Imarisai

Saqqaata tullia

Imai

Jehovap Nalunaajaasui

Kalaallisut

Napasuliaq Alapernaarsuiffik – Atuaqqissaarutissaq  |  Apriili 2017

Guutip naalagaaffia tikiuppat suut peerutissappat?

Guutip naalagaaffia tikiuppat suut peerutissappat?

‘Silarsuaq piumatus­susialu nungus­sap­put, Guutil­li piumasaanik ilior­toq naas­saan­ngitsumik atas­saaq.’ – 1 JOH 2:17.

ERINARSUUTIT: 55, 24

1, 2. (a) Silarsuaq man­na pinerlut­torlu toqumut eq­qar­tuus­saq qanoq as­sigiis­suteqar­pat? (Al­laaserisap aal­laq­qaataani as­siliaq takuuk). (b) Silarsuaq man­na piuneerus­saareer­pat qilam­miit­tut nunamiit­tul­lu tamarmik qanoq misigis­sap­pat?

TAKORLOORUK par­naarus­siviup torsuusarsuatigut paarsisut inupiluk pinerlut­toq ingerlaqatigiitigalugu ima suaar­tut: “Toqungasoq pisup­poq!” Sooq angut taan­na peq­qip­pasit­toq taama oqaatigineqar­pa? Toqumut eq­qar­tuun­neqarami toqutaaf­fis­saminukaan­neqarlunilu. Toqoreersutut naatsorsuun­neqar­poq. *

2 Silarsuaq ajor­toq inuuf­figisar­put pinerlut­tutut eq­qar­tuun­neqareerluni toqutaalersutut ip­poq. Biibilimi al­las­simavoq ‘silarsuaq nungus­sasoq’. (1 Joh 2:17) Jehovap aalajanger­paa silarsuaq man­na qanit­tuararsuak­kut piuneerutis­sal­lugu, taamaat­tumik piuneerun­nis­saa qular­nan­ngil­luin­nar­poq. Silarsuarli man­na angul­lu pinerlut­toq eq­qaasar­put pingaarutilim­mik al­laas­suteqar­put. Inuit ilaat pinerlut­tup eq­qar­tuun­neqar­nera naaper­tuil­luan­ngitsuusorigamik­ku akerliliip­put neriul­lutik  toqutaas­san­ngitsoq. Jehovali eq­qar­tuus­sisuuvoq naam­mal­luin­nar­toq silarsuarmil­lu piuneerutsitsiniarluni aalajanger­nera naaper­tuil­luaq­qis­saar­poq. (5 Mos 32:4) Eq­qar­tuus­sutil­lu naam­mas­sineqar­nis­saa kingusinaar­navian­ngilaq. Silarsuaq man­na kiisami piuneerun­neqar­pat qilam­miit­tut nunamiit­tul­lu tamarmik Jehovap eq­qar­tuus­sinera eq­qor­tuusutut isigis­savaat. Ila, toq­qis­sial­lan­nas­saqaaq!

3. Guutip naalagaaf­fia tikiup­pat ajoqutaasut sisamat suut peerutis­sap­pat?

3 ‘Silarsuarmut nungut­tus­samut’ suut ilaap­pat? Tas­saap­put ajoqutaasut ul­lumik­kut inuunitsin­nut ilaalersimasut. Tamak­ku tamarmik qanit­tuk­kut peerutis­sap­put. Taman­nalu Naalagaaf­fim­mik nutaarsias­samut nuan­nersumut ilaavoq. (Matt 24:14) Al­laaserisami matumani ajoqutaasut sisamat Guutip naalagaaf­fia tikiup­pat piuneerut­tus­sat sam­mis­savavut: Inuit ajor­tut, aaq­qis­suus­sinerit ajor­tut, eq­qun­ngitsulior­nerit pis­sutsil­lu ajor­tut. Taak­kua ataasiak­kaarlugit sam­minerini uku paasis­savavut: (1) Taakkua ul­lumik­kut qanoq sun­ner­tar­paatigut, (2) Jehovap qanoq iliuuseqarfigis­savai, aam­ma (3) Jehovap sunik taar­teqar­tis­savai.

