‘Nuannaartuarnissarsi suleqataaffigaarput.’ — 2 KOR 1:24.

1. Paulusip kristumiut Korinthimiut pillugit tusakkani suut nuannaarutigai?

UKIUMI 55-imi apustilip Paulusip tusarpaa qatanngutit Korinthimiut assortuuttuartut. Paulusip taakku ataatap meeqqaminik asanninneratut asagamigit oqaaqqissaarniarlugit allaffigai. (1 Kor 1:11; 4:15) Paulusip aamma ikinngutini Titusi Korinthimiut tikeraaqqullugit aallartippaa, kingornalu ilagiit qanoq innerannik oqaluttuunneqarniassagami illoqarfimmi umiarsualivittalimmi Troasimi naapeqquvoq. Qaammatialuit tamatuma kingorna Paulusip qatanngutit Korinthimiut ernummatigamigit Titusi Troasimi utaqqivaa. Titusili takkutinngitsoormat Paulusi umiarsuarluni Makedoniamukarpoq. Kingusinnerusukkulli tassani Titusi naapikkamiuk nuannaarpoq. Titusip oqaluttuuppaa qatanngutit Korinthimiut Paulusip oqaaqqissaarutai maleruaraat Paulusilu kipitsavigalugu takorusukkaat. Tamanna tusaramiuk Paulusi ‘suli annerusumik nuannaarnerulerpoq’. — 2 Kor 2:12, 13; 7:5-9.

2. (a) Paulusip Korinthimiut upperneq nuannaarnerlu pillugit qanoq allaffigai? (b) Apeqqutit suut akissutissarsissavavut?

2 Tamatuma kinguninngua Paulusip Korinthimiut allaffigeqqippai. Ima allappoq: “Uppernissinnut naalagaanngilagut nuannaartuarnissarsili suleqataaffigaarput; uppertooreerpusimi.” (2 Kor 1:24) Paulusi qanoq isumaqarluni taama allappa? Ullumikkullu utoqqaanertat taassuma allagai qanoq ilinniarfigisinnaavaat?

UPPERNERPUT NUANNAARNERPULLU

3. (a) Paulusip allagai “uppernissinnut naalagaanngilagut . . . uppertooreerpusimi” qanoq paasisariaqarpat? (b) Ullumikkut utoqqaanertat Paulusip maligassiaa qanoq malippaat?

3 Paulusip kristumiut pissuserisariaqagaat pingaarutillit marluk — upperneq nuannaarnerlu — eqqartorpai. Siullertut, upperneq eqqartoramiuk ima allappoq: “Uppernissinnut naalagaanngilagut . . . uppertooreerpusimi.”  Paulusip nalunngilaa qatanngutit Korinthimiut Guutimik ilumoorfiginnillutik kiffartornerannut nammineq pissutaanani inuilluunniit allat pissutaanngitsut, Guutimilli upperinninnertik pissutigalugu kiffartortut. Qularutiginngilaa ilumoorlutik Guutimik asannillutillu eqqortuliorusuttut. Taamaattumik qatanngutimi uppernerat apeqqusinngilaa apeqquserusunnagulu. (2 Kor 2:3) Ullumikkuttaaq utoqqaanertat Paulusi ilaarlugu qatanngutitik Guutimik upperinnillutik ajunngitsunillu pissutiginiagaqarlutik kiffartortuunerat qularutiginngilaat. (2 Th 3:4) Ilagiinnut sukannersunik malittarisassiorneq ajorput, najoqqutassialli Biibilimiittut ilitsersuutillu Jehovap peqatigiissortaaneersut atorlugit qatanngutit aalajangiiniarneranni siunnersortarpaat. Utoqqaanertat qatanngutimik uppernerannut naalagaanngillat. — 1 Petr 5:2, 3.

4. (a) Paulusip allagai ‘nuannaartuarnissarsi suleqataaffigaarput’ qanoq paasisariaqarpat? (b) Ullumikkut utoqqaanertat Paulusip isiginnittaasiatut qanoq isiginnittaaseqarpat?

