Imarisai

Imai

Jehovap Nalunaajaasui

Oqaatsit toqqakkit Kalaallisut

‘Takornartaasusi’, qitornasi ikiorsigit

‘Takornartaasusi’, qitornasi ikiorsigit

“Qitor­nak­ka sal­lusuis­sum­mi inuusut tusarlugit tas­sa tamanit uan­nut nuan­ner­ner­paaq.” – 3 JOH 4.

ERINARSUUTIT: 139, 41

1, 2. (a) Nunasisut meeraat unam­miniar­nar­tunik sunik nalaataqar­tar­pat? (b) Apeq­qutit suut al­laaserisami matumani sam­mis­savavut?

JOSHUA ima oqalut­tuar­poq: “Mikisun­nguul­lungali angajoq­qaama nunasisuusut oqaasii uagutsin­ni ilagiin­nilu ator­tar­pak­ka. Atualeramali oqaatsit nunasif­figisatsin­ni ator­neqar­tut atorusun­nerusaler­pak­ka. Ukiualuit ingerlaneran­ni oqaatsit taak­ku kisiisa atuler­pak­ka. Ataatsimiin­nerit paasisin­naan­ngilak­ka, aam­ma misigin­ngilanga angajoq­qaama kulturiat kultureralugu.” Joshuap misigisimasaa qaqutigoor­tuun­ngilaq.

2 Ul­lumik­kut inuit 240 millioninit amerlanerusut nunami inun­ngorfigisamin­ni najugaqan­ngil­lat. Angajoq­qaajuguit nunasisoq, meeq­qatit Jehovamik asan­nin­nermik ‘sal­lusuis­sum­milu inuunis­samik’ ilin­niar­nis­saan­nut qanoq pitsaaner­paamik periarfis­sis­sin­naavigit? (3 Joh 4) Aam­ma al­lat qanoq ikiuus­sin­naap­pat?

ANGAJOQQAAJUSUSI, MALIGASSIUILLUARITSI

3, 4. (a) Angajoq­qaat meeq­qamin­nut qanoq maligas­siuil­luarsin­naap­pat? (b) Angajoq­qaat meeq­qamik sunis­saat naatsorsuutigis­san­ngilaat?

3 Ilis­si angajoq­qaajususi, meeq­qas­si Jehovamut qanit­tumik at­taveqar­nis­saat naas­saan­ngitsumil­lu inuunis­saat kis­saatigigus­siuk maligas­siuinis­sarsi pingaaruteqarluin­nar­poq.  Meeq­qas­si naalagaaf­fik siul­liul­lugu noq­qaas­sutigigis­si takugunik­ku Jehovap ul­lormut pisariaqar­titamin­nik isumagin­nis­sin­naaneranik tatigin­nin­nis­sar­tik ilik­kas­savaat. (Matt 6:33, 34) Jehovamut kif­far­tor­nersi pigisanik katersinis­samin­ngar­nit pingaar­nerutis­siuk. Pilimanian­ngitsumik inooriaaseqaritsi akiitsoqar­naveersaarlusilu. ‘Qilam­mi pisuus­sutit’, tas­sa Jehovamit akuerisaanis­sarsi, noq­qaas­sutigisiuk, aningaasat ‘naalan­narsinis­sarluun­niit inun­nit pisoq’ noq­qaas­sutiginagit. – Markusi 10:21, 22 atuakkit; Joh 12:43.

4 Ima ulapitsigilin­ngisaan­naritsi meeq­qas­sin­nut pif­fis­saqar­piar­tas­sanasi. Im­min­nut eq­qarsaatigalutik ilis­siluun­niit pil­lusi pisun­ngor­nis­samin­nik tusaamasaaler­nis­samin­nil­luun­niit sal­liutitsinatik Jehova sal­liun­niarlugu aalajangeraangata tul­luusimaarutigisarisi paasitit­tarsigit. Inup­pas­suit isumaqar­put meeq­qat angajoq­qaamin­nik ilorrisimaar­titsil­lutik isumas­suisus­saasut. Taamatul­li kuk­kusumik isigin­nit­taaseqar­naveersaarlusi eq­qarsar­taaseq una pigilius­siuk: ‘Imaan­ngilaq qitor­naasut angajoq­qaat pis­saan­nik katersuisus­saasut, angajoq­qaanuku qitor­namik pis­saan­nik katersuisus­saasut’. – 2 Kor 12:14.