INUIT AJORTUT

4. Inuit ajor­tut ul­lumik­kut qanoq sun­ner­tar­paatigut?

4 Inuit ajortut ullumikkut qanoq sunnertarpaatigut? Apustili Paulusi al­lap­poq ul­lus­sat kingul­liit ‘atugarliungaarfius­sasut’. Imalu nangil­luni: ‘Inuit ajor­tut peq­quserlut­tul­lu ajor­tumut nak­kaak­kiar­tuin­nar­tus­saap­put.’ (2 Tim 3:1-5, 13) Taman­na misigaajuk? Ilar­pas­suat­ta inuit ajor­tut soorlu naak­kit­taal­lutik nakuuser­tut, uumis­suil­lutik nikas­saasut inupiluil­lu pinerlut­tut iliuusii ajoqutigisar­paat. Ajor­tulior­tut ilaasa iliuutsitik iser­tor­niar­neq ajor­paat. Al­lat ikiuiniar­tuusaar­tar­put. Nam­minerlu ajor­tumik pineqarsiman­ngik­kaluar­tugut inuunitsin­nut sun­niuteqar­tar­put. Meeq­qat, utoq­qaat al­lal­luun­niit im­minut il­lersorsin­naan­ngitsut naak­kit­taatsuliorfigineqarsimasut tusaraangatsigit erloqium­mer­tar­pugut. Inuit ajor­tut uumasutut qaasut­tutut al­laal­lu anersaapilut­tut pis­susilersoriaaseqar­put. (Jaak 3:15) Qujanar­tumil­li Jehovap oqaasianit neriuutis­sin­neqar­pugut.

5. (a) Inuit ajor­tut suli qanoq periarfis­saqar­pat? (b) Al­lan­ngoruman­ngitsut qanoq pineqas­sap­pat?

5 Jehovap qanoq iliuuseqarfigissavai? Maan­nak­kor­piaq Jehovap inuit ajor­tut al­lan­ngor­nis­saan­nut periarfis­saqar­tip­pai. (Es 55:7) Inuit inaarutaasumik suli eq­qar­tuun­neqan­ngil­lat. Qanit­tuk­kut piuneerut­tus­saq tas­saavoq silarsuaq man­na. Inuil­li an­nikil­lior­nar­torsuup tungaanut al­lan­ngoruman­ngitsut silarsuarmil­lu matuman­nga tapersersuisut qanoq pineqas­sap­pat? Jehova neriorsuivoq inuit ajor­tut nunamit peerumaarlugit. (Tussiaat 37:10 atuaruk). Ul­lumik­kut inup­pas­suit ajor­tuliatik iser­tor­tar­paat amerlaner­tigul­lu pil­lar­neqas­sanatik. (Job 21:7, 9) Biibilimili ima eq­qaasin­neqar­pugut: “Guutip isaasa angutip ingerlavigisaa nak­kutigaat, al­loriar­neri tamaasa isigaat. Taar­toqan­ngilaq tarrajut­toqar­naniluun­niit ajor­tunut iser­torfiusin­naasunik.” (Job 34:21, 22) Jehovap inuit ajor­tut iliuusii tamaasa takusin­naam­magit taas­sumun­nga iser­torfis­saqan­ngilaq. Harmagedonip kingor­na im­maqa inuit ajor­tut ujaraluas­savavut, takoq­qin­navian­ngilavul­li. Piuneerutivis­simas­sap­put! – Tuss 37:12-15.

6. Inuit ajor­tut peerup­pata kik­kut inuus­sap­pat, aam­ma sooq taman­na nutaarsias­saava nuan­nersoq?

 6 Inuit ajortut peeruppata kikkut inuussappat? Jehova ima neriorsuivoq: “Qanilaar­tut nuna kingor­nutis­savaat pil­luangaar­ner­til­lu nuan­naarutigis­sal­lugu.” Imalu nangip­poq: “Iluar­tut nuna kingor­nutis­savaat najugaqas­sal­lutil­lu tas­sani naas­saan­ngitsumik.” (Tuss 37:11, 29) “Qanilaar­tut” aam­ma “iluar­tut” kik­kuup­pat? Qanilaar­tut tas­saap­put maniguul­lutik Jehovamit ilin­niar­tin­neqar­tut naalat­tul­lu. Iluar­tut tas­saap­put Guutip eq­qor­tuuneragaanik iliuuseqar­nis­samik nuan­narisaqar­tut. Ul­lumik­kut silarsuatsin­ni inuit ajor­tut eq­qor­tuliorusut­tunit amerlanerungaar­put. Silarsuar­taas­samili qanilaar­tut eq­qor­tuliorusut­tul­lu kisimik inuus­sap­put, nunalu paratiisin­ngor­tis­savaat.

