Imarisai

Imai

Jehovap Nalunaajaasui

Oqaatsit toqqakkit Kalaallisut

Inuttut pissusitoqaq qanoq peerlugulu peersimajuarsinnaagipput

Inuttut pissusitoqaq qanoq peerlugulu peersimajuarsinnaagipput

“Inut­tut pis­susitoq­qasi ileq­qui ilan­ngul­lugit peer­niarsigit.” – KOL 3:9NW.

ERINARSUUTIT: 52, 54

1, 2. Inuit Jehovap Nalunaajaasui pil­lugit sunik maluginiagaqar­tar­pat?

INUP­PAS­SUIT maluginiar­tar­paat Jehovap Nalunaajaasui im­mik­korluin­naq it­tut. As­sersuutigalugu atuak­kior­toq Anton Gil­limik atilik nazistit nalaan­ni Tysklandimi Nalunaajaasut pis­susiinik nersuivoq. Ima al­lap­poq: “Jehovap Nalunaajaasui nazistinit im­mik­kut akeq­qersimaarfigineqar­put. ... 1939-mi taak­kua ilaat 6.000-t [tigusanut inis­siarsuar­niip­put].” Nangil­luni al­lap­poq Nalunaajaasut naal­liungaaraluarlutik tatiginar­tuuner­tik, tatineqar­til­lutik eq­qis­sisimasar­ner­tik, Guutimin­nik ilumoorfigin­nin­ner­tik ataasius­suseqar­ner­til­lu ilisimaneqaatigigaat.

2 Ukiuni kingul­liunerusuni Sydafrikamiut maluginiarsimavaat Jehovap Nalunaajaasui im­mik­kooruteqar­tut. Nalunaajaasut am­mimik­kut as­sigiin­ngitsunik qalipaatil­lit nunami tas­saniit­tut pif­fis­sami aalajangersimasumi ataatsimooq­qusaan­ngil­lat. 2011-mili sapaam­mi decembarip 18-ian­ni Nalunaajaasut 78.000-nit amerlanerusut Sydafrikami  naggueqatigiin­nit as­sigiin­ngitsuneersut eq­qaanilu nunaneersut Johan­nesburgimi timersor­tarfis­suit an­nersaan­ni im­mik­kut it­tumik katersuup­put. Timersor­tarfis­suarmi pisor­taasut ilaat ima oqar­poq: “Timersor­tarfis­suarmi matumani inup­pas­suar­nik taama pis­suseris­saar­tigisunik aatsaat takuvunga. Tamarmik atisaris­saar­put. Ilis­silu timersor­tarfis­suarmik eq­qiaal­luaqaasi. Pingaar­ner­paamil­li inuiaas­sutsit tamaasa ilumut akuerivasi.”

3. Qatan­ngutigiis­suit ilaaf­figisat­ta suna as­seqan­ngil­luin­nas­sutigaat?

3 Inun­nut Nalunaajaasuun­ngik­kaluar­tunut erseq­qip­poq nunarsuaq tamak­kerlugu qatan­ngutigiis­suit ilaaf­figisavut as­seqan­ngil­luin­nar­tut. (1 Petr 5:9) Peqatigiis­sor­tanit al­lanit tamanit sooq taama al­laanerutigivugut? Biibili Guutil­lu anersaava il­ler­nar­toq iluaqutigalugit Jehovap iluarin­ngisaanik suugaluar­tumil­luun­niit al­lan­nguiniarluta ilungersor­tarat­ta. ‘Inut­tut pis­susitoqaq peer­tar­par­put inut­tul­lu pis­suseq nutaaq atisarlugu’. – Kol 3:9, 10NW.