4 Paulusi aamma ima allappoq: ‘Nuannaartuarnissarsi suleqataaffigaarput.’ Paulusi taamatut allakkami Korinthimiunik tamaviaarluni ikiuiniarnermini suleqataasut pivai. Sooq taamatut oqarsinnaavugut? Korinthimiunut allakkamini tamatumani suleqatini marluk ima eqqaagamigit: ‘Jiisusi Kristusi uannit Silvanusimillu Timotheusimillu ilissinnut oqaluussissutigineqarpoq.’ (2 Kor 1:19) Paulusip allakkamini ‘suleqatini’ eqqaagaangamigit tamatigut oqaluussinermi tamaviaarluni suleqatigisartakkani, soorlu Apollosi, Akvila, Priska, Timotheusi Titusilu, eqqarsaatigisarpai. (Rom 16:3, 21; 1 Kor 3:6-9; 2 Kor 8:23) Taamaattumik Paulusip Korinthimiut nuannaartuarnissaannik suleqataaffiginninnerarnermigut paasitippai suleqatinilu sapinngisartik tamaat ilagiit Guutimut kiffartornermi nuannaarneruleriartortuarnissaannut ikiuukkusullutik. Ullumikkuttaaq utoqqaanertat taamatut iliorusupput. Sapinngisartik tamaat qatanngutitik Jehovamik ‘qiimmattarlutik’ kiffartorfiginninnissaannut ikiorusuppaat. — Tuss 100:2; Fil 1:25.

5. Qatanngutit ilaat qanoq aperineqarsimappat, suullu eqqarsaatigissavavut?

5 Qanittukkut qatanngutit aallussilluartut nunanit tamalaaneersut ima aperineqarsimapput: “Utoqqaanertap oqaasii iliuusiilu suut nuannaarnerulissutigaagit?” Akissutaasa sammineranni illit utoqqaanertat oqaatigisimasaat iliuuserisimasaallu nuannaarnerulissutigisatit eqqarsaatigikkit. Tamattalu ilagiit nuannaarnerulernissaannut qanoq sunniuteqaqataasinnaanerluta eqqarsaatigisinnaavarput. *

“INUULLUAQQUTIKKISIUK ASASARA PERSISI”

6, 7. (a) Utoqqaanertat Jiisusi, Paulusi Guutillu kiffai allat ilaatigut qanoq ilaarsinnaavaat? (b) Sooq qatanngutitta atiinik eqqaamannittarnerput nuannaarutigisarpaat?

6 Qatannguterpassuit utoqqaanertanit soqutigineqartarnertik nuannarinerarpaat. Utoqqaanertat soqutiginninnertik ilaatigut ersersissinnaavaat Daavip, Elihup Jiisusillu maligassiaannik malinninnermikkut. (Atuakkit 2 Samueli 9:6; Jobi 33:1; Lukasi 19:5). Jehovamut kiffaasut taakkua allat atiisigut taasarnerisigut soqutiginninnerminnik ersersitsivigisarpaat. Aamma Paulusip nalunngilaa qatanngutimi atiisa eqqaamanissaat taakkualu atiisigut taasarnissaat qanoq pingaaruteqartigisoq. Allakkami ilaasa naggataatungaani qatanngutini 25-it sinnerlugit atiisigut taavai. Eqqaasaasa ilaat qatanngutaavoq arnaq Persisimik atilik, taannalu  pillugu ima allappoq: “Inuulluaqqutikkisiuk asasara Persisi.” — Rom 16:3-15.

7 Utoqqaanertat ilaasa atit eqqaamanissaat sapernartittarpaat. Qatanngutimilli ataasiakkaat atiisa eqqaamaniartarnerisigut ima oqarfigisarpaallusooq: ‘Pingaartippakkit.’ (2 Mos 33:17) Qatanngutillu Napasuliaq Alapernaarsuiffik-mik atuaqqissaaqatigiinnermi ataatsimiinnernilu allani akigaangamik utoqqaanertanit atimikkut taaneqartarnertik nuannaarutigisarpaat. — Naleqqiuguk Johannesi 10:3.