ANGAJOQQAAJUSUSI, OQAATSITIGUT UNAMMINIARNARTUT AJUGAAFFIGINIARSARISIGIT

5. Sooq angajoq­qaat Jehova pil­lugu meeq­qatik oqaloqatigikulasariaqar­paat?

5 Siulit­tuutigineqareersutut ‘im­mik­kut oqaasil­lit tamalaat’ Jehovap peqatigiis­sor­taanut or­nigus­sor­put. (Zak 8:23, tastamantitoĸaĸ) Qitor­nas­sili oqaatsisi paasil­luar­neq ajor­patigit, ilis­si taak­kunin­nga sal­lusuis­sut pil­lugu ilin­niar­titsinis­sarsi ajor­nakusoorsin­naavoq. Taak­ku Biibilimik atuaq­qis­saaqatigisar­tak­kas­sin­nit tamanit pingaaruteqar­ner­paajup­put, taak­kualu Jehovamik ilisarisiman­niler­nerat inuunermik naas­saan­ngitsumik kinguneqarsin­naavoq. (Joh 17:3) Ilis­si qitor­nasi Jehovap ajoqersuutai pil­lugit ilin­nias­sap­pata taak­ku ‘eq­qar­tukulasariaqar­pasi’. – 5 Mosesi 6:6, 7 atuakkit.

6. Meeq­qas­si ilis­si oqaatsis­sin­nik ilin­niar­nerat sunik iluaqutis­sar­taqarsin­naava? (Al­laaserisap aal­laq­qaataani as­seq takuuk).

6 Ilimanar­poq meeq­qas­si nunasif­figisas­sin­ni oqaaserineqar­tut atuarfim­mi al­lanil­lu ilik­kas­sagaat. Ilis­sili oqaatsisi ilik­kas­savaat oqaloqatigikulasarussigit. Meeq­qasi ilis­si oqaatsisi atorlugit oqalus­sin­naap­pata misigis­sutsitik pil­lugit ilis­si oqaloqatiginis­sarsi ajor­nan­ngin­nerutis­savaat. Al­lanit­taaq iluaqutis­sar­taqar­poq. Meeq­qasi arlariin­nik oqaaseqarunik taman­na eq­qarsarsin­naas­susian­nut al­lanil­lu paasin­nis­sin­naas­susian­nut sun­niuteqarluas­saaq. Aam­ma oqaluus­sinermi iliuuseqar­nerunis­samut periarfis­saqar­nerus­sap­put. Carolina nunasisunik angajoq­qaalik ima oqalut­tuar­poq: “Ilagiin­ni al­lanik oqaasilin­niil­luni nuan­neqaaq. Aam­ma pisariaqar­titsif­fiunerusuni ikiuutaal­luni pis­sanganar­tar­poq.”

