Ukiumi 59-imi Kr.in.king. sakkutuut naalagaat Juliusi sakkutuuilu qasoqisut tigusarpassuit ilagalugit Romamut apuupput. Isaaffikkut Porta Capenakkut illoqarfimmut isaapput. Kaasarip Nerop illussaarsua sakkutuunit kaasarip paarsisuinit nakkutigineqartoq Palatinip qattuneraniittoq takusinnaavaat. * Tigusat Forum Romanum saneqquppaat, Viminalillu qattuneranukartillutik naatsiivik Romamiut guutiinut altarilik sakkutuullu silami sungiusartarferujussuat aamma saneqquppaat.

Qattunersalersorlugu assiliaq sakkutuunik kaasarip paarsisuinik takutitsisoq Claudiusip Qilaanngusaasaaneersorineqartoq, ukiumi 51-imi sanaaq

Tigusat ilagaat apustili Paulusi. Qaammatialuit tamatuma siorna malissuarsiortillugit inngilip Paulusi ima oqarfigisimavaa: “Kaasarimut sassarumaarputit.” (ApS 27:24) Immaqa Paulusip eqqarsaatigaa oqaatsit taakku ungasinngitsukkut eqquutissanersut. Romamiut illoqarfissuat isigitillugu Paulusip eqqarsaatigigunarpaa ukiualuit tamatuma siorna pallittaalisami Antoniami Jerusalemimiikkami Jiisusimit qanoq oqarfigineqarsimalluni. Taassumami ima oqarfigisimavaa: “Nikalloqinak! Soorlu Jerusalemimi uanga pillunga nalunaajaasimasutit, Romamissaaq taamaaliussaatit.” — ApS 23:10, 11.

Immaqa Paulusip Castra Praetoria, sakkutuut kaasarip paarsisuisa pallittaalisarsuat aappalaartunik qarmarujussualik napasuliarujussualillu, isigaa. Sakkutuut kaasarip paarsisui tusindit arlallit, illoqarfiup politiivi qimussersullu pallittaalisarsuarmiipput. Pallittaalisarsuarmit  erserpoq kaasari qanoq pissaaneqartigisoq. Sakkutuut kaasarip paarsisuisa aamma tigusat Romamiut naalagaaffissuanni nunamit allaneersut akisussaaffigimmatigit sakkutuut naalagaasa Juliusip tigusat taakku Romamukaappai. Qaammatit arlallit tigusat angalareerlutik kiisami Romamut apuupput. — ApS 27:1-3, 43, 44.

PAULUSI ‘AKORNUSERSORNEQARANI’ OQALUUSSIUARPOQ

Romamut angalanerat pissanganartorujussuusimavoq. Umiarsuartillutik anorersuarujussuarmat Paulusi siulittuivoq umiiarumaarlutik ajunaartoqarnavianngitsorli. Paulusi pulateriaarsummit toqunartulimmit kiineqarpoq, ajoqutissarsinngilarli. Qeqertami Maltami napparsimasunik ajorunnaarsitsimmat Maltamiut ilaasa guutiuneralerpaat. Immaqa sakkutuut kaasarip paarsisuisa pisimasut taakku tusarpaat oqaloqatigiissutigalugillu.

Niueriartortarfimmi ‘Forum Appiimi’ uninngaartarfimmilu ‘Tres Tabernæmi’ Paulusip qatanngutinik Romameersunik naapitsivoq. (ApS 28:15) Paulusi Romami nalunaajaarusuppoq. Tigusaaqqagaluarluni qanoq oqaluussisinnaagami? (Rom 1:14, 15) Immaqa tigusat sakkutuut naalagaanertaannut sassartinneqaqqaartarput. Taamaappat Paulusi sakkutuut kaasarip paarsisuisa naalagaanertaannut Afranius Burrusimut, immaqa Romami pissaaneqarnerpaasa tullianut, sassartinneqarunarpoq. * Kingornali Paulusi sakkutuut kaasarip paarsisuisa ilaannit ataatsimit taamaallaat nakkutigineqarpoq. Paulusip nammineq najugassarsiornissaa pulaartoqarnissaalu akuerineqarpoq taamaalillunilu ‘akornusersorneqarani’ oqaluussiuarsinnaalluni. — ApS 28:16, 30, 31.

