Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Decembari 2016

 MISIGISALIKKERSAARUT

Kiffartorninni tamanut naleqqussartarpunga

Kiffartorninni tamanut naleqqussartarpunga

“Kuisikkuit qimassavakkit!” Ataatama 1941-mi anaanaga taama oqarfigaa. Sioorasaarigaluartoq anaanaga kuisinniarluni aalajangerpoq. Ataatamalu qimappaatigut. Taamanikkut arfineq-pingasuinnarnik ukioqarpunga.

TAAMA pisoqannginnerani sallusuissut soqutigilereerpara. Anaanaga Biibililersaarutinik pisarpoq, ingammillu assiliartai alutoringaarpakka. Anaanama ilikkakkaminik uannut oqaluttuartarnera ataatama akerleraa. Alapernaallungali apersortarakku ataataga angerlarsimanngikkaangat anaanama atuaqqissaaqatigisarpaanga. Tamatuma kingunerisaanik inuunera Jehovamut tunniulluinnarniarlugu aalajangerpunga. 1943-mi qulinik ukioqarlunga Blackpoolimi Tuluit Nunaanniittumi kuisippunga.

JEHOVA KIFFARTORFIGILERPARA

Taamanimiilli anaanagalu aalajangersimasumik oqaluussisalerpugut. Taamanikkut oqaluttartut oqaluussinermi atortarpavut. Angisuujupput 4 kilollu sinnerlugit oqimaatsigalutik. Takorloorsinga nukappiaraallunga taamaattoq tigummiarlugu angallakkiga!

 14-iinnarnik ukioqarlunga pionerinngorusuppunga. Anaanama ilagiinnik nakkutilliisoq oqaloqatigeqquaa. Taassuma pioneritut imminut pilersorsinnaaniassagama ilinniagaqaqqullunga siunnersorpaanga. Taamaaliorpungalu. Ukiut marluk sulisareerlunga pioneriuneq pillugu ilagiinnik nakkutilliisoq alla oqaloqatigaara. Taassuma pionerinngoqqullunga kajumissaarpaanga.

1949-mi apriilimi pigisavut tunniussuuteriarlugit anaanagalu Middletonimut Manchesterip eqqaaniittumut nuulluta pionerinngorpugut. Qaammatit sisamat qaangiuttut qatanngut angut pionerioqatigilerpara. Immikkoortortaqaffimmiit siunnersorneqarpugut Irlamimi ilagiinnut pilerseqqammersitanut nuussasugut. Anaanaga ilagiinni allani allamik pionerioqateqarpoq.

Ilagiinni nutaani taakkunani qatanngutit angutit piumasaqaatinik eqqortitsisut ikimmata 17-iinnarnik ukioqaraluarlunga pionerioqatigalu ataatsimiinnerit aqunnissaat akisussaaffigaarput. Kingusinnerusukkut Buxtonimi ilagiinnut nuuppunga tassani oqaluussisartut ikillutillu ikiorneqartariaqarmata. Misilittakkat tamakku kingusinnerusukkut suliassiissutigineqartunut piareersaatigaakka.

1953-imi Rochesterimi USA-miittumi tamanut oqalugiaammut qaaqqusisugut

1951-imi Napasuliap Alapernaarsuiffiup Biibilimik Ilinniarfianut Gileadimut qinnuteqarpunga. 1952-imi decembarimi sak­ku­tuun­ngo­ri­ar­toq­qu­ne­qar­punga. Piffissaq tamaat kiffartortuugama sakkutuujunnginnissara qinnuteqaatigaara, eqqartuussivimmiilli itigartinneqarpunga qaammatillu arfinillit par­naa­rus­saa­sus­san­ngor­tin­ne­qar­lu­nga. Parnaarussivimmiitillunga Gileadimi klassit 22-annut qaaqqusaavunga. 1953-imi juulimi iperagaaniariarlunga umiarsuarmut Georgic-imut ilaallunga New Yorkiliarpunga.

Tikinniariarlunga 1953-imi ataatsimeersuarnermut najuuppunga. Taava South Lansingimut qimuttuitsorpunga, tassaniimmat ilinniarfik. Parnaarussivimmit iperagaaqqammerama aningaasaateqarpianngilanga.  Qimuttuitsoreerlunga bussernialerama ilaaqatissama bussiutissannik 25 centinik atukkerpaanga.

