ەحوبا كۋاگەرلەرى نەگە ساياساتقا ارالاسپايدى؟
ەحوبا كۋاگەرلەرى كيەلى كىتاپقا نەگىزدەلگەن ٴدىني كوزقاراستارىنا بايلانىستى ساياساتقا ارالاسپايدى. ٴبىز ميتينگتەرگە شىقپايمىز، قانداي دا ٴبىر ساياسي پارتياعا نە كانديداتقا داۋىس بەرمەيمىز، مەملەكەتتىك قىزمەتكە ۇمتىلمايمىز جانە ۇكىمەت باسىنداعىلاردى بيلىكتەن كەتىرۋگە تىرىسپايمىز. ويتكەنى بەيتاراپتىق ساقتاۋعا كيەلى كىتاپتا كەلەلى سەبەپتەر بار:
ٴبىز يسا پايعامباردىڭ جولىمەن جۇرەمىز. ول جەردە بولعان كەزىندە ساياساتقا ارالاسپاي، پاتشا بولۋدان باس تارتقان (جوحان 6:15). ول شاكىرتتەرىنە وسى دۇنيەلىك بولماۋدى جانە ساياسي ماسەلەلەردە قانداي دا ٴبىر تاراپتى جاقتاماۋ كەرەكتىگىن ۇيرەتكەن (جوحان 17:14، 16؛ 18:36؛ مارقا 12:13—17).
ٴبىز قۇداي پاتشالىعىنىڭ ازاماتىمىز. يسا وسى ۇكىمەت تۋرالى: «پاتشالىق جايلى وسى ىزگى حابار بارلىق حالىقتار ەستۋ ٷشىن بۇكىل جەر بەتىندە ۋاعىزدالادى»،— دەگەن (ماتاي 24:14). قۇداي پاتشالىعىنىڭ وكىلدەرى بولعاندىقتان، بىزگە وسى ۇكىمەتتىڭ ورنايتىنىن باسقالارعا ايتۋ تاپسىرىلعان. سوندىقتان ەشقانداي ەلدىڭ، ٴتىپتى ٶزىمىزدىڭ تۇرىپ جاتقان جەرىمىزدىڭ دە ساياساتىنا ارالاسپايمىز (قورىنتتىقتارعا 2-حات 5:20؛ ەفەستىكتەرگە 6:20).
بەيتاراپ بولعاندىقتان، ٴبىز قۇداي پاتشىلىعى تۋرالى حاباردى كەز كەلگەن ادامعا، ول قانداي ساياسي قوزقاراستا بولسا دا، تازا ار-ۇجدانمەن ايتا الامىز. ٴبىز قۇداي پاتشالىعى ادامزاتتىڭ بارلىق پروبلەمالارىن شەشىپ بەرەتىنىنە سەنەتىنىمىزدى سوزىمىزبەن دە، ىسىمىزبەن دە كورسەتەمىز (ٴزابۇر 56:11).
ساياساتقا ارالاسپاعاندىقتان، ٴبىز بىرلىگى جاراسقان دۇنيەجۇزىلىك باۋىرلاستىقتى قۇرايمىز (قولوستىقتارعا 3:14؛ پەتىردىڭ 1-حاتى 2:17). ال ساياساتقا ارالاساتىن دىندەردە مۇنداي بىرلىك جوق (قورىنتتىقتارعا 1-حات 1:10).
بيلىككە قۇرمەت تانىتامىز. ساياساتقا ارالاسپاساق تا، ٴبىز ٶزىمىز تۇرىپ جاتقان ەلدىڭ بيلىگىنە مويىنسۇنامىز. ويتكەنى كيەلى كىتاپتا: «ٵربىر ادام بيلىك باسىنداعىلارعا باعىنسىن»،— دەگەن بۇيرىق جازىلعان (ريمدىكتەرگە 13:1). ٴبىز زاڭعا مويىنسۇنامىز، سالىقتاردى تولەيمىز جانە بيلىك باسىنداعىلاردىڭ ٶز ازاماتتارىنىڭ ٶمىرىن جاقسارتۋ ٷشىن جاسايتىن شارالارىن قولدايمىز. ٴبىز بيلىككە قاستاندىق جاسامايمىز، قايتا «پاتشالار مەن جوعارى دارەجەلى ادامدار ٷشىن دە دۇعا ەتىڭدەر» دەگەن كيەلى كىتاپتىڭ كەڭەسىنە قۇلاق اسامىز. اسىرەسە ولار ٴبىزدىڭ عيباداتىمىزعا اسەر ەتەتىن شەشىم قابىلداعاندا، وسىلاي ەتەمىز (تىموتەگە 1-حات 2:1، 2).