7. Oqaatsit ilaqut­tas­sin­ni aporfiusar­pata qanoq iliorsin­naavit?

7 Nunasisul­li meeraat nunasif­figisamin­ni kulturerineqar­tunik oqaaserineqar­tunil­lu ilik­kariar­tor­til­lutik ilaat angajoq­qaamik oqaasii atorlugit oqaluk­kusuk­kun­naariar­torlutil­luun­niit oqalus­sin­naajun­naariar­tor­tar­put. Angajoq­qaajususi, ilis­si meeq­qasi taamaalisimap­pata, nunasif­figisas­sin­ni oqaaserineqar­tunik ilin­nialaarsin­naas­savisi? Meeq­qas­si kristumiutut perorsar­nis­saat ajor­nan­ngin­nerutis­savarsi oqalun­neri, aliik­kutaat atuarfim­mil­luun­niit ilin­niagas­saat paasisin­naagus­sigit  aam­ma ilin­niar­titsisui toq­qarlugit oqaloqatigisin­naagus­sigit. Ilumoor­poq oqaatsinik al­lanik ilin­niar­neq pif­fis­sar­tor­narlunilu ilungersor­narlunilu maniguun­niar­nar­tuusar­toq. Im­minul­li akilersin­naavoq. As­sersuutigalugu meerarsi tusilar­tun­ngus­sagaluar­pat at­tavigisin­naajumal­lugu us­sersorluni oqalun­neq ilin­nias­sagaluar­parsi, ilaa? Meeraq oqaatsit al­lat atorlugit oqal­lorin­nerusoq taamatul­li soqutigitigisariaqar­par­put, ilaa? *

8. Nunasif­figisan­ni oqaatsit pik­korif­figin­ngik­kuk­kit meeq­qatit qanoq ikiorsin­naavigit?

8 Angajoq­qaat nunasisut oqaatsit meeq­qamik atuligaat atorlugit oqal­loris­sinis­sar­tik ar­tor­nar­tis­sin­naavaat. Angajoq­qaat oqaatsitigut kil­leqarunik meeq­qamik ‘Al­lak­kanik Il­ler­nar­tunik’ paasin­nin­nis­saan­nut ikioruminaatsis­sin­naavaat. (2 Tim 3:15) Ilis­si atuk­kasi taamaap­pata, meeq­qasi Jehovamik ilisarisiman­niler­nis­saan­nut asan­niler­nis­saan­nul­lu suli ikiorsin­naavasi. Utoq­qaaner­taq Shanimik atilik ima oqar­poq: “Anaanat­ta kisimiit­tup oqaatsinik uagut paasil­luar­nerusin­naasatsin­nik paasin­nis­sin­naanera kil­leqar­poq, aam­ma qatan­ngutik­kalu taas­suma oqaasii pik­korif­figin­ngilavut. Takusar­par­pul­li atuaq­qis­saar­toq, qinusoq sapaatil­lu-akun­neri tamaasa ilaqutariit­tut atuaq­qis­saaqatigiit­tar­nias­sagat­ta sapin­ngisaminik ilior­toq, taamaalil­lutalu paasivar­put Jehovamik ilisarisiman­niler­niar­nis­saq pingaaruteqar­torujus­suusoq.”

9. Angajoq­qaat meeq­qatik oqaatsit marluk atorlugit atuaq­qis­saar­tariaqar­pata qanoq ikiorsin­naavaat?

9 Meeq­qat ilaat oqaatsit marluk atorlugit Jehova pil­lugu ilin­niar­tariaqarsin­naap­put – oqaatsit atuarfim­mi ator­tak­katik atorlugit oqaatsil­lu angerlarsimaf­fim­min­ni ator­tak­katik atorlugit. Taamaat­tumik angajoq­qaat ilaasa atuak­kat atuagas­sial­lu, tusar­naagas­siat filmiaq­qal­lu atorlugit meeq­qamin­nik ilin­niar­titsinermin­ni oqaatsit marluk ator­tar­paat. Erseq­qip­poq angajoq­qaat nunasisuusut meeq­qatik Jehovamut qanil­linis­saan­nut ikiorumal­lugit iliuuseqar­nerusariaqar­tut.

ILAGIINNUT SORLERNIK OQAASILINNUT AGGERTASSAVISI?

10. (a) Ilagiin­nut sorler­nukar­tar­nis­saq pil­lugu kina aalajangiisariaqar­pa? (b) Ilaqutariinni it­tuusoq aalajangiin­ngin­nermini susariaqar­pa?