“NAALAKKAMI SULINGAARTOQ”

8. Paulusip Jehova Jiisusilu ilaatigut qanoq pingaarutilimmik ilaarpai?

8 Paulusip aamma nersualaarisarnermigut allanik soqutiginninnini ersersittarpaa. Utoqqaanertat aamma taamaaliornermikkut qatanngutitik Guutimut nuannaarlutik kiffartornissaannut tapersersorsinnaavaat. Paulusip Korinthimiut nersualaarpai ima allaffigigamigit: “Tulluusimaarutigingaarpassi.” (2 Kor 7:4) Qularnanngitsumik qatanngutit Korinthimiut Paulusip oqaasii asaneqartutut misigilissutigisimassavaat. Aamma Paulusip ilagiit allat sulilluarnerat pillugu nersualaartarpai. (Rom 1:8; Fil 1:3-5; 1 Th 1:8) Paulusillu ilagiinnut Romamiittunut allakkamini Persisi eqqaareerlugu ima allappoq: “Naalakkami sulingaartoq.” (Rom 16:12) Qatanngutip arnap aalajaatsup taassuma taamatut allaatigineqarnini nuannaarutigisimassaqaa! Paulusip nersualaarinermigut Jehova Jiisusilu ilaarpai. — Atuakkit Markusi 1:9-11; Johannesi 1:47; Saqq 2:2, 13, 19.

9. Sooq ilagiinniittut imminnut nersualaaraangamik nuannaarnerulersarpat?

9 Ullumikkuttaaq utoqqaanertat nalunngilaat qatanngutiminnik pingaartitsinerminnik ersersitsisarnissartik pingaaruteqartorujussuusoq. (Uss 3:27; 15:23) Utoqqaanertap qatanngutini nersualaaraangamigit taakkuninnga taakkualu iliuusiinik soqutiginninnini ersersittarpaa. Qatanngutit utoqqaanertanit qiimmassarneqarnissartik pisariaqartippaat. Qatanngut arnaq 50-it sinnerlugit ukiulik ima oqarpoq: “Suliffinni qaqutiguinnaq nersualaarneqartarpunga. Suleqatikka allanik soqutiginninngillat imminnullu unammisarlutik. Taamaattumik ilagiinni iliuuseqarnera pillugu utoqqaanertamit nersualaarneqaraangama nuannaarnerulertarpunga nukissaqarnerulertarlungalu! Ataatannit qilammiusumit asaneqarlunga misigisarpunga.” Qatanngut angut kisimiittoq marlunnillu qitornalik utoqqaanertamit pingaartinneqangaarluni oqarfigineqarpoq. Utoqqaanertap oqaasii Guutimut kiffartornermini sapinngisaminik iliuuseqarnissaminut kajumississutigai. Ersarippoq utoqqaanertap uppeqatini ilumoorluni nersualaaraangamigit Guutimut kiffartornermi “nukillaarnatik” nuannaartuarnissaannut ikiortarai. — Es 40:31.

‘GUUTIP ILAGIISSAI PAARISIGIT’

10, 11. (a) Utoqqaanertat Nehemia qanoq ilinniarfigisinnaavaat? (b) Utoqqaanertap qatanngutini pulaaraangamigit qanoq uppernikkut nakussatsissinnaavai?

10 Utoqqaanertat qatanngutitik nuannaarlutik Guutimut kiffartorsinnaaqqullugit asannillutik aamma pingaarutilimmik qanoq ikiorsinnaavaat? Qiimmassarneqarnissaminnik pisariaqartitsisut ikiorumallugit iliuuseqapallallutik. (Atuaruk Apustilit Suliaat 20:28). Utoqqaanertat taamaaliornermikkut Guutip itsaq kiffai aalajaatsut ilaartarpaat. Assersuutigalugu Biibilimi eqqaaneqarpoq Nehemiap juuteqatimi ilaasa annilaanganerat malugigamiuk qiimmassarniarlugit iliuuseqartoq. (Neh 4:8) Ullumikkuttaaq utoqqaanertat taamatut iliorusupput. Qatanngutitik nikallungasut sapinngisaminnik qiimmassartarpaat. Ajornanngikkaangat utoqqaanertat qatanngutitik pulaartarpaat ‘anersaap tunissutaanik’  tuniniarlugit, tassa uppernikkut nakussatsinniarlugit. (Rom 1:11) Utoqqaanertat qanoq taamaaliorsinnaappat?