NUNAMI ALLAMI KIFFARTULERPUNGA

Ilinniarfimmi Gileadimi inunnut tamanut naleqqussarsinnaaqqulluta nuannersumik ilinniartitaavugut. (1 Kor 9:22) Paul Bruun, Raymond Leach uangalu Filippinerinukaqquneqarpugut, qaammatilli arlallit qaangiuttut aatsaat visummissavut pivavut. Taava umiarsuarluta Rotterdamiliarpugut. Imaq Akullersuaq ikaariarlugu Suezkanalenikkoorluta Malaysia aqqusaarlugu Hong Kongiliarpugut. Kiisamilu ulluni 47-ni umiartoreerluta 1954-imi novembarip 19-ianni Manilamut apuuppugut.

Raymond Leach uangalu Filippinerinut ajoqersuiartortitanngoriartorluta ulluni 47-ni umiartortugut

Filippinerini kulturimut allamut, nunamut allamut oqaatsinullu allanut naleqqussartariaqarpugut. Pingasuulluta ilagiinni Quezon Citymiittuni kiffartornerput aallartipparput. Tassaniittulli amerlasuut tuluttut oqaluttarmata qaammatini siullerni arfinilinni tagalogitut oqaatsit ikittuinnaat ilikkarpavut. Suliassiissutigineqartumili tulliuttumi ilikkagaqarneruvugut.

Ilaanni 1955-imi maajimi oqaluussereerluta angerlaratta qatanngullu Leach allagarsisimavugut. Ilagiinnik nakkutilliisutut kiffartortussanngorpugut. 22-innarnik ukioqarpunga sunaaffalu taamatut kiffartornissatsinni allatut qanoq naleqqussarsinnaanerlunga paasilerumaarlugu.

Ataatsimeersuarnermi bikolitut tamanut oqalugiartunga

Assersuutigalugu illoqarfeeqqap avataani pisiniarfimmi ilagiinnik nakkutilliisutut tamanut oqalugiaqqaarpunga. Taamanikkut Filippinerini ataatsimiittarfitsinniinngitsoq kikkunnit tamanit orniguffiusartumi oqalugiartoqartarpoq. Ilagiit assigiinngitsut tikeraartartillugit niuerniartarfinni, rådhusit saavanni, basketballertarfinni, naatsiiviliarsuarni aqquserngillu teqeqquini tamanut oqalugiartarpunga. Ataatsimik sialussuarnera pissutigalugu San Pablo Citymi silami oqalugiarsinnaanngilanga. Angutillu akisussaaffillit siunnersorpakka ataatsimiittarfitsinni  oqalugiassasunga. Tamatuma kingorna aperaannga tamanit orniguffiusartumi ataatsimiinnerunngimmat tamanut ammasumik ataatsimmiinnertut nalunaarutigisinnaaneritsik.

Tamatigut qatanngutit angerlarsimaffianni unnuisarpunga. Angerlarsimaffii sorpassuaqanngikkaluarlutik eqqiluitsuupput. Amerlanertigut natermi qisuusumi saattumik allequtaqarlunga sinittarpunga. Illup silataani kikkunnit tamanit takuneqarsinnaasoq uffarfiusinnaasutuaasarmat kannguttaannaveersaarlunga uffarneq ilikkarpara. Bussit ilaannikkullu qeqertanukassagaangama umiatsiat angallatigisarpakka. Nammineq biileqanngisaannarpunga.

Kursusinngikkaluarlunga tagalogitut ilikkarpunga. Oqaluussinermi ataatsimiinnernilu qatanngutit tusarnaarnerisigut ilikkarpunga. Qatanngutit ilinniartikkusuppaannga, kamagittarnerat unneqqarillutillu nassuiaasarnerat qujamasuutigaara.

