UKIUT arlaqanngitsut matuma siorna aappariit 50-it pallillugit ukiullit, Roaldi Elsebethilu, pigissaarlutik, Norgemi illoqarfiit annersaata tulliani, Bergenimi najugaqarput. Panertik ernertillu, Isabeli Fabianilu, peqatigalugit ilagiinni aalajaallutik kiffartoqataapput. Roaldi utoqqaanertaavoq Elsebethilu pioneriulluni meeraallu Isabeli Fabianilu oqaluussisartutut kiffartorluarput.

Ilaqutariit 2009-mi septembarip qaammataani aalajangerput najugaqarfimmut avinngarusimasumut sapaatip-akunnerani ataatsimi oqaluussiniarlutik. Roaldi Elsebethilu Fabiani, taamani 18-inik ukioqartoq, peqatigalugu qaasuitsup killeqarfiata avannaani Finnmarkimi qeqertaasamut Nordkynimukarput. Kjøllefjordip illoqarfeeraani qatanngutit angutit arnallu najugaqarfimmut taassumunnga avinngarusimasumut oqaluussiartoqataasut peqatigalugit oqaluussipput. Roaldi ima oqaluttuarpoq: “Aallaqqaammut sapaatip-akunnerani immikkut suliniuteqarnermut tamatumunnga peqataasinnaajumallunga isumagisartakkama allanut suliaritinnissaasa iluatsissimanerat nalerisimaarutigaara.” Sapaatilli-akunnera qaangiutinngitsorluunniit Roaldi nalerisimaarunnaalersutut misigilerpoq. Sooq?

 ILIMAGINNGILLUINNAKKATSINNIK APERINEQARPUGUT

Roaldi ima nangippoq: “Mariop, Finnmarkimi pioneriusup, naatsorsuutiginngilluinnakkatsinnik ilagiinni 23-nik oqaluussisartulimmi ikiuukkiartorluta Lakselvimut nuunnissatsinnut piumassuseqarnersugut apereriataarpaatigut.” Roaldip ilimaginngilluinnakkaminik aperineqarnini tupaallaatigaa. Ima nassuiaavoq: “Siornatigut Elsebethilu pisariaqartitsiffiunerusumi kiffartornissarput eqqartortareernikuuarput — aatsaalli meeqqat namminneq initaareerpata aallartikkusulluta.” Roaldip ullualuinnarni najukkami avinngarusimasumi oqaluussinikuugaluarluni malugisinnaavaa oqaluussiffigineqartut Jehova pillugu ilinniarnissaminnut piumassuseqarluartut. Maannangaarlu ikiorneqarnissaminnut pisariaqartitsipput. Ima nangippoq: “Apeqqut eqqarsalissutiginermik ulluni arlalinni sininnaviissutigaara.” Taava Mariop Roaldi ilaqutaalu Kjøllefjordip kujataatungaanut 240 km-erit missiliorlugit (150 miili) ungasitsigisumut Lakselvimukaappai, taamaaliorporlu ilagiit taqqavaniittut taakkununnga ilisaritikkusukkamigit.

Lakselvimut tikimmata Andreasip, taqqavani utoqqaanertaasut aappaata, tikeraartitik illoqarfeeqqami Naalagaaffilersaarfimmilu takornariartippai. Roaldi Elsebethilu ilagiinnit tikilluaqqusaasutut misigipput oqarfigineqarpullu najukkami kiffartornermi ikiuukkumallutik nuussappata qujamasuutigineqassasoq. Andreasip qungujulluni Roaldi Fabianilu oqarfigai atorfinitsinneqarsinnaanermut oqaloqateqarnissaat isumagisimallugu. Tikeraat qanoq iliussappat?

QANOQ AALAJANGISSAAGUT?

