ساداقالارىڭىز قايدا جۇمسالادى؟
ٶمىردى وزگەرتەتىن نۇكتەلەر
1-قازان، 2021
1912-جىلدىڭ 1-ماۋسىمىندا جارىق كورگەن «كۇزەت مۇناراسىندا» بىلاي دەلىنگەن: «ٴبىزدىڭ وقىرماندارىمىزدىڭ كوبىسىنىڭ زاعيپ تانىستارى بولۋى مۇمكىن. مۇنداي ادامدار وقۋ قۇرالدارىن تەگىن الا الادى... بۇل باسىلىمدار جانارىنان ايىرىلعان ادامدار وقي الۋ ٷشىن بەدەرلى نۇكتەلەرمەن باسىپ شىعارىلعان. كوپتەگەن كوزى كورمەيتىن جاندار جارقىن بولاشاققا ٷمىت سيلايتىن حاباردى بىلگەندەرىنە وتە ريزا».
بۇل سوزدەر جازىلعاندا اعىلشىنشا سويلەيتىن ەلدەردە برايل ٵلىپبيى ٵرتۇرلى بولدى. الايدا ەحوبا كۋاگەرلەرى سول كەزدىڭ وزىندە كيەلى كىتاپ شىندىقتارىن برايل قارپىندە جەتكىزدى. بۇل ٸس ٵلى كۇنگە دەيىن جالعاسۋدا! قازىر برايل قارپىندەگى باسىلىمدارىمىز 50 دەن استام تىلدە قولجەتىمدى. بۇل ٸس قالاي ٴجۇرىپ جاتىر؟
بىردەن التىعا دەيىنگى نۇكتەلەر جيىنتىعى ٴبىر سيمۆولدى بىلدىرەدى. ٵربىر سيمۆولدىڭ نۇكتەلەرى ٴبىر ۇياشىقتا تۇرادى
ٴماتىندى برايل قارپىنە اۋىستىرۋ
ەڭ الدىمەن ٴماتىندى برايل قارپىنە اۋىستىرۋ كەرەك. پاتتەرسونداعى ٴماتىندى وڭدەۋ بولىمىندەگى مايكل ميللەن باۋىرلاس بىلاي دەيدى: «بۇرىن ٴبىز ٴماتىندى برايل قارپىنە اينالدىرۋ ٷشىن كوممەرسيالىق باعدارلامانى قولداناتىن ەدىك. ٴبىراق بۇل باعدارلامادا بىزگە كەرەكتى بارلىق تىلدەر بولمادى. قازىر ٴبىز Watchtower Translation System (كۇزەت مۇناراسىنىڭ اۋدارما جۇيەسى) باعدارلاماسىن قولدانامىز، سەبەبى ونىڭ كومەگىمەن كوپتەگەن تىلدەردە ٴماتىندى برايل قارپىنە وزگەرتە الامىز. بۇعان ەشقانداي باعدارلاما تەڭ كەلمەيدى دەپ ايتا الامىن«.
برايل قارپىندەگى ادەبيەتتەردە تەك باسىلىمنىڭ ٴماتىنى عانا ەمەس، سۋرەتتەردىڭ سيپاتتاماسى دا بار. مىسالى، «ماڭگى باقي ٶمىردىڭ راقاتىن كورىڭىز!» كىتابىنىڭ مۇقاباسىنداعى سۋرەت كەلەسىدەي سيپاتتالعان: «ەر ادام يرەلەڭدەگەن جولمەن كەلە جاتىر، جان-جاعىندا اسەم گۇلدەر، شوپتەر مەن اعاشتار ٶسىپ تۇر. الىستان جوتالار مەن تاۋلار كورىنىپ تۇر«. قىزمەت كومەكشىسى جانە تۇراقتى ٸزاشار بولىپ قىزمەت ەتەتىن يامشەد دەگەن زاعيپ باۋىرلاسىمىز بىلاي دەدى: «وسىنداي سۋرەت سيپاتتامالارى ماعان كوپ كومەگىن تيگىزەدى».
