Imarisai

Imai

Jehovap Nalunaajaasui

Oqaatsit toqqakkit Kalaallisut

Annikilliornitsini tamani Jehovap tuppallersartarpaatigut

Annikilliornitsini tamani Jehovap tuppallersartarpaatigut

‘Guuti tup­pal­lersaajuar­toq an­nikil­liuuteqar­nitsin­ni tamani uatsin­nik tup­pal­lersaasar­poq.’ – 2 KOR 1:3, 4.

ERINARSUUTIT: 38, 56

1, 2. Jehovap an­nikil­lior­nitsin­ni qanoq tup­pal­lersar­tar­paatigut, oqaatsiminilu qanoq neriorsor­paatigut?

QATAN­NGUTIP angutip aap­paqan­ngitsup Korinthimiunut al­lak­kat siul­liit 7:28 aap­pariit ‘inuunermin­ni ajor­nar­torsiorumaar­neran­nik’ al­las­simasor­talik eq­qarsaatigisarsimavaa. Utoq­qaaner­tarlu aap­palik oqaloqatigigamiuk ima aperaa: “‘Ajor­nar­torsiutit’ suunuku pineqar­tut? Aap­par­taas­sagumalu tamak­ku qanoq iliuuseqarfigisas­savak­ka?” Apeq­qutaali akitin­nagu apustilip Paulusip al­lataa al­la una eq­qarsaatigeq­qaaq­quaa: Jehova ‘Guutiuvoq tup­pal­lersaajuar­toq an­nikil­liuuteqar­nitsin­ni tamani uatsin­nik tup­pal­lersaasar­toq’. – 2 Kor 1:3, 4.

2 Nalun­ngilar­put Ataatat­ta Jehovap asagaatigut ajor­nar­torsioraangat­talu tup­pal­lersar­taraatigut. Misigisimas­sagunar­pat Jehovamit an­ner­toq­qusersor­neqarlutil­lu oqaatsini aq­qutigalugu siulersoraatit. Pitsaaner­paamik kis­saak­kaatigut, soorlu itsaq kif­fani taama pisarsimagai,  up­peril­luin­narsin­naavar­put. – Jeremia 29:11, 12 atuakkit.

3. Al­laaserisami matumani apeq­qutit suut akineqas­sap­pat?

3 Ajor­nar­torsiutinut an­nikil­liuutinul­lu pis­sutaasut nalun­ngik­kaan­ni piner­tusaar­nis­saq saper­nan­ngin­nerusar­poq. Aap­pariit­tut ilaqutariit­tul­lu suut ajor­nar­torsiutigisin­naavavut? Oqalut­tuat Biibilimeersut nalitsin­neersul­lu suut tup­pal­lersaatigisin­naavavut? An­nikil­lior­nitsin­ni qanoq piner­tusaarsin­naasugut paasiniarlugu apeq­qutit taak­ku akis­sutis­sarseriar­tigit.

AAPPARIIT AJORNARTORSIUTAAT

4, 5. Uiusup nuliaasul­lu suut ajor­nar­torsiutigisin­naavaat?

4 Jehovap ar­naq siul­leq pin­ngor­teriarlugu angum­mut nuliar­taaritip­paa. Taava Jehova ima oqar­poq: “Angutip ataatani anaananilu qimal­lugit nuliani at­tavigis­savaa, uiniulis­sap­pul­lu ataaseq.” (1 Mos 2:24) Soorunami ul­lumik­kut tamat­ta naam­mal­luin­nan­ngitsuuvugut. (Rom 3:23) Taamaat­tumik angut ar­narlu aap­pariileraangamik ajor­nar­torsior­tar­nis­saat ilimagisin­naavar­put. As­sersuutigalugu ar­naq aap­paqan­ngin­nermini angajoq­qaani naalat­tarsimas­savai. Guutil­li oqaasiani al­las­simavoq aap­pariilerunik uiusoq nuliaminut niaquus­sasoq. (1 Kor 11:3) Uiusup aal­laq­qaam­mut nuliaminik siulersuinis­sani saper­nar­tis­sin­naavaa. Nuliaasul­lu angajoq­qaaminit siulersor­neqarun­naarluni uiminit siulersor­neqaler­nini akueriuminaatsis­sin­naavaa. Aam­ma kater­naat sakitil­lu isumaqatigiin­ngis­sutigisin­naasaat ajor­nar­torsiutin­ngorsin­naap­put.