AAQQISSUUSSINERIT AJORTUT

7. Ul­lumik­kut aaq­qis­suus­sinerit ajor­tut qanoq sun­ner­tar­paatigut?

7 Aaqqissuussinerit ajortut ullumikkut qanoq sunnertarpaatigut? Ul­lumik­kut silarsuarmi ajor­tor­pas­suit inuit ataasiak­kaat pisuus­sutiginagu aaq­qis­suus­siner­nit aal­laaveqar­put. Up­perisarsioqatigiit inun­nik mil­lionilin­nik nakutitsisar­put. As­sersuutigalugu Guutip kinaanera pil­lugu sal­lusar­put, Biibili tutsuiginar­tuun­ngin­nerar­tar­paat aam­ma nunarsuup inuil­lu siunis­saat pil­lugu nakutitsisar­put. Naalak­kersuisut un­neq­qaris­suun­ngitsut sorsun­ner­nik aam­ma kinaas­susersior­neq tun­ngavigalugu nakuuser­ner­nik tapersersuinermik­kut piitsunik im­minul­lu il­lersorsin­naan­ngitsunik naqisiman­nit­tar­put. Naalak­kersuisut taamaat­tut inuit ilaan­nik sal­liutitsinermik­kut akilersil­lutil­lu peq­quserlut­tar­nermik­kut pisuujunerulerlutil­lu pis­saaneqar­neruler­tar­put. Niuer­niaqatigiit aningaaserituut avatangiisinik mingutsitsisar­put, nunap pisuus­sutaanik nungusaasar­put inuil­lu iluanaar­niarfigisarlugit nam­min­neq pisuujuneruler­nias­sagamik. Erseq­qip­poq aaq­qis­suus­sinerit ajor­tut ul­lumik­kut silarsuarmi erloqinar­tor­pas­suar­nut akisus­saasuusut.

8. Aaq­qis­suus­sinerit ul­lumik­kut aalajaap­pasis­sut qanoq pineqar­nis­saat Biibilimi qanoq al­laatigineqar­pa?

8 Jehova qanoq iliuuseqassava? An­nikil­lior­nar­tus­sarsuaq aal­lar­tip­pat up­perisarsioqatigiit eq­qun­ngitsut, Biibilimi ator­tit­tar­tutut Babylonersuarmik taaneqar­tutut al­laatigineqar­tut, politik­kik­kut pis­saanilin­nit saas­sun­neqas­sap­put. (Saqq 17:1, 2, 16; 18:1-4) Up­perisarsior­nik­kut aaq­qis­suus­sinerit taak­ku piuneerul­luin­nas­sap­put. Aaq­qis­suus­sineril­li ajor­tut al­lat qanoq pineqas­sap­pat? Taak­ku inuit isaan­ni aalajaap­pasil­lutil­lu ataavar­pasik­kamik Biibilimi qaq­qanut qeqer­tanul­lu as­sersuun­neqar­put. (Saqqummersitat 6:14 atuaruk). Nangil­lunili al­las­simavoq naalak­kersuisut aaq­qis­suus­sineril­lu al­lat tamarmik Guutip naalagaaf­fianik tapersersuin­ngitsut piuneerutis­sasut. Taman­na an­nik­kil­lior­nar­tus­sarsuup naggataani pis­saaq. (Jer 25:31-33) Tamatuma kingor­na ajor­tunik aaq­qis­suus­siner­nik pilersitsisoqaq­qin­ngisaan­nas­saaq!

9. Sooq nuna nutaaq aaq­qis­suus­saal­luagaajumaar­toq up­perisin­naavar­put?

9 Aaqqissuussinerit ajortut sunik taarserneqassappat? Harmagedonip kingor­na nunami arlaatigut aaq­qis­suus­sisoqas­sava? Biibilimi ima al­las­simavoq: ‘Neriorsuutaa naaper­torlugu ilimagisaraavut qilaat nutaat nunalu nutaaq iluas­sutsip najugarisas­sai.’ (2 Petr 3:13) Qilaat nunalu  as­sersuutaasut maan­na atuut­tut tas­saap­put naalak­kersuisut ajor­tut taak­kualu in­nut­taat. Taak­kualu taar­tigis­savaat “qilaat nutaat nunalu nutaaq”. Qilaat nutaat tas­saas­sap­put naalak­kersuisut nutaat – Jiisusi Kristusi taas­sumalu naalak­kersueqatai 144.000-t Guutip naalagaaf­fianik taaneqar­tut. Nuna nutaaq tas­saas­saaq inuit Guutip naalagaaf­fianit aqun­neqar­tut. Jiisusip naalak­kersueqataasalu Jehova Guuti aaq­qis­suus­sisoq ilaaq­qis­saas­savaat. (1 Kor 14:33) Tas­sa ‘nuna nutaaq’ aaq­qis­suus­saal­luagaas­saaq. Angutil­lu piuk­kun­nar­tut akisus­saaf­filer­neqas­sap­put. (Tuss 45:17) Angutit taak­ku Kristusimit 144.000-nil­lu siulersor­neqas­sap­put. Takorlooruk aaq­qis­suus­sinerit ajor­tut tamarmik aaq­qis­suus­sinermik ataasiin­narmik ajor­tun­ngun­ngisaan­nar­tus­samik taarser­neqar­pata qanoq nuan­ner­tigis­sasoq!