4. Al­laaserisami matumani suut sam­mis­savavut, aam­ma sooq?

4 Inut­tut pis­susitoqaq peereerutsigu peersimajuar­tariaqar­par­put. Al­laaserisami matumani siul­ler­tut paasinias­savar­put inut­tut pis­susitoq­qamik qanoq peersisin­naasugut aam­ma sooq taamaalior­nis­saq pingaaruteqaqisoq. Paasis­savar­put inuk qanorluun­niit ajor­tumik ilior­tigisimagaluarluni inuunermini al­lan­nguerujus­suarsin­naasoq. Taava sam­mis­savar­put ukior­pas­suar­ni sal­lusuis­sum­miis­simasut inut­tut pis­susitoq­qatik qanoq peersimajuarsin­naagaat. Sooq taman­na sam­misariaqar­par­put? Jehovamut kif­far­tor­tuusimasut ajoraluar­tumik mianersorun­naarsimam­mata. Jehovamik ilisarisiman­nin­ngik­kal­lar­nermis­sul­li eq­qarsar­taaseqalerlutil­lu pis­suseqalersimap­put. Mianersoq­qus­sut una tamat­ta eq­qaamasariaqar­par­put: “Kinaluun­niit patajaatsuusorisoq mianersorli orloq­qunani.” – 1 Kor 10:12.

KINGUAASSIUUTITIGUT PILERISSUSIPALAAT SUULLUUNNIIT PIIKKIT

5. (a) Inut­tut pis­susitoq­qamik peersinis­sap sooq taama pingaaruteqar­tigineranut erseq­qis­saataasumik as­sersuuteqarit. (Al­laaserisap aal­laq­qaataani as­seq takuuk). (b) Kolos­semiut 3:5-9 naaper­torlugu, ileq­qupalaat suut inut­tut pis­susitoq­qanut ilaap­pat?

5 Paasileruk­ku atisatit iper­tul­lutil­lu tipit­tut qanoq ilius­sagaluar­pit? Periarfis­saq siul­leq atorlugu piis­sagaluar­patit. Tamatumun­nga as­singusumik paasigutsigu Jehovap iluarin­ngisaanik ilior­tarluta al­lan­nguipal­lan­nis­sar­put pisariaqarluin­nas­saaq. Ileq­qupalaat pil­lugit Paulusi ima al­lap­poq: “Tamaasa iperas­savasi.” Taak­kua ilaat marluk sam­meriar­tigit: Kinguaas­siuutitigut inuunerlun­neq mingut­tuunerlu. – Kolossemiut 3:5-9 atuakkit.

6, 7. (a) Paulusip oqaasiinit qanoq erser­pa inut­tut pis­susitoqaq piis­sagaan­ni ilungersor­nis­saq pisariaqar­toq? (b) Sakura qanoq inooriaaseqarsimava, al­lan­ngor­nis­samul­lu suna nakus­satsis­sutigaa?

6 Kinguaassiuutitigut inuunerlunneq. “Kinguaas­siuutitigut inuunerlun­neq” Biibilimi eq­qaaneqaraangat ilaatigut pineqar­tar­poq inuit katis­simanatik kinguaas­siuutitigut atoqatigiin­nerat. Paulusi al­lap­poq kinguaas­siuutitigut inuunerlun­nermut tun­ngatil­lugu kristumiut ‘im­min­niit­tut toqutit­tariaqaraat’. Tas­sa pileris­susipiloqarun­naarumal­luta as­sut ilungersor­tariaqar­pugut. Saper­narsin­naavoq, iluatsis­sin­naavugul­li!

