Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Februaari 2013

Anersaakkut kingornussarput

Anersaakkut kingornussarput

‘Tamassa Naalakkap [Jehovap, NW] kiffaasa kingornussassaat.’ — ES 54:17, 1900.

1. Jehovap inuit iluaqutissaannik sumik tunivai?

JEHOVA naassaanngilluinnartuuvoq uagullu qanoq naassaanngitsumik inuulersinnaanitsinnik oqaluttuuppaatigut. Tusarliussaalu allanngorsimanngilaq. Biibilimi ima allassimasoqarpoq: ‘Naalakkap oqaasia naassaanngitsumik atavoq.’ (1 Petr 1:23-25) Biibili tamatumanilu tusarliunneqartoq pingaarutilik uagutsinnut tunniussimammagu qujamasuutigisariaqarparput.

2. Guutip imminut tunngasoq suna ilisimassagipput kissaatigaa?

2 Jehovap atermi tamanit ilisimaneqarnissaa kissaatigaa. Qilaap nunallu pinngortitaanerat oqaluttuarineqarmat Jehovap aqqa Biibilimi siullerpaamik eqqaaneqarpoq. (1 Mos 2:4) Guutip Mosesimut inatsisit qulit tunniukkamigit tupinnartuliornikkut atini arlaleriarluni allaffissianut ujaraasunut allappaa. Assersuutigalugu New World Translation naapertorlugu inatsit siulleq ima aallartippoq: “Uanga tassaavunga Jehova Guutit.” (2 Mos 20:1-17) Guuti taassumalu aqqa ilisimalinnginniassagatsigit Diaavulup Biibili suujunnaarseriaraluartarsimavaa. Jehovalli tamanna pitsaaliorpaa.

3. Guutip aamma Biibilimiittoq suna ilisimassagipput kissaatigaa?

3 Guuti pillugu inuit eqqunngitsorpassuarnik isumaqarput. Jehovalli sallusuissut tamanit ilisimaneqassasoq kissaatigaa. Sallusuissutip Biibilimi paasiuminartumik allaatigineqarnera qujamasuutigisariaqarparput. (Atuakkit Tussiaat 43:3, 4). Oqartoqarsinnaavoq uagut qaamasumiittugut silarsuarlu taarmiusoq. — 1 Joh 1:6, 7.

KINGORNUSSAQARPUGUT PINGAARTITTARIAQAKKATSINNIK

4, 5. 1931-miilli sumik immikkut ittumik pisinnaatitaaffeqarpugut?

4 Nunaqqatigiit kinguaariinnut tulliuttunut pikkoriffiit, ileqqut inooriaatsillu ingerlateqqittagaat assigiissinnaasarput. Taakku kingornussaanerarneqarsinnaapput.  Uaguttaaq Jehovamut Nalunaajaasuugatta kingornussaqarpugut. Uagut Biibilimik, Jehova pillugu sallusuissummik siunertaanillu eqqorluartumik paasinninneq anersaakkut kingornussaraarput. Taassumalu atianik taaguuteqarneq immikkut ittumik ataqqinaatigaarput.

1931-mi ataatsimeersuarnermi immikkorluinnaq ittumik, Jehovap Nalunaajaasuisut, taaguuteqalerpugut

5 1931-mi ataatsimeersuarnermi Columbusimi Ohiomiittumi taaguutitaarpugut. Ataatsimeersuarnermi saqqummiussassat allattorsimaffianni naqinnerit “JW” allanneqarsimapput. Qatanngut arnaq oqaluttuarpoq qatanngutit naqinnerit taakku “Just Wait”-imik (utaqqiinnarit-mik) imaluunniit “Just Watch”-imik (eqqumaannarit-mik) ilaasalu allaat “Jehovah’s Witnesses”-imik (Jehovap Nalunaajaasui-mik) isumaqarsorigaat. Tamatuma siornatigut Biibilimik Atuaqqissaartartunik taaguuteqaraluarpugut, 1931-mili juulip 26-ani immikkut oqalugiaateqartoqarnerani tusarnaartut tamarmik Jehovap Nalunaajaasuinik taaguuteqalernissarput akueraat. Ulloq Biibilimik tunngavilimmik taaguutitaarfipput pissanganartuuvoq. (Atuaruk Esaja 43:12, NW). * Qatanngut angut ima oqaluttuarpoq: “Nilliaatigalutik ersaattaattut puiunngisaannassavakka.” Nunarsuaq tamakkerlugu upperisarsiortut allat taamatut taaguuteqarusunngillat, taamatulli immikkorluinnaq ittumik taaguuteqarnissarput Guutip ukiut 80-it sinnerlugit akuerisimavaa.