5 Aam­ma aap­pariit qitor­nar­taar­tus­san­ngorlutik paasigamik­ku qanoq misiginersut eq­qarsaatigiuk. Nuan­naangaaraluarlutik isumakuluuteqar­tar­put. Nuliaasup naar­tunera qanoq is­sava? Meeraq peq­qis­suus­sava? Aam­ma aningaasar­tuuteqar­nerulis­sap­put. Meeq­qap inun­ngor­nerata kingor­na al­latigut aam­ma al­lan­nguisariaqar­put. Anaanaasup naalungiarsuup isumaginis­saanut pif­fis­sarujus­suaq atus­savaa. Taamaat­tumik uiusoq nuliaasorlu im­min­nut pif­fis­sakin­nerulis­sap­put. Ataataasoq aam­ma akisus­saaf­feqar­neruler­poq. Nuliani qitor­nanilu pisariaqar­titaan­nik pilersor­tus­saavai.

6-8. Aap­pariit qitor­nar­taarsin­naan­ngitsut qanoq misigisin­naap­pat?

6 Aap­pariit al­lat al­lamik ajor­nar­torsiuteqar­put. Qitor­nar­taarusungaaraluarlutik qitor­naatsuup­put. Nuliaasoq naar­tulin­ngik­kuni misigis­sutsik­kut an­niangaarsin­naavoq. (Uss 13:12) Biibilip nalaani ar­nanut aap­par­taar­neq qitor­naqar­nerlu pingaaruteqangaar­put. Taamaat­tumik Rakelip Jaakup nuliata angajumi naar­tunera paasigamiuk nam­mineq er­nisuitsuunini aliasuutigaa. (1 Mos 30:1, 2) Ul­lumik­kut nunat ilaan­ni inup­pas­suit isumaqar­put qitor­nar­pas­suaqar­neq pingaaruteqangaar­toq. Ajoqersuiar­tor­titat nunani taamaat­tuni najugal­lit aperitit­tar­put sooq qitor­naqan­ngin­nerlutik. Qitor­naqan­ngin­nermin­nut pis­sutaasoq sapin­ngisamin­nik nas­suiareeraluarlugu suli ima oqarfigitit­tar­put: “Qitor­nar­taar­nis­sarsi qin­nutigis­savar­put!”

7 Al­lamik as­sersuuteqariar­ta. Qatan­ngut  ar­naq Tuluit Nunaan­ni najugalik qitor­nar­taarusut­tuaan­narsimavoq. Paasigamiuk silarsuarmi matumani qitor­nar­taarsin­naanani aliatsangaar­poq. Uinilu qitor­navis­siar­taar­nis­sar­tik aalajangiutereeraluarlugu nulia suli aliasup­poq. Ima oqar­poq: “Nalun­ngilara qitor­navis­siar­taar­neq nam­mineq qitor­nar­taar­ner­tul­li in­ngitsoq.”

8 Biibilimi al­las­simavoq ar­naq ‘qitor­nior­nermigut an­naan­neqas­sasoq’. (1 Tim 2:15) Taman­nali isumaqan­ngilaq qitor­nar­taar­nini pis­sutigiin­narlugu naas­saan­ngitsumik inuulersin­naasoq. Qanorli isumaqar­pa? Anaanaasup qitor­nani angerlarsimaf­fitsil­lu isumaginiarlugit ulapit­tarami al­lanik ajor­tumik oqal­lisigin­nin­nis­saminut susas­sarin­ngisaminul­lu akuliutin­ngin­nis­saminut iluaqutigis­savaa. (1 Tim 5:13) Taamaak­kaluar­toq aap­parminut ilaqut­taminul­lu tun­ngatil­lugit ajor­nar­torsiorsin­naavoq.