11 Utoqqaanertap paarsisutut pulaannginnermini qiimmassagassani eqqarsaatigeqqissaartariaqarpai. Assersuutigalugu imminut ima aperisinnaavoq: ‘Pulaagassara sunik unamminiagassaqarpa? Taassumunnga qiimmassaataasinnaasut suut eqqartorsinnaavakka? Allassimaffik imaluunniit Biibilimik oqaluttuaq sorleq qiimmassaatigisinnaavaa?’ Utoqqaanertap pulaagassani eqqarsaatigeqqissaaqqaaruniuk ulluinnarni pisartut eqqartuinnarnagit qatanngutiminut iluaqutaalluarsinnaasunik eqqaasaqarsinnaavoq. Utoqqaanertap qatanngutini pulaaraangamigit oqaaseqartittarlugillu tusarnaaqqissaartarpai. (Jaak 1:19) Qatanngut arnaq ima oqarpoq: “Utoqqaanertap soqutiginnilluni tusarnaaqqissaaraanganga tuppallertarpunga.” — Luk 8:18.

Utoqqaanertat qiimmassarumalluta paarsisutut pulaannginnerminni piareersartarput

12. Ilagiinni kikkut qiimmassarneqarnissartik pisariaqartippaat, aamma sooq?

12 Kikkut utoqqaanertanit qiimmassarneqarnissartik pisariaqartippaat? Paulusi allappoq utoqqaanertat ‘savaatit tamaasa’ paarissagaat. Aap, ilagiinniittut tamarmik, allaat ukiorpassuarni oqaluussisartutut pioneritullu aalajaallutik kiffartorsimasut, qiimmassarneqarnissartik pisariaqartittarpaat. Sooq utoqqaanertanit annertoqqusersorneqartariaqarpat? Guutimut upperluaraluarlutik silarsuarmit matumannga ajortumit tatineqangaarnertik sapilersutut misigisilissutigisinnaasarpaat. Guutip kiffaasa aalajaatsut ilaannikkut ikiorneqarnissaminnik pisariaqartitsisarnerat kunngip Daavip misigisimasaanit erserpoq. Oqaluttuaq tamanna sammeriartigu.

ABISHAJIP “IKIORIARTORPAA”

13. (a) Jishbi-Benobip Daavi susoq takugamiuk saassuppaa? (b) Sooq Abishajip Daavi piffissaq eqqorlugu ikiorsinnaasimavaa?

13 Daavip inuusuttup kunngitut taninneqarnermi kinguninngua Goliati, Rafap kinguaavisa ilaat, saassukkiartorpaa. Daavip sapiitsup inorujussuaq taanna toquppaa. (1 Sam 17:4, 48-51; 1 Nal 20:5, 8) Ukiorpassuit  tamatuma kingorna Israelikkut filisterillu sorsuunneranni Daavip inorujussuaq alla akiorpaa. Taanna Jishbi-Benobimik atilik aamma Rafap kinguaavisa ilagaat. (2 Sam 21:16) Maannali Daavi inorujussuarmit taassumannga toqutaangajappoq. Sooq? Daavi suli sapiissuseqarpoq, Biibilimili allassimavoq ‘Daavi qasoqqasoq’. Jishbi-Benobip takugamiuk qasulersoq “pilersaarpoq Daavi toqukkumallugu”. Abishajilli ingerlaannaq “Daavi ikioriartorpaa filisterilu toqullugu”. (2 Sam 21:15-17) Daavi toqutaangajavippoq! Daavip inuunermi navianartorsiortinneqarnerani Abishajimit nakkutigineqarlunilu ikioriartorneqarnini qujamasuutigisimassaqaa! Oqaluttuaq tamanna qanoq ilinniarfigisinnaavarput?

14. (a) Pissutsini artornartuni aalajaattuarnissatsinnut suna iluaqutigisinnaavarput? (b) Utoqqaanertat qatanngutitik aalajaattuarsinnaaqqullugit nuannaaleqqinnissaannullu qanoq ikiorsinnaavaat? Assersuuteqarit.