6. Paasissutissat suut kingornussatsinnut ilaappat?

6 Itsaq Guutip kiffai pillugit Biibilimi paasissutissat eqqoqqissaartut pingaarutillillu kingornussatsinnut ilaapput. Assersuutigalugu Aaperaap, Iisaap Jaakullu qanoq pisimanerannik allassimasoqarpoq. Taakkua inooriaaseq Jehovamit akuerineqarsinnaasoq pillugu ilaquttatik oqaloqatigikulasarsimassavaat. Josefip taamatut oqaloqatigiittarnertik Potifarip nulianik kinguaassiuutitigut inuunerloqateqarusunnginnerminut iluaqutigisimassavaa. (1 Mos 39:7-9) Ukiuni hundredelinni siullerni kristumiut Guuti pillugu paasissutissanik avitseqatigiittarput. Assersuutigalugu apustilip Paulusip Naalakkap unnukkorsiortitsinera pillugu sukumiisumik ilagiit oqaluttuuppai. (1 Kor 11:2, 23) Guutimik eqqortumik pallorfiginninniassagatta tamakku tamarmik Biibilimi allassimapput. (Atuakkit Johannesi 4:23, 24). Biibili tamanit iluaqutigineqarsinnaavoq, uagulli Jehovap innuttarimmatigut Biibili qujamasuutigingaartariaqarparput.

7. Kingornussatsinnut ilaasutut suut neriorsuutigineqarpat?

7 Ullumikkut aamma Jehovap innuttani ikiortarpai. (Tuss 118:7) Innuttani qanoq sernissortarnerai atuagassiaatitsinni atuarsinnaavarput. Tamanna, allaat malersugaagaluarluta, toqqissisimassutigisarparput. Biibilimi neriorsuutigineqarpoq sakkut uagutsinnik ajoqusiiniutaasut suulluunniit  atorsinnaassuseqassanngitsut. Naapertuilluassuserpullu Jehovameersuummat Guutip innuttaanik eqqartuussivitsigut malersuisut eqqunngitsumik oqalunnerat uppernarsarneqarumaarpoq. Tamakku kingornussatsinnut ilaapput. (Es 54:17) Saatanip ajoqutigiuagassatsinnik ajoqusersinnaanngilaatigut.

8. Allaaserisami matumani tulliuttumilu suut sammissavavut?

8 Saatanip Biibili suujunnaarseriaraluartarsimavaa, Jehovap aqqa Biibilimit peeriaraluartarsimallugulu sallusuissut isertoriartarsimagaluarpaa. Saatanilli misiliinerigalui tamarmik iluatsittarsimanngillat. Allaaserisami matumani tulliuttumilu sammissavavut (1) Guutip Biibili tamatumanilu tusarliunneqartut qanoq tammatsaaligai; (2) Jehovap atermi ilisimaneqarnissaa qanoq qulakkeersimaneraa; aamma (3) Guutip ullumikkut sallusuissummik qanoq paasinnissinnaalersikkaatigut.

JEHOVAP BIIBILI TAMATUMANILU TUSARLIUNNEQARTUT TAMMATSAALISIMAVAI

9-11. Jehovap Biibili qanoq tammatsaalisimavaa?

9 Biibili suujunnaarsinniarneqartuarsimagaluarpoq, Jehovalli tammatsaalisimavaa. Enciclopedia Cattolica-mi ima allassimasoqarpoq: “Albigenserinik valdenserinillu malersuineq pissutigalugu 1229-mi Toulousemi isumalioqatigiit inerteqquteqarput inuinnaat [ilitsoqqussaralugu oqaatsitik atorlugit Biibilit] atortassanngikkaat . . . 1234-mi Tarragonami Spaniamiittumi isumalioqatigiit Jakob I siuttoralugu tamatumunnga assingusumik inerteqquteqarput. . . . 1559-imi paaveqarfik Paul IV-nata ujarlerfissiaanik, Allanik Upperisalinnik Killisiuisoqatigiit akuersiseqqaarnagit oqaatsit ilitsoqqussat atorlugit B[iibilinik] naqiterinissamut Biibileqarnissamullu inerteqqutinik, atulersitsigami siullerpaamik malersuinermut akuliuppoq.”