سونىمەن قاتار ٴبىز باسقالاردىڭ ساياسي كوزقاراستارىن قۇرمەتتەيمىز. مىسالى، بولىپ جاتقان سايلاۋعا كەدەرگى جاسامايمىز، بىرەۋدىڭ داۋىس بەرۋىنە دە توسقاۋىل بولمايمىز.
ٴبىزدىڭ بەيتاراپتىعىمىز جاڭاشىلدىق پا؟ جوق، ولاي ەمەس. I عاسىرداعى ەلشىلەر مەن باسقا دا ماسىحشىلەر مەملەكەتتىك بيلىككە تۋرا ٴبىز سياقتى قاراعان. بۇل تۋرالى ٴبىر كىتاپتا بىلاي جازىلعان: «العاشقى ماسىحشىلەر بيلىككە قۇرمەت كورسەتۋدى مىندەت ساناعانمەن، ساياساتقا ارالاسۋدى قۇپتاماعان» («Beyond Good Intentions»). ال باسقا ٴبىر كىتاپتا I عاسىرداعى ماسىحشىلەردىڭ «مەملەكەتتىك قىزمەت اتقارماعاندارى» ايتىلعان («On the Road to Civilization»).
ٴبىزدىڭ بەيتاراپتىعىمىز ۇلتتىق قاۋىپسىزدىككە قاۋىپ توندىرە مە؟ جوق، توندىرمەيدى. ٴبىز بەيبىتسۇيگىش ادامدارمىز، بىزدەن قورقۋعا ەشقانداي نەگىز جوق. ۋكراينانىڭ ۇلتتىق عىلىم اكادەمياسىنىڭ 2001-جىلعى ەسەبىندە ٴبىزدىڭ ساياسي بەيتاراپتىعىمىزعا قاتىستى بىلاي دەلىنگەن: «ەحوبا كۋاگەرلەرىنىڭ ساياساتقا ارالاسپايتىنى، بالكىم، كەيبىرەۋلەرگە ۇنامايتىن شىعار. وسى سەبەپتەن دە ولار ناسيستىك جانە كوممۋنيستىك رەجيم كەزىندە قۋعىن-سۇرگىنگە ۇشىراعان ەدى». ٴتىپتى كەڭەس ۇكىمەتىندە رەپرەسسياعا ۇشىرعاندا دا كۋاگەرلەر «زاڭعا باعىناتىندارىن كورسەتكەن. ولار كولحوزدار مەن ونەركاسىپ ورىندارىندا ادالدىقپەن بەل جازباي ەڭبەك ەتكەن. سوۆەت بيلىگىنە كۋاگەرلەر ەشقانداي قاۋىپ-قاتەر توندىرمەگەن». ەسەپتە ايتىلعانداي، بۇگىنگى كۇندە دە كۋاگەرلەردىڭ ٴدىني سەنىمدەرى مەن اتقارىپ جۇرگەن ٸس-شارالارى «ەشقانداي مەملەكەتتىڭ قاۋىپسىزدىگى مەن ٴبىرتۇتاستىعىنا قاۋىپ توندىرمەيدى».
قىزىقتى بولار مالىمەتتەر
ٴجيى قويىلاتىن سۇراقتار
نەگە ەحوبا كۋاگەرلەرى پاتريوتتىق ٸس-شارالارعا قاتىسپايدى؟
ولار وزدەرىنىڭ الەۋمەتتىك يا ساياسي ۇستانىمدارىن سولاي بىلدىرگىسى كەلە مە؟
ٴجيى قويىلاتىن سۇراقتار
ەحوبا كۋاگەرلەرى نەلىكتەن سوعىسقا قاتىسپايدى؟
دۇنيەجۇزى بويىنشا ەحوبا كۋاگەرلەرى سوعىسقا قاتىسپايتىندارىمەن تانىمال. نەگە بۇلاي ەكەنىن ٴبىلىڭىز.
ٴبىز جونىندە
ەحوبا كۋاگەرلەرىنىڭ كەلۋىن ٶتىنۋ
كيەلى كىتاپقا قاتىستى سۇراقتارىڭىزدىڭ جاۋابىن الىڭىز نەمەسە ەحوبا كۋاگەرلەرى جايلى كوبىرەك ٴبىلىڭىز.