Fabiani ima eqqarsaqqaaraluarpoq: “Maanga nuukkusunngilanga!” Ikinngutigilluakkani ilagiinni peroriartoqatigisimasani qimannissai illoqarfeeqqamilu najugaqalernissani kajungerivallaanngilaa aammami innaallagisserisunngorniarnini suli naammassisimannginnamiuk. Isabeli (taamani 21-nik ukioqartoq) nuunnissaq qanoq isumaqarfiginerini aperineqarami ima akivoq: “Tamannarpiaq kissaatigiuaannarnikuuara!” Isabelili ima nangippoq: “Nuunnissarli eqqarsaatigereerakku imminut ima aperivunga: ‘Taamaaliorneq silatusaarnerussava? Ikinngutikka maqaasissavakka? Ilagiit massakkut nuannaralugillu sungiusimalluakkakka najuunnassavakka?’” Elsebethimmi nuussinnaanini qanoq isumaqarfigaa? Ima oqarpoq: “Ilaqutariittut Jehovamit suliassinneqarsimasutut misigivunga, kisianni aamma illorput iluarsartuunneqaqqammersoq ukiunilu 25-ni kingullerni pigisat katersornikuusavut eqqarsaatigaakka.”

Elsebethi Isabelilu

Roaldi ilaqutaalu sapaatip-akunnerani ataatsimi oqaluussiartoreerlutik Bergenimut angerlarput, kristumiulli qatanngutitik Lakselvimiittut, 2.100 km-imit (1.300 miilinit) ungasinnerusumiittut, eqqarsaatigiinnaavippaat. Elsebethi ima oqarpoq: “Jehovamut qinoqattaarpunga ikinngutillu peqatigisimasakka assinik misigisalikkersaarutinillu avitseqatigisarnerisigut attavigiuarpakka.” Roaldi ima oqarpoq: “Misigivunga nuunnissamut periarfissaqarnerput suliarisartakkavullu isumannaatsumik qimassinnaanerlugit eqqarsaatigilluaqqaartariaqarlugit. Qanoq imminut pilersorsinnaagatta? Jehovamut qinoqattaarpunga aamma ilaquttakka qatanngutillu misilittagaqarluartut oqaloqatigeqattaarlugit. Fabiani ima oqaluttuarpoq: “Nuussinnaanerput eqqarsaatiginerujartortillugu paasinerujartuinnarpara nuunnginnissamut tunngavissaqanngitsunga. Jehovamut qinoqattaarama nuukkusunneruleraluttuinnarpunga.” Isabelimi? Nuussinnaanissaminut piareersarniarluni illoqarfimmi najukkamini pionerinngorpoq. Qaammatit arfinillit pionerioreerluni, piffissanilu nammineq Biibilimik atuaqqissaarnissamut atorluareerlugu, nuunnissaminut piareertutut misigivoq.

NUUNNISSARTIK SULISSUTIGILERPAAT

Ilaqutariit oqaluussisartunik pisariaqartitsiffiunerusumi kiffartornissartik kissaatiginerujartortillugu nuunnissartik sulissutigilerpaat. Roaldi aningaasarsiorluarnartumik nuannarisaminillu suliffeqaraluarluni ukioq ataaseq sulinngiffeqarsinnaanerluni sulisitsisuminut aperigami tassannga aperineqarpoq sapaatit-akunnerini arfinilinni sulinngiffeqartaleruni sapaatip-akunnerini marlunni sulisalersinnaanersoq. Roaldi ima oqarpoq: “Naak akissarsiakka apparujussuaraluartut ilaqutariittut ingerlalluarpugut.”

Elsebethi ima oqaluttuarpoq: “Uimma aperaanga Lakselvimi inissarsiornissarput Bergenimilu illutta attartortinniarnissaa isumagisinnaaneriga. Piffissartornarpoq ulapinnarlunilu, naggataatigulli iluatsippoq.” Ima nangippoq: “Kingusinnerusukkut meeqqat ullup ilaannaa sulisalerput nerisassanut angalanermullu aningaasartuutinut tapeeqataasalerlutik.”

Isabeli ima oqarpoq: “Illoqarfeeqqamut nuukkatta pioneritut imminut pilersorsinnaajumallunga suliffittaarnissara uannut unamminiarnarnerpaasimavoq, ilaannikkullu  suliffittaarsinnnaanngitsutut misigisarpunga.” Ukiup siulliup ingerlanerani suliffinni qulingiluani assigiinngitsuni ullup ilaannaani sulisarnermigut Isabelip aningaasartuutini matussusersinnaasimavai. Fabianimi? “Innaallagisserisutut naammassissaguma suliffimmi ilinniartutut suleqqaartariaqarpunga. Lakselvimi ilinniarnera nangissinnaasimavara. Kingusinnerusukkut naammassivunga ullullu ilaannaani innaallagisserisutut sulisalerlunga.”