Jehovap oqaatsimini neriorsuuter­pas­sui ar­torsar­nitsin­ni tup­pal­lersaatigisar­pavut

9. Aap­paqar­nermut tun­ngatil­lugu aam­ma suna ajor­nar­torsiutaasin­naava?

9 Aap­paqar­nermut tun­ngatil­lugu ajor­nar­torsiutigisin­naasat ilagaat aap­paasup toqunera. Taamatut misigisaqar­nis­sar­tik ilimagin­ngik­kaluarlugu inup­pas­suit aap­par­tik asasar­tik toquk­kut an­naasimavaat. Kristumiut toqusunit makititaanis­saq up­peril­luin­nar­paat, taman­nalu tup­pal­lersaatigingaar­tar­paat. (Joh 5:28, 29) Ataatat­ta Jehovap oqaatsimini neriorsuuter­pas­sui ar­torsar­nitsin­ni tup­pal­lersaatigisar­pavut. Maan­na sam­meriar­tigu Jehovap kif­faasa ilaat taas­suman­nga qanoq tup­pal­lersar­neqarsimasut qanorlu taman­na iluaqutigisimaneraat.

Aap­pat toqup­pat suut tup­pal­lersaatigisin­naavigit? (Im­mikkoortut 9 aamma 12 takukkit)

ANNIKILLIORNITSINNI TUPPALLERSARNEQARNEQ

10. Han­na qanoq tup­pal­lersar­neqar­pa? (Al­laaserisap aal­laq­qaataani as­siliaq takuuk).

10 Han­na Elkanap nulia asasaq qanoq an­nikil­lior­toq sam­meriar­tigu. Qitor­nar­taarusuk­kaluarluni qitor­nar­taarsin­naan­ngilaq. Elkanap nuliata aap­paa Penin­na qitor­nar­pas­suaqar­poq. (1 Samueli 1:4-7 atuakkit). Taas­suma Han­nap er­nisuitsuunera ‘ukior­pas­suar­ni’ il­laruaatigisarsimavaa. Taman­na Han­nap aliasuutigingaar­paa. Tup­pal­lersar­neqarumal­luni sua? Jehovamut qinuvoq. Al­laat Jehovamik pal­lorfigin­nit­tarfiliar­poq sivisuumil­lu qinul­luni. Er­ner­taar­nis­sani Jehovamut qin­nutigaa ikiorumaaraanilu tatigalugu. Qinoreerami iluaal­latsitsingaar­poq “isik­kualu aliasup­paluk­kun­naarluni”. (1 Sam 1:12, 17, 18) Nalun­ngilaa er­ner­taan­ngik­kuni Jehovap al­latut tup­pal­lersarumaaraani.

11. Qinuneq qanoq tup­pal­lersaatigisin­naavar­put?

11 Naam­mal­luin­nan­ngitsuugat­ta Saatanil­lu silarsuaani inuugat­ta an­nikil­lior­tuas­saagut. (1 Joh 5:19) Ikior­tis­saqar­pugul­li. Jehovamut ‘Guutimut tup­pal­lersaajuar­tumut’ qinusin­naavugut. Han­na taamaalior­poq. Qanor­piaq misiginerluni  Jehovamut oqaatigaa ikioq­qul­lunilu kimigiiserfigalugu. Taamatul­li uagut an­nikil­liuuteqaraangat­ta ajor­nar­torsiutit­ta oqaatigiinnarnissaat naam­magisas­san­ngilar­put. Ilungersorluta qin­nuigisariaqar­par­put qanor­piarlu misiginerluta oqalut­tuul­lugu. – Fil 4:6, 7.