ٴماتىندى برايل قارپىنە اينالدىرعاننان كەيىن، ونى برايل قارپىندەگى ادەبيەتتەردى باسىپ شىعاراتىن فيليالعا جىبەرەدى. بەدەرلى-نۇكتەلى قارىپ جاساۋ كەزىندە قاتتى قاعاز پايدالانىلادى. وسىلاي باسىپ شىعارۋ پروسەسىندە قاعاز تەسىلىپ كەتپەيدى جانە كوپ قولدانعاندا دا نۇكتەلەر ٶز ٴپىشىنىن جوعالتپايدى. كەيىن قاعازدار جيناقتالادى، تىگىلەدى، سوسىن قاۋىمدار تاپسىرىس بەرگەن ادەبيەتتەرمەن بىرگە جىبەرىلەدى. نەمەسە پوچتا بولىمشەلەرى ارقىلى زاعيپ جاندارعا تەگىن جىبەرىلەدى، ارينە، ەگەر سونداي قىزمەت كورسەتىلسە. فيليالدار قاجەت بولعاندا مۇنداي ادەبيەتتەردى قاۋىمدارعا تەز ارادا جەتكىزۋدى ۇيىمداستىرادى، وسىنىڭ ارقاسىندا كوزى كورمەيتىن نە ناشار كورەتىن باۋىرلاستاردىڭ كەزدەسۋلەرگە قاجەتتى ادەبيەتتەرى بولادى.
بۇل جۇمىستاردىڭ بارلىعى كوپ ۋاقىت پەن قوماقتى قاراجاتتى تالاپ ەتەدى. ماسەلەن، ۋولكيللدەگى (نيۋ-يورك شتاتى) باسپاحانامىز 50 000 كادىمگى كيەلى كىتاپتى باسىپ شىعارۋعا قانشا ۋاقىت جۇمساسا، برايل قارپىندەگى نەبارى ەكى كيەلى كىتاپتى باسىپ شىعارۋعا سونشا ۋاقىت جۇمسايدى. اعىلشىن تىلىندە برايل قارپىمەن باسىپ شىعارىلعان ٵربىر كيەلى كىتاپ 25 تومنان تۇرادى. ونى باسىپ شىعارۋعا قاجەتتى ماتەريالدار كادىمگى كيەلى كىتاپتى باسىپ شىعارۋعا قاراعاندا 123 ەسە قىمبات. ال وسى 25 تومنىڭ مۇقاباسىن جاساۋدىڭ وزىنە شامامەن 150 اقش دوللارى كەتەدى!
برايل قارپىمەن باسىپ شىعارىلعان اعىلشىن تىلىندەگى كيەلى كىتاپتىڭ «جاڭا دۇنيە اۋدارماسى» 25 تومنان تۇرادى
برايل قارپىندەگى ادەبيەتتەردى باسىپ شىعارۋعا قاتىساتىن باۋىرلاستار قىزمەتتەرى جايلى نە دەيدى ەكەن؟ وڭتۇستىك افريكا فيليالىندا قىزمەت ەتەتىن ناديا ەسىمدى باۋىرلاس بىلاي دەيدى: «كوزى كورمەيتىن نە ناشار كورەتىن باۋىرلاستارىمىزعا وڭاي ەمەس، ولارعا تىم بولماعاندا وسىلاي كومەكتەسە الاتىنىما قۋانامىن. بۇل شارا ەحوبانىڭ ولاردى قانشالىقتى جاقسى كورەتىنىن دالەلدەيدى».
«برايل قارپىمەن وقۋدى ۇيرەنىڭىز»
ەگەر ادام برايل قارپىندە وقي الماسا شە؟ وسىدان بىرنەشە جىل بۇرىن ٴبىز «برايل قارپىمەن وقۋدى ۇيرەنىڭىز» كىتاپشاسىن باسىپ شىعارعان ەدىك. ول برايل قارپىندە جانە كادىمگى ماتىنمەن جازىلعان. وسى كىتاپشانىڭ كومەگىمەن كوزى كورەتىن ادام زاعيپ ادامعا برايل قارپىندە وقۋدى ۇيرەتە الادى. كىتاپشامەن بىرگە برايل قارپىندە جازۋعا ارنالعان قۇرالدار بەرىلەدى. ولاردىڭ كومەگىمەن ادام برايل قارپىندە جازىپ ۇيرەنەدى. مۇنداي جاتتىعۋلاردىڭ ارقاسىندا ادام ٵر قارىپتى ەستە ۇستاپ، كەيىن ونى ساۋساقتىڭ ۇشىمەن سيپاپ انىقتاي الادى.