10 “Takor­nar­tat” Nalunaajaasunit oqaaseqatigisamin­nit ungasis­sumi najugaqaraangamik ilagiit najugarilik­kamin­ni oqaaserineqar­tunik oqalut­tut peqatigisariaqar­tar­paat. (Tuss 146:9) Ilageeqar­pal­li oqaatsinik ilitsoq­qus­samin­nik atuisunik ilaqutariin­ni it­tuusup man­na eq­qarsaatigisariaqas­savaa: Ilagiit sorler­nik oqaasil­lit ilaqut­taminut pitsaanerus­sap­pat? Aalajangin­ngin­nermini eq­qarsaatigin­neq­qis­saaq­qaarlunilu taman­na pil­lugu qinusariaqar­poq. Aam­ma nuliani meeq­qanilu oqaloqatigeq­qaas­savai. (1 Kor 11:3) Suut eq­qarsaatigil­luas­savai? Najoq­qutas­siat Biibilimiit­tut suut aalajangiinis­saminut iluaqutigisin­naavai?

11, 12. (a) Oqaatsit meeq­qap ataatsimiin­ner­ni qanoq paasisaqar­tigineranut qanoq sun­niuteqar­tar­pat? (b) Sooq meeq­qat ilaat angajoq­qaamik oqaasiinik ilin­niarusun­neq ajor­pat?

11 Angajoq­qaajusut meeq­qamik sor­piaat pisariaqar­tin­neraat eq­qarsaatigisariaqar­paat. Meeq­qat sal­lusuis­sutinik Biibilimiit­tunik paasin­nil­luas­sap­pata sapaatit-akun­neri tamaasa ataatsimiin­ner­ni akun­ner­paalun­ni Biibilimik ilin­niar­tin­neqar­tar­nis­saat naam­man­ngilaq. Mak­kuli eq­qarsaatigik­kit: Meeq­qat oqaatsinik  paasil­luar­nerusin­naasaan­nik atuif­fiusumi ataatsimiin­nerin­nar­til­luun­niit iluaqutigingaar­tar­paat, im­maqa angajoq­qaat ilimagisaan­nin­ngar­nit ilin­niagaqar­nerusarlutik. Oqaatsit meeq­qat paasil­luan­ngisaat ator­neqar­tuup­pata taama paasisaqar­tiginis­saat ilimanan­ngilaq. (1 Korinthimiut 14:9, 11 atuakkit). Aam­ma meeq­qap ilitsoq­qus­saralugit oqaatsini eq­qarsaatimigut misigis­sutsimigul­lu im­maqa at­tor­tin­neqaatigiuaan­nar­navian­ngilai. Meeq­qam­mi ilaat angajoq­qaamik oqaasii atorlugit akinermik, takutitsinermik saq­qum­mius­sinermil­lu ilik­karsimasar­put, nam­min­nerli eq­qarsaatimin­nik misigis­sutsimin­nil­lu ersersitsisin­naaneq ajorlutik.

12 Aam­mat­taaq meeq­qap uum­mataanut sun­niuteqar­tar­tut oqaasiin­nan­ngil­lat. Joshuamut, eq­qaariik­katsin­nut, tun­ngatil­lugu taamaas­simavoq. Taas­suma aleqaa Esther ima oqar­poq: “Meeq­qat mikisut angajoq­qaamik oqaasiinit, kulturian­nit up­perisaan­nil­lu sun­ner­tit­tar­put.” Meeq­qat angajoq­qaamik kulturian­nik pigilius­sisiman­ngik­kunik imaas­sin­naavoq taak­kua oqaasii up­perisaal­lu ilin­niarusun­ngik­kaat. Angajoq­qaat nunasisuusut qanoq iliorsin­naap­pat?

13, 14. (a) Sooq aap­pariit nunasisut meeq­qatil­lu ilagiin­nut nunasif­fim­mik oqaasiinik atuif­fiusunut ataatsimiigiar­taler­pat? (b) Angajoq­qaat taak­ku qanoq ilil­lutik Jehovamut qanimut at­taveqar­tuar­pat?

