Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Februaari 2018

Nuannaarneq – Pissuseq Guuti ikiortigalugu ineriartortissinnaasarput

Nuannaarneq – Pissuseq Guuti ikiortigalugu ineriartortissinnaasarput

INUIT nuan­naarusup­put. Ul­lunili kingul­ler­ni inuugat­ta kik­kut tamarmik ‘anigoruminaatsunik’ ajor­nar­torsiuteqar­tar­put. (2 Tim 3:1NW) Naaper­tuil­luan­ngitsumik pineqar­neq, nap­parsimaneq, sulif­fis­saaleqineq, isumakuluuteqar­neq asasamil­luun­niit toqusoor­nerup pianik aliasun­neq pis­sutigalugu inuit ilaat nuan­naarun­naar­tar­put. Aam­ma al­laat Jehovamik pal­lorfigin­nit­tut nikal­lorsin­naal­lutil­lu nuan­naarun­naariar­tuaarsin­naap­put. Ilin­nut taama pisoqarsimap­pat qanoq nuan­naaq­qilersin­naavit?

Apeq­qut taman­na akiumal­lugu nuan­naar­neq piviusoq suunersoq paasiniaq­qaar­tariaqar­par­put. Al­lat erloqinar­torsioraluarlutik qanoq nuan­naar­tuarsimanersut sam­meriarlugu uagut qanoq nuan­naar­tuarsin­naal­lutalu nuan­naar­nerulersin­naasugut sam­mis­savar­put.

NUANNAARNEQ SUUA?

Nuan­naar­neq qiimasaagin­nar­nermut tun­ngan­ngilaq. Ima as­sersuuteqariar­ta: Imigas­sar­tor­pal­laarluni aalakoor­toq il­laqat­taarsin­naasar­poq. Silat­toq­qik­kamili il­larun­naarlunilu paasivaa suli ajor­nar­torsiuter­pas­suaqarluni. Qiimasaar­nera sivikitsuin­naal­lunilu piviusumik nuan­naar­nerun­ngilaq. – Uss 14:13.

Nuan­naar­nerli al­laavoq, tas­sa qaman­nga pisumik misigis­susiuvoq arlaan­nik ajun­ngitsumik pigaangat­ta qilanaaruteqaraangat­taluun­niit. Qanorluun­niit atugaqaraluarut­ta, tas­sa ajun­ngitsunik ajor­tunil­luun­niit, nuan­naarsin­naavugut. Nuan­naar­neq pil­luar­nerluun­niit atuk­kanit, ajun­ngitsunit ajor­tunil­luun­niit, aalajangiisuun­ngilaq. (1 Th 1:6) Aam­ma inuk erloqis­suteqaraluarluni nuan­naarsin­naavoq. As­sersuutigalugu apustilit Jiisusi pil­lugu oqaluus­siner­tik pil­lugu iperar­tor­neqar­put. Taamaat­toq “kil­lisiuisarfik qimap­paat nuan­naarlutik Jiisusip aq­qa pil­lugu narrunarsagaanis­samut qin­ngaq­qun­nar­titaan­ngin­namik”. (ApS 5:41) Apustilit nuan­naar­neran­nut iperar­tor­neqar­nerat pis­sutaan­ngilaq, kisian­ni Guutimut aalajaas­sin­naaner­tik nuan­naarutigaat.

Nuan­naar­neq inun­nguuserineqar­nanilu nam­mineerluni ilutsin­ni ineriar­tor­neq ajor­poq. Sooq? Nuan­naar­neq piviusoq Guutip anersaavata il­ler­nar­tup inerititaanut ilaam­mat. Guutip anersaava iluaqutigalugu “inut­tut pis­suseq nutaaq”, tas­sungalu atatil­lugu nuan­naar­neq, ineriar­tor­tis­sin­naavar­put. (Ef 4:24, NW; Gal 5:22) Nuan­naarut­ta inuunermi ajor­nar­torsiutivut naam­magalugit atorsin­naanerulis­savavut.

MALIGASSAT ASSIGERUSUTAVUT

Jehovap nunarsuaq ajun­ngitsumik siuner­taqarfigigaluar­paa, nalitsin­ni ajor­tut pisar­tut pin­nagit. Inuit ajor­tulior­taraluar­tut Jehova nuan­naarun­naan­ngilaq. Biibilimi al­las­simavoq ‘pis­saaneq nuan­naar­nerlu najugaani it­tut’. (1 Nal 16:27) Aam­ma kif­fami ajun­ngitsuliaat Jehovap nuan­naarutigisar­pai. – Uss 27:11.

