugu Biibilimik atuaqqissaartarlutillu atuagassiaativut atuagaativullu atuaqqissaartakkit, misissueqqissaartarit eqqarsaatiginneqqissaartarlutillu. Nukittusinnaaqqullutit Jehova anersaamik illernartumik tuneqqullutit kimigiiserfigisaruk. Eqqaamassavat naakkiukkutta orluguttaluunniit arpaqataaqqilersinnaagatta apuuffissatsinnullu apuussinnaalluta. Allaat kukkussutivut arpallaqqinnerulernissatsinnut ilinniutigisinnaavavut.

21 Biibilimi ersersinneqarpoq ajugaasup pisassaa, inuuneq naassaanngitsoq, pissarsiarerusukkutsigu apuuffissamut apuunnissatta tungaanut arpattuartariaqartugut. Arpannitsinni Jehovap ‘eqqissingaarnermik’ tunissavaatigut. (Tuss 119:165, NW) Maannangaaq ikiortuarusuppaatigut arpannerlu naammassigutsigu naassaanngitsumik pilluaqqussutisiassatsinnik tunilluta. — Jaak 1:12.