13 Angajoq­qaat kristumiut nam­min­neq piumanerusamin­nik sal­liutitsinatik meeq­qamik pisariaqar­titaan­nik sal­liutitsisar­put. (1 Kor 10:24) Joshuap Estheril­lu ataataat, Samuel, ima oqar­poq: “Nuliaralu maluginiar­tar­par­put meeq­qat­ta oqaatsit sorliit sal­lusuis­sum­mut tun­ngatil­lugu kil­lin­neqaatigisar­neraat, ilisimas­suseqar­nis­sar­pul­lu qin­nutigisar­par­put. Iliuusis­satsitut eq­qor­tutut paasisar­put akun­nagigaluar­par­put. Uagul­li oqaatsitsin­nik atuif­fiusumut ataatsimiigiaraangat­ta im­man­nguaan­naq iluaqutigisaraat paasigatsigu aalajanger­pugut ilagiin­nut nunasif­figisatsin­ni oqaaserineqar­tunik atuif­fiusunut nuun­niarluta. Tamatigut ataatsimiigiaqatigiit­tarlutalu oqaluus­seqatigiit­tar­pugut. Aam­ma ilageeqatitsin­nik neriar­toq­qusisarlutalu aneeqatiserin­nit­tar­pugut. Tamak­ku tamaasa meeq­qat­ta qatan­ngutitsin­nik ilisarisiman­niler­nis­samin­nut iluaqutigaat, aam­ma Jehova Guutimit­tut taamaal­laat ilisarisimanagu aam­mali Ataatatut Ikin­ngutitul­lu ilisarisimaler­paat. Taman­nalu uagut oqaatsitsin­nik oqalus­sin­naanis­saan­nin­ngar­nit pingaar­nerungaar­tutut isigaar­put.”

14 Samuel ima nangip­poq: “Nuliaralu anersaak­kut nukit­tujuarumal­luta ilagiin­nut uagut oqaatsivut atorlugit ataatsimiit­tar­tunut ataatsimiigiar­tar­pugut. Ulapeqaagut, qasusaqaagul­lu. Jehovali qutsavigaar­put ilungersor­nivut pil­liutivul­lu pil­luaq­qum­magit. Meeq­qavut pingasut tamarmik pif­fis­saq tamaat Jehovamut kif­far­tor­put.”

INUUSUTTUAQQAT QANOQ ILIORSINNAASUT

15. Sooq qatan­ngut Kristinamik atilik misigiva ilagiin­ni nunasif­figisamik oqaasilin­niik­kuni pitsaanerus­sasoq?

15 Meeq­qat peroriar­tor­til­lutik imaas­sin­naavoq paasigaat ilagiin­ni oqaatsinik paasil­luar­nerusin­naasamin­nik atuif­fiusuni Jehovamut kif­far­torluar­nerusin­naal­lutik. Taamaap­pat taak­kua angajoq­qaavi misigis­san­ngil­lat meeq­qamik ajat­toraatik. Kristina oqalut­tuar­poq: “Angajoq­qaama oqaasii tun­ngaviusutigut nalun­ngilak­ka, taak­kuali oqaasii atorlugit ataatsimiin­ner­ni malin­naal­luarsin­naan­ngilanga.  Aq­qaneq-marlun­nik ukioqarlunga oqaatsit atuarfim­mi ator­tak­kak­ka atorlugit ataatsimeersuar­toqar­toq peqataavunga. Taamanik­kut aatsaat paasiler­para tusar­naak­kak­ka sal­lusuis­sutaasut! Aam­ma nuan­nersumik al­lan­nguivunga nunasif­figisatsin­ni oqaaserineqar­tut atorlugit qinusalerama. Jehova uum­mam­miuk­ka pil­lugit oqaloqatigisin­naan­ngor­para!” (ApS 2:11, 41) Kristina 18-inik ukioqalerami tamak­ku pil­lugit angajoq­qaani oqaloqatigai aalajangerlunilu ilagiin­nut nunasif­figisamik oqaasiinik oqaasilin­nut nuun­niarluni. Ima oqar­poq: “Iliuuseqar­nis­san­nut kajumis­sivunga oqaatsit atuarfim­mi ator­tak­kak­ka atorlugit Jehova pil­lugu ilin­niarama.” Sivitsun­ngitsoq Kristina pionerin­ngor­poq, nuan­naaqaarlu.