10 Biibili inunnit suujunnaarseriarneqartaraluartoq Jehovamit tammatsaalineqarpoq. 1382-ip missaani John Wycliffep Biibili tuluttuunngortitaq siulleq saqqummersippaa. William Tyndalep aamma Biibili tuluttuunngortippaa. Tamatuma kingunerisaanik taanna 1536-mi toqutaavoq. Qisummut nappakkamut qilersorneqareerluni ima nillerpoq: “Naalagaq, Englandimi kunngip isai uisikkit.” Tamatuma kingorna qiminneqarpoq ikuallanneqarlunilu.

11 1535-mi Miles Coverdalep aamma Biibili tuluttuunngortippaa. Coverdalep Biibilimik nutserinermini Tyndalep nutsigaa Biibilillu ilaa latiinerisooq Martin Lutherillu tyskisuunngortitaa atorsimavai. Ullumikkut New World Translation of the Holy Scriptures oqaatsinut amerlasuunut nutserneqarsimavoq. Oqaluussisartorpassuit oqaatsiminnut nutserneqarsimasoq qujamasuutigaat nutsigaq taanna paasiuminarmat, eqqoqqissaarmat oqaluussinermilu atoruminarmat. Saatanip inuilluunniit Biibili suujunnaarsissinnaasimanngilaat.

 JEHOVAP ATERMI ILISIMANEQARTUARNISSAA QULAKKEERPAA

Tyndalep allallu Biibilimik nutserinermikkut inuunertik navianartorsiortippaat

12. New World Translation inuit Jehovap aqqanik ilisimannilernissaannut qanoq iluaqutaasimava?

12 Jehovap Guutip atermi Biibilimiiginnarnissaa qulakkeersimavaa. New World Translation nutserneqaqqaarmat qatanngutit Guutip aqqa, Jehova, Biibilip allassimaqqaarfiini allassimagaangat tamatigut atorneqartarnissaa qulakkeersimavaat. Atia Allakkani Hebræerisuuni 6.973-eriarlugu Kristumiullu Allagaataanni Grækerisuuni 237-riarlugu atorneqarsimavoq. New World Translation maanna tamaat ilaannaaluunniit oqaatsinut 116-inut nutserneqarsimavoq, 178.545.862-inillu amerlanerusunut naqiterneqarsimavoq.

13. Qanoq nalunngilarput pinngortitsisoqarneraniilli inuit Guutip aqqa nalusimanngikkaat?

13 Inuit siulliit, Adamip Evallu, Jehovap aqqa nalunagulu atortarpaat. Noap aamma aqqa atortarpaa. Ima oqarpoq: “Unnersiutigineqarli Naalagaq [Jehova, NW] Semip Guutia!” (1 Mos 4:1; 9:26) Guutip inuit oqalukkaangamigit atini atortarpaa. Ima oqarpoq: “Uanga tassa Jahve, tassa atera! Ataqqinassusera tunniutissanngilara kimulluunniit.” Guutilu ima nangippoq: “Uanga Naalagaavunga [tassa Jehova, NW], allamik taamaattoqanngilaq, uangaanngitsumik Guuteqanngilaq.” (Es 42:8; 45:5) Jehovap atini inunnit tamanit ilisimaneqarsinnaanngortissimavaa. Jehovap aqqanik atuisinnaaneq taassumunngalu nalunaajaasuuneq uagutsinnut immikkut pisinnaatitaaffiupput angisuut! Taamaattumik pissutissaqarluarpugut ‘katinngat qullarlugu Guutitta aqqani’ qiimmattarnissamut. — Tuss 20:6.

