جاستاردىڭ ساۋالدارى
ۋاقىت جەتپەيدى، نە ىستەيمىن؟
نەگە ۋاقىتتى جوسپارلاۋ كەرەك؟
ۋاقىت اقشا سياقتى. ونى بوسقا جۇمساساڭ، كەرەك كەزدە ۋاقىت تاپپاي قالاسىڭ. ال كەرىسىنشە دۇرىس جۇمساساڭ، وزىڭە ۇنامدى ىستەرگە ۋاقىت قالادى!
كيەلى كىتاپ كەڭەسى: «ەرىنشەك اڭسايدى، ٴبىراق تۇگى جوق، ال ىنتالى جان جۇرەر توق» (ناقىل سوزدەر 13:4).
ٶيتۇيىن: ۋاقىتتى جوسپارلاۋ ەركىندىگىڭدى شەكتەمەيدى، قايتا، كوبىرەك ەركىندىك بەرەدى.
ۋاقىتتى ٴتيىمدى پايدالانۋدى وسى كەزدەن ۇيرەنىپ الساڭ، وسكەندە مۇنىڭ كوپ يگىلىگىن كورەسىڭ. كىم بىلەدى، بولاشاقتا جۇمىس بەرۋشىلەر سەنى وسى قابىلەتىڭ ٷشىن جۇمىستان شىعارماي، الىپ قالار. ٶزىڭ ويلاشى، ەگەر سەن باستىق بولساڭ، ۇنەمى كەشىگىپ جۇرەتىن جۇمىسشىنى جۇمىستا قالدىرار ما ەدىڭ، الدە كەشىكپەيتىن، ٸسىن ٶز ۋاقىتىندا اياقتايتىن جۇمىسشىنى قالدىرار ما ەدىڭ؟
كيەلى كىتاپ كەڭەسى: «كىشكەنە نارسەدە سەنىمدى بولعان ۇلكەن نارسەدە دە سەنىمدى» (لۇقا 16:10).
ٶيتۇيىن: ۋاقىتتى قالاي جۇمسايتىنىڭا قاراپ، سەنىڭ قانداي ادام ەكەنىڭدى بىلۋگە بولادى.
شىنى كەرەك، ۋاقىتتى دۇرىس جوسپارلاپ، ونى ۇستانۋ وڭاي ەمەس. جوسپارىمىزدى قۇرتاتىن كەدەرگىلەر بار. كەيبىرىن قاراستىرايىق.
1-كەدەرگى: دوستار
«دوستارىم ٴبىر جەرگە شاقىرسا، ۋاقىتىم بولماي تۇرسا دا، بارامىن. شارۋالارىمدى كەلگەن سوڭ تەز-تەز ىستەي سالام دەپ ويلايمىن. ٴبىراق ٴبارى مەن ويلاعانداي بولا بەرمەيدى، كەيدە ەشتەڭەگە ۇلگەرمەي قالامىن» (سينتيا).
2-كەدەرگى: الاڭداتاتىن نارسەلەر
«تەلەديدار تۋرا ٴبىر شاڭسورعىش سەكىلدى. نەشە ٴتۇرلى شوۋلار، فيلمدەر ارقىلى سەنى بار كۇشىمەن وزىنە تارتادى. قارسى تۇرۋ قيىننىڭ قيىنى» (ايۆي).
«مەن پلانشەتتە ساعاتتاپ وتىرىپ الامىن. قۋاتى ٴبىتىپ، ٶشىپ قالعاننان كەيىن عانا توقتايمىن، كەيىن سوعان ٶزىم جامان بولامىن» (ماري).
3-كەدەرگى: كەيىنگە ىسىرا بەرۋ
«مەن ۋاقىتىمدى بوسقا كەتىرىپ، ٷي جۇمىسى مەن باسقا دا ىستەردى كەيىنگە ىسىرا بەرەم، سوسىن تاقالعاندا تاپىراقتاپ جۇرەم. ۋاقىتىمدى دۇرىس جوسپارلاي المايمىن» (بەت).
ۋاقىتتى جوسپارلاۋ ەركىندىگىڭدى شەكتەمەيدى، قايتا، كوبىرەك ەركىندىك بەرەدى.
نە ىستەسەڭ بولادى؟
ماڭىزدى ىستەردىڭ ٴتىزىمىن جاسا. اپتا ىشىندە ورىنداۋىڭ كەرەك مەكتەپ تاپسىرمالارى مەن ٷي تىرلىكتەرىن جازىپ شىق. سوسىن قاي تاپسىرماعا قانشا ۋاقىت كەتەتىنىن جاز.