EQQUNNGITSULIORNERIT

10. Il­lit il­loqarfin­ni eq­qun­ngitsulior­nerit suut nalingin­naap­pat, qanorlu ilin­nut ilaqut­tan­nul­lu sun­niuteqar­pat?

10 Eqqunngitsuliornerit ullumikkut uagutsinnut qanoq sunniuteqarpat? Silarsuarmi kinguaas­siuutitigut inuunerluf­fiusumi, un­neq­qaserluf­fiusumi nakuuserfiungaar­tumilu inuuvugut. Aliik­kusersuutini eq­qun­ngitsulior­nerit kajunger­narsisin­niar­neqar­tar­put Jehoval­lu suut eq­qor­tuuneran­nik suul­lu eq­qun­ngitsuuneran­nik najoq­qutas­siai il­laruaatigineqar­tarlutik. (Es 5:20) Ingam­mik angajoq­qaat sun­niutipalaanut taamaat­tunut qitor­natik il­lersor­niarlugit tamaviaar­tariaqar­put. Kristumiut ilumoor­tut tamarmik silarsuarmi Guutip najoq­qutas­siaanik ataq­qin­nin­ngif­fiusumi Jehovamut at­taveqar­ner­tik ilungersorlutik il­lersor­tariaqar­paat.

11. Jehovap Sodomamik Gomorramil­lu eq­qar­tuus­sinera qanoq ilin­niutigaar­put?

11 Jehovap eqqunngitsuliornerit qanoq iliuuseqarfigissavai? Il­loqarfin­ni Sodomami Gomorramilu eq­qun­ngitsulior­nerit Jehovap qanoq iliuuseqarfigigai eq­qarsaatigiuk. (2 Petrusi 2:6-8 atuakkit). Loti angut naaper­tuil­luar­toq ilaqutaalu erloqingaar­put nunaq­qatigisamik eq­qun­ngitsuliar­pas­sui pis­sutigalugit. Ajus­suseerutsitsiniarluni Jehovap il­loqarfiit taak­ku eq­qaal­lu tamaat piuneerup­pai. Il­loqarfiil­lu taak­ku ul­lumik­kut inun­nut ajor­tulior­tunut ‘sioorasaarutis­saap­put’. Taamanik­kut ilior­nermisul­li silarsuaq man­na piuneeruk­kuniuk aam­ma eq­qun­ngitsulior­toqar­tarun­naar­titsis­saaq.

12. Silarsuaq man­na piuneerup­pat sulerinis­sat qilanaaraajuk?

12 Eqqunngitsuliornerit sunik taarserneqassappat? Silarsuar­taas­sami nuan­nersor­pas­suit ulap­putigis­savavut. As­sersuutigalugu nunarsuaq paratiisin­ngor­tis­savar­put nam­minerlu asasatsin­nul­lu angerlarsimaf­fis­saliorluta. Aam­ma mil­lionil­lit toqusunit makit­tut tikil­luaq­qul­lugil­lu Jehova inun­nul­lu iliuuserisar­pas­sui pil­lugit taak­ku ilin­niar­tis­savavut. (Es 65:21, 22; ApS 24:15) Taamanik­kus­samut nuan­naarutigisatsin­nik Jehovamul­lu ataq­qinaataasunik ulap­puteqas­saagut!

PISSUTSIT AJORTUT

13. Edenimi pikitsitsineq qanoq kinguneqar­pa?

13 Pissutsit ajortut ullumikkut uagutsinnut qanoq sunniuteqarpat? Inuit aaq­qis­suus­sineril­lu ajor­tut eq­qun­ngitsulior­neril­lu pis­sutigalugit pis­sutsit ajor­tun­ngor­put. Tamat­ta sorsun­ner­nit, piitsuunermit, nikas­saanermit, nap­paatinit toqumil­luun­niit sun­ner­neqar­tar­pugut. Saatani, Adami Evalu Jehovamut pikitsitsim­mata  pis­sutsit ajor­tun­ngor­put. Taak­kualu pikitsitsinerat tamatsin­nut sun­niuteqar­poq.