 7 Taman­na qatan­ngutip ar­nap Japanimiup Sakuramik atil­lip misigisaanit erser­poq. * Sakura peroriar­tor­til­luni kiserlior­tarlunilu aliasut­tar­poq. Kiserliorun­naarumal­luni 15-inik ukioqar­nerminiil­li atoqateqar­taler­poq. Sakura inun­nik as­sigiin­ngitsunik atoqateqar­tar­poq pingasoriarlunilu naar­tuersil­luni. Ima oqar­poq: “Siul­lermik kinguaas­siuutitigut inuunerloqateqaraangama toq­qis­sisimasutut misigisimasar­punga, eq­qarsar­tarama pisariaqar­tin­neqarlungalu asaneqarlunga. Atoqateqar­nerujar­tuin­nar­til­lungali eq­qis­sisiman­ngin­nerujar­tuin­naler­punga.” Sakura taamatut inooriaaseqar­poq 23-nik ukioqaler­nis­sami tungaanut. Taava Jehovap Nalunaajaasuinit Biibilimik atuaq­qis­saaqatigineqar­taler­poq, ilik­kak­kanilu as­sut nuan­narai. Inuunerluk­kun­naar­nis­samut qaman­ngalu pisumik pisuusutut kan­ngusut­tutul­lu misigiun­naar­nis­samut Jehovamit ikior­neqar­poq. Ul­lumik­kut Sakura pioneritut kif­far­tor­poq, aam­ma kiserliorun­naar­poq. Ima oqar­poq: “Ul­lut tamaviisa Jehovamit naam­mat­torsuarmik asan­nit­tuliorfigineqar­tar­nera nuan­naarutigeqaara.”

QANOQ MINGUTTUUNIK ILEQQOQARUNNAARTOQARTARTOQ

8. Iliuutsit suut Guutimit mingut­tuutut isigineqalis­sutigisin­naavavut?

8 Minguttuuneq. ‘Mingut­tuuneq’ Biibilimi eq­qaaneqaraangat kinguaas­siuutitigut inuunerlun­nermuin­naq tun­nganeq ajor­poq. Pujor­tar­nermut paquminar­tunil­luun­niit quiasaapilun­nermut tun­ngasin­naavoq. (2 Kor 7:1; Ef 5:3, 4) Aam­ma inuit kisimiitsil­lutik iliuuserisin­naasaan­nut ajor­tunut, soorlu atuak­kanik tiingalis­sutaasunik atuar­nermut por­nografiimil­luun­niit isigin­naar­nermut, tun­ngasin­naavoq. Tamak­ku mingut­tuumik ilior­nermik, im­minut iner­tin­nermik, kinguneqarsin­naap­put. – Kol 3:5. *

9. Kinguaas­siuutitigut aqus­sin­naan­ngisamik pileris­suseqaler­neq qanoq kinguneqarsin­naava?

9 Inuit por­nografiimik isigin­naar­tar­tut kinguaas­siuutitigut pileris­sutsimik aqus­sin­naan­ngisamin­nik ineriar­tor­titsisar­put kinguaas­siuutitigul­lu atoqateqar­nis­samik pin­ngitsuuisin­naajun­naarsin­naal­lutik. Ilisimatuut paasisimavaat por­nografiimik pin­ngitsuuisin­naajun­naar­neq imigas­samik ikiaroor­nar­tunil­luun­niit pin­ngitsuuisin­naajun­naar­nermut as­singusoq. Taamaat­tumik tupin­nan­ngilaq por­nografiimik isigin­naar­tar­neq ajor­tumik kinguneqar­tarmat. Kingunipiluit ilagisin­naavaat kan­ngusungaar­neq, sulif­fim­mi suliaqar­pian­ngin­neq, ilaqutariit­tut pil­luaan­neq, avin­neq al­laal­lu im­minor­neq. Angut por­nografiimik pin­ngitsuuisin­naajun­naarsimasoq ukiumi ataatsimi por­nografiimik isigin­naan­ngereerluni oqar­poq kiisami im­minut ataq­qileq­qis­simal­luni.