14. Biibilimiunngitsoq Guutip aqqa suni allani atorneqartarpa?

14 Guutip aqqa Biibilimiinnaanngitsoq atorneqarpoq. Assersuutigalugu Meshap ujarattaani, Immap Uumaatsup kangiatungaani 21 kilometerisut ungasitsigisumiittumi Dhibanimi (Dibonimi), Guutip aqqa atorneqartoq nassaarineqarpoq. Allaffissiami ujaraasumi eqqaaneqarput Israelip kunngia Omri Moabillu kunngiata Meshap Israelikkunnut sorsunneq pillugu oqaasii. (1 Kng 16:28; 2 Kng 1:1; 3:4, 5) Meshap ujarattaa immikkut soqutiginaateqarpoq tassani Guutip aqqa tetragrammimik taaneqartartoq atorlugu allanneqarsimammat. Aamma Allakkani Lakishimeersutut ilisimaneqartuni, marraat aseqqukuini Israelimi nassaarineqartuni, tetragrammimik taaneqartartoq atorlugu arlaleriarluni allanneqarsimavoq.

15. Septuaginta suua, aamma sooq pisariaqartinneqarsimava?

15 Ukiut 2.000-it sinnerlugit matuma siorna Allakkat Hebræerisuut grækerisuunngortinneqarput Septuagintatullu saqqummersinneqarlutik. Sooq grækerisuunngortinneqartariaqarsimappat? Juutit ukiuni 70-ini Babylonimi aallarussaaqqasimapput. Ukiumi 537-mi kr.in.si. aniguisitaagamik ilaat Babylonimiiginnarniarlutik aalajangerput. Piffissalli ingerlanerani juuterpassuit grækerisut oqaluffiusumut Alexandriamut Egyptenimiittumut nuupput. Juutit taakkua Allakkat Hebræerisuut grækerisuunngortinneqarnissaat pisariaqartippaat. Grækerisuut Septuagintat ilaanni Guutip aqqa hebræerisut allanneqarsimavoq.

16. Guutip aqqa Bay Psalm Book-imi qanoq atorneqarpa?

16 Tuluit Nunaata Amerikami nunasiaataani atuakkiat naqiterneqartut siullersaanni Bay Psalm Book-imi Guutip aqqa atorneqarpoq. Atuagaq siullermeerlugu 1640-mi naqiterneqartoq Tussiaatineersuuvoq hebræerisuumillu tuluttuunngortinneqarsimalluni. Tassanilu ilaatigut Guutip aqqa Iehovamik allallugu Tussiaat 1:1, 2-mi atorneqarpoq, tamatumanilu allassimavoq “angut pilluaqqusaasoq” guutsiitsut siunnersuutaannik malinninnani “Iehovalli inatsisaanik nuannarisaqartuusoq”. Guutip aqqa pillugu atuagassiaaqqami Guds navn der vil bestå for evigt-imi amerlanerusunik paasissutissaqarpoq.

 JEHOVAP SALLUSUISSUMMIK PAASINNISSINNAALERSIPPAATIGUT

17, 18. (a) Oqaaseq “sallusuissut” qanoq nassuiassaviuk? (b) ‘Nutaarsiassap nuannersup ilumoorsusianut’ suut ilaappat?

17 Uagut nuannaarluta “Jehova, sallusuissutip Guutia” kiffartorfigaarput. (Tuss 31:5, NW [31:6]) Sallusuissut suugami? Biibilip allassimaqqaarfiini oqaaseq “sallusuissut” aalajaatsumik, allanngujuitsumik tatiginartumillu isumaqartunit nutsigaavoq.

18 Ullumikkut Jehovap sallusuissummik uagut paasinnissinnaanngortissimavaatigut. Sallusuissummillu paasisaqarnerujartoqqulluta ikiortuartarpaatigut. (2 Joh 1, 2) Tamanna Ussatit 4:18-imi ima ersersinneqarpoq: “Iluartup aqqusininnguata assigaa ullaap qaammalernera qaammarissiartortoq ulloqeqqaaneratut qaamatigilerserluni.” Jiisusi Guutimut qinunermini ima oqarpoq: “Oqaatsitit sallusuissutaapput.” (Joh 17:17) ‘Nutaarsiassap nuannersup ilumoorsusia’ Biibilimiippoq. (Gal 2:14, NW) Tamatumanilu pineqarput kristumiut ilinniartitsissutaat tamarmik. Ilinniartitsissutigineqartut ilaat suugamik? Jehovap aqqa, qilammi nunamilu kisimi oqartussaanera, Jiisusip utertitsissutitut pilliutaa, makititsinissaq Guutillu naalagaaffia pillugit sallusuissutit. Maanna Guutip sallusuissut, Saatanimit isertorniarneqarsimagaluartoq, qanoq tammatsaalisimaneraa sammissavarput.