Pis­sutsit naatsorsuutigisatsitut pin­ngik­kaangata nikal­lun­ngin­nitsigut Jehova ilaarsin­naavar­put. Isumakulup­pal­laar­nata maan­na ajun­ngitsut atugarisavut eq­qarsaatiginiar­nerusin­naavavut siunis­samilu  suli ajun­ngin­nerusut pisus­sat erinitsajuil­luta utaq­qil­lutigit. *

Inuit ajor­nar­torsiuteqaraluarlutik nuan­naar­tuar­nermik­kut maligas­siuisor­pas­suit Biibilimi al­laatigineqar­put. Aaperaat inuunermini navianar­torsioraluarluni inun­nil­lu al­lanit ajor­nar­torsior­tin­neqaraluarluni nuan­naar­tuar­poq. (1 Mos 12:10-20; 14:8-16; 16:4, 5; 20:1-18; 21:8, 9) Qanoq ilil­luni? Silarsuarmi Mis­siarsip naalagaaf­figisaani inuunis­saminik neriuutimi eq­qarsaatigineratigut. (1 Mos 22:15-18; Hebr 11:10) Jiisusi ima oqar­poq: “Aaperaat ataatarsi nuan­naaqaaq ul­lora takus­sagamiuk.” (Joh 8:56) Siunis­sami nuan­naangaar­nis­sat­ta eq­qarsaatigiuar­neratigut Aaperaat ilaar­tar­par­put. – Rom 8:21.

Aam­ma Paulusip Silasil­lu Guutip neriorsuutai eq­qarsaatiginiar­neruaat. Up­perluar­tuup­put ajor­tunil­lu nalaataqaraluarlutik nuan­naar­tuarlutik. As­sersuutigalugu iperar­tor­neqarlutil­lu paar­naarus­saagaluarlutik “qinup­put Guutimul­lu erinalin­nik un­nersiutigin­nil­lutik”. (ApS 16:23-25) Siunis­samut Guutip neriorsuutai eq­qarsaatigiuaramik­kit naal­liun­nermin­ni piner­tusaarsin­naap­put. Aam­ma naal­liun­nermin­nut pis­sutaasoq, Kristusimik malin­nin­ner­tik, nuan­naarutigaat. Guutimik aalajaal­luta kif­far­torfigin­nin­nit­ta kinguneqarluar­tar­nera eq­qaamagaangatsigu Paulusi Silasilu ilaar­tar­pavut. – Fil 1:12-14.

Aam­ma ul­lutsin­ni qatan­nguter­pas­suavut ajor­tunik nalaataqaraluarlutik nuan­naar­tuar­nermik­kut maligas­siuil­luar­put. As­sersuutigalugu 2013-imi novembarimi Filip­pinerini Haiyanimik taaneqar­tumik ulus­saarsuarmat Nalunaajaasut angerlarsimaf­fii 1.000-t sin­nerlugit aseror­neqar­put. George, il­loqarfim­mi Taclobanimi il­lua aserorluin­narsimasoq, ima oqalut­tuar­poq: “Taama pisoqaraluar­toq qatan­ngutit nuan­naar­put. Nuan­naar­neq misigisar­put nas­suiaruminaap­poq.” Jehovap uagut pil­luta iliuuserisai eq­qarsaatigalugil­lu qujamasuf­figiuarutsigu ajor­nar­torsiungaaraluarluta nuan­naar­tuarsin­naavugut. Nuan­naar­nis­samut pis­sutis­sanik al­lanik Jehovap sunik tunisimavaatigut?

NUANNAARNISSAMUT PISSUTISSAVUT

Nuan­naar­nis­satsin­nut pis­sutaasoq an­ner­paaq tas­saavoq Jehovamut at­taveqar­ner­put. Qilam­mi nunamilu Kisimi Oqar­tus­saasoq ilisarisimasaraar­put. Taan­na tas­saavoq Ataatar­put, Guuter­put Ikin­nguter­pul­lu! – Tuss 71:17, 18.

Aam­ma Jehovap inuunermik tamatumin­ngalu nuan­naarutigin­nis­sin­naanermik tunisimam­matigut qujamasup­pugut. (Oqal 3:12, 13) Im­minut qanil­lisis­simam­matigut taas­suma piumasaa paasisin­naal­lugulu qanoq inuus­sanersugut nalun­ngilar­put. (Kol 1:9, 10) Inuil­li amerlaner­paar­taasa inuunerup siuner­taa ilisiman­ngilaat. As­sigiin­ngis­sut taman­na erseq­qis­sar­niarlugu Paulusi ima al­lap­poq: “Isit takusiman­ngisaat siutil­lu tusaasiman­ngisaat, inuil­lu uum­mataan­ni pilersiman­ngitsut Guutip asasiminut piareersagai, tamak­ku Guutip Anersaak­kut uatsin­nut saq­qum­mersip­pai.” (1 Kor 2:9, 10) Jehovap piumasaanik siuner­taanil­lu ilisiman­nin­ner­put nuan­naalis­sutigaar­put, ilaa?