10. Ribeirop por­nografiimik pin­ngitsuuisin­naajun­naaq­qanini qanoq ajugaaf­figaa?

10 Inup­pas­suit por­nografiimik isigin­naar­naveersaar­neq as­sut saper­nar­tip­paat. Tamatumun­ngali akiuun­nermi ajugaasoqarsin­naavoq. Ribeirop Brasiliameersup misigisimasai eq­qarsaatigeriak­kit. Inuusut­tuaraal­luni angerlarsimaf­fini qimal­lugu fabrik­kimi pap­pialamik atoq­qiisarfiusumi sulisaler­poq.  Tas­saniitil­luni atuagas­sianik por­nografiimut tun­ngasunik siumuivoq. Ribeiro ima oqar­poq: “Atuan­ngitsoorsin­naajun­naariar­tuaar­pak­ka. Ima ingasatsigiler­poq ar­nap inooqatima il­lutsin­nit aninis­saanut utaq­qisin­naan­ngingajat­tarlunga videonik por­nografiimut tun­ngasunik isigin­naar­nias­sagama.” Taamaal­luni sulitil­luni Ribeirop atuak­kat atoq­qitas­sat qaleriiaarsimasut akor­nan­ni atuagaq Ilaqutariittut pilluarneq isertugaateqarpoq takuaa. Tiguaa atuarlugulu. Atuak­kani pis­sutigalugit Jehovap Nalunaajaasuinit Biibilimik atuaq­qis­saaqatigineqar­taler­poq. Taamaak­kaluar­torli Ribeirop por­nografiimik pin­ngitsuuisin­naajun­naaq­qanini sivisuumik akior­paa. Suna iluaqutigaa? Ima nas­suiaavoq: “Qinunik­kut, Biibilimik atuaq­qis­saar­nik­kut ilik­kak­kan­nil­lu eq­qarsaatigin­neq­qis­saar­nik­kut Guutip pis­susiinik ima qujamasuutigin­nin­neruler­tingaanga Jehovamik asan­nin­nera por­nografiimik piumas­sutsin­nit sak­kor­tunerulerluni.” Ribeiro Biibili Guutil­lu anersaava il­ler­nar­toq iluaqutigalugit ileq­quminik al­lan­nguivoq, kuisil­luni, maan­nalu ilagiin­ni utoq­qaaner­taal­luni.

11. Por­nografiimik ingalas­siman­nin­nis­samut suut iluaqutaap­pat?

11 Maluginiaruk Ribeirop por­nografii ingalas­simajumal­lugu Biibilimik atuaq­qis­saar­tar­nis­saa naam­man­ngitsoq. Aam­ma atuak­kani eq­qarsaatigeq­qis­saar­tariaqar­pai uum­maminul­lu sun­niuteqar­til­lugit. Jehovamut qinusariaqar­poq, taan­na ikioq­qul­luni kimigiiserfigalugu. Tamak­ku Ribeirop Guutimik asan­nin­neranut nakus­satsis­sutaap­put, asan­nin­nera por­nografiimik isigin­naarusus­sus­sianit sak­kor­tunerulerluni. Uagut­taaq por­nografiimik ingalas­siman­nik­kumal­luta Jehova qaman­nga pisumik asasariaqar­par­put ajor­tul­lu uumigisariaqarlugit. – Tussiaat 97:10 atuaruk.