16. Sooq Nadiap ilagiin­ni al­lamiutut oqalut­tuniigin­nar­ner­tik nuan­naarutigaa?

16 Ilis­si inuusut­tuaraasusi, nunasif­figisas­si oqaasiinik oqaasilin­ni ilagiin­niik­kusup­pisi? Taamaap­pat im­minut aperigitsi sooq ilagiin­nut taak­kunun­nga nuuk­kusun­nersusi. Ilagiin­nut taama it­tunut nuuk­kusup­pit Jehovamut qanil­linerunis­san­nut iluaqutaanias­sam­mat? (Jaak 4:8) Imaluun­niit nuuk­kusup­pit iliuutsitit tamarmik angajoq­qaan­nit nak­kutigineqan­ngin­nias­sam­mata imaluun­niit suliniuteqarusup­pal­laan­ngin­navit? Nadia, maan­na Betelimi kif­far­tor­toq, ima oqar­poq: “Qatan­ngutik­kalu inuusut­tuaran­ngorat­ta ilagiin­nut nunasif­figisat­ta oqaasiinik oqaasilin­nut nuuk­kusup­pugut.” Angajoq­qaavisali nalun­ngilaat taman­na meeq­qamik Jehovamut at­taveqar­neran­nut iluaqutaanavian­ngitsoq. “Maan­na qujamasuutigaar­put angajoq­qaavut ilungersorsimam­mata oqaatsimin­nik ilin­niar­tin­niarluta ilagiin­nilu al­lamiutut oqalut­tuniigin­narsimagat­ta. Inuunitsin­nut pisuun­ngual­laataavoq, al­lal­lu Jehovamik ilisarisiman­niler­nis­saan­nik ikior­nis­saan­nut periarfis­saqar­nerulis­sutigaar­put.”

ALLAT QANOQ IKIUISINNAASUT

17. (a) Jehovap kik­kut meeq­qanik perorsaanis­samik akisus­saaf­filer­pai? (b) Angajoq­qaat meeq­qamin­nik sal­lusuis­sut pil­lugu ilin­niar­titsinermi qanoq ikior­tis­sarsiorsin­naap­pat?

17 Jehovap angajoqqaat akisus­saaf­filer­pai sal­lusuis­sut pil­lugu meeq­qamin­nik ilin­niar­titsinis­samik. Akisus­saaf­fik taman­na aatak­kuinut al­lanul­luun­niit tun­niutin­ngilaa. (Ussatit 1:8; 31:10, 27, 28 atuakkit). Angajoq­qaal­li nunasif­figisamin­ni oqaaserineqar­tunik atuisin­naan­ngitsut meeq­qamik uum­mataan­nik angusinis­samin­nut ikior­neqar­tariaqarsin­naap­put. Angajoq­qaat ikioq­qup­pata imaan­ngilaq meeq­qamin­nik perorsaanis­samut akisus­saaf­fim­min­nik ajat­tuisut. Taamaalior­neral­li “Jehovap ileq­qoreq­qusai oqaaq­qisaarutaalu malil­lugit” meeq­qamin­nik perorsaaneran­nut ilaasin­naavoq. (Ef 6:4NW) As­sersuutigalugu angajoq­qaat ilaqutariit­tut qanoq atuaq­qis­saaqatigiit­tarsin­naaner­tik pil­lugu ilagiin­ni utoq­qaaner­tanut siun­nersoq­qusin­naap­put meeq­qamin­nul­lu pitsaasunik ikin­ngutis­sarsiuus­sinermi ikioq­qusin­naal­lutik.