Jehovap in­nut­tani pil­lugit iliuuserisai al­lat eq­qarsaatigik­kit. Isumak­keerfigineqarsin­naalersip­paatigut. (1 Joh 2:12) Silarsuar­taas­sami inuunis­samik, qanit­tuk­kut pisus­samik, neriuutis­sip­paatigut. (Rom 12:12) Maan­nangaaq Jehovap im­minik pal­lorfigin­neqatis­satsin­nik ikin­ngutis­sar­pas­suaqar­tip­paatigut. (Tuss 133:1) Aam­ma Saatanimit anersaapiluinil­lu il­lersor­paatigut. (Tuss 91:11) Jehovap tun­nius­sar­pas­sui eq­qarsaatigiuarutsigit nuan­naar­nerulis­saagut. – Fil 4:4.

QANOQ NUANNAARNERULERTOQARSINNAASOQ

Kristumiu nuan­naareersoq suli nuan­naar­nerulersin­naava? Jiisusi ima oqar­poq: “Taama oqaluf­figaas­si tipaatsun­nera ilis­sin­neeq­qul­lugu tipaatsun­nersilu naam­mal­luin­nar­tun­ngoq­qul­lugu.” (Joh 15:11) Tas­sa suli nuan­naar­neruler­tuaan­narsin­naavugut. Nuan­naar­ner­put ikumatitsinermut  as­sersuus­sin­naavar­put. Ikumatitaq kis­satsin­nerujumagutsigu suli qisut­tor­nerusariaqar­par­put. Una eq­qaamajuk: Anersaaq il­ler­nar­toq nuan­naar­nis­satsin­nut iluaqutigisar­par­put. Tas­sa nuan­naar­nerorusuk­kut­ta Guutip anersaava qin­nutigiuar­tariaqar­par­put. Aam­ma Biibilimi al­las­simasut, anersaamit il­ler­nar­tumit isumas­sarsiarititaasut, eq­qarsaatigeq­qis­saar­tuar­tariaqar­pavut. – Tuss 1:1, 2; Luk 11:13.

Nuan­naar­nerulis­sutigisin­naasar­put al­la tas­saavoq Jehovap iluarisaanik ulap­puteqar­neq. (Tuss 35:27; 112:1) Sooq? Biibilimi ima al­las­simavoq: “Guuti mianeruuk inatsisaalu maleruarlugit, inuit tamarmik taamaalior­tus­saap­put!” (Oqal 12:13) Guutip piumasaatut iliuuseqar­tus­satut pin­ngor­titaavugut. Tas­sa Jehova kif­far­torfigigutsigu inuuner­put nuan­naarutigis­savar­put. *

NUANNAARNERUP ILUAQUTISSARTAI

Nuan­naar­neruleriar­tor­til­luta iluaqutis­sar­pas­suit al­lat misigis­savavut. As­sersuutigalugu ajor­nar­torsiuteqaraluarluta nuan­naar­ner­put at­tatiin­narlugu kif­far­tor­tuarut­ta Jehovamit iluarisaanerulis­saagut. (5 Mos 16:15; 1 Th 5:16-18) Aam­ma piviusumik nuan­naarut­ta pigisalerituler­natalu Guutip naalagaaf­fia pil­lugu pil­liuteqar­nerorusus­saagut. (Matt 13:44) Jehovalu pil­lugu iliuuseqar­nerunerup kinguneqarluar­neri takugaangatsigit nuan­naar­nerulis­sal­lutalu qamuuna nalerisimaar­nerulis­saagut aam­malu al­lat nuan­naar­nerulersis­sal­lutigit. – ApS 20:35; Fil 1:3-5.

Aam­ma nuan­naar­nerugut­ta peq­qin­nerusin­naavugut. Biibilimi ima al­las­simavoq: “Uum­matik­kut nuan­naar­neq peq­qin­nar­tuuvoq.” (Uss 17:22) USA-mi Nebraskap ilisimatusarfiani peq­qis­susermik misis­sueq­qis­saar­tar­toq Biibilimi al­las­simasumut isumaqataal­luni ima oqaaseqar­poq: “Maan­na inuunin­ni nuan­naarlutil­lu nalerisimaaruit siunis­sami peq­qis­suunis­sat ilimanaateqar­neruvoq.”

Tas­sa maan­na pis­sutsini erloqinar­tuni inuugaluarluta qinunik­kut, atuaq­qis­saar­nik­kut Guutil­lu oqaasianik eq­qarsaatigin­neq­qis­saar­nik­kut anersaamik il­ler­nar­tumik tunineqaraangat­ta piviusumik nuan­naarsin­naavugut. Aam­ma maan­na Jehovap uagutsin­nut ajun­ngitsut tunis­suter­pas­sui eq­qarsaatigigutsigit, al­lat up­per­nerat ilaarutsigu Guutil­lu piumasaatut ilior­niar­tuarut­ta nuan­naar­nerulersin­naavugut. Taava Tus­siaat 64:11-mi ima al­las­simasoq misigis­savar­put: “Iluar­tut Naalagaq tipaatsuutigis­savaat taas­sumanilu qimar­nguf­fis­sarsiorluni.”

^ par. 10 ‘Anersaap inerititaa’ pil­lugu al­laaserisami saq­qum­merumaar­tus­sami utaq­qisin­naas­suseq sam­mineqas­saaq.