14. Jehovap pis­sutsit ajor­tut qanoq iliuuseqarfigis­savai?

14 Jehovap pissutsit ajortut qanoq iliuuseqarfigissavai? As­sersuutigalugu Jehova sorsut­toqarun­naarsitsis­sal­luni neriorsuivoq. (Tussiaat 46:9, 10 atuakkit). Nap­paataarutititsis­saaq. (Es 33:24) Toqu nungutis­savaa piujun­naarsivil­lugu. (Es 25:8) Piitsoqarun­naar­titsis­saaq. (Tuss 72:12-16) Pis­sutsil­lu ajor­tut ul­lumik­kut erloqis­sutaasut tamaasa piuneerutitis­savai. Al­laam­mi Saatani in­ngilipiluil­lu sun­niinerlut­tarun­naarsis­savai. – Ef 2:2.

Silarsuaq sorsuttoqarfiunngitsoq, nappaateqarfiunngitsoq toqusartoqarfiunngitsorlu takorlooruk! (Immikkoortoq 15 takuuk)

15. Harmagedonip kingor­na suut pisariaarutivis­simas­sap­pat?

15 Silarsuaq sorsut­toqarfiun­ngitsoq, nap­paateqarfiun­ngitsoq toqusar­toqarfiun­ngitsorlu inuuf­figalugu qanoq is­sanersoq takorlooruk! Sorsun­nermut tun­ngasunik sak­kutooqar­tarun­naarlunilu sak­koqarun­naarlunilu eq­qaas­sutis­saqarun­naas­saaq. Nap­parsim­maviit, nakorsat, peq­qis­saasut, toqusut inaat iliveqarfiil­lu pisariaqas­san­ngil­lat. Pinerlut­toqas­san­ngim­mat politiit, kalerrisaarutit im­maqalu al­laat matuersaatit pisariaqas­san­ngil­lat! Pis­sutsit ajor­tut tamak­ku isumakuluuteqar­titsingaar­tut misigisarun­naavis­savavut.

16, 17. (a) Harmagedonimi aniguisut qanoq misigis­sap­pat? As­sersuuteqarit. (b) Silarsuaq ajor­toq man­na piuneerus­saaler­pat aniguinis­sat qanoq qulak­keersin­naaviuk?

16 Pissutsit ajortut misigisarunnaarutsigit inuuneq qanoq issava? Takorlooruminaap­poq. Silarsuarmi pis­sutsinik ajor­toqarfiusumi taama sivisutigisumik inooreerat­ta sun­niutipilui malugisarun­naarsimavavut. As­sersuutigalugu inuit nipilior­toqarfiusup eq­qaani najugal­lit nipilior­neq tusaajun­naar­tar­paat. Inuil­lu eq­qaavis­suup eq­qaani najugal­lit tik­ka naamajun­naar­tar­paat. Jehoval­li pis­sutsit ajor­tut peer­pagit toq­qis­sial­lan­nangaas­saaq!

17 Ul­lumik­kut erloqisar­ner­put sumik taarser­neqas­sava? Tussiaat 37:11-mi al­las­simavoq ‘pil­luangaar­ner­put nuan­naarutigis­sagip­put’. Jehovap qanoq kis­saak­kaatigut nalunagu tup­pal­ler­nangaar­poq! Erloqinar­torsiorfiusumi matumani Jehovamut peqatigiis­sor­taanul­lu qanit­tuar­niarlutit sapin­ngisan­nik iliuuseqarit. Neriuutit erlin­nangaar­toq eq­qarsaatigeq­qis­saaruk, ilin­nut piviusuunera qulak­keeruk al­lanul­lu oqalut­tuaralugu. (1 Tim 4:15, 16; 1 Petr 3:15) Taamaalioruit qulak­keersin­naavat pis­sutsit maan­nak­kut atuut­tut atorun­naar­pata inuujumaarlutit naas­saan­ngitsumil­lu pil­luarumaarlutit!

^ par. 1 Ukior­pas­suit matuma sior­na USA-mi par­naarus­siviit ilaan­ni ileq­quusimasoq im­mik­koor­tumi matumani pineqar­poq.