ALLAT QANOQ ANNERUSUMIK KIFFARTULERSIMASUT

Mareliusi Kesialu Norgemi arnamut Samimiumut oqaluussisut

Mareliusip taassumalu nulia Kesiap aamma oqaluussisartunik pisariaqartitsiffiunerusuni kiffartornissartik kissaatigaat. Mareliusi maanna 29-nik ukiulik ima oqarpoq: “Ataatsimeersuarnerni pioneritut kiffartorneq pillugu oqalugiaatit apeqqarissaartarnerillu annerusumik kiffartorusulissutigaakka. Kesiap maanna 26-nik ukiullip ilaquttani qimallugit nuunnissani kajugerivallaanngilaa. Ima oqarpoq: “Inuit asasakka qimallugit ungasissumut aallarnissara nuannarinngilluinnarpara.” Tamatuma saniatigut Mareliusi illortik akilerniarlugu ulloq naallugu sulisarsimavoq. Ima oqarpoq: “Jehovap ikiuineratigut allannguinissatsinnullu ikioqqulluta qinnuigeqattaareerneratigut nuussinnaanngorsimavugut.” Siullermik Biibilimik atuaqqissaarnerusalerput. Taava aappariit illortik tuneriarlugu suliffimminnilu soraarniuteqariarlutik illoqarfimmut Altamut, Norgep avannarpasissuanut, aggustimi 2011-mi nuupput. Taavani pioneritut imminnut pilersorsinnaajumallutik Mareliusi naatsorsuuserisutut Kesialu pisinniartitsisutut sulisarput.

Aappariit Knutip Lisbethillu 30-t qaangerlugit ukiullit Jehovas Vidners Årbog-imi oqaluussisartunik pisariaqartitsiffiunerusumi kiffartortut pillugit oqaluttuat killinneqaatigaat. Lisbethi ima oqarpoq: “Misigisalikkersaarutit nunani allani kiffartornissamik eqqarsaatiginnilissutigaavut, inuillu nalinginnaasut uattut ittut taamaaliorsinnaanerat qularutigigakku tunuarsimaaqqaaraluarpunga.” Taamaakkaluartorli nuunnissartik sulissutigilerpaat. Knuti ima oqarpoq: “Inerput tunivarput sipaarsinnaajumallutalu anaanannut nuuppugut. Kingusinnerusukkut nunami allami kiffartornermut assingusumik misigisaqarumalluta ukioq ataaseq Bergenimi tuluttut oqaluttuni ilagiinniilerpugut Lisbethillu arnaani najugaqarluta.” Sivitsunngitsoq Knuti Lisbethilu alloriarnissaminnut, ungasissumut nuunnissaminnut, piareertutut misigigamik Ugandamut nuupput. Ukiumut qaammatit marluk suliniarlutik Norgemukaqqittarput. Taamaalillutik ukiup sinnerani Ugandami piffissaq tamaat oqaluussinissaminnut naammattunik aningaasaateqarsinnaasarput.

‘USSERSIUK TAKUSIULLU JEHOVA AJUNNGITSUUSOQ’

“Ilaqutariittut imminut qaninnerulerpugut.” — Roaldi

Kajumillutik kiffartortut taakku maanna qanoq ingerlappat? Roaldi ima oqarpoq: “Bergenimi najugaqarnitsinnut sanilliullugu najukkami avinngarusimasumi ilaqutariittut peqatigiinnerujussuanngorlutalu imminut qaninnerulerpugut. Meeqqat anersaakkut ineriartortut takullugit pilluaqqussutaangaarpoq.” Ima nangippoq: “Aamma pigisanut tunngatillugu oqimaaqatigiinnerusumik isiginnittaaseqalerpugut. Pigisat siornatigutulli pingaartikkunnaarpavut.”