KAMANNEQ, SORRAATSUMIK OQALUNNEQ SALLUNERLU IPERARSIGIT

12. Stephenip kamajajun­naar­nis­saminut sorraatsumil­lu oqalut­tarun­naar­nis­saminut suna iluaqutigaa?

12 Inuit ilaat kamajap­put al­lanul­lu sorraatsumik ajual­lan­nar­tumil­lu oqalut­tarlutik. Taamatut ileq­qoqar­neq ilaqutariit­tut inuunermut sun­niuteqapilut­tar­poq. Stephen meeralik Australiameersoq as­sut oqaasipilut­tarsimavoq suminiaran­nguil­lu kamas­sutigerujus­suar­tarlugit. Ima oqar­poq: “Nuliaralu pingasoriarluta averuser­nikuuvugut avin­nis­sar­pul­lu sulis­sutigalugu.” Taava taan­na nulialu Nalunaajaasunit Biibilimik atuaq­qis­saaqatigineqar­taler­put, Stephenil­lu ilik­kak­kani maleruar­niarsariler­pai. Oqar­poq Jehova ilisarisimalin­ngik­kal­laramiuk uumitsak­kaangami ima kamatsigiler­tarluni misigisarluni qaar­tooriaan­naal­luni. Siun­nersuutinil­li Biibilimiit­tunik maleruaalerami pis­sutsit atugaat iluaal­lap­put. Ima oqar­poq: “Ilaqutariit­tut inuuner­put as­sorsuaq iluaal­lap­poq. Jehovap ikiuineratigut maan­na eq­qis­sisimal­luin­nar­tutut misigivunga.” Maan­nalu Stephen ilagiin­ni kif­far­tor­tuuvoq nulialu ukior­paalun­ni pioneriusimal­luni. Utoq­qaaner­tat Stephen pil­lugu ima oqar­put: “Stephen qatan­ngutaavoq saamasuul­lunilu eqiasuil­lunilu maniguut­toq.” Aam­ma kamatsil­lugu takusiman­ngisaan­nar­nerar­paat. Stephenip inut­tut pis­sutsimigut taamatut al­lan­ngor­nini nam­mineq ataq­qinaatigerusun­ngilaa. Ima oqar­poq: “Inuunin­ni taamatut nuan­nersunik pil­luaq­qus­sutisisimas­san­ngik­kaluar­punga  Jehovap inut­tut pis­susin­nik al­lan­ngor­titsil­luin­nar­nis­samut ikiuinis­saa akuerisiman­ngitsuuguk­ku.”

13. Sooq kaman­neq navianar­pa, Biibililu naaper­torlugu sunaveersaar­tariaqar­pugut?

13 Biibilimi kajumis­saar­neqar­pugut kamaq­qunata, al­lanut sorraatsumik oqaloq­qunata nil­liaq­qunatalu. (Ef 4:31) Tamak­ku nakuuser­nermik kinguneqarajup­put. Kaman­neq peq­qar­niisaar­nerlu ul­lumik­kut silarsuarmi inup­pas­suar­nit nalingin­naasutut isigineqar­put. Taamatul­li pis­suseqar­neq Pin­ngor­titsisitsin­nut ataq­qinaataan­ngilaq. Qatan­ngutit­ta ilar­pas­suisa pis­susitik ajor­tut taak­ku peersimavaat inut­tul­lu pis­suseq nutaaq atisimal­lugu. – Tussiaat 37:8-11 atuakkit.

14. Inuk peq­qar­niitsoq saamasun­ngorsin­naava?

14 Qatan­ngut Hansimik atilik Østrigimi ilagiin­ni utoq­qaaner­tatut kif­far­tor­poq. Ilagiin­ni Hansip or­nit­tagaani utoq­qaaner­taqatigiin­nik ataqatigiis­saarisoq ima oqar­poq: “Taan­na ilumut qatan­ngutinut saamaner­paanut ilaavoq.” Hansili saamajuaan­narsiman­ngilaq. Inuusut­tuaraal­luni imerajut­tun­ngor­poq nakuuser­talerlunilu. Ilaan­ni aalakoorluni ima kamatsigiler­poq ar­naatini toqul­lugu. Hans ukiuni 20-ni par­naarus­sas­san­ngor­tin­neqar­poq, par­naarus­satul­li inuunini inut­tut al­lan­ngus­sutigin­ngilaa. Taava taas­suma anaanaata utoq­qaaner­tat qin­nuigai taan­na pulaaq­qul­lugu, Hansilu Biibilimik atuaq­qis­saar­taler­poq. Ima oqar­poq: “Inut­tut pis­susitoq­qan­nik peersiniar­nera ilungersunar­tip­para. Biibilimi al­las­simaf­fiit qiim­mas­saatigisama ilagaat Esajap al­lagai 55:7, tas­sani ima al­las­simagami: ‘Iluaatsup qimal­liuk aq­qutigisani,’ aam­ma Korinthimiunut al­lak­kat siul­liit  6:11, tas­sani ileq­qupalaamin­nik qimatsisut pil­lugit ima al­las­simasoqarami: ‘Ilasi taamaas­simagaluar­put.’ Ukior­pas­suar­ni Jehovap naam­magit­tarluni anersaani il­ler­nar­toq atorlugu inut­tut pis­sutsimik nutaamik atisinis­san­nut ikior­paanga.” Hans suli par­naarus­saaq­qatil­luni kuisip­poq, ukiunilu 17-ini af­farmilu par­naarus­saaq­qareerluni iperagaavoq. Ima oqar­poq: “Jehovap nal­lit­tuingaarlunilu isumak­keerfigin­ningaar­tuunera qujamasuutigaara.”