12. An­nap an­nikil­lioraluarluni pil­luar­nis­saminut suna iluaqutigaa?

12 Qitor­naqan­ngin­ner­put asasat­taluun­niit toqunera pis­sutigalugu aliasungaarsin­naavugut. Tup­pal­lersaatis­saqar­pugul­li. An­na Jiisusip nalaani inuusoq eq­qarsaatigiuk. Ukiuni arfineq-marluin­nar­ni aap­pareereerlutik uia toquvoq. Qitor­naqarunan­ngilarlu. Sunali iluaqutigaa? “Naalaf­fik qiman­ngisaan­nar­paa.” 84-inik ukioqaraluarluni suli naalaf­filiar­tar­poq qinujar­torluni Jehovalu pal­lorfigiar­torlugu. (Luk 2:37) Taman­na tup­pal­lersaatigisar­paa an­nikil­lioraluarlunilu pil­luar­nis­saminut iluaqutigalugu.

13. Ilaqut­tatsin­nit pakatsisin­neqas­sagut­ta ikin­ngutaal­luar­tut qanoq tup­pal­lersaasigisin­naavavut?

13 Aam­ma ikin­ngutigil­luak­kavut ilagiin­niit­tut tup­pal­lersaasigisin­naavavut. (Uss 18:24) Paula tal­limaan­nar­nik ukioqar­toq ar­naa Jehovamut kif­far­torun­naar­poq. Taman­na Paulap aliasuutigingaarlugulu ar­torsaatigaa. Qatan­ngutil­li ar­nap An­nimik atil­lip pioneriusup qiim­mas­sarlugulu asan­nit­tumik isumas­sor­paa. Paula ima nas­suiaavoq: “An­n ilaqutarin­ngik­kaluarlugu asan­nit­tumik isumas­suinera Jehovamut kif­far­tor­tuar­nis­san­nut iluaqutigaara.” Paulap nuan­naarutigingaagaanik ar­naa ilagiin­nut uter­poq. An­n aam­ma nuan­naar­poq Paula Jehovamut kif­far­tor­tuar­nis­saanut ikiorsin­naagamiuk.

14. Al­lanik tup­pal­lersaagaangat­ta nam­mineq qanoq iluaqutigisar­par­put?

14 Ajun­ngitsulior­neq ulap­putigigaangatsigu nam­mineq ajor­nar­torsiutivut puior­tar­pavut. As­sersuutigalugu qatan­ngutit ar­nar­pas­suit, aap­pal­lit aap­paqan­ngitsul­lu,  Guutip naalagaaf­fia pil­lugu nutaarsias­saq nuan­nersoq oqaluus­sis­sutigigaangamik­ku nalusan­ngilaat Jehova suleqatigalugulu piumasaatut iliorlutik. Taman­na pil­luas­sutigisar­paat. Tamat­tami al­lat nutaarsias­samik nuan­nersumik oqalut­tuun­nerisigut taak­ku isumas­sorsin­naavavut. Qatan­ngutivul­lu ajun­ngitsuliorfigigaangatsigit qanil­lisar­pavut. (Fil 2:4) Apustili Paulusi taamaalior­tar­poq. Al­lat isumas­sor­tar­pai “soorlu anaanap qitor­nani paaq­qisarai”. Paulusip aam­ma qatan­ngutini tup­pal­lersarlugil­lu qiim­mas­sar­tar­pai “ataatap qitor­naminut ileq­qorisar­tagaatut”. – 1 Thessalonikamiut 2:7, 11, 12 atuakkit.

 ILAQUTARIINNI TUPPALLERSARNEQARNEQ

15. Meeq­qat ilin­niar­tin­nis­saat kik­kut akisus­saaf­figaat?

15 Ilaqutariit ilagiin­niit­tut qanoq tup­pal­lersarsin­naavavut? Ilaan­nik­kut oqaluus­sisar­tun­ngorlaanit aperineqar­tar­pugut qitor­natik Jehova pil­lugu ilin­niar­tis­sin­naanerivut al­laal­luun­niit Biibilimik atuaq­qis­saaqatigisin­naanerivut. Biibilimi ersersin­neqar­poq angajoq­qaat qitor­namin­nik ilin­niar­titsineq perorsaanerlu akisus­saaf­figigaat. (Uss 23:22; Ef 6:1-4) Al­lat ilaan­nik­kut ikiuisin­naagaluar­tut angajoq­qaat qitor­namin­nik ilin­niar­titsinis­saat pingaaruteqangaar­poq. Qitor­natik oqaloqatigikulasariaqar­paat.