Piffissap ingerlanerani nutaanik suliassinneqartarama allanngueqqittariaqartarpunga. 1956-imi qatanngut Nathan Knorr tikeraarmat nuna tamakkerlugu ataatsimeersuarpugut. Tusagassiuutinut attaveqartartussanngorpunga. Tamanna misilittagaqarfiginnginnakku allanit ilinniartinneqarpunga. Ukioq ataaseq qaangiutinngitsoq nuna tamakkerlugu ataatsimeersuaqqippugut, uangalu ataatsimeersuarnermik nakkutilliisuuvunga. Qatanngut Frederick Franz qullersaqarfitsinneersoq tikeraarpoq, taannalu ilinniarfigeqaara. Filippinerimiut nuannaarutigingaagaannik  qatanngutip Franzip tamanut oqalugiarami Filippinerimiut inuiattut assuutaat, barong tagalog, atorpaa. Tamanna inuiannut kajumillunga naleqqussartarnissannut ilinniutigaara.

Ilageeqatigiinnik arlalinnik nakkutilliisunngorama allanngueqqittariaqarpunga. Taamanikkut filmi Glæden og Lykken i Den Nye Verdens Samfund takutittarparput. Tamatigungajak silami tamanit orniuffiusartumi filmertitsisaratta ilaannikkut sullernit paaminnaqutaasarlutillu filmertitsissummut nipputtarput. Qinngortitsissutaalu salitassaangaatsiartarpoq. Taamatut filmertitsisarnerit suliarujussuusarput, inuilli takkullutik Jehovap nunarsuaq tamakkerlugu peqatigiissortaanik paasisaqarnerat takullugu nalerisimaarnarpoq.

Nunap ilaani katuullit palasiisa pisortat katersuuttarnitsinnik akuerseqqunagit tatisarpaat. Oqaluffiup qanittuani oqalugiartut tusaaneqaqqunagit oqaluffiup siarni sianertittarpaat. Taamaaliortaraluartut oqaluussiuaratta maanna Filippinerimiorpassuit Jehovamik pallorfiginnittuupput.

ALLATUT KIFFARTULERLUNGALU ALLANNGUEQQIPPUNGA

1959-imi immikkoortortaqaffimmi kiffartulerpunga. Tassani misilitakkakka ilinniarfigilluarpakka. Kingusinnerusukkut nunanut allanut tikeraartartussanngorpunga. Angalanerit ilaanni Janet Dumond Thailandimi ajoqersuiartortitaq naapippara. Allaqatigiittareerluta katippugut. Ukiuni 51-ini pilluarluta Jehovamut kiffartoqatigiippugut.

Janetilu Filippinerit qeqertarpassuisa ilaanniittugut

Nunani 33-ni Jehovap innuttaanut tikeraartarsimanera nuannaarutigaara. Inuit assigiinngitsunik kultureqarlutillu tunuliaqutallit qanoq periaaseqarfigissanerlugit siornatigut suliassiissutigineqartartunit  ilikkarsimagakku qujamasuutigingaarpara! Angalasarninnit paasilluarpara Jehovap inuit tamalaat asagai. – ApS 10:34, 35.

Nalunaajaasut amerliartortuarnerat nuannaarutigaarput

SULI ALLANNGUISARPUGUT

Janetilu qatanngutitsinnik Filippineriniittunik kiffartoqateqarnerput nuannaarutigaarput, immikkoortortaqarfimmilu Quezon Citymiittumi suli kiffartorpugut. Ukiut 60-it matuma siorna Filippinerini kiffartulernitsinniit maanna oqaluussisartut quleriaammik amerlisimapput. Ukiorpassuit qaangiutereeraluartut Jehovap kissaatigisaatut suli allannguisariaqartarpugut. Assersuutigalugu qanittukkut peqatigiiffitsinni allannguisoqarmat kajumilluta allanngueqqippugut.

Aalajangersimasumik oqaluussisarpugut

Jehovap siulersuinera sapinngisatsinnik malinniarsimavarput, tamannalu inooriaasiuvoq nalerisimaarnarnerpaaq. Qatanngutivut pitsaanerpaamik kiffartorfigisinnaajumallugit pisariaqartitat suulluunniit naapertorlugit allannguiniartarpugut. Aap, Jehovamit kissaatigineqartillugu aalajangiusimavarput inunnut tamanut naleqqussartuarniarluta.

Immikkoortortaqarfimmi Quezon Citymiittumi suli kiffartorpugut