Qitornaasut angajoqqaajusullu ilagiinniittunik peqateqartarnertik iluaqutigissavaat (Immikkoortut 18 aamma 19 takukkit)

18, 19. (a) Kristumiut inuusut­tuaq­qanik qanoq ikiuisin­naap­pat? (b) Angajoq­qaat sujuar­tariaqar­pat?

18 Angajoq­qaat meeq­qatik ikiorumal­lugit ilaqutariit­tut atuaq­qis­saaqatigiin­nis­samin­nut ilaqutariin­nik al­lanik ilaan­nik­kut ilaserin­nit­tarsin­naap­put. Inuusut­tuarar­pas­suit­taaq kristumioqatitik oqaluus­seqatigisarunik­kit al­lanil­lu sam­misaqaqatigisarunik­kit taak­ku ilin­niarfigisin­naavaat. (Uss 27:17) Shan, eq­qaariigar­put, ima oqar­poq: “Eq­qaamal­luar­para qatan­ngutit­ta isumas­sorluarman­nga. Ataatsimiin­ner­ni saq­qum­mius­sinis­san­nut  ikioraangamin­nga ilik­kagaqar­nerujuaan­nar­punga. Aam­ma oqaluus­sisar­toqatigiiul­luta sun­ngif­fim­mi sam­misaqaqatigiik­kaangat­ta nuan­ner­taqaaq.”

19 Soorunami meeq­qanik ikiuisus­satut angajoq­qaanit toq­qar­neqarsimasut meeq­qat angajoq­qaamin­nik ataq­qin­neq­qul­lugit kajumis­saar­tuaan­nas­savaat. Taamaalior­toqarsin­naavoq angajoq­qaajusut eq­qar­torluar­tar­nerisigut angajoq­qaal­lu meeq­qamin­nik perorsaanis­samut akisus­saaf­fian­nik arsaan­ngin­nerisigut. Aam­ma ikiuisut ilagiin­neersunit ilagiil­luun­niit avataan­neersunit ileq­qus­satigut eq­qun­ngitsulior­ner­tut paatsoor­neqarsin­naasumik pis­susilersor­naveersaar­tariaqar­put. (1 Petr 2:12) Angajoq­qaat al­lanut ikioq­qugaluarunil­luun­niit meeq­qamin­nik sal­lusuis­sut pil­lugu ilin­niar­titsinis­sar­tik suli akisus­saaf­figaat. Kristumioqatimik ikiuineran­nik nak­kutigin­nit­tariaqar­put.

20. Angajoq­qaat meeq­qatik Jehovamut aalajaal­lutik kif­fan­ngor­nis­saan­nut qanoq ikiorsin­naavaat?

20 Angajoq­qaajususi, Jehovamut ikioq­qul­lusi qinusaritsi, sapin­ngisarsilu tamaat iliuuseqaritsi. (2 Nalunaarsuutit 15:7 atuaruk). Meeq­qas­si Jehovamut ikin­ngutaanis­saat ilis­si soqutigisas­sin­nit pingaar­nerutis­siuk. Meeq­qas­si uum­mataat Guutip oqaasianit kil­lin­neqarsin­naaq­qul­lugit sapin­ngisarsi tamaat iliuuseqaritsi. Ilis­si qitor­nas­si Jehovamut kif­fan­ngorsin­naanerat qularutigilin­ngisaan­narsiuk. Meeq­qasi Guutip oqaasianik ilis­silu maligas­sias­sin­nik malin­nip­pata apustilip Johan­nesip anersaak­kut qitor­nani pil­lugit misigineratut misigis­saasi, taan­na ima al­lak­kami: “Qitor­nak­ka sal­lusuis­sum­mi inuusut tusarlugit tas­sa tamanit uan­nut nuan­ner­ner­paaq.” – 3 Joh 4.

^ par. 7 Takuuk al­laaserisaq “Du kan lære et andet sprog!”, Vågn op! marsi 2007-imoor­tumi, qupp. 10-12.