Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Marsi 2013

Jehova ineqarfigaarput

Jehova ineqarfigaarput

‘Naalagaq, ineqarfigaatsigit kinguaariikkuutaani.’ — TUSS 90:1.

1, 2. Guutip kiffaasa silarsuaq manna qanoq isumaqarfigaat, qanorlu ittumik angerlarsimaffeqarpat?

 SILARSUARMI matumani ajortumi, angerlarsimaffinni misigisarnittut, toqqissisimasutut nalerisimaartutullu misigisarpit? Taamaanngippat Jehovamut kiffartortutut allatut misigivutit. Itsarli Jehovamik ilumoorlutik asannittut tamarmik silarsuarmi matumani ajortumi takornartatut misigisarsimapput. Assersuutigalugu aalajaallutik Guutimik pallorfiginnittut Kana’animi sumiiffimmiit sumiiffimmut nooqattaartut taamatut aamma misigipput. Biibilimi allassimavoq taakku kikkunnut tamanut ‘nunami takornartaanertik allamiuunertillu’ nalunaarutigigaat. — Hebr 11:13.

2 Kristusip ajoqersugai tanitat qilanni innuttaassuseqarput. Taakku aamma silarsuarmi matumani allamiuusutut najugaqarallartutullu misigipput. (Fil 3:20; 1 Petr 2:11) Kristusip ‘savaatai allat’ aamma “silarsuarmut ilaanngillat”, soorlu Jiisusi silarsuarmut ilaanngitsoq. (Joh 10:16; 17:16, NW) Taamaakkaluartorli Guutip innuttai ineqarfeqarput, imaluunniit angerlarsimaffeqarput. Ineqarfipput isaannarmik takuneqarsinnaanngikkaluartoq toqqissisimanarnerpaallunilu angerlarsimaffiuvoq asanninnermik ulikkaartoq. Angerlarsimaffik taanna qanoq ittuugami? Mosesi ima allappoq: ‘Naalagaq, ineqarfigaatsigit kinguaariikkuutaani.’ (Tuss 90:1) Jehova kiffaminut ilumoorfiginnittunut ‘ineqarfiuvoq’. Itsaq Jehova kiffaminut qanoq angerlarsimaffiusimava? Ullumikkut innuttaminut qanoq angerlarsimaffiua? Siunissamilu kiffaminut qanoq kisimi toqqissisimanartumik angerlarsimaffiusinnaagami?

ITSAQ JEHOVA KIFFAMINUT ‘INEQARFIUVOQ’

3. Tussiaat 90:1-imi Jehova sumut assersuunneqarpa, aamma sooq?

3 Jehovap kinaassusia paasilluarnerusinnaaniassagatsigu ilaannikkut Biibilimi Jehova inuunitsinni ilisimasatsinnut assersuunneqartarpoq. Assersuutigalugu Tussiaat 90:1-imi Jehova ‘ineqarfimmut’, imaluunniit  angerlarsimaffimmut, assersuunneqarpoq. Angerlarsimaffik eqqarsaatigigaangatsigu sumiiffik asanninnermik, eqqissinermik toqqissisimanermillu ulikkaartoq eqqarsaatigisarparput. Sooq Jehova angerlarsimaffimmut assersuunneqarpa? Biibilimi allassimavoq Jehova tassaasoq asanninneq. (1 Joh 4:8) Aamma allassimavoq eqqissinermut Guutiusoq kiffaminillu sernissuisartoq. (Tuss 4:9) Jehova kiffaminut aalajaatsunut Aaperaamut, Iisaamut Jaakumullu qanoq angerlarsimaffiusimanersoq maanna sammissavarput.

4, 5. Qanoq Guutip Aaperaat pilluaqqullugulu sernissorpaa?

4 Aaperaap eqqarsaatigisimassavaa sooq Jehovamit ima oqarfigineqarnerluni: “Nunagisat eqqarlitit ataatavillu illua qimallugit nunamut ilinnut takutitassannut aallarit.” Jehovalli nangilluni oqaasii uku tuppallersaatigingaarsimassavai: “Inuiassuanngortikkumaarpakkit pilluaqqullutillu. Aqqit tusaamasanngortikkumaarpara.” Aamma ima nangippoq: “Ilinnik pilluaqqusisut pilluaqqujumaarpakka ilinnillu perloqqusisoq perloqqujumaarlugu.” — 1 Mos 12:1-3.