Angajoq­qaat qitor­natik oqaloqatigikulasariaqar­paat

16. Meeq­qanik ilin­niar­titsigaangat­ta suna eq­qaamasas­savar­put?

16 Angajoq­qaanit aperineqaraangat­ta qitor­nar­tik Biibilimik atuaq­qis­saaqatigisin­naanerip­put angajoq­qaavitut oqar­tus­saas­suseqar­nias­san­ngilagut. Ilaan­nik­kut meeraq sal­lusuis­sum­miin­ngitsunik angajoq­qaalik atuaq­qis­saaqatigisin­naavar­put. Meeraq nam­mineq qitor­narin­ngisar­put atuaq­qis­saaqatigigaangatsigu silatusaas­saagut taas­suma angerlarsimaf­fiani angajoq­qaavi angerlarsimatil­lugit Nalunaajaasumil­luun­niit inersimal­luar­tumik najuut­toqar­til­lugu sumiif­fim­miluun­niit al­lami inun­nut al­lanut saq­qumisumi atuaq­qis­saaqatigigutsigu. Taamaalior­nik­kut susoqar­nera paasinerlun­neqas­san­ngilaq. Im­maqalu pif­fis­sap ingerlanerani meeq­qap angajoq­qaavisa qitor­natik Jehova pil­lugu ilin­niar­tis­sin­naalis­savaat.

17. Meeq­qat ilaqutariin­ni qanoq tup­pal­lersaataasin­naap­pat?

17 Meeq­qat Jehovamik asan­nilersimasut ilaqut­tamin­nut tup­pal­lersaataal­lutil­lu qiim­mas­saataasin­naap­put. Qanoq? Angajoq­qaamin­nik ataq­qin­nin­nermik­kut sulias­satigul­lu ikiuiniarlutik ilungersor­nermik­kut. Aam­ma meeq­qat Jehovamut aalajaak­kaangamik ilaqutaasunut tamanut qiim­mas­saataasar­put. Ulersuaq sioq­qul­lugu Lemeki Jehovamik pal­lorfigin­nit­tuuvoq. Er­ni Noa pil­lugu ima oqar­poq: “Taas­suma erloqil­luta nunaam­mi Naalak­kap perloq­qusaani suleruloor­nitsin­ni oqilisaak­kumaar­paatigut.” Siulit­tuut taman­na ulersuup kingor­na eq­quup­poq Jehovap nuna perloq­qusaajun­naarsim­magu. (1 Mos 5:29; 8:21) Ul­lumik­kut meeq­qat Jehovamut aalajaat­tuarunik ilaqut­tamin­nut oqilisaataasin­naap­put, tas­sa tup­pal­lersaataasin­naap­put. Ilaqut­tatik tamaasa maan­na siunis­samilu an­nikil­lior­ner­ni piner­tusaar­nis­samut ikiorsin­naavaat.

18. An­nikil­lior­nitsini tamani piner­tusaar­nis­samut suut iluaqutigis­savavut?

18 Ul­lumik­kut Jehovap in­nut­tai qinunik­kut, Biibilimi oqalut­tuanik eq­qarsaatigin­neq­qis­saar­nik­kut up­peqatimil­lu qanimut ikin­ngutiginerisigut tup­pal­lersar­neqar­tar­put. (Tussiaat 145:18, 19 atuakkit). Nalun­ngilar­put Jehova tup­pal­lersar­niarluta piareersimajuar­toq, an­nikil­lior­nitsin­nilu tamani piner­tusaarsin­naaq­qul­luta ikiorumaar­paatigut!