PAULUSIP NUIMASUT NALUNAAJAAFFIGAI

Ullumikkut Castra Praetoriap qarmarsui

Imaassinnaavoq Burrusip Paulusi Neromut sassartitaannginnerani kaasarip illussaarsuani imaluunniit sakkutuut pallittaalisaanni apersoraa. Paulusip atorfikkaat oqaluussiffiginissaannut periarfissani atorluarsimassavaa. (ApS 26:19-23) Naluarput Burrusip Paulusi pisuusorineraa pisuunngitsuusorineraaluunniit, nalunngilarpulli sakkutuut pallittaalisaannut parnaarussaatinngikkaa. *

Paulusip “juutini pingaarnertaasut” allarpassuillu illuminut qaaqquai nalunaajaaffigiumallugit. Aamma sakkutuut  kaasarip paarsisuisa tusartarpaat Paulusi “ullaaralaannguamiit unnuk tikillugu” Jiisusi Guutillu naalagaaffia pillugit juutinut peqqissaartumik nalunaajaasoq. — ApS 28:17, 23.

Sakkutuut Paulusip allakkat oqaasertalersugai tusarpaat

Sakkutuunik paarsisunik illussaarsuarmik nakkutiginnittunik sakkutooqatigeeqarpoq ullut tamaasa taarseraattuartunik. Aamma Paulusi sakkutuunit assigiinngitsunit nakkutigineqartarpoq. Tamatuma kingunerisaanik sakkutoorpassuit nalunaajaaffigineqarput. Ukiuni marlunni parnaarussaaqqanerani Paulusip kristumiunut Efesosimiunut, Filippimiunut, Kolossemiunut Hebræerinullu allakkat oqaasertalersorai tusarsimavaat angummullu kristumiumut Fiilimuumut allattoq takullugu. Paulusip ‘qitornartaarisani’ Onesimosi inussiaq qimaasimasoq isumassorpaa, taannalu kingorna naalakkaminut uterpoq. (Fiil 10) Ilimanarpoq Paulusip sakkutuut najugarisaminiittut aamma soqutigigai. (1 Kor 9:22) Assersuutigalugu Paulusip sakkutooq taassuma sakkutuussutaasa immikkuualuttortai pillugit immaqa oqaloqatigisimavaa tamatumunngalu tunngatillugu ilikkakkani assersuusiornermigut atorlugit. — Ef 6:13-17.

 ‘ERSIORNAK GUUTIP OQAASIA OQALUUSSISSUTIGUUK’

Sakkutuut kaasarip paarsisui inuppassuarnik Romamiut naalagaaffissuannit tamalaaneersunik naapitsisarput, aamma kaasari, taassumalu ilaqutai, kiffai inussiaataalu naapittarpaat. Taamaalilluni sakkutuut kaasarip paarsisuisa saniatigut inuppassuit nutaarsiassaq nuannersoq tusarsimasinnaavaat, taakkualu ilaat kristumiunngorsimapput. (Fil 1:12, 13; 4:22) Paulusip maligassiuinera kajumississutigalugu kristumiut Romamiittut ‘ersinatik Guutip oqaasia oqaluussissutigisinnaasimavaat’. — Fil 1:14.

Qanorluunniit atugaqaraluarutta naapitavut oqaluussiffigisinnaavavut

Uaguttaaq Paulusip maligassiuinera kajumississutigaarput nutaarsiassap nuannersup “qanoq ilisukkulluunniit” oqaluussissutiginissaanut. (2 Tim 4:2) Immaqa utoqqaat illuanniippugut, napparsimmavimmi uninngavugut imaluunniit uppernerput pissutigalugu parnaarussaaqqalluta. Qanorluunniit atugaqaraluarutta naapitavut, soorlu uagutsinnik sullissisut, oqaluussiffigisinnaavavut. Sapiilluta oqaluussinermut periarfissavut tamaasa atorluartarutsigit ersersittarparput ‘Guutip oqaasiata qilersugaannginnera’. — 2 Tim 2:8, 9.

^ par. 2 Takuuk ungalusaq “Nerop nalaani sakkutuut kaasarip paarsisui”.

^ par. 7 Takuuk ungalusaq “Sextus Afranius Burrus”.

^ par. 9 Ukiup 36-p 37-llu akornanni Kr.in.king. Herodesi Agrippa kaasarimit Tiberiusimit sakkutuut pallittaalisaanni parnaarussaavoq Caligula kaasarinngussaneraramiuk. Caligulap kaasarinngornermi kingorna Herodesi akissarsisippaa Judæami kunnginngortillugu. — ApS 12:1.