5 Aaperaat Jehovamit neriorsorneqarpoq kinguaanilu pilluaqquneqarumaartut aamma sernissorneqarumaartut, Jehovalu neriorsuinermisorluinnaq iliorpoq. (1 Mos 26:1-6) Assersuutigalugu Aaperaap Egyptenimi Faraomit aamma Gerarimi kunngimit Abimelekimit toqunneqarnissaa nuliaatalu, Sarap, kanngunarsarneqarnissaa pinaveersaartippaa. Tamatumunnga assingusumik Iisaaq Rebekkalu sernissorpai. (1 Mos 12:14-20, 1900; 20:1-14; 26:6-11) Biibilimi ima allassimasoqarpoq: “[Jehovap] kimit qunutinneqaqqunngilai, taakkulu pillugit kunngit pillartarpai: Tanitakka attunngisaannarsigit! Pruffiitikka ajortumik peqinasigit!” — Tuss 105:14, 15.

‘Qimassanngilakkit’

6. Iisaap Jaaku qanoq oqarfigaa, Jaakulu qanoq eqqarsarsimassava?

6 Aaperaap ernutaa Jaaku aamma Jehovamit isumassorneqarluarpoq. Jaakup nuliartaarnissaanut piffissanngormat ataataata Iisaap ima oqarfigaa: “Kana’anikkut arnartaasa ilaannik nuliartaassanngilatit. Paddan-Aramimut aallarit anaanavit ataataata Betuelip inoqutaanut, tassanilu angappit Labanip paniisa ilaannik nuliartaarniarit.” (1 Mos 28:1, 2) Jaaku ataatami peqqusineratorluinnaq iliorpoq. Ilaquttani Kana’animiittut qimappai kisimiigunarlunilu kilometerit hundredellit atorlugit Karanimukarpoq. (1 Mos 28:10) Ima eqqarsarsimasinnaavoq: ‘Qanoq sivisutigisumik peqassanngilanga? Angaama takuguninga nuannaassava? Jehovamik asannittumik nuliartaassaanga?’ Be’ershebamilli 100 kilometerisut ungasissusilimmiittumi Luzimi Jaakup isumakulukkunnaassutigisaanik pisoqarpoq. Qanoq pisoqarami?

7. Qanoq Jaaku Guutimit tuppallersarneqarpa?

 7 Luzimi Jehovap Jaaku sinnattukkut saqqummerfigaa imalu oqarfigalugu: “Najussavakkit sernigalutillu sumulluunniit ingerlagaangavit, nunamullu matumunnga utertikkumaarpakkit; qimakkumanngilakkimmi, ilinnullu neriorsuutikka eqquutitissavakka.” (1 Mos 28:15) Oqaatsit taakku tuppallernartut Jaakup qiimmaallaatigisimassavai! Tamatuma kingorna Jehovap neriorsuutaasa eqquunnerisa takunissaat Jaakup qilanaarisimassavaa. Najukkat qimassimagukku, immaqa nunami allami kiffartorniarlutit, Jaakutut isumakuluuteqarsimassaatit. Jehovamilli isumassorneqarneq qularnanngitsumik amerlasuutigut misigisimassavat.

8, 9. Qanoq Jehova Jaakumut ‘ineqarfiua’, tamannalu qanoq ilinniarfigisinnaavarput?

8 Jaaku Karanimut apuummat angaata Labanip tikilluaqqungaarpaa kingusinnerusukkullu Lea aamma Rakeli tassunga nulissiutitippai. Piffissap ingerlanerani Labanip Jaaku naapertuilluanngitsumik pisalerpaa akissarsiassaalu quleriarluni allanngortillugit! (1 Mos 31:41, 42) Taamaattorli Jaakup Jehovamit isumassorneqarnissani qularutiginngilluinnaramiuk tamakku tamaasa naammagalugit atorpai. Tamatuma kingunerisaanik Jehovap Jaaku pilluaqquaa. Guutip Kana’animut uteqqummani Jaakup ‘savaaterpassuit, inussiallu arnat inussiallu angutit qatigattuullu siutituullu pigisarilersimavai’. (1 Mos 30:43) Jaaku Jehovamut qujamasungaarpoq imalu qinulluni: “Kiffaasunga ilinnit taama atsigisumik ajunngisaarfigineqassallunga unneqqariffigineqassallungalu suunngippallaaraluaqaanga; taamani Jordani ikaarpara ajaappiara kisiat pigalugu, maannali pigisaqalerpunga marluinngorlutik tammaartartunik.” — 1 Mos 32:11.