كيەلى كىتاپ كەڭەسى: «نەنىڭ ماڭىزدىراق ەكەنىنە كوز جەتكىز» (فىلىپىلىكتەرگە 1:10).
بوس ۋاقىتىڭدا جاساعىڭ كەلەتىن ىستەردىڭ ٴتىزىمىن جاسا. ولاردىڭ اراسىنا الەۋمەتتىك جەلىدە وتىرۋ، تەلەديدار كورۋ سياقتى ىستەردى دە قوسىپ قوي. كەيىن اپتا سايىن بۇعان قانشا ۋاقىت كەتەتىنىن جازىپ قوي.
كيەلى كىتاپ كەڭەسى: «دانا بولىڭدار، ۋاقىتتارىڭدى بارىنشا ٴتيىمدى پايدالانىڭدار» (قولوستىقتارعا 4:5).
جوسپار قۇر. ەكى ٴتىزىمدى دە قاراپ شىق. ماڭىزدى ىستەردى جاساۋعا ۋاقىتىڭ جەتە مە؟ بالكىم، ساعان دەمالۋعا جۇمسايتىن ۋاقىتتى ازايتۋ كەرەك شىعار.
كەڭەس: كۇندە ىستەيتىن ىستەردىڭ ٴتىزىمىن جاساپ، ىستەگەندەرىڭدى بەلگىلەپ وتىر.
كيەلى كىتاپ كەڭەسى: «ىنتالىنىڭ جوسپارلارى تابىسقا جەتەلەر» (ناقىل سوزدەر 21:5).
جوسپاردى ۇستان. ماڭىزدى ىستەردى ٴبىتىرۋ ٷشىن كەيدە شاقىرىلعان جەردەن باس تارتۋعا تۋرا كەلەدى. ٴبىراق كەيىن ٶزىڭ بايقايسىڭ، ماڭىزدى ىستەرىڭ بىتكەندە، ۇنايتىن ىستەرمەن اينالىسۋعا كوبىرەك ۋاقىتىڭ بولادى.
كيەلى كىتاپ ٴپرينسيپى: «ەرىنشەك بولماي، ىستەرىڭدى ىنتا-جىگەرمەن اتقارىڭدار» (ريمدىكتەرگە 12:11).
بەينەت ٴتۇبى — زەينەت، ٴبىراق اسىقپا. تارا ەسىمدى قىز بىلاي دەيدى: «كەيدە مەن جوسپارىمداعى ٴبىر-ەكى تىرلىكتى جاساپ بولعاسىن، ەندى 15 مينۋتتاي تەلەديدار كورەمىن دە، سوسىن جۇمىسىمدى جالعاستىرامىن دەيمىن. ٴبىراق 15 مينۋتىم جارتى ساعاتقا، جارتى ساعاتىم 1 ساعاتقا ۇلاسىپ، قالاي 2 ساعاتىم ٶتىپ كەتكەنىن بايقاماي قالامىن!»
نە ىستەۋگە بولادى؟ ٵر كۇنى مىندەتتى تۇردە دەمالۋعا ۋاقىت جۇمساۋىم كەرەك دەپ ويلاما، قايتا، دەمالىس سەن ٷشىن جۇمىس اياقتالعاننان كەيىن وزىڭە جاسايتىن سيلىق بولسىن.
كيەلى كىتاپ كەڭەسى: «ادام بالاسى ٷشىن ٸشىپ-جەپ، بەينەتىنىڭ زەينەتىن كورىپ، راقاتتانۋدان ارتىق ەشتەڭە جوق» (ۋاعىزداۋشى 2:24).
قىزىقتى بولار مالىمەتتەر
قۇرداستارىڭ نە دەيدى؟
كەيىنگە قالدىرۋ ادەتى جايلى قۇرداستارىڭ نە دەيدى؟
كەيىنگە قالدىرۋ ادەتىنىڭ زيانى مەن ۋاقىتتى اقىلمەن قولدانۋدىڭ پايداسى جايلى جاستار نە دەيتىنىن تىڭداپ كورىڭىز.
فلوماستەرلىك انيماسيا
كىم قوجا: سەن بە، قۇرىلعىڭ با؟
عالامتور زامانىندا ٶمىر سۇرسەڭ دە، ول ەمەس، سەن وعان قوجا بولا الاسىڭ. قۇرىلعىڭا تاۋەلدى بولىپ قالعانىڭدى قالاي انىقتاۋعا بولادى؟ بۇل دەرتتەن قالاي جازىلۋعا بولادى؟