«مەن ەندى ولارسىز ٶمىر سۇرە المايمىن»
كوزى كورمەيتىن نە ناشار كورەتىن باۋىرلاستار وسى ادەبيەتتەرىمىزدىڭ قانداي پايداسىن كورىپ ٴجۇر؟ گايتيدە تۇراتىن ەرنست باۋىرلاستىڭ برايل قارپىندە ەشقانداي باسىلىمى بولماعان ەكەن. سودان تاپسىرمالارمەن شىققاندا، تۇسىنىكتەمە بەرگەندە، ول تەك ەسىندە ساقتاعان مالىمەتتەردى عانا ايتاتىن. «ٴبىراق قازىر قالاعان كەزىمدە قول كوتەرىپ، جاۋاپ بەرە الامىن. قازىر مەن دە باسقا باۋىرلاستارمەن بىرگە رۋحاني اس-سۋدى بىردەي قابىلداپ جاتىرمىن!»— دەيدى ەرنست.
ال اۆسترياداعى كوزى ناشار كورەتىن يان ەسىمدى اقساقال قاۋىمدا كۇزەت مۇناراسى مەن كيەلى كىتاپتى زەرتتەۋ بولىگىن جۇرگىزەدى. ول بىلاي دەيدى: «ٴبىزدىڭ ادەبيەتتەر برايل قارپىندەگى باسقا كىتاپتارعا قاراعاندا الدەقايدا تۇسىنىكتى. مىسالى، ٴبىزدىڭ ادەبيەتتەرىمىزدە كىتاپتىڭ بەتتەرى كورسەتىلگەن، سىلتەمەلەر بار، ولاردى تەز-اق تاۋىپ الاسىڭ. بۇعان قوسا، سۋرەتتەرگە سيپاتتامالار دا بەرىلگەن».
وڭتۇستىك كورەيادا تۇراتىن سون ۋك ەسىمدى ٸزاشار باۋىرلاستىڭ كوزى كورمەيدى، قۇلاعى دا ەستىمەيدى. سوندىقتان كەزدەسۋلەردە وعان تاكتيلدى اۋدارما قاجەت بولاتىن. ال قازىر ول ادەبيەتتەرىمىزدى برايل قارپىندە ٶزى-اق وقي الادى. ول بىلاي دەدى: «ادەتتە زاعيپ ادامدارعا ارنالعان باسىلىمداردى وقۋ وتە قيىن. سەبەبى كەيبىر نۇكتەلەرى بولماي قالادى، بەتتەگى جولدار قيسىق ورنالاسقان، قاعازدارى دا تىم جۇقا. ٴبىراق ەحوبا كۋاگەرلەرى قولداناتىن قاعازدار وتە ساپالى، نۇكتەلەرى انىق ەتىپ ويىلعان، ولاردى وقۋ جەڭىل. بۇرىن ادەبيەتتەرىمىزدى زەرتتەۋ ٷشىن ماعان باسقالاردىڭ كومەگى قاجەت ەدى، ال قازىر ٶزىم-اق زەرتتەي الامىن. كەزدەسۋلەرگە اپتا سايىن دايىندالىپ، بارىنشا اتسالىسا الاتىنىما قاتتى قۋانامىن! مەن برايل قارپىندەگى بارلىق ادەبيەتتەرىمىزدى وقىپ وتىرامىن. مەن ەندى ولارسىز ٶمىر سۇرە المايمىن».
ٴبىزدىڭ بارلىق ادەبيەتتەرىمىزدەگىدەي برايل قارپىندەگى ادەبيەتتەرىمىزدە دە كەلەسىدەي سوزدەر بار: «بۇل باسىلىم ساتۋعا ارنالماعان. ول ەرىكتى ساداقانىڭ دەمەۋىمەن دۇنيەجۇزى بويىنشا جۇرگىزىلىپ جاتقان كيەلى كىتاپتان ٴبىلىم بەرۋ ىسىندە قولدانىلادى». donate.jw.org سايتىندا جازىلعان ادىستەرمەن ساداقا جاساپ جاتقاندارىڭىزعا كوپ راقمەت! جومارتتىقتارىڭىزدىڭ ارقاسىندا رۋحاني اس-سۋ بارلىعىنا، سونىڭ ىشىندە كوزى كورمەيتىن نە ناشار كورەتىندەرگە دە قولجەتىمدى بولۋدا!
قىزىقتى بولار مالىمەتتەر
ٴجيى قويىلاتىن سۇراقتار
ەحوبا كۋاگەرلەرىنىڭ ٸسى قالاي قارجىلاندىرىلادى؟
ٴبىزدىڭ ساداقا جاساۋ جولدارىمىز شىركەۋلەردەن وزگەشە.