9 Assersuutinit taakkunannga Mosesip oqaasiisa uku ilumoorluinnarnerat erserpoq: ‘Naalagaq, ineqarfigigaatsigit kinguaariikkuutaani’! (Tuss 90:1) Jehova allanngorsimanngilaq. Kiffani ilumoortut suli asallugillu sernissorlugillu isumassorpai. (Jaak 1:17) Tamanna misissoriartigu.

ULLUMIKKUT JEHOVA ‘INEQARFIGAARPUT’

10. Sooq Jehova ‘ineqarfigiuarsinnaallutigu’ qularutiginngilluinnarsinnaavarput?

10 Takorlooruk ima misigisaqarlutit: Nunarsuaq tamakkerlugu pinerlunniaqatigiit eqqartuunneqarneranni ilisimannittuullutit. Pinerlunniaqatigiinnut siuttuusoq silassorissuuvoq, pissaaneqangaarpoq, peqqusersusaarluni salluliortarpoq toqutsisarlunilu. Ilisimannittooreerlutit eqqartuussivimmit aniguit qanoq misigissavit? Toqqissisimasutut misigissavit? Naamerluinnaq! Politiinit illersorneqarnissannik piumasaqarnissannut pissutissaqarluassaatit. Taamatuttaaq Jehovamut kiffaasutut Jehovap akeraa ajortoq, Saatani, pillugu unnerluussinermi ilisimannittuuvugut. (Atuaruk Saqqummersitat 12:17). Guutip innuttai Saatanimit nipangersinniarneqartarput. Saatani taamaaliornermini iluatsitsisisarsimava? Naamik, anersaakkummi siuariartortuarpugut. Tamatumunngalu pissutaasoq ataasiinnaavoq: Jehova qimarnguigigatsigu, tassa ‘ineqarfigigatsigu’, ingammik ulluni kingullerni makkunani. (Atuakkit Esaja 54:14, 17). Saatanimilli tammartinneqartikkutta Jehova toqqissilluta ‘ineqarfigisinnaanngilarput’.

Guutip kiffai taassuma inngiliinit tapersersorneqarlutillu sernissorneqarput

11. Aaperaat, Iisaaq Jaakulu pillugit oqaluttuat sumik allamik ilinniarfigisinnaavavut?

11 Aaperaat, Iisaaq Jaakulu pillugit oqaluttuat aamma allamik ilinniarfigisinnaavavut. Kana’animi inuugaluarlutik nunaqavissunit immikkoortuarput inuillu iliuuserisartagaat ajortut uumigalugit. (1 Mos 27:46) Suna eqqortuunersoq sunalu eqqunngitsuunersoq ilisimasinnaajumallugu inatsisit allattorsimaffiannik takisuumik pisariaqartitsinngillat. Jehovap suut iluarigai suullu uumigigai ilisimavaat. Taamaattumik sapinngisartik tamaat silarsuarmut ilaanaveersaarput. Uagutsinnut maligassaalluangaaramik! Jehovamik ilumoorfiginnillutik kiffartortut  sapinngisannik malinniartarpigit? Peqqissaarlutit ikinngutissarsiortarnikkut aliikkutassanillu toqqaasarnikkut silarsuarmut ilaanaveersaarnerit ersersittarpiuk? Ajoraluartumik ilagiinni kristumiut ilaat Saatanip silarsuaani, annerusumik minnerusumilluunniit, angerlarsimasutut misigisarput. Taamatut misigisaruit misigilaartaruilluunniit Jehova ikioqqullutit qinnuigiuk. Eqqaamajuk silarsuaq manna Saatanip pigimmagu taannalu namminissarsiortuullunilu uagutsinnik soqutiginninngilaq. — 2 Kor 4:4; Ef 2:1, 2.