14 Saatanimit allanillu malersorneqaraluarluta Jehovamut kiffaasutut nunarsuaq tamakkerlugu Guuti kiffartorfigiuarparput. Ilavut qaangerneqarpasissinnaanngitsunik ajornartorsiuteqartarsimapput. Jehovali tatigilluinnaratsigu pissutsini artornartuni aalajaannissatsinnut nukissaqarpugut, soorlu Daavi Goliatip ajugaaffiginissaanut nukissaqartoq. Ilaannikkulli Saatanip silarsuaanut akiuuttuarnissatsinnut nukissaaruttutut misigisarsinnaavugut. Taamatut misigigaangatta ajornartorsiutit naammagalugit atortaraluakkavut nikalluutigeriaannaasarpavut. Pissutsini taama ittuni utoqqaanertap piffissaq eqqorlugu pisariaqartitatsinnik ikiorsinnaavaatigut. Ikiuineratigullu Guutimut kiffartornerput nuannaarutigeqqilertarparput. Ilarpassuavut taamatut ikiorneqarsimapput. Qatanngut arnaq 60-it sinnerlugit ukiulik pioneriusoq ima oqarpoq: “Ungasissorsuunngitsukkut nikallortutut misigivunga oqaluussineralu pissutigalugu nukissaarullunga. Utoqqaanertap nukissaarunnera malugigamiuk saaffigaanga. Oqaluttuaq Biibilimeersoq tunngavigalugu qiimmaallannartumik oqaloqatigiippugut. Siunnersuutai malippakka iluaqutigalugillu.” Imalu nangippoq: “Utoqqaanertap nukillaarsimanera malugigamiuk ikioramingalu ilumut asannittuliorfigaanga!” Aap, tuppallernangaarpoq nalunagu utoqqaanertat Abishajip Daavimik ikiuinissaminut piareersimaneratut uagutsinnik ikiuinissaminnut piareersimajuartut.

NALUNNGILAAT PAULUSIP ASAGAATIK

15, 16. (a) Sooq Paulusi qatanngutiminit asaneqarpa? (b) Sooq utoqqaanertat asavavut?

15 Utoqqaanertat tamaviaartarput. Ilaannikkut qatanngutitik isumaalugigamikkit sinissaaruttarput, unnuakkullu qinnukkumallugit ikiorniarlugilluunniit makittarput. (2 Kor 11:27, 28) Taamaakkaluartorli utoqqaanertat Paulusitut piumaffigineqarnermissut kajumillutik iliortarput. Paulusi Korinthimiunut ima allappoq: “Suna tamaat atorumavara allaat nungullunga atorneqarumallunga ilissi pillusi.” (2 Kor 12:15) Paulusip qatanngutini asagamigit nukini tamaasa atorlugit nakussatsinniartarpai. (Atuaruk 2 Korinthimiut 2:4; Fil 2:17; 1 Th 2:8) Taamaammallu Paulusi qatanngutiminit asaneqangaarpoq! — ApS 20:31-38.

16 Uaguttaaq utoqqaanertat asavavut, Jehovalu qutsavigisarparput taakku aqqutigalugit isumassortarmatigut. Uagutsinnik soqutiginninnerat nuannaarnerulissutigisarparput. Paarsisutut pulaartarnerat nakussatsissutigisarparput. Silarsuullu matuma tatisinera pissutigalugu sapilersutut misigigaangatta utoqqaanertat uagutsinnik ikiuinissaminnut piareersimasarnerat qujamasuutigaarput. Aap, utoqqaanertat ilumut ‘nuannaartuarnissarput suleqataaffigaat’.

^ par. 5 Qatanngutit taakku aamma ima aperineqarput: “Utoqqaanertat pissusiisa ilaat sorleq pingaartinnerpaaviuk?” Amerlanerit akipput: “Saaffigiuminartuunerat.” Pissuseq pingaarutilik tamanna atuagassiami kingusinnerusukkut saqqummersussami sammineqassaaq.