SAATANIP SALLUSUISSUMMIK ISERTUINIARALUARNERI JEHOVAP MAANGAANNARTITTARPAI

19, 20. Nimrodi kinaava, naalakkersuineranilu qanoq pisoqarpa?

19 Ulersuaqareermat Nimrodimik atilimmik ‘Jehovamik akerlilersuisumik’ pinerrarissorsuaqarpoq. (1 Mos 10:9, NW) Nimrodi Jehovamik Guutimik akerlilersuisuugami ilumoortumik Saatanimut kiffartorpoq Jiisusillu ima oqarfigisaasut ippoq: ‘Ataataq nagguigisarsi tassa Diaavulu, ataatassilu pilerigisai suliariniarpasi. . . . [taassumalu] sallusuissut aalajangiutinngilaa.’ — Joh 8:441936.

20 Nimrodi Babelimut illoqarfinnullu allanut kuussuup Tigrisip kuussuullu Eufratip akornanniittunut naalakkersuivoq. (1 Mos 10:10) Ukiumi 2269-imi kr.in.si. Babelimik sanaartortitsinera napasulialiortitsineralu aallartissimagunarpoq. Jehovap inuit nunarsuaq tamakkerlugu siaruarnissaat piumasarigaluaraa taakku ima oqarput: “Qaa, illoqarfiliorta napasuliartalimmik kaarfa qilammut apissisimasumik, tusaamasanngoqqulluta nunarsuarmullu tamarmut siammartitaaqqunata.” Pilersaarutaalli maangaannarpoq Guutip “nunarsuarmi tamarmi oqaasiusut ilatsimmagit” nunarsuarmullu tamarmut siammartimmagit. (1 Mos 11:1-4, 8, 9) Saatani pallorfiginninnermik ilumoortumik suujunnaarsitseriaraluarpoq aamma inuit tamaasa imminik pallorfiginnilerseriaraluarpai. Jehovali pallorfiginninnermik ilumoortumik illersuivoq maannakkullu inuit taassuminnga pallorfiginnilersut ullut tamaasa amerliartorput.

21, 22. (a) Sooq pallorfiginninneq ilumoortoq navianartorsiortinneqanngisaannarsimava? (b) Allaaserisami tulliuttumi suut sammissavavut?

21 Upperisarsiorneq eqqunngitsoq pallorfiginninnermik ilumoortumik navianartorsiortitsinngisaannarsimavoq. Sooq? Ajoqersuisorsuatta, Jehovap, oqaatsini tammatsaalisimallugulu atini ilisimaneqalersissimallugulu sallusuissut paasineqarsinnaanngortimmagu. (Es 30:20, 21) Sallusuissut malillugu Guuti pallorfigigaangatsigu piviusumik nuannaalertarpugut, eqqumajuartariaqarpugulli, Jehovamik tatiginnittariaqarlutalu anersaamit illernartumit siulersortittariaqarpugut.

22 Allaaserisami tulliuttumi eqqunngitsunik ajoqersuisalersimaneq qanoq aallartissimanersoq sammissavarput. Biibilimi tamakku ajoqersuutigineqannginnerat Jehovallu imminut tunngasunik ilumoortunik paasissutissilluta pilluaqqusimagaatigut sammissavarput. Tamakku anersaakkut kingornussaraavut immikkorluinnaq ittut.

^ par. 5 Esaja 43:12, NW: “‘Uangaana nalunaarutiginnittoq annaassisorlu tusarliisorlu, akornassinni allanertamik guuteqanngikkallarmat. Taava ilissi nalunaajaasuuvusi uannut,’ oqarpoq Jehova, ‘uangalu Guutiuvunga.’”