12. (a) Jehovap kiffani qanoq ikiortarpai? (b) Jehovap ikiuisarnera qanoq isumaqarfigaajuk?

12 Saatanimit tammartinneqarusunngikkutta Jehovap kiffaminut ikiuutissiissutai tamaasa iluaqutiginiartariaqarpavut. Assersuutigalugu ajornartorsiutivut naammagalugit atorsinnaaniassagatsigit kristumiut ataatsimiittarneri, ilaqutariittut atuaqqissaaqatigiittarnerit utoqqaanertallu tuppallersaallutillu tapersersuisartut aqqutigalugit Jehovap ikiortarpaatigut. (Ef 4:8-12) Qatanngut George Gangas ukiorpassuarni Siulersuisoqatigiinni ilaasortaasimasoq ima allappoq: “[Guutip innuttai] peqatigigaangakkit ilaquttat angerlarsimaqatigalugillusooq misigisarpunga.” Illit aamma taamatut misigisarpit?

13. Hebræerit 11:13-imi suna pingaarutilik ilinniarfigisinnaavarput?

13 Aaperaat, Iisaaq Jaakulu pillugit oqaluttuat allamik aamma pingaarutilimmik ilinniarfigaavut. Inoqatitsinnit allaanerunissarput annilaangatigisariaqanngilarput. Soorlu  immikkoortoq 1-imi atuaripput angutit aalajaatsut taakku kikkunnut tamanut ‘nunami takornartaanertik allamiuunertillu’ nalunaarutigaat. (Hebr 11:13) Silarsuarmiunit allaanerullutit ersersittarpiuk? Taamaaliornissaq ilaannikkut sapernarsinnaasarpoq. Guutilli qatanngutippillu ikiuineratigut taamaaliorsinnaavutit. Eqqaamajuk kisimiinnginnavit. Jehovamik kiffartorfiginnikkusuttut tamarmik Saatani taassumalu silarsuaa akiortariaqarpaat! (Ef 6:12) Jehovamilli tatiginnikkutta taannalu ineqarfigigutsigu akiuunnermi tamatumani ajugaasinnaavugut.

14. Aaperaap “illoqarfik” suna utaqqivaa?

14 Aaperaat malittariaqarlugulu akissarsiassarput eqqaamajuartariaqarparput. (2 Kor 4:18) Apustili Paulusi allappoq Aaperaap utaqqigaa “illoqarfik aalajaatsunik toqqavilik sanasua pinngortitsisualu tassaasoq Guuti.” (Hebr 11:10) “Illoqarfik” eqqaasaa tassaavoq Guutip naalagaaffia. Aaperaap ‘illoqarfiup’ tikiunnissaa utaqqisariaqarpaa. Oqartoqarsinnaavoq uagut taanna utaqqisariaqanngikkipput. Guutip naalagaaffia maanna qilammi naalakkersuivoq. Biibilimilu siulittuutini paatsuugassaanngitsumik ersersinneqarpoq Guutip naalagaaffia  qanittukkut nunarsuarmi tamarmi naalakkersuilissasoq. Guutip naalagaaffia ilumut upperalugu iliuutsikkut ersersittarpiuk? Guutip naalagaaffia inuuninni salliutittarpiuk silarsuarmillu matumannga immikkoorlutit? — Atuakkit 2 Petrusi 3:11, 12, 1936. *

JEHOVA INEQARFIGIUASSAVARPUT

15. Silarsuarmik matuminnga tatiginnittut qanoq siunissaqarpat?

15 Naggatissami silarsuarmi ajornartorsiutit ajornerulissapput. (Matt 24:7, 8) Qularnanngilarlu inuuniarneq ajornarnerulissasoq annikilliornartussarsuaq aallartippat. Nunarsuaq tamakkerlugu aseruineqassallunilu paatsiveerunnersuaqassaaq, inuillu annilaangangaassapput. (Hab 3:16, 17) Biibilimi allassimavoq inuit saariarfissaarullutik “qaarusunni qaqqallu qunnerini” imminut annaanniarlutik toqqorfissarsiussasut. (Saqq 6:15-17) Inuilli qaarusunnut toqqorfissarsiornerat, aningaasatigut pissaanilinnut politikkerinulluunniit ikiortissarsiornerat, iluaqutaanavianngilaq.

16. Ilagiinnik aaqqissuussaaneq qanoq isigisariaqarparput, aamma sooq?

16 Annikilliornartussarsuarmi Jehovap sernissorumaarpaatigut. Pruffiititut Habakkukitut Guuti annatsitsisoq tipaatsuutigissavarput. (Hab 3:18) Pissutsini artornartuni taakkunani Jehovap qanoq sernissussavaatigut? Tamanna siunissami paasinarsiumaarpoq. Kisianni qularutiginngilluinnarsinnaavarput Israelikkut Egyptenimit aniguisinneqarnerminni ilitsersorneqarsimanerattut Jehovamut innuttaasut aaqqissuussaajumaarnerat taassumanngalu ilitsersorneqarumaarnerat. (Atuaruk 2 Mosesi 13:18; Saqq 7:9) Jehovap qanoq ililluni ilitsersussagamisigut? Jehovap ilagiit aqqutigalugit qanoq iliornissatsinnik ilitsersussagunarpaatigut. Esaja 26:20-mi ‘ininnguit’ Guutip innuttaanut illersuutaasussat eqqaaneqarput. Taakku tassaasinnaapput ilagiit nunarsuarmiittut tamarmik. (Atuaruk Esaja 26:20). Ilagiit ataatsimiittarneri pingaartippigit? Jehovap ilagiit aqqutigalugit maleruaqqusai maleruartuaannarpigit? — Hebr 13:17.

17. Jehovap kiffaminut ilumoorfiginnittunut toqusimasunut ‘ineqarfiunera’ qanoq paasisariaqarpa?

17 Aalajaatsut annikilliornartussarsuup aallartinnginnerani toqugaluarpataluunniit Jehova taakkununnga suli ‘ineqarfiussaaq’. Qanoq? Toqusunit makitikkumaaramigit. Aaperaap, Iisaap Jaakullu toqoreernerisa kingunerujussuatigut Jehovap Mosesi oqarfigaa taakkununnga suli Guutiulluni. (2 Mos 3:6) Jiisusi allakkat taakku issuareerlugit ima oqarpoq: “Guutimi toqusut Guutiginngilaat, inuusulli Guutigaat, taassumunnga tamarmik inuummata.” (Luk 20:38) Jehovap ilumoorfiginnillutik imminik kiffartorfiginnittut makitinneqarnissaat qularutiginngilluinnaramiuk toqusimasut makitinneqareersutut isigai. — Oqal 7:1.

18. Silarsuassami nutaami Jehova innuttaminut qanoq ‘ineqarfiussava’?

18 Silarsuassami nutaami Jehova innuttaminut immikkorluinnaq ittumik ‘ineqarfiulissaaq’. Saqqummersitat 21:3-mi ima allassimasoqarpoq: “Guuti ineqarfeqalerpoq inunni, taakkunani ineqarumaarpoq.” Ukiuni 1000-ini siullerni Jehovap Jiisusi nunarsuarmut naalakkersuisissavaa. Ukiut 1000-it naangajalerneranni Jiisusip Ataatami nunarsuarmut siunertaa piviusunngortissimassavaa Naalagaaffillu Jehovamut uterteqqissallugu. (1 Kor 15:28) Tamatumalu kingorna inuit naammalluinnartut Jehovap nammineq naalakkersulissavai. Siunissarput nuannerunangaarami! Itsaq aalajaallutik kiffartortut malinnerisigut Jehova maanna ‘ineqarfigisigu’.

^ par. 14 2 Petrusi 3:11, 121936: ‘Tamakku tamarmik taama nungukkumaarmata, soorunami iluartumik ileqqoqarlusi mianerinnittariaqarpusi. Guutip ullussaata nalliuffissaa ilimagalugu qilanaaralugulu, qilaat taava ikumallutik aakkumaarmata pinngoqqaartullu ikuallallutik uukkumaarmata.’