 Elsebethip paasivaa oqaatsinik allanik ilinniartoqarnissaanik pisariaqartitsisoqartoq. Sooq? Illoqarfeeraq Karasjoki Samimiunut, tassa Norgep, Sverigep, Finlandip Ruslandillu inoqqaavinut, qitiulluinnartumik inissisimasoq Lakselvimi ilagiit angalaarfigisartagaannut ilaagami. Elsebethip Samimiut oqaluussiffigisinnaajumallugit taakkua oqaasii ilinnialerpai. Massakkullu Samimiut oqaloqatigilaarsinnaavai. Angalaarfigisartakkani nutaaq nuannaraa? Nuannaarpaseqaluni ima oqarpoq: “Arfinilinnik Biibilimik atuaqqissaaqateqartarpunga. Maani kiffartornera qiimmattaatigeqaara!”

Fabiani, maanna pioneriusoq ilagiinnilu kiffartortuusoq, oqaluttuarpoq Isabelilu ilagiiminni nutaami inuusuttuaqqat pingasut ilagiinni sammisartakkanut peqataasalernissaminnut kajumissaarneqarnissaminnik pisariaqartitsisut ikiorsimallugit. Inuusuttut taakku pingasut massakkut kiffartornermi aallussilluartuupput. Marlullu kuisimasuupput marsimilu 2012-imi ikiorti-pioneriullutik. Inuusuttuaqqat ilaat sallusuissummiikkunnaarsimagaluartoq Fabiani Isabelilu sallusuissummiileqqinnissaminut ikiorsimammanni qutsavigai. Fabiani ima oqarpoq: “Qujaniarnera killinneqaatigeqaara. Allanik ikiuineq ilumut pilluarnangaarpoq!” Isabeli ima oqarpoq: “Sulianni matumani ilumut ‘usserlugulu takuara Jehova ajunngitsuusoq.’” (Tuss 34:9) Ima nangippoq: “Tamatumalu saniatigut maani kiffartorneq nuannersorujussuuvoq!”

Mareliusi Kesialu maanna pilimanianngitsumik inuulersimagaluarlutik pisuujunerusutut misigipput. Altami ilagiit nuuffigisimasaat massakkut 41-nik oqaluussisartoqarpoq. Mareliusi ima oqarpoq: “Inuunerput qanoq allanngortigisimasoq takusinnaallugu qiimmaallannarpoq. Maani pioneritut kiffartorsinnaanitsinnut Jehova qutsavigisarparput. Ilumut allamik nalerisimaarnarnerusoqanngilaq.” Kesia ima oqarpoq: “Jehovamik tatiginninnerunissara ilikkarpara, taassumalu isumagilluartarpaatigut. Qanigisannillu ungasissumi najugaqarneq taakkuninnga peqateqallatuartarninnik qujamasuutiginninnerulissutigaara. Peqqissiminngilanga nuunniarluta aalajangersimagatta.”

Knuti Lisbethilu Ugandami ilaqutariinnik atuaqqissaaqateqartut

Knutimmi Lisbethillu Ugandamut nuussimanertik nuannaraat? Knuti ima oqarpoq: “Avatangiisit kulturillu allanartut sungiunniarsareqqaarpavut. Imeqarniarneq, innaallagiaqarniarneq naarluttarnerlu ajornartorsiutigillattaartarpavut, Biibilimilli atuaqqissaaqaterpassuaqarneq qiimmattaatigaarput!” Lisbethi ima oqarpoq: “Najukkatta ungasinngisaani inuit nutaarsiassamik nuannersumik oqaluussiffigineqanngisaannarsimapput. Taamaakkaluartorli oqaluussiffigiartoraangatsigit Biibilimik atuartartut uagutsinnit ilinniarteqqusut naapittarpavut. Ajoqersuutinik Biibilimiittunik inunnut taamaattunut maniguuttunut ilinniartitsineq nalissaqanngilaq!”

Siulersuisutta, Jiisusip Kristusip, oqaluussineq aallartissimasani nunarsuup isua tikillugu ingerlanneqartoq qilammit nakkutigalugu qiimmattaatiginngitsoornavianngilaa! Guutip innuttai tamarmik Jiisusip inunnik inuiannit tamaneersunik ajoqersuganngortitseqqusinera piviusunngortikkumallugu kajumillutik kiffartornertik uummatikkut iluunngarlutik nuannaarutigingaarpaat. — Matt 28:19, 20.