15. Inut­tut pis­susitoq­qamut suna al­la ilaava, Biibilimilu qanoq eq­qaaneqar­pa?

15 Inut­tut pis­susitoq­qamut ilaasoq al­la tas­saavoq sal­luneq. As­sersuutigalugu inup­pas­suit akileraarumanatik kuk­kus­sutimin­nul­luun­niit tun­ngatil­lugu akisus­saasuujumanatik sal­lusar­put. Jehovali ‘Guutiuvoq un­neq­qaris­soq’. (Tuss 31:6) Taamaat­tumik pal­lorfigin­nitsini tamaasa piumaf­figai ‘ilumoor­tumik im­min­nut oqaluf­figisas­sasut’ ‘sal­lulior­tas­san­ngitsul­lu’. (Ef 4:25; Kol 3:9) Erseq­qip­poq ilumoor­tumik oqalut­tariaqar­tugut kan­ngusuk­kaluarut­ta saper­nar­tik­kaluarutsiguluun­niit. – Uss 6:16-19.

AKIUUNNERMI QANOQ AJUGAASUT

16. Inut­tut pis­susitoq­qamik peersinis­samut suut iluaqutigis­savavut?

16 Inut­tut pis­susitoq­qamik nam­mineerluta peersisin­naan­ngilagut. Sakura, Ribeiro, Stephen Hansilu inooriaatsitoq­qamin­nik al­lan­nguiniarlutik tamarmik akiuut­tariaqarsimap­put. Iluaqutigisaat tas­saap­put Guutip oqaasiata taas­sumalu anersaavata il­ler­nar­tup sun­niinerat. (Luk 11:13; Hebr 4:12) Taak­kua sun­niisin­naas­susiat iluaqutigiumal­lugu ul­lut tamaasa Biibilimik atuar­tariaqar­pugut, atuak­kavut eq­qarsaatigeq­qis­saar­tariaqar­pavut ilisimas­susermil­lu nukis­samil­lu qin­nutigin­nit­tuar­tariaqarluta ilik­kak­kavut maleruarlugit. (Jos 1:8; Tuss 119:97; 1 Th 5:17) Aam­ma Guutip oqaasia taas­sumalu anersaava il­ler­nar­toq iluaqutigisar­pavut ilagiin­ni ataatsimiin­ner­nut piareersarlutalu najuuk­kaangat­ta. (Hebr 10:24, 25) Aam­ma Jehovap peqatigiis­sor­taasa pilersitaat al­lar­pas­suit, soorlu atuagas­siaativut, JW Broadcasting, JW Library aam­ma jw.org, atorluarusup­pavut. – Luk 12:42.

Inuttut pissusitoqaq qanoq peersinnaavarput? (Immikkoortoq 16 takuuk)

17. Al­laaserisami tul­liut­tumi suna sam­mis­savar­put?

17 Ileq­qupalaat kristumiut Jehovamit iluarisaajumal­lutik peer­tariaqagaasa peersimajuar­tariaqagaasalu ilaat sam­mereer­pavut. Sulili al­lanik iliuusis­saqar­pugut. Inut­tut pis­suseq nutaaq atisariaqar­par­put inuunitsin­nilu atuut­tuar­tit­tariaqarlugu. Qanoq taamaaliorsin­naasugut al­laaserisami tul­liut­tumi sam­mis­savar­put.

^ par. 7 Al­laaserisami matumani atit ilaat al­lan